Teki deki-ati foe tjari gobaka

¹ Joe lobi foe tjari gobaka? Foeroe preikiman lobi foe doe dati. Kande joe ben fredefrede na ini a bigin, spesroetoe te joe ben e tjari wan gobaka na ososma di no ben sori foeroe belangstelling di joe ben miti den a fosi leisi. Ma te joe e ’teki deki-ati nanga jepi foe wi Gado, foe froeteri a boen njoensoe’ te joe e tjari gobaka, dan kande joe sa froewondroe foe si o makriki èn o warti a wroko disi kan de (1 Tes. 2:2). Fa so?

² Foe taki en leti, wan prenspari difrenti de na mindri wan gobaka, èn a fosi leisi te joe e miti wan sma. Joe e tjari a gobaka na wan sma di joe sabi, no na wan freimdesma, èn foeroetron a moro makriki foe taki nanga wan sma di joe sabi leki nanga wan freimdesma. Èn den boen bakapisi di e gi satisfaksi te joe abi wan prati na a wroko disi, na taki gobaka kan meki joe opo oso-bijbelstudie di abi boen bakapisi.

³ Te wi e wroko oso foe oso, wi e go ibri tron baka na sma di no ben abi belangstelling di wi ben fisiti den a fosi leisi. Foe san ede wi e tan go dan? Wi e froestan taki den situwâsi foe sma e kenki èn taki wan sma di ben sori foe abi wan mi-no-ke fasi noso srefi ben de teige a fisiti di wi ben tjari a leisi di pasa, kan abi belangstelling a tra leisi te wi go na den. Nanga dati na prakseri wi e sreka wisrefi boen na fesi èn wi e begi gi a blesi foe Jehovah so taki wan sani di wi e taki a leisi disi sa meki wan sma handri na tapoe wan boen fasi.

⁴ Efoe na ini wi oso-foe-oso wroko wi e preiki sondro draidrai gi sma di no ben sori belangstelling fosi srefisrefi, dan dati no moesoe meki wi wani foe go baka moro na iniwan sma di e sori pikinso belangstelling gi a Kownoekondre boskopoe?​—Tori. 10:34, 35.

⁵ Foeroe foe wi de na ini waarheid tide foe di nanga pasensi wan preikiman ben tjari gobaka na wi. Efoe joe na wan foe den sma disi, joe kan aksi joesrefi: ’San a preikiman dati ben prakseri foe mi a fosi leisi? Mi ben teki a Kownoekondre boskopoe wantewante di mi ben jere en a fosi leisi? A ben de so taki a gersi leki mi ben abi wan mi-no-ke fasi?’ Wi moesoe breiti taki a preikiman di ben tjari wan gobaka ben feni en warti foe tjari wan gobaka na wi, ben ’teki deki-ati nanga jepi foe Gado’, ben kon na wi èn ben go doro foe leri wi a waarheid. Fa a de nanga den sma di ben sori pikinso belangstelling fosi, ma baka ten gersi leki den ben e kibri gi wi? Wan positief fasi foe si sani de toemoesi prenspari, soleki fa na ondrofenitori di e kon now e sori.

⁶ Di toe preikiman ben e doe stratiwroko wan froekoe mamanten, den ben miti wan jongoe oema e poesoe wan beibiwagi nanga wan pikin na ini. Na oema ben teki wan tijdschrift èn ben gi den Kotoigi sisa wan kari foe kon na en oso a sonde na baka. Den ben go na tapoe a ten di den ben taki nanga na ososma, ma a ben taigi den taki a no ben abi ten foe taki. Ma a ben pramisi taki a ben o de a wiki na baka. Den sisa ben tweifri efoe a ben o hori ensrefi na en wortoe, ma na oema ben e wakti den di den ben go baka. Den ben bigin wan studie èn na oema ben go na fesi na wan froewondroe fasi. Na ini wan sjatoe pisi ten a ben bigin go na den konmakandra doronomo èn ben bigin abi wan prati na ini a velddienst. A dopoe now.

⁷ Poti wan fondamenti na a fosi fisiti: A fondamenti foe wan gobaka di abi boen bakapisi foeroetron e poti na a fosi leisi. Arki boen na den sani di na ososma e taki. San den e taigi joe? A abi belangstelling gi relisi? A e broko en ede nanga sociaal afersi? A abi belangstelling gi sabidensi? historia? a natoeroe? Na a kaba foe a fisiti, joe kan poti wan aksi di e gi foe prakseri èn pramisi foe taki foe a bijbel piki te joe e go baka.

⁸ Foe eksempre, efoe na ososma taki wan sani na tapoe a pramisi foe bijbel foe wan paradijs grontapoe, dan a kan fiti foe taki a tori disi moro fara. Leti bifo joe gowe, joe ben sa kan aksi: „Fa wi kan de seiker taki Gado sa meki a pramisi disi kon troe?” Baka dati, taki toe: „Kande mi kan kon tra leisi te den tra memre foe na osofamiri de na oso, èn dan mi kan sori joe a piki foe bijbel na tapoe na aksi disi.”

