Wi Abi wan Nyun Yepisani fu Bigin Bijbelstudie!
1 Wan Amerkan uma di ben de fu a Lomsu Kerki, ben fayafaya srefisrefi na ini a kerki fu en. Ala ten a ben opo taki gi den leri fu a kerki disi. A ben teki waka srefi fu go te na a Vatikan, a presi pe na edeman fu a Lomsu Kerki e tan. Ma toku a ben teki wan bijbelstudie di wan Kotoigi fu Yehovah ben kon na en oso. Fu san ede? Bika a ben wani leri sabi san Bijbel e taki èn a kerki fu en no ben pristeri sma wan oso-bijbelstudie. San na ondrofenitori disi e leri wi? Taki noiti wi no sabi suma o teki wan bijbelstudie.—Preik. 11:6.
2 Oiti yu draidrai fu taigi tra sma taki wi wani studeri Bijbel nanga iniwan sma di wani sabi moro? Ibri sma na ini yu birti sabi taki wi e du disi sondro taki den abi fu pai gi dati? Fa wi kan sorgu taki den kon sabi dati? Wi kan du dati te wi e gebroiki wan nyun yepisani! Na wan moi traktaat fu siksi bladzijde di abi leki nen Yu Ben Sa Wani Sabi Moro fu Bijbel? Meki wi leri sabi a traktaat disi moro bun, fu di wi o luku ibri ondro-edeprakseri.
3 „Fu San Ede Yu Musu Leisi Bijbel?” A traktaat e sori heri moi, fu san ede wan sma musu du dati. A traktaat e fruklari taki Bijbel abi „rai di e sori a lobi di Gado abi gi wi”, fu di a e sori wi fa wi musu begi Gado fu a yepi wi èn fa wi kan kisi têgo libi (1 Tes. 2:13). A traktaat e taki fu difrenti „tru tori” fu Bijbel „di e meki wi frustan sani moro bun”, soleki san o pasa nanga wi baka te wi dede èn fu san ede someni problema de na grontapu. A e taki so srefi fu „den gronprakseri fu Gado di skrifi na ini Bijbel”. A traktaat e sori taki, te wi e libi akruderi den gronprakseri disi, dan dati o meki taki wi sa abi wan moro bun gosontu èn taki wi sa de moro koloku. Dati o meki wi abi howpu nanga tra moi eigifasi. A traktaat e taki fu ete wan sani fu san ede wi musu leisi Bijbel; dati na profeititori di e taki fu a ten di e kon, èn so srefi fu den sani di o pasa heri esi.—Openb. 21:3, 4.
4 „Wi Abi Yepi Fanowdu fu Frustan Bijbel”: A traktaat e taki: „Wi alamala abi yepi fanowdu fu frustan a Wortu fu Gado.” Dan a e fruteri fa wi e studeri Bijbel nanga sma: „Furutron a moro bun fu studeri Bijbel akruderi wan spesrutu sistema. Disi yu kan du te yu e bigin nanga prenspari leri.” Ala di a traktaat e sori krinkrin taki „den sani di yu sa leri e komoto fu Bijbel”, toku a e kari spesrutu a San Gado e aksi-brochure leki wan yepisani di o meki sma kon „frustan den pisi na ini Bijbel di e taki fu difrenti sortu tori”. Wan tumusi prenspari aksi e opo kon na a tra ondro-edeprakseri.
5 „Yu Wani Studeri Bijbel Ibri Wiki?” A traktaat e sori taki a bijbelstudie kan hori na wan ten èn na wan presi di a studenti feni bun. A sma kan studeri na en eigi oso noso nanga yepi fu a telefon. Suma kan teki prati na a takimakandra? A traktaat e piki: „Yu heri osofamiri. Iniwan mati di yu wani kari kon, kan teki prati so srefi. Noso, efu dati na san yu wani, den Kotoigi kan hori a takimakandra nanga yu wawan.” O langa wan sma musu studeri? A traktaat e taki: „Furu sma e poti wán yuru wan wiki na wan sei fu studeri Bijbel. Efu yu abi [furu] ten, noso efu yu no abi so furu ten ibri wiki, dan den Kotoigi sa seti sani fu yepi yu.” Dati na a tori! Wi wani fiti wisrefi na a situwâsi fu ibri studenti.
6 „Wan Kari fu Teki Leri”: A sma kan koti a pisi fu a traktaat puru, pe a kan skrifi na tapu taki a wani a San Gado e aksi-brochure noso taki a wani taki wan sma musu kon na en fu fruteri en fa wi e studeri Bijbel nanga sma. A kafti fu a San Gado e aksi-brochure de fu si nanga ala en kloru. Yu kan frustan fu san ede a traktaat disi o meki taki moro opregti sma o aksi fu kisi yepi? We, fa wi kan gebroiki a nyun yepisani disi na a moro bun fasi?
