A sabi foe Gado e piki foeroe aksi
1 Bifo joe ben kisi wan soifri sabi foe waarheid, kande joe ben abi foeroe aksi di ben abi foe doe nanga a libi èn di joe no ben man gi piki na tapoe. O breiti joe ben de foe kisi piki di abi den gron tapoe bijbel, na tapoe den aksi dati! Now joe man jepi tra sma foe feni den srefi piki disi. (Teki gersi 2 Timoteus 2:2.) Joe kan prati nanga den a sabi foe Gado di e tjari wi go na têgo libi (Joh. 17:3). Ma fa joe kan jepi wan sma foe warderi a waarde foe a sabi disi? We, prakseri foe den aksi di waarheid ben piki gi joe. San na a sani di sma di e soekoe waarheid, wani sabi? Te joe abi den sani disi na prakseri, dan dati kan jepi joe foe pristeri a boekoe Sabi di e tjari joe go na têgo libi. Den idea di e kon now kan jepi joe te joe e sreka joesrefi foe gi kotoigi na ini juni.
2 Foe di foeroe sma e aksi densrefi foe san ede so foeroe pina de na grontapoe, a fasi disi foe bigin ben sa kan meki a sma piki boen:
◼ „Te rampoe de noso te ogridoe èn ogri di e doe nanga tranga e kon moro foeroe, dan foeroetron sma e aksi foe san ede den sortoe takroe sani disi e feni presi. San joe ben sa piki?” Gi okasi foe piki èn sori taki joe froestan a piki foe a sma. Baka dati, go na kapitel 8 na ini a Sabi-boekoe, èn poti prakseri na tapoe a sani di taki na ini paragraaf 2. Froeklari taki a boekoe disi e froeteri fa bijbel e tjari kon na krin foe san ede ogri sani e feni presi, èn taki: „Efoe joe ben sa wani foe leisi en, dan mi ben sa wani libi na eksemplaar disi gi joe.” Efoe na ososma teki a boekoe, taki dan san na a bijdrage.
3 Te joe e go baka pe joe ben libi a „Sabi”-boekoe, joe ben kan taki:
◼ „Mi abi belangstelling gi a prakseri di joe ben abi ini a tori foe san ede so foeroe pina de na grontapoe. Joe e agri nanga a piki foe bijbel, soleki fa a skrifi na ini a boekoe?” Gi okasi foe piki. Leisi paragraaf 17 tapoe bladzijde 76 nanga 77 na ini a Sabi-boekoe, èn aksi foe leisi Romesma 9:14 na ini a bijbel foe na ososma. Taki dan: „A boen njoensoe de, taki Gado no e meki wi abi pen èn no e pina wi na wan fasi di no joisti. A pramisi foe gi wi têgo libi na ini vrede nanga kolokoe. A fosi kapitel foe a boekoe disi nen ’Joe kan abi wan kolokoe tamara!’ Mi ben sa wani tjari kon na krin fa dati kan kon troe gi joe èn den lobiwan foe joe.” Go na kapitel 1, èn sori fa wi e studeri. Doe so foeroe leki a kan foe a kapitel efoe a situwâsi e fiti foe doe dati.
4 Joe ben sa kan gebroiki na inleiding di de tapoe bladzijde 14 na ini a boekoe „Fa foe bigin èn go doro nanga bijbel takimakandra”, na ondro na edeprakseri „Owroedei/Dede”:
◼ „Oiti joe aksi joesrefi: Dede na a kaba foe ala sani? Noso wan tra sani de ete baka dede? [Gi okasi foe piki.] Bijbel e froeklari ibri piki di wi ben sa kan abi foe a dede di sma e dede. [Leisi Preikiman 9:5, 10.] A e sori toe taki wan troetroe howpoe de gi den wan di abi bribi. [Go na paragraaf 13 tapoe bladzijde 84 na ini a Sabi-boekoe; leisi den wortoe foe Jesus di de foe feni na ini Johanes 11:25 èn tjari den kon na krin.] A heri kapitel disi skrifi foe piki na aksi: San e pasa nanga den lobiwan foe wi di dede? Efoe joe ben sa wani leisi en, mi kan libi na eksemplaar disi gi joe.” Taigi na ososma san na a bijdrage.
5 Te joe e tjari a gobaka, joe ben kan taigi a sma baka soema na joe, èn baka dati joe kan taki:
◼ „A lasti leisi wi ben taki san e pasa te wan sma dede. Foeroe sma e bribi taki ibri libi na baka a dede, ben sa de noso na ini hemel noso na ini hèl. Ma oiti joe e prakseri efoe a kan taki den dedewan kan libi baka leti djaso na grontapoe? [Gi okasi foe piki.] Soleki fa bijbel e sori, den wan di e kisi wan opobaka sa de na mindri den safri-atiwan di sa kisi grontapoe. [Leisi Psalm 37:11, 29, èn taki dan foe paragraaf 20 tapoe bladzijde 88 na ini a Sabi-boekoe.] A howpoe dati gi trowstoe na miljoenmiljoen sma di ben frede dede. A boekoe disi sa jepi joe foe froestan na afersi moro boen. Mi kan sori joe fa?”
6 Efoe joe wani gebroiki wan makriki pristeri, joe ben sa kan proeberi a wan disi:
◼ „Mi ben sa wani sori joe wan prenki na ini a boekoe disi, Sabi di e tjari joe go na têgo libi. Disi a no wan moi prenki?” Opo a boekoe so taki na ososma kan si bladzijde 4 nanga 5. Gi okasi foe piki. Baka dati, leisi den wortoe tapoe bladzijde 5. Bosroiti nanga: „Joe kan kisi a boekoe disi foe leisi en gi joesrefi.” Kari a bijdrage. Proeberi foe kon sabi oten a ben sa fiti foe go baka foe kweki iniwan belangstelling di a ben sori.
7 Wi abi a sabi foe Gado di e piki den prenspari aksi foe a libi. Sreka joesrefi fajafaja, èn Jehovah sa blesi den moeiti foe joe foe prati a bodoi disi di e gi libi, na den sma di e soekoe waarheid.