Panja a sabi di e tjari sma go na têgo libi
1 Jehovah na a Sma „di e leri sabi na sma” (Ps. 94:10). A e gebroiki wi foe panja en sabi di e kibri libi, na den wan di no sabi fa foe dini en na wan fasi di fiti. A boekoe Sabi di e tjari joe go na têgo libi, na wan heri boen wrokosani foe gi leri èn nanga disi opregti sma kan kon froestan soifri, soema na Gado nanga jepi foe en skrifi Wortoe, bijbel (1 Tim. 2:3, 4). A fasi fa a Sabi-boekoe e taki krin èn na wan logis fasi foe a waarheid, sa jepi sma foe froestan san Jehovah wani leri den. A moen disi wi wani hori takimakandra nanga sma, so taki den sa wani leisi a boekoe. Djaso joe e kisi wan toe rai. Na presi foe proeberi hori den na ede, proeberi taki foe den prenspari prakseri na ini joe eigi wortoe èn na a fasi fa joe gwenti foe taki nanga sma.
2 Foe di moro foeroe sma lasi wan lobiwan na dede, meki joe ben kan gebroiki na opobaka howpoe na ini wan takimakandra foe di joe e bigin taki wan sani leki disi:
◼ „Moro foeroe foe wi lasi wan lobiwan na dede. Joe aksi joesrefi efoe joe sa si a sma dati baka? [Gi okasi foe piki.] Dede no ben de wan pisi foe a prakseri di Gado ben abi biginbigin gi libisma. Jesus ben sori taki wi lobiwan kan kon fri foe dede. [Leisi Johanes 11:11, 25, 44.] Ala di disi ben pasa hondrohondro jari pasa kaba, tokoe a e sori san Gado pramisi foe doe gi wi. [Opo a Sabi-boekoe na a prenki tapoe bladzijde 85 èn leisi na ondro-edeprakseri. Dan sori a prenki tapoe bladzijde 86 èn taki wan sani foe en.] Efoe joe ben sa wani leisi moro foe a howpoe disi foe na opobaka di e trowstoe sma, dan mi ben sa prisiri foe libi a boekoe disi gi joe.”
3 Baka a fosi takimakandra di joe ben abi foe na opobaka, joe ben kan bigin a tra takimakandra nanga a srefi sma na a fasi disi:
◼ „Kande joe e memre taki mi ben taki dati dede no ben de wan pisi foe a prakseri di Gado ben abi biginbigin gi libisma. Efoe dati troe, dan foe san ede wi e kon owroe èn dede? Son sekrepatoe e libi moro leki 100 jari, èn bon de di libi doesoendoesoen jari kaba. Foe san ede libisma e libi soso 70 noso 80 jari? [Gi okasi foe piki.] Wi e dede foe di a fosi libisma paar no ben gi jesi na Gado.” Leisi Romesma 5:12. Go na bladzijde 53 ini a Sabi-boekoe èn leisi a titel foe a kapitel. Loekoe den fosi dri paragraaf, èn poti prakseri na den piki foe den aksi di skrifi. Meki wan mofo foe kon baka na wan tra ten foe taki foe a tra pisi foe a kapitel. Gi a sma deki-ati foe kaba leisi en na ini a pisi ten dati.
4 Efoe joe e taki nanga wan sma di e sori foe de wan bribisma, dan joe ben sa kan taki:
◼ „Troetroe hondrohondro difrenti relisi de na ini a ten disi. Den e leri ala sortoe sani di de kontrari makandra. Son sma e taki dati ala relisi boen èn a no abi bisi san wi e bribi. San joe e denki? [Gi okasi foe piki.] Jesus ben leri sma a troe relisi èn ben sori taki Gado no e teki tra fasi foe anbegi. [Leisi Mateus 7:21-23.] Efoe wi wani plisi Gado, dan wi moesoe anbegi en akroederi en wani.” Opo a Sabi-boekoe na kapitel 5, leisi a titel, èn poti prakseri na wan toe foe den ondro-edeprakseri. Tjari kon na krin taki den tori disi sa jepi wan sma foe leri fa foe plisi Gado. Efoe a sma taki a boen, pristeri a boekoe.
5 Sma di broeja foe di someni relisi de, ben sa kan warderi a piki tapoe na aksi disi te joe e tjari wan gobaka:
◼ „Foe di someni difrenti relisi de na ini a ten disi, dan fa wi kan sabi sortoewan na a joistiwan? Na san joe ben sa kan si sortoe relisi na a joistiwan? [Gi okasi foe piki.] Jesus ben taigi wi fa foe kon sabi soema na den troe bakaman foe en.” Leisi Johanes 13:35. Loekoe paragraaf 18 nanga 19 na ini kapitel 5 foe a Sabi-boekoe. Poti prakseri taki efoe wan sma e gebroiki den tirilin disi foe bijbel èn a fasi foe poeroe a boenwan na mindri trawan, taki a kan kon sabi a troe relisi. Froeteri fa sma na heri grontapoe kon sabi Jehovah Kotoigi foe a troetroe lobi foe den nanga den hei markitiki ini a tori foe boen gwenti nanga wet. Tjari kon na krin fa wan studie foe bijbel, te wan sma e gebroiki a Sabi-boekoe, sa sori krin sortoe fasi foe anbegi Gado feni boen.
6 Efoe joe e miti wan papa noso mama, dan a pristeri disi kan wroko boen:
◼ „Ibri dei wi e jere njoensoetori fa jongoewan e tjari densrefi na wan fasi foe no wani gi jesi èn den gersi foe abi no wan enkri moreel waarde. Son bigisma wani gi a skoro sistema a fowtoe taki den no e leri den pikin a difrenti na mindri san boen noso san ogri. Soema joe denki moesoe gi a leri disi? [Gi okasi foe piki.] Arki san bijbel e taki foe na aksi disi. [Leisi Efeisesma 6:4.] Dati e froeteri wi taki a de a frantiwortoe foe a papa nanga mama foe poti moreel waarde safrisafri na ini den pikin.” Opo a Sabi-boekoe tapoe bladzijde 145, leisi paragraaf 16, èn taki wan sani foe den prenki tapoe bladzijde 147. Tjari kon na krin taki a boekoe meki gi a heri osofamiri foe den studeri en. Gebroiki paragraaf 17 nanga 18 tapoe bladzijde 146 èn aksi a sma foe sori en fa wi e hori so wan studie nanga osofamiri.
7 Efoe na a fosi fisiti joe ben bigin wan studie nanga wan papa noso mama di ben broko ede nanga sani, dan joe ben sa kan go doro nanga a studie na a gobaka foe di joe e taki:
◼ „Grontapoe foe a ten disi e poti wan lo tesi gi den jongoewan foe wi. Dati meki, te den e gro kon bigi, a de so moeilek gi den foe tron sma di e frede Gado. Kande joe e memre taki ini a lasti takimakandra di wi ben abi, dati wi ben taki foe toe gronprakseri. Leki papa nanga mama di lobi Gado, wi moesoe de boen eksempre gi den pikin foe wi, èn wi moesoe sori den doronomo taki wi lobi den. Wan tra sani de di bijbel e taki dati pikin abi fanowdoe foe den papa nanga mama.” Leisi Odo 1:8. Go na bladzijde 148 ini a Sabi-boekoe èn go doro nanga a studie, foe di joe teki paragraaf 19-23. Gi leki rai taki joe o kon baka foe studeri nanga a heri osofamiri, èn taki joe sa bigin nanga kapitel 1.