7 Suma Yu Kan Gi a Traktaat? Yu kan gi sma di yu e miti a traktaat noso yu kan libi a traktaat na a oso fu wan sma efu nowan sma no de na oso. Yu kan prati en oso fu oso, na strati èn na ini bisnis kontren. Gi sma a traktaat efu den e teki wi publikâsi noso efu den no wani den. Poti en na ini den tijdschrift noso na ini tra publikâsi di wi e prati. Poti en na ini den brifi di yu e skrifi. Aksi den sma di yu e taki nanga den na telefon, efu yu no kan seni en go gi den. Sorgu taki yu abi den traktaat na yu ala ten, so taki yu kan prati den te yu e bai sani, te yu de na ini bus, opolani, boto, èn na iniwan okasi di yu e kisi fu preiki. Gi iniwan sma di e kon na yu oso wan traktaat. Gi a traktaat na famiriman, birtisma, sma na yu wrokope, tra studenti na skoro, nanga tra sma di yu sabi. Meki muiti fu gi ibriwan sma di yu e miti a traktaat disi! San yu kan du baka dati?
8 Efu wan Sma Wani Studeri Wantewante: Son sma o taigi yu wantewante taki den ben sa wani wan bijbelstudie. Fu dati ede, awinsi o ten yu e teki prati na a diniwroko, sorgu taki ala ten yu abi tu San Gado e aksi-brochure na yu; wan gi a studenti èn a trawan gi yusrefi. Efu a sma wani, dan bigin a studie wantewante. Opo bladzijde 2 èn leisi „Fa foe gebroiki a brochure disi”. Baka dati yu kan bigin wantewante nanga les 1 èn yu kan sori fa a studie e go. A makriki srefisrefi, a no so?
9 Efu a Sma Di Arki Yu, Abi Ten Fanowdu fu Denki a Tori: No wakti tumusi langa fosi yu go baka na en. Te yu e du dati, sorgu taki yu abi a San Gado e aksi-brochure na yu. Sori en den nen fu den tori fu a brochure na tapu bladzijde 2. Meki a teki wan fu den les di e hari en prakseri. Go na a les dati, èn bigin taki fu a les di a teki.
10 Go Baka na den Sma Pe Yu Ben Prati Tijdschrift: Efu yu ben gi a sma a traktaat makandra nanga wan tu tijdschrift, dan yu ben sa kan taki te yu go baka na a sma: „A lasti leisi di mi ben de dya, mi ben breiti taki mi ben kan libi A Waktitoren gi yu. Kande yu ben si taki a heri nen fu a tijdschrift na A Waktitoren A E Bariwroko gi Yehovah Kownukondre. Tide mi wani fruteri yu san na a Kownukondre disi èn san a o du gi yu nanga yu osofamiri.” Go na les 6 fu a San Gado e aksi-brochure. Bigin leisi a fosi paragraaf èn taki makandra nanga a sma fu a les so langa na ososma abi a ten fu du dati. Sreka sani fu go baka wan tra dei fu kaba a les.
11 Sorgu Taki Yu Abi den Traktaat na Yu Ala Ten: A dienstopziener nanga den lektuur dinari musu sorgu taki ala ten, nofo fu a Sabi Bijbel-traktaat de na ini a gemeente. Poti wan tu traktaat na ini yu saka noso na ini yu tas, na ini yu oto, na yu wrokope, na skoro, so srefi krosibei fu a doro pe sma e waka fu kon na ini yu oso. Poti den traktaat na ala presi pe yu man feni den makriki. A no de fu taki, dati yu musu tyari wan tu traktaat na ini yu preikiwroko tas fu gebroiki den te yu o miti sma nanga suma yu kan taki fu a Bijbel.
12 Meki Yehovah Blesi den Muiti fu Wi: Wan marki di ala Kresten wani doro na fu leri wan tra sma a waarheid (Mat. 28:19, 20). Yu abi wan bijbelstudie? Efu yu abi wan bijbelstudie kaba di yu e hori ibri wiki, dan yu kan feni ten fu hori ete wan bijbelstudie? Efu yu no abi wan bijbelstudie ete, dan a no de fu taki dati yu wani abi wan. Begi Yehovah fu a blesi den muiti fu yu fu feni wan sma di yu kan studeri nanga en. Dan yu musu du sani akruderi san yu ben aksi na ini begi.—1 Yoh. 5:14, 15.
13 Wi abi wan nyun yepisani fu bigin oso-bijbelstudie! Leisi a traktaat disi heri bun. Gi ala sma a traktaat disi. Du ala san yu man „fu du bun, fu de gudu ini bun wroko, fu lobi fu gi, fu de klariklari fu prati nanga trawan” san yu leri na ini a Wortu fu Gado.—1 Tim. 6:18.
[Faki na tapu bladzijde 4]
OKASI FU LIBI A TRAKTAAT NA BAKA
◼ Te wi e taki nanga sma ibri dei
◼ Te wan sma e teki den publikâsi fu wi
◼ Te no wan sma de na oso
◼ Te wi e tyari gobaka
◼ Te wi e miti wan sma na stratiwroko
◼ Te wi e preiki na ini bisnis kontren
◼ Te wi e preiki na ibri okasi di wi e kisi
◼ Te wi e skrifi brifi
◼ Te wi de na ini bus, taxi, boto, noso tra sani
◼ Te wan sma kon na wi oso
◼ Te wi e taki nanga famiriman, birtisma, tra sma na yu wrokope, tra studenti na skoro, èn tra sma di wi sabi