Spesrutu dei konmakandra programa gi a dienstyari 2010
1. (a) San na wan tu thema fu spesrutu dei konmakandra di pasa? (b) Wan tu spesrutu sani de di yu leri na den spesrutu dei konmakandra di pasa, èn di yepi yu na ini yu diniwroko?
1 „Ondrosuku fu sabi san na den moro prenspari sani”, „Tanapu fasti leki wán ipi”, „Tan gi kotoigi fu a waarheid”, nanga „Wi na a klèidoti èn Yehovah na wi Patu-bakriman” (Fil. 1:9, 10, 27; Yoh. 18:37; Yes. 64:8). Disi na wan tu fu den furu thema di wi ben taki fu den na den spesrutu dei konmakandra di pasa. Yu e angri fu go na a spesrutu dei konmakandra fu a dienstyari 2010? A thema o de: „A ten di tan abra kon syatu”, èn a teki puru fu 1 Korentesma 7:29.
2. San yu kan du fu de fayafaya fu go na a bigi konmakandra disi?
2 Bigin taki fayafaya fu a programa fu a spesrutu dei konmakandra te a meki bekènti kaba na ini a gemeente o ten a o hori. Son papa nanga mama e yepi den pikin fu de fayafaya fu go na a konmakandra disi, fu di den e marki a dei na tapu a kalender èn den e skrifi den sani di den o abi fanowdu. Na so den kan teri den dei teleki a dei dati doro. Te yu e hori yu osofamiri anbegi, dan yu kan luku baka san yu ben skrifi na den spesrutu dei konmakandra di pasa. Yu kan sreka yu ati tu gi a konmakandra disi, fu di yu e luku baka san skrifi na ini a buku Kisi wini fu a Theokrasia Diniwroko-skoro, bladzijde 13-16. Na so fasi yu kan yepi yusrefi nanga yu osofamiri fu „luku bun fa unu e arki”.—Luk. 8:18.
3. Fa wi kan kisi wini dorodoro fu a programa?
3 Du san yu leri: Baka wan bigi konmakandra, sma e taki nofo tron: „Disi ben de wan tumusi moi programa!” Dati tru, fu di disi na wan fu den furu moi sani di Yehovah seti gi wi (Odo 10:22). Te yu wani kisi wini fu a programa, dan yu musu denki dipi fu san yu leri èn hori den sani dati na prakseri (Luk. 8:15). Te yu de na pasi e go na oso, dan taki fu a programa nanga yu famiri noso den sma na ini yu wagi. Taki nanga makandra fu den marki di unu wani doro èn fu den sani di o yepi unu na ini a diniwroko. Te yu e du dati, dan dati sa yepi yu fu kisi wini fu den sani di yu leri, wan langa pisi ten baka a konmakandra.—Yak. 1:25.
4. Fu san ede wi o kisi furu wini fu a spesrutu dei konmakandra disi?
4 Wi e breiti srefisrefi te wi kisi wan kado di de soifri san wi abi fanowdu. Wi e angri fu si san Yehovah sreka gi wi na a spesrutu dei konmakandra di e kon, a no so? Wi kan de seiker taki wi o kisi furu wini. Wi kan fruwakti taki wi hemel Tata, Yehovah, o gi wi a yoisti kado, fu di a o gi wi a deki-ati nanga a leri di wi abi fanowdu fu man du a wroko di a gi wi fu du.—2 Tim. 4:2; Yak. 1:17.