Yu Musu Leri fu Abi a Koni fu Si Sani Krin

¹ Now wi e libi na ini den lasti dei di e gi sma broko-ede. Fu dati ede a libi kon moro muilek èn na ala sei a pipel fu Gado e kisi difrenti hebi tesi (2 Tim. 3:1-5). Wi alamala abi deki-ati fanowdu fu tanapu kánkan ini a bribi (1 Kor. 16:13). Wi man tan kánkan nanga a yepi fu Yehovah te wi e tan leisi en Wortu doronomo, te wi e frutrow tapu en yeye èn te wi e tan krosibei na en organisâsi.​—Ps. 37:28; Rom. 8:38, 39; Openb. 2:10.

² Fu dati ede di a spesrutu dei-konmakandra ben hori a yari di pasa, wi ben abi bun reide fu taki fu a thema „Tron Bigisma ini a Man Di Yu Man Frustan Sani”. A tori disi ben teki puru fu 1 Korentesma 14:20; drape wi e leisi den wortu disi fu Paulus: „Brada, no tron yongu pikin ini a man di yu man frustan sani, ma de nyofi pikin ini a tori fu takrudu; na presi fu dati tron bigisma ini a man di yu man frustan sani.” Fa yu ben feni a programa?

³ „A gi mi deki-ati srefisrefi!” „Disi ben de soifri san wi abi fanowdu!” Dati na soso tu fu den furu sani di sma ben taki. Wan man di no de wan Kotoigi ben kon na a spesrutu dei-konmakandra fu si fa en umapikin di abi 12 yari ben teki dopu. Srefi en ben taki dati a lobi a programa srefisrefi èn taki a ben kan si fa a programa o yepi na osofamiri fu en. Na so yu e denki tu? Meki wi taki fu wan tu fu den prenspari sani fu a programa.

⁴ Soifri Sabi De Fanowdu fu Leri fu Si Sani Krin: Ini a fosi lezing di nen „Yu Musu Kweki a Man Di Yu Man Frustan Sani Nownow”, a takiman ben poti krakti tapu den sani di de fanowdu fu kakafutu gi den tyalensi fu a ten disi. San na den sani dati? A no sari taki wi abi a koni fu frustan sani wawan. Wi musu leri fu frustan Bijbel moro bun, fu di wi abi fu feti nanga ala den takru sani di e miti wi. Fu frustan disi wi abi a tiri fu Gado fanowdu. Neleki a psalm skrifiman, wi musu aksi Yehovah te wi e begi fu meki wi frustan den wet nanga den frumane fu en so taki wi kan dini en nanga wi heri ati.​—Ps. 119:1, 2, 34.

⁵ Ini a tra pisi a kring-owruman ben sori taki Yehovah e gebroiki en Wortu nanga en organisâsi fu gi wi „Sani Di Kan Yepi Wi Tron Bigisma ini a Man Di Wi Man Frustan Bijbel”. A kring-owruman ben sori taki fu frustan sani wani taki dati ’sma man sabi fa fu si a fini fu wan tori èn fa fu si krin fa a tori de trutru, fu di a e frustan san na den aparti pisi fu a tori èn san ala den pisi fu a tori srefi abi fu du nanga makandra’. Suma kan leri wi fu abi a koni disi? Yehovah ben gi wi presenti ini libisma, fu yepi wi fu go na fesi na yeye fasi (Ef. 4:11, 12). En organisâsi na grontapu e gi wi deki-ati fu leisi Gado Wortu ibri dei èn fu kon ala ten na den gemeente konmakandra (Ps. 1:2). Wi e leri fa fu gebroiki Bijbel nanga wi Kresten publikâsi te wi e studeri nanga wisrefi èn te wi e studeri makandra leki osofamiri èn so srefi te wi e sreka wisrefi gi den konmakandra èn gi a preikiwroko. Yu gebroiki ala den sani disi di seti? Yu e leisi Bijbel doronomo? Disi de prenspari efu wi wani kibri wisrefi fu sma no kori wi meki wi waka baka den modo nanga den du fu grontapu, so srefi den filosofia nanga den bedrigi krakti fu en.​—Kol. 2:6-8.

