Den blesi fu a pionierwroko
1, 2. Sortu blesi wan sma kan kisi te a de na ini a pionierwroko, èn fu san ede?
1 „Mi sabi taki nowan tra wroko ben kan gi mi so furu prisiri leki fu prati waarheid nanga trawan”, na so wan pionier ben taki. Wan tra pionier ben taki: „Na a kaba fu ibri dei, mi e sribi switi èn mi ati furu nanga prisiri.” A sani di den pionier disi taki, na wan sani di ala brada nanga sisa ben taki baka di den kisi den blesi fu a pionierwroko.—Odo 10:22.
2 A e gi trutru prisiri fu yepi trawan fu kisi a sabi fu Gado Wortu di e gi libi (Tori. 20:35; 1 Tes. 2:19, 20). „A de wan tumusi moi sani èn a e tranga mi bribi fu si taki a Wortu fu Gado abi so furu krakti taki a man meki sma kenki a fasi fa den e libi”, na so wan brada ben skrifi di e pionier wan langa pisi ten kaba. Iya, fu di den pionier e du ala san den man fu yepi sma èn fu hori bijbelstudie, meki den e kisi den sortu blesi disi.
3, 4. Fa a pionierwroko e leri wan sma fu frutrow tapu Yehovah èn fa a e yepi wan sma fu go na fesi na yeye fasi?
3 Frutrow tapu Yehovah: Ala dei den pionier e frutrow tapu a yeye fu Gado te den e du a diniwroko fu den. Fu di den e du dati meki a e yepi den fu kweki „a froktu fu a yeye” èn a yeye disi e kibri den (Gal. 5:16, 22, 23). Boiti dati, den pionier e gebroiki Gado Wortu doronomo èn fu dati ede meki den abi a koni fu gebroiki Bijbel fu opo taki gi a waarheid èn fu gi trawan deki-ati (2 Tim. 2:15). Wan brada di pionier someni tenti yari langa, ben taki: „A pionierwroko yepi mi fu kisi furu sabi fu Bijbel èn mi gebroiki a sabi disi fu yepi furu sma leri sabi Yehovah nanga den sani di a abi na prakseri.” Dati na wan blesi trutru!
4 Gewoon pionier musu frutrow tapu Yehovah na furu tra fasi tu. A bribi fu den e kon moro tranga te den e si fa Yehovah e blesi a muiti di den e meki te den musu sorgu gi den sani di den abi fanowdu. Wan gewoon pionier di abi 72 yari èn di e du a pionierwroko 55 yari kaba, ben taki: „Noiti Yehovah meki mi fesi fadon.” Boiti dati, den pionier e kibri densrefi gi den furu problema fu a libi fu di den no e feti fu kisi gudu. Yu e feni a sortu libi disi wan moi sani?—Mat. 6:22; Hebr. 13:5, 6.
5. Fa a pionierwroko e yepi wan sma fu kon krosibei na Yehovah?
5 Kon krosibei na Gado: A banti di wi abi nanga Yehovah na a moro warti sani di wi abi (Ps. 63:3). Te wi e teki prati doronomo na a diniwroko fu di wi lobi Yehovah, dan dati sa meki wi kisi wan moro bun banti nanga en (Yak. 4:8). Wan brada di e pionier moro leki 18 yari kaba, ben taki: „A pionierwroko e meki wi ’tesi èn si taki Yehovah bun’ èn disi e meki taki dei fu dei wi e kon kisi wan moro bun banti nanga a Mekiman fu wi.”—Ps. 34:8.
6. San den pionier musu abi? Suma boiti den pionier e kisi wini sosrefi?
6 Boiti taki den pionier musu de na ini wan bun situwâsi, dan den musu abi wan tranga bribi sosrefi, den musu abi trutru lobi gi Gado èn gi tra sma, èn den musu de klariklari fu gi densrefi (Mat. 16:24; 17:20; 22:37-39). Ma soleki fa den prisiri fesi fu den pionier na ala sei e sori, dan den blesi di den e kisi fu a pionierwroko bigi moro den sani di den no abi na materia sei (Mal. 3:10). A no den pionier wawan e kisi den blesi disi, ma na osofamiri fu den nanga a gemeente pe den de, e kisi wini sosrefi fu den tumusi moi fasi di den pionier abi.—Fil. 4:23.