Nyun Spesrutu Dei-konmakandra Programa
„Tron Bigisma ini a Man Di Yu Man Frustan Sani” na a thema fu a spesrutu dei-konmakandra programa bigin nanga september 2000 (1 Kor. 14:20). Fu san ede wi sa kisi wini te wi de drape? Wi e libi na ini wan grontapu di lai nanga ogri. Fu man kakafutu gi den sani disi, dan wi musu du muiti fu frustan sani na yeye fasi moro bun, so taki wi kan wini ogri nanga bun. A spesrutu dei-konmakandra sa yepi wi fu du dati.
Na a bigin fu a konmakandra, a kringopziener sa taki fu „Sani Di Kan Yepi Wi Tron Bigisma ini a Man Di Wi Man Frustan Bijbel”. A kringopziener sa sori wi fa wi kan tron sma di e tanapu kánkan na ini a Kresten bribi. Ini a lezing di abi leki nen „Kibri Yeyefasi fu di Yu E Leri fu Gebroiki a Koni fu Si Sani Krin”, a fisiti takiman sa poti krakti na tapu o prenspari a de fu gebroiki den Bijbel gronprakseri te wi wani leri fu frustan sani bun.
Yongusma so srefi musu leri fu frustan sani bun. Den brada sa taki fu dati ini den pisi „Fu San Ede Wi Musu De Nyofi Pikin ini a Tori fu Takrudu” èn „Yonguwan Di E Kisi Frustan Now”. Kon yere fa yonguwan e fruteri san den e du fu tranga densrefi na yeye fasi, so taki den man dwengi densrefi fu no angri fu kon sabi den godelowsu sani fu grontapu, èn so taki den kan tan fara fu problema.
Fa wi kan feni a moro bigi koloku ini a libi? A fisiti takiman sa fruklari disi ini a lasti taki „Kisi Wini fu di Wi E Gebroiki Bijbel Gronprakseri Nanga Frustan”. A takiman sa gi wan tu eksempre fu sori taki te wi e gebroiki a Wortu fu Gado, dan dati sa yepi wi fu kakafutu gi problema, fu teki bosroiti, èn fu kisi wini trutru fu den sani di Yehovah e leri wi.
Den sma di wani sori taki den gi densrefi abra na Yehovah fu di den e dopu na ini watra na a konmakandra, musu taigi a fesiman opziener wantewante. Marki a datum di a spesrutu dei-konmakandra sa hori wantewante na tapu yu kalender te a meki bekènti, èn sreka sani bun so taki yu kan kisi wini fu a moi programa disi. No misi no wan pisi fu a spesrutu dei-konmakandra! A sa gi yu krakti fu horidoro èn fu tan getrow na Yehovah na ini na ogri sistema disi.