Suku okasi fu studeri Bijbel nanga sma
1. San a wani taki fu du san Yesus taki na ini Mateyus 28:19, 20?
1 Yesus gi wi a komando fu ’meki disipel, èn fu leri den’ (Mat. 28:19, 20). Fu dati ede wi wani de klariklari ala ten fu aksi sma efu den wani studeri Bijbel. Wi no o du disi nomo tapu a spesrutu satra, noso sonde fu a mun di poti fu aksi sma efu den wani studeri Bijbel. Den rai di e kon now kan yepi wi fu du dati.
2. Sortu sma wi kan aksi efu den wani studeri Bijbel?
2 Aksi sma efu den wani studeri Bijbel: O moro wi e aksi sma efu den wani studeri Bijbel, o moro okasi wi o abi fu feni wan Bijbelstudie (Preik. 11:6). Yu pruberi fu aksi sma langalanga efu den wani studeri Bijbel? Wan gemeente na ini Amerikankondre, ben meki spesrutu muiti fu du a sani disi wan heri mun langa. Den ben breiti srefisrefi, fu di den ben man bigin 42 nyun Bijbelstudie! No denki taki den ososma di sori taki den wani sabi moro, sabi kaba taki yu wani studeri Bijbel nanga den. Kande yu kan aksi den efu den wani studeri Bijbel te yu e go baka na den wan tra leisi. Efu den no wani, dan a no abi trobi. Yu kan tan tyari gobaka na den sma disi. Yu aksi yu birtisma, famiriman, sma na yu wrokope, èn sma na skoro efu den ben sa wani studeri Bijbel nanga yu? Yu kan aksi den Bijbelstudenti fu yu tu efu den abi mati, noso famiriman di ben sa wani studeri Bijbel.
3. Sortu bun yepisani wi abi fu bigin wan Bijbelstudie, èn fa wi kan gebroiki en?
3 Wan bun yepisani: Wan bun sani di kan yepi wi fu bigin wan Bijbelstudie, na a traktaat Yu wani sabi a piki tapu den aksi disi? Yu kan gi ososma a traktaat disi, awansi den teki publikâsi, noso den no du dati. Wi kan gebroiki a traktaat disi te wi e wroko na ini bisnis kontren, te wi e du stratiwroko, te wi e seni brifi gi sma, èn te wi e tyari gobaka. Boiti dati, wi kan libi a traktaat disi na baka gi sma di no de na oso. Kande yu kan sorgu taki yu abi a traktaat disi na yu te yu de na ini bus, te yu e go bai sani, èn te yu de na wroko. A lasti bladzijde fu a traktaat disi e taki syatu fa wi e studeri nanga sma, èn a e taki tu fu a Bijbel leri-buku.
4. Fa wi kan gebroiki a traktaat Yu wani sabi a piki tapu den aksi disi?, fu bigin wan Bijbelstudie?
4 Baka te yu gi a sma a traktaat, dan yu kan sori en den aksi na tapu a fosi bladzijde, èn yu kan aksi en: „Sortuwan fu den aksi disi yu ben wani kisi piki na tapu?” Dan luku makandra nanga a sma sortu piki a traktaat e gi, èn leisi, noso taki syatu fu a lasti bladzijde pe skrifi taki a sma kan kisi Bijbelstudie efu a wani dati. Yu kan sori a sma tu pe fu a Bijbel leri-buku a kan leisi moro fu a tori di unu ben taki fu en. Pristeri a buku èn seti sani so taki yu kan go baka fu taki moro fara nanga a sma.
5. Fu san ede wi musu suku okasi fu studeri Bijbel nanga sma?
5 Na ini a kontren pe wi e preiki, sma de ete di e angri fu kon sabi san Bijbel e leri wi trutru. Te wi e suku okasi fu studeri Bijbel nanga sma, dan wi o abi prisiri fu di wi o abi moro okasi fu yepi sma fu kon tapu a pasi di e tyari wi go na libi.—Mat. 7:13, 14.