⁶ Leri Gebroiki a Koni Di Wi Abi fu Si Sani Krin: A fisiti takiman ben hori en fosi lezing di nen „Kibri Yeyefasi fu di Yu E Leri fu Gebroiki a Koni fu Si Sani Krin”. Na ini a lezing disi a ben fruklari taki den wan di de wan pisi fu grontapu, no man si krin san bun èn san ogri (Yes. 5:20, 21). Den no man du dati bika den no e poti prakseri na den regtfardiki markitiki fu Gado èn den no wani hori densrefi na den. Ma na a tra sei, fu di wi kisi leri na yeye fasi fu Yehovah en organisâsi meki wi e hori wisrefi na den markitiki fu Gado. Den markitiki disi e yepi fu tiri wi na ini den sani di wi e du èn den e yepi wi fu tyari wisrefi na wan bun fasi. Fu dati ede wisrefi man sabi san bun èn yoisti na ini Yehovah ai, èn san na a volmaakti wani fu En.​—Rom. 12:2.

⁷ Efu wi no wani abi a bruya denki fu grontapu èn efu wi no wani koti den takru froktu di e kon fu dati, dan wi musu tan leri gebroiki a koni di wi abi fu si sani krin. Fa wi kan du disi? Leki fa Hebrewsma 5:12-14 e taki, dan na apostel Paulus ben sori o prenspari a de fu no gebroiki „merki” wawan. Wi abi tranga yeye nyanyan fanowdu, soleki a wan di wi e kisi te wi e studeri a profeititori fu Yesaya na a Gemeente Bukustudie. Wi musu gebroiki den sani di wi leri wantewante na ini wi libi. Te wi e du dati, dan wi abi na overtoigi taki den gronprakseri nanga den markitiki fu Yehovah regtfardiki. Disi e leri wi fu gebroiki a koni di wi abi fu si sani krin, so taki wi kan si krin san bun èn san ogri.

⁸ Na wan sari sani, taki son sma fadon gowe na yeye fasi. Fu san ede? Bika den no ben poti ala den prakseri na den sani di bun èn reti na ini Yehovah ai. Dati meki den fadon gowe fu di den ben e arki radio nanga telefisi programa pe sma e hori takimakandra fu tori di Bijbel e krutu. Den ben fadon gowe tu fu di den ben e arki takru poku noso fu di den ben e taki nanga tra sma fu tori di no bun nanga yepi fu a computer. Te wi e handri nanga koni, dan don sma di no e tyari densrefi na wan fasi di fiti, noso ogri sma, no sa abi krakti na wi tapu.​—Odo 13:20; Gal. 5:7; 1 Tim. 6:20, 21.

⁹ Yonguwan Musu „De Nyofi Pikin ini a Tori fu Takrudu”: A programa ben abi tu pisi di ben gi yongusma deki-ati fu leri fa fu kisi a koni fu si sani krin. A takiman ben sori taki efu wan sma de wan „nyofi pikin ini a tori fu takrudu”, dan dati wani taki dati a no abi ondrofeni tapu a kontren dati; a de neleki wan nyofi pikin di no sabi kwetikweti san Yehovah feni bun (1 Kor. 14:20). Wi alamala ben kisi deki-ati fu luku bun fa wi e gebroiki wi ten, so taki wi man kakafutu gi ala sortu takrudu di kan puru wi na a pasi (Ef. 5:15-17). Wi ben kisi deki-ati fu go luku omeni ten wi e gebroiki fu leisi sani di no e yepi wi fu kisi moro koni fu frustan sani na yeye fasi. Yu du dati? San yu kon si? Boiti dati yu e leisi Bijbel ibri dei, yu musu abi a fasti bosroiti tu fu tan leisi den sani di na organisâsi e gi wi. Te wi e du dati, dan dati o yepi wi alamala, so srefi den yonguwan, fu „kisi frustan”.​—Odo 4:7-9.

¹⁰ „Kisi Wini fu di Wi E Gebroiki Bijbel Gronprakseri Nanga Frustan”: Disi ben de a nen fu a lasti lezing fu a spesrutu dei-konmakandra. A fisiti takiman ben fruklari taki a koni di e meki wi tan na libi e komoto fu Yehovah; a koni disi hei krinkrin moro iniwan sortu koni di a heri libisma famiri abi. Denki nomo san a wani taki fu man meki bun furu gebroiki fu a koni fu Yehovah! A e gi opregtisma a koni fu En bogobogo, efu den e suku èn efu den e aksi Gado na ini bribi fu kisi a koni dati (Odo 2:3-5, 9; 28:5). Yu e gebroiki a sani disi di a e gi heri bun?