⁹ Efoe na ososma no sori belangstelling na ini no wan spesroetoe tori, joe ben kan poti wán foe den aksi di skrifi na ini den pristeri di de na tapoe a lasti bladzijde foe Wi Kownoekondre Dienst èn gebroiki dati leki a fondamenti foe a tra takimakandra foe joe.

¹⁰ Abi wan raport, na tapoe san joe e skrifi ala sani soifri: Joe moesoe skrifi soifri na tapoe joe oso-foe-oso raport èn a moesoe abi ala sani na tapoe. Skrifi a nen nanga adres foe na ososma so esi leki joe gowe foe na oso. No e rai san na a nomroe foe na oso noso a nen foe a strati​—loekoe a bodoi baka foe si efoe a de soifri. Skrifi wan toe sani foe a sma. Meki notisi foe a tori di joe ben taki, den bijbeltekst di joe ben leisi, èn ala lektuur di joe ben libi na baka, èn na aksi di joe sa piki te joe go baka. Skrifi a dei nanga a ten foe a fosi fisiti èn o ten joe ben taki joe ben o go baka. Now di a raport foe joe abi ala sani na tapoe, no lasi en! Poti en na tapoe wan boen presi so taki joe kan gebroiki en baka ten. Tan prakseri foe a sma èn fa joe o doe na a tra fisiti.

¹¹ Sabi san na den marki foe joe: Na tapoe a fosi presi, doe ala san joe man foe meki na ososma firi boen, foe di joe e taki nanga firi èn nanga switifasi. Sori taki joe abi belangstelling gi en leki wan sma, sondro taki joe e aksi-aksi en toemoesi foeroe sani. Memre en baka dati foe iniwan aksi di joe ben poti na tapoe a fosi fisiti. Arki boen san a e denki, èn sori taki joe abi troetroe warderi foe san a e taki. Baka dati, sori foe san ede a fasi fa bijbel e si sani de praktis. Efoe a kan, sori en go na a prakseri di skrifi na ini a boekoe Sabi di e tjari joe go na têgo libi. Hori boen na prakseri taki joe moro prenspari marki foe gobaka na foe bigin wan bijbelstudie.

¹² A fasi fa a Sabi-boekoe e taki sani sondro foe draidrai, gi foeroe foe wi a krakti foe ’teki deki-ati’ na tapoe den bijbelstudie foe gi den studenti deki-ati foe go na den konmakandra èn foe abi demakandra nanga na organisâsi foe Jehovah. Fositen, wi ben gwenti foe wakti te leki sma ben studeri wan pisi ten fosi wi ben e gi den wan kari foe abi demakandra nanga wi. Now foeroe studenti e bigin fisiti den konmakandra so esi leki den bigin studeri, èn leki wan bakapisi foe dati den e go na fesi moro esi.

¹³ Wan trowpaar ben gi informeel kotoigi na wan kompe wrokoman. Di a ben sori belangstelling gi waarheid, den ben gi en wan kari foe abi wan bijbelstudie na ini a Sabi-boekoe. Na a srefi ten, den ben taigi en taki foe taki en leti a moesoe go na den konmakandra, pe foeroe foe den aksi foe en ben sa kisi wan piki. A man, no wawan ben teki a kari foe den, ma a ben studeri so srefi toe tron wan wiki èn a ben bigin go doronomo na den konmakandra na ini a Kownoekondre zaal.

¹⁴ Gebroiki a brochure San Gado e aksi foe wi?: Na tapoe den „Boskopoeman foe a vrede foe Gado”-distriktkongres wi ben kisi a brochure San Gado e aksi foe wi? A brochure disi boen foe bigin bijbelstudie nanga sma di e frede Gado awansi sortoe skoro den kisi. A abi wan kompleet studie kursus di e taki foe den fondamenti leri foe bijbel. A poeblikâsi sa de wan toemoesi boen wrokosani foe prati a sabi foe Gado. A e froeteri a waarheid so krin èn so makriki taki pikinmoro ibriwan foe wi sa man foe gebroiki en foe leri trawan den markitiki foe Gado. So srefi, foeroe preikiman sa abi a grani foe hori wan bijbelstudie nanga a brochure disi.

¹⁵ Wan toe sma di e denki taki den no abi a ten foe studeri a Sabi-boekoe kande wani foe studeri a San Gado e aksi-brochure nanga jepi foe sjatoe takimakandra. Den sa feni san den e leri, moi srefisrefi! Na tapoe toe noso dri bladzijde nomo den sa feni piki na tapoe den aksi di sma aksi densrefi hondrohondro jari kaba: Soema na Gado? Soema na Didibri? San na a prakseri foe Gado gi a grontapoe? San na a Kownoekondre foe Gado? Fa joe kan feni a troe relisi? Ala di a brochure e pristeri a waarheid nanga makriki wortoe, tokoe a boskopoe foe en krakti srefisrefi. A abi den prenspari penti na ini di den owroeman sa loekoe baka nanga den sma di wani teki dopoe èn a kan de leki wan wrokosani di joe kan bigin gebroiki foe hori wan moro finifini studie nanga jepi foe a Sabi-boekoe.

