Gado Wortu abi krakti
1. San na a thema fu a spesrutu dei konmakandra fu a dienstyari 2014?
1 Bijbel abi a krakti fu kenki wi libi èn a kan meki wi denki èn du sani soleki fa Yehovah wani. Disi no de so nanga den sani di sondu libisma meki. Ma o furu krakti a Wortu fu Gado abi? Fa wi kan meki Gado Wortu abi moro krakti tapu wi libi? Fa wi kan gebroiki en moro bun fu yepi tra sma? Wi de seiker taki a sa tranga a bribi fu wi alamala te wi o taki fu den penti disi na a spesrutu dei konmakandra di sreka gi a dienstyari 2014. A thema na „Gado Wortu abi krakti”, èn a teki puru fu Hebrewsma 4:12.
2. Sortu aksi o kisi piki?
2 Feni den piki tapu den aksi disi: Te yu o arki a programa, skrifi den piki tapu den aksi di kari dyaso na ondrosei.
• Fu san ede wi musu bribi den sani di Yehovah taki? (Ps. 29:4)
• Fa wi kan meki a Wortu fu Gado abi krakti na ini a libi fu wi? (Ps. 34:8)
• Fa wi kan meki a Wortu fu Gado abi krakti tapu sma di wi e miti na ini a preikiwroko? (2 Tim. 3:16, 17)
• San wi kan du fu no meki a grontapu fu Satan kori wi? (1 Yoh. 5:19)
• Un yonguwan, fa unu kan du moro na ini a diniwroko? (Yer. 17:7)
• Fa wi kan kon tranga srefi te wi swaki? (2 Kor. 12:10)
• San de fanowdu fu tan tyari kenki kon na ini wi libi, aladi wi ben abi takru gwenti noso takru maniri bun langa kaba? (Ef. 4:23)
3. Boiti taki wi musu arki a programa, san wi kan du ete fu feni wini fu a spesrutu dei konmakandra?
3 Wi sa kisi furu wini te wi e arki den prenspari sani disi! Neleki a kring konmakandra nanga a kongres, a spesrutu dei konmakandra sa gi wi na okasi fu kon leri sabi tra sma èn abi bun demakandra nanga wi brada nanga sisa fu tra gemeente (Ps. 133:1-3; 2 Kor. 6:11-13). Sobun, meki ten fu abi demakandra nanga mati di yu abi kaba, èn suku fu meki nyun mati. Efu wan fisiti takiman soleki a distrikt-opziener noso wan brada fu Betel kisi a frantwortu fu kon na yu spesrutu dei konmakandra, dan a ben o bun fu gi en nanga en wefi wan switikon. Fu tru, furu sani de di e meki taki wi e angri fu go na a spesrutu dei konmakandra!