Den de moi eksempre fu sma di tan getrow
1 Na ini a yari 1937, wan nyun fasi fu du furuten diniwroko bigin, namku a spesrutu pionierwroko. Mansma nanga umasma di ben abi furu ondrofeni na ini a Kresten diniwroko, ben de klariklari fu dini awansi pe na organisâsi ben seni den go. Now, baka someni tenti yari, spesrutu pionier e tan gi wi wan moi eksempre, fu di den e tan dini na wan getrow fasi.—Hebr. 6:12.
2 Den ben teki fesi na ini a wroko: Sensi a bigin, spesrutu pionier teki fesi na ini a preikiwroko, èn den ben e gebroiki wan gramofon na sma den mofodoro. Den ben gebroiki a gramofon sosrefi na den gobaka fu bigin taki fu Bijbel tori. Na disi spesrutu pionier ben du na ini bigi foto pe gemeente ben seti kaba. Bakaten, spesrutu pionier ben seni go na kontren pe moro Kownukondre preikiman ben de fanowdu. Den ben go na ala sma di ben wani sabi moro fu a Kownukondre boskopu, èn den ben studeri Bijbel nanga den. Fu di den du so furu muiti, meki hondrohondro nyun gemeente ben seti. Fu di den tan wroko tranga fu preiki a bun nyunsu, meki so furu sma de na ini na organisâsi na ini a ten disi (Yes. 60:22). Spesrutu pionier e tan du prenspari wroko fu preiki a bun nyunsu „gi ala sma na grontapu”.—Kol. 1:23.
3 A de wan bun sani fu teki na eksempre fu den: Son spesrutu pionier e du a furuten diniwroko someni tenti yari kaba. Na ini den yari di pasa, den loyaal man nanga uma disi ondrofeni difrenti sani di meki taki a bribi fu den kon moro tranga (1 Petr. 1:6, 7). Den ben de klariklari fu libi sondro furu gudu, soso fu man dini na presi pe yepi de fanowdu trutru. Sonwan fu den pionier disi kon grani èn den no de so gosontu moro, noso den de na ini tra muilek situwâsi (2 Kor. 4:16, 17). Ma toku, den e „tan gro bun srefi te den ede-wiwiri kon weti” (Ps. 92:14). Den e frutrow tapu Yehovah èn den e kisi blesi fu en.—Ps. 34:8; Odo 10:22.
4 Spesrutu pionier e frudini en trutru taki wi prèise den na wan lobi-ati fasi. Efu yu abi a grani fu abi spesrutu pionier na ini a gemeente fu yu, dan gebroiki na okasi fu abi demakandra nanga den, èn teki leri fu den ondrofeni di den abi. Sori warderi gi a wroko di den e du leki getrow Kownukondre preikiman. Kisi deki-ati fu a fasi fa den e tanapu kánkan na ini a tru anbegi. Ala sma di e sori bribi neleki den spesrutu pionier disi, sa kisi a bun-ati nanga a blesi fu Yehovah, fu di ’den wan di e tyari densrefi na wan getrow fasi e meki en firi prisiri’.—Odo 12:22.