Soema sa arki a boskopoe foe wi?
1 Noiti ete na ini a libisma historia, sma kisi so foeroe bodoi pasa marki ala di foeroe foe dati no prenspari kwetikweti èn e kori sma. Leki wan bakapisi foe dati, foeroe sma no sabi san den moesoe doe, èn a e kon moeilek gi wi foe meki den sma arki a boskopoe foe Gado Kownoekondre. Den no e froestan sortoe boen krakti a kan abi na den tapoe efoe den e arki Gado Wortoe. — Luk. 11:28.
2 Wi breiti taki na foeroe presi foe grontapoe, foeroe tindoesoen sma e arki a boskopoe dati èn e teki den oso-bijbelstudie di wi e pristeri den. Ma na ini tra kontren, den sma no e handri na so wan fasi srefisrefi. Foeroe foe den fisiti di wi e tjari na ini a diniwroko de sondro boen bakapisi, èn kande wi e aksi wisrefi soema e arki a boskopoe foe wi.
3 Wi moesoe loekoe boen taki wi no e lasi-ati. Paulus ben froeklari : „’Ibri sma di e kari a nen foe Jehovah sa kisi froeloesoe.’ Ma fa den sa kari en . . . efoe den no jere foe en? Ma fa den sa jere sondro foe wan sma e preiki?. . . Neleki fa a skrifi: ’O switi den foetoe foe den wan de di e meki boen njoensoe foe boen sani bekènti!’” (Rom. 10:13-15) Efoe na wan faja fasi wi e sai Kownoekondre siri, dan Gado sa meki a gro na ini na ati foe opregti sma. — 1 Kor. 3:6.
4 A sroto na a meki di wi moesoe meki gobaka doronomo: Na ini kontren pe a e sori taki wan toe sma nomo e arki a boskopoe foe wi, wi moesoe poti prakseri na tapoe ibri sma di abi srefi pikinso belangstelling, awansi wi prati poeblikâsi ofoe no. Wi no moesoe de toemoesi gaw foe denki taki wi no sa man doe noti, a no so? Te wi e sai siri, wi no sabi pe a sa abi boen bakapisi (Preik. 11:6). Efoe wi sreka heri boen te wi e go baka foe prati wan sani foe den Boekoe foe bijbel nanga sma, srefi efoe a de sjatoe nomo, wi kan doro na ati foe a sma. Wi kan libi wan traktaat noso wi kan pristeri den njoen tijdschrift. Te foe kaba, wi sa man foe sori kande fa wi e hori wan bijbelstudie. A sa froewondroe wi foe si o foeroe Jehovah e blesi den moeiti di wi e doe. — Ps. 126:5, 6.
5 Wan preikiman ben libi wan traktaat gi wan oema di ben sori pikinso belangstelling. A no ben feni na oema na oso baka te leki toe moen baka dati, èn dan na oema ben abi en toemoesi druk foe taki. A preikiman ben libi a srefi traktaat baka gi en. Ala di a preikiman ben tan doe moeiti foe miti en na oso, tokoe a ben teki dri moen moro foe miti en, èn di a miti nanga en te foe kaba, a ben kon si taki na oema ben siki. A sisa ben fisiti en a tra wiki baka, èn wan sjatoe takimakandra ben bigin foe a traktaat baka dati. Di a sisa ben go a tra wiki baka, na oema ben sori taki a ben abi troetroe belangstelling gi a Kownoekondre boskopoe. Sani di ben kenki na ini en libi ben meki a kon froestan a fanowdoe foe en na jejefasi. Den begin wan bijbelstudie, èn nanga faja a ben studeri ibri wiki baka dati.
6 Soleki fa a de nanga ibri sani di wi wani foe si taki a e gro, awansi na bromki, groentoe, noso belangstelling gi a Kownoekondre boskopoe, a de fanowdoe foe sorgoe gi en. Dati e teki ten, tranga moeiti, wan fasi di e sori taki wi abi broko-ede, èn a fasti bosroiti foe no gi abra. A jari di pasa, moro leki a di foe dri pisi foe wán miljoen sma na ini soema Kownoekondre siri ben bigin gro, ben teki dopoe! Efoe wi e tan preiki, dan seiker wi sa feni moro foeroe sma di sa arki a boskopoe foe wi. — Teki gersi Galasiasma 6:9.