A Nyun Spesrutu Dei-konmakandra Programa

A thema fu a spesrutu dei-konmakandra programa fu a nyun dienstyari na wan krakti boskopu di teki fu Bijbel: „Saka Unsrefi na Gado Ondro — Kakafutu gi Didibri” (Yak. 4:7). Disi na tumusi bun rai gi den muilek ten disi! A gi di wi e gi yesi na den komando fu Gado e meki taki wi na feanti fu Satan. A programa sa leri wi fa fu tanapu kánkan teige den ogri trapu di Didibri e seti fu pori a bribi fu wi. San na wan tu fu den yeye gudu di wi sa kisi na tapu a konmakandra disi?

A kringopziener sa sori wi fa osofamiri sa kisi a krakti fu kakafutu gi den kwinsi fu a grontapu te a sa taki fu a tori „Sori Taki Yu E Saka Yusrefi na Gado Ondro Leki Memre fu wan Osofamiri”. A fosi lezing di a fisiti takiman sa hori fu a dei, na: „San a Wani Taki fu Kakafutu gi Didibri.” A lezing disi sa sori wi fu san ede èn fa wi musu handri na wan krakti fasi, fu man kakafutu gi den muiti di Satan e du fu broko wi yeyefasi. Tu fu den lezing seti spesrutu fu man yepi den yonguwan, di musu de na ai so srefi fu man si den trapu fu Didibri. Furu Kresten di de bigisma now, ben weigri fu broko kindi gi den lostu fu a grontapu, di den ben yongu. Wi sa prisiri fu yere wan tu fu den eigi ondrofeni fu den.

Ibri memre fu a libisma libimakandra musu saka ensrefi na ondro tirimakti. Fu dati ede a lasti lezing fu a fisiti takiman sa poti prakseri na fo difrenti kontren pe wi musu sori taki wi e saka wisrefi na ondro a tiri fu Gado: (1) te wi abi fu du nanga tirimakti, (2) ini a gemeente, (3) na wi grontapu wroko, èn (4) na ini na osofamiri. Fu tru, a de wan programa nanga furu sani di wi sa man gebroiki!

Den wan di abi a winsi fu teki dopu na tapu a spesrutu dei-konmakandra disi, musu piki a fesiman opziener so esi leki a kan. Wi alamala musu marki a dei na tapu wi kalender èn wi musu sreka sani na fesi fu de na a heri programa. Wi sa kisi têgo blesi te wi e tan saka wisrefi ala ten na ondro Yehovah.