¹⁶ Foe pristeri wan studie na wan gobaka, joe ben kan taki nomo: „Joe ben sabi taki efoe joe teki wan toe miniti nomo joe kan abi a piki tapoe wan prenspari bijbel aksi?” Baka dati, poti wan aksi di de na a bigin foe wan foe den lès na ini a brochure. Foe eksempre, efoe joe go na wan owroesma, joe ben sa kan taki: „Wi sabi taki na ini a ten di pasa Jesus ben dresi sma. Ma san Jesus sa doe gi den sikisma na ini a ten di e kon? gi den owroesma? gi den dedesma?” Den piki de foe feni na ini lès 5. Wan sma di abi belangstelling gi relisi sa poti prakseri na tapoe na aksi disi: „Gado e arki ala begi?” A piki de na ini lès 7. Memre foe osofamiri sa wani sabi: „San Gado e aksi foe papa nanga mama èn foe pikin?” Den sa kon sabi dati te den e studeri lès 8. Tra aksi na: „Den dedewan kan doe den libiwan ogri?” èn dati e kon na krin na ini lès 11; „Foe san ede someni relisi de di e taki dati den na kresten?”, den e taki foe dati na ini lès 13; èn „San joe moesoe doe foe tron wan mati foe Gado?”, e kisi wan piki na ini lès 16.

¹⁷ Jepi den wan di e taki wan tra tongo: Fa a de nanga ososma di e taki wan tra tongo? Efoe a kan, dan den moesoe kisi leri na ini a tongo di den sabi moro boen (1 Kor. 14:9). A stads-opziener (noso na boiti presi, a kring-opziener) kan gi bodoi foe gemeente nanga groepoe di e hori konmakandra na ini tra tongo, na ini a birti. A sekretarsi ben sa man foe seni ala ’Te bezoeken anderstalig adres’-formulier (S-70) (Formulier foe go baka na sma di e taki tra tongo), di a e kisi foe gemeente preikiman, go na a joisti gemeente noso groepoe di e taki tra tongo. Efoe gemeente noso groepoe no de krosibei èn preikiman no de di e taki a tongo foe na ososma, dan a preikiman kan proeberi foe studeri nanga na ososma foe di a e gebroiki a San Gado e aksi-brochure na ini den toe tongo.

¹⁸ Wan preikiman di e taki Ingrisitongo ben bigin wan studie nanga wan man di e taki Vietnameisi èn en wefi di e taki Thai. Den ben gebroiki poeblikâsi na ini Ingrisitongo, Vietnameisi nanga na ini Thai na a studie. Ala di a tongo problema ben de wan tjalensi na ini a bigin, a preikiman e skrifi: „A gro na jejefasi foe a trowpaar kon wantewante. Den si a fanowdoe foe bigin go na den konmakandra nanga den toe pikin foe den, èn den e leisi bijbel ala neti leki wan osofamiri. Na oemapikin foe den di abi siksi jari e hori en eigi bijbelstudie.”

¹⁹ Te wi e studeri nanga sma di e taki wan tra tongo, no taki toemoesi esi, taki den wortoe boen èn gebroiki makriki wortoe nanga zin. Ma hori na prakseri taki joe moesoe handri sma di e taki wan tra tongo nanga lespeki. Joe no moesoe handri den leki den na pikin-nengre.

²⁰ Gebroiki den moi prenki na ini a San Gado e aksi-brochure. Efoe „wan prenki warti doesoen wortoe”, dan den foeroe prenki na ini a brochure sa abi foeroe bodoi pasa marki gi na ososma. Aksi en foe leisi den bijbeltekst na ini en eigi bijbel. Efoe a studie kan hori na wan ten te wan memre foe na osofamiri di sabi Sranantongo man foe vertaal, dan sondro tweifri dati sa abi wini.​—Loekoe Wi Kownoekondre Dienst foe oktober 1990, bladzijde 7, 8 nanga Onze Koninkrijksdienst foe april 1984, bladzijde 8.

²¹ Tjari gobaka sondro foe draidrai: O langa joe moesoe wakti fosi joe tjari wan gobaka? Wan toe preikiman e go baka na ini wán noso toe dei baka di den ben go a fosi leisi. Trawan e go baka na tapoe a srefi dei! Dati esi toemoesi? Foeroetron a no gersi leki den ososma abi moeiti nanga dati. Foeroetron a de a preikiman di e tjari a gobaka, di moesoe kisi wan moro positief fasi foe si sani, makandra nanga pikinso deki-ati. Loekoe den ondrofenitori di e kon.

²² Wan preikiman di abi 13 jari ben e wroko oso-foe-oso wan dei di a ben si toe oema e waka makandra. Foe di a ben hori a