¹¹ Wi ben kisi a deki-ati fu leri fu feni den gronprakseri te wi e leisi Bijbel (2 Tim. 3:16, 17). Ondrosuku den gronprakseri finifini fu kan frustan soifri san Yehovah e taki. Teki ten fu go denki den gronprakseri disi, poti den bun na ini yu frustan, èn poti den dipi na ini yu ati. Na so wan fasi yu o leri fu gebroiki a koni fu si sani krin, so taki sani kan waka bun gi yu te yu e teki prenspari bosroiti ini a libi (Yos. 1:8). Meki wi luku wan tu sani di miti furu sma. Meki wi si fa sani kan waka bun nanga wi te wi e gebroiki den gronprakseri fu Bijbel.

¹² ’Mi o teki a modo dati abra?’ Den sortu modo krosi di sma e weri, e sori nofotron taki sma lobi fu du san densrefi wani èn den no abi trobi san tra sma e denki fu dati. So wan fasi fu denki èn handri e meki taki sma e weri syabi-syabi krosi, noso krosi di no fiti èn krosi di span tumusi. Sortu prenspari Bijbel gronprakseri o yepi wi fu no du dati? Te wi leri fu gebroiki a koni di wi abi fu si sani krin, dan dati o meki wi poti prakseri na a sani di skrifi na ini 1 Timoteus 2:9, 10. Drape Bijbel e taki dati wi musu weri krosi „nanga bescheidenfasi èn nanga gosontu frustan . . . , na a fasi di e fiti [sma] di e taki dati den e lespeki Gado”. Tra gronprakseri di yu man gebroiki tu na den wan di kari na ini 2 Korentesma 6:3 nanga Kolosesma 3:18, 20.

¹³ ’San mi kan du fu meki a matifasi ini mi osofamiri tan?’ A tumusi prenspari taki den memre fu na osofamiri e taki nanga makandra èn e arki makandra. Yakobus 1:19 e fruteri wi: „Ibri sma musu de esi fu yere, ma a no musu de esi fu taki, a no musu de esi fu kisi atibron.” Den memre fu na osofamiri musu arki makandra èn den musu taki nanga makandra, bika ala den tu sani disi de prenspari na ini na osofamiri. Awansi wi abi leti nanga san wi e taki, ma e taki dati na wan grofu fasi, noso na so wan fasi taki wi e wisiwasi a sma, noso na so wan fasi taki wi e hati a sma, dan dati no o yepi wan trawan trutru. So bun, efu yu na wan masra noso wan wefi, efu yu na wan papa, wan mama noso wan pikin, yu musu sorgu taki den sani di yu e taki „switi ala ten, [èn taki den] musu abi sowtu leki spesrei”.​—Kol. 4:6.

¹⁴ ’Misrefi e feti baka gudu nomonomo, fu di grontapu e du dati?’ Sma fu grontapu e gi wi deki-ati fu feti baka gudu nomo. Disi e meki taki a libi e kon moro frekti. Dati no e meki sma koloku trutru (Preik. 5:10; Luk. 12:15; 1 Tim. 6:9, 10). Yesus ben leri wi wan prenspari gronprakseri fu yepi wi fu no fadon ini a trapu fu feti baka gudu nomo. A gronprakseri disi na taki wi musu hori wi ai soifri. Te wi e libi wan libi di no frekti tumusi, dan wi o poti ala wi prakseri na Kownukondre afersi. Iniwan tra sani e kon na ini a di fu tu presi na ini wi libi.​—Mat. 6:22, 23, 33.

¹⁵ San Wi Musu Suku fu Du: Gado Wortu na wan bun buku di abi regtfardiki gronprakseri di kan tiri wi te wi musu teki bosroiti. Wi musu leri sabi den gronprakseri disi, wi musu denki dipi fu den èn wi musu frustan fa wi kan gebroiki den ini wi libi. Te wi leri fu „gebroiki a koni fu [wi] fu si sani krin, fu man si krin san bun èn san ogri”, dan na so wan fasi wi o kisi wini gi wisrefi èn wi o gi Yehovah grani.​—Hebr. 5:14.