„Nyanyan na a reti ten”
1. Fa a spesrutu dei konmakandra di pasa yepi yu nanga trawan?
1 Nofo tron te wi komoto fu wan spesrutu dei konmakandra, wi e taki: „Dati ben de soifri san wi ben abi fanowdu!” Wan kring-opziener ben taki dati baka di wan tu sma fu en kring ben yere a programa, den ben taki dati den wani du moro na ini a diniwroko. Tra kring-opziener ben taki: „A programa yepi wi fu si krin na ini sortu ten wi e libi èn fu luku sortu bosroiti wi e teki na ini a libi.” „Wan tu preikiman ben feni taki disi ben memre den fu sorgu taki den e tan poti prakseri na a moro prenspari sani, èn dati na a preikiwroko.” Fa a spesrutu dei konmakandra yepi yu?
2. San wi o go luku na a programa fu a spesrutu dei konmakandra fu a dienstyari disi?
2 A programa fu a dienstyari disi, o de soifri san wi abi fanowdu tu. A thema na „Suku kibri na Yehovah”, èn a teki puru fu Psalm 118:8, 9. Luku wan tu fu den tori di wi o go luku: „Yehovah na wan fortresi te wi de na nowtu”, „Yepi trawan fu feni kibri na Yehovah”, „De wan kibripresi neleki Yehovah”, „Yonguwan, leri fu frutrow tapu Yehovah!”, èn „Yehovah e kibri wi na ini wan paradijs di de nownow kaba”.
3. Fa wi kan kisi wini dorodoro fu a programa?
3 Fa wi kan kisi wini: Te unu sabi kaba o ten a spesrutu dei konmakandra o hori, dan seti sani bun fu de drape èn gi den Bijbelstudenti fu yu a kari fu kon makandra nanga yu. Efu wi wani ’meki froktu fu di wi e horidoro’, dan wi no musu frigiti den sani di wi yere (Luk. 8:15). Fu dati ede, wi musu arki a programa bun, wi musu skrifi syatu san na den moro prenspari sani, èn sosrefi den rai di wi wani fiti na ini wi libi èn na ini wi diniwroko. Teki ten baka a konmakandra, fu taki leki osofamiri fu a programa, èn luku sortu spesrutu sani yu nanga yu osofamiri kan fiti na ini un libi.
4. Fu san ede wi musu angri fu go na a spesrutu dei konmakandra di e kon?
4 Neleki fa wan sma e sreka wan switi gosontu nyanyan, na so den brada sreka a spesrutu dei konmakandra fu a dienstyari disi nanga furu lobi èn den denki bun fu den sani di o kon na ini a programa. Meki Yehovah blesi a muiti di yu o du fu de drape èn fu kisi wini fu „nyanyan na a reti ten”, di e tranga Kresten futuboi.—Mat. 24:45.