Aksi di opo kon
◼ San wi kan du fu yepi pionier?
Na heri grontapu a ben de so taki na ini a dienstyari 2009, pikinmoro 800.000 brada nanga sisa ben dini leki gewoon pionier nanga spesrutu pionier. Den furuten dinari disi gi furu fu den ten, den krakti, nanga den sani di den abi fu prati a Kownukondre bun nyunsu (Odo 3:9). A no de fu taki dati Yehovah breiti nanga a muiti di den e meki! Na sortu fasi wi kan si sani neleki Yehovah? Fa wi kan yepi den pionier fu wi fu abi prisiri na ini a diniwroko fu den èn fu tan horidoro?
A no de fu taki dati den sani di wi e taki kan gi den a deki-ati fu tan go doro nanga a pionierwroko (Odo 25:11). Wi kan kenki wi schema so taki wi kan wroko makandra nanga den? Te wi e wroko makandra nanga den, dan wi kan gebroiki wi wagi na presi fu a di fu den. Èn te wi e rèi makandra nanga den na ini den wagi, dan kande wi kan gi den wan bijdrage fu yepi den (1 Kor. 13:5; Fil. 2:4). Wi e sori tu taki wi e horibaka gi den pionier na wan lobi-ati fasi te wi e kari den kon wanwan leisi fu nyan na wi oso.—1 Petr. 4:8, 9.
Bijbel e gi a dyaranti taki Yehovah o sorgu gi den sani di den sma abi fanowdu di e suku en Kownukondre fosi (Ps. 37:25; Mat. 6:33). Wan fasi fa a e du dati, na taki a e gebroiki den lobi Kresten brada nanga sisa fu wi (1 Yoh. 3:16-18). A no de fu taki dati den pionier no e fruwakti taki sma o gi den moni fu pai den kostu fu den, fu di dati na den eigi frantwortu. Kande den no e taigi trawan te den abi wan sani fanowdu. Ma wi kan yepi den pionier disi di e tan horidoro, fu di wi o de na ai fu si efu den ’e mankeri wan sani’.—2 Kor. 8:14, 15.
Di Feibe, wan uma di ben e preiki fayafaya na ini a fosi yarihondro na ini a gemeente Kenkrea, go na Rome, dan Paulus ben gi den brada na ini Rome a deki-ati disi: „Teki en nanga prisiri leki wan futuboi fu Masra, soleki fa a fiti den santawan, èn . . . yepi en nanga ala sani pe a ben sa abi unu fanowdu” (Rom. 16:1, 2). Wi abi na okasi fu sori a srefi lobi disi èn fu horibaka gi den wan na ini wi gemeente di e tan fruteri sma a bun nyunsu, leki gewoon pionier nanga spesrutu pionier.—Tori. 5:42.