Wan nyun seti fu luku baka san wi leri na den bigi konmakandra
A grontapu fu Satan e kon moro takru, ma Yehovah e tranga wi, so taki wi man ’drai wi baka gi ogridu èn gi den lostu fu grontapu. A e yepi wi sosrefi fu libi nanga gosontu frustan, fu libi na wan regtfardiki fasi èn fu dini En na wan getrow fasi, na ini a disiten seti fu sani’ (Tit. 2:12). A Kring Konmakandra nanga a Spesrutu Dei Konmakandra di e hori ala yari, na wan tu fu den sani di Gado seti nanga yepi fu „a getrow èn koni srafu” (Mat. 24:45). Den konmakandra disi pe wi e kisi yeye nyanyan, e gi wi krakti trutru!
Nanga yepi fu wan nyun seti di sa bigin na ini a dienstyari 2005, wi sa luku baka san wi leri na den bigi konmakandra disi. A seti disi sa yepi wi fu memre èn fu du san wi leri. Na tapu bladzijde 5 nanga 6 fu na inibere pisi fu a Kownukondre diniwroko disi, yu abi wan tu artikel di e taki fu den sani di sa kon na krin na den bigi konmakandra, èn yu abi aksi sosrefi di wi sa gebroiki fu luku baka san wi leri na ibriwan fu den bigi konmakandra. Den gemeente sa taki fu den aksi disi na a Diniwroko Konmakandra di sa hori syatu bifo, èn syatu baka den bigi konmakandra disi. Fa wi sa du disi?
Wán, noso tu wiki bifo a gemeente go na a Kring Konmakandra, wan lezing fu tin miniti sa hori na a Diniwroko Konmakandra, di teki puru fu na artikel „A nyun Kring Konmakandra programa”. Disi sa meki taki den sma na ini a gemeente de fayafaya fu go na a Kring Konmakandra. A takiman sa poti prakseri tu na den aksi fu luku sani baka èn a sa gi ala sma deki-ati fu skrifi den moi penti di den e yere, so taki den de srekasreka te wi sa luku baka san wi ben leri, wan tu wiki baka a Kring Konmakandra.
Wan tu wiki baka a Kring Konmakandra, wan prati fu 15 miniti sa hori na a Diniwroko Konmakandra pe wi sa luku baka san wi leri na a fosi dei fu a Kring Konmakandra. A wiki baka dati, wan prati fu 15 miniti sa hori pe wi sa luku baka san wi leri na a di fu tu dei fu a programa. Wi sa gebroiki den aksi di de fu feni na a inibere pisi fu a Kownukondre diniwroko disi, fu hori den takimakandra dati. Den takimakandra disi musu sori wi fa wi kan fiti den sani di wi leri na ini wi libi. Den owruman kan seti sani fu puru ten fu tra pisi fu a Diniwroko Konmakandra, noso den kan puru son prati fu a programa. Den kan kenki a schema tu, fu di den e skoifi wan tu fu den prati, so taki den kan taki fu den sani di wi leri na a Kring Konmakandra.
Na a srefi fasi wi sa taki fu a Spesrutu Dei Konmakandra, ma wi sa hori wán prati nomo fu 15 miniti fu taki fu a heri programa fu a Spesrutu Dei Konmakandra. Wi alamala sa wani kibri na inibere pisi fu a Kownukondre diniwroko disi èn wi wani gebroiki en fu nyan bun fu den moi rai di Yehovah e gi wi.—Yes. 48:17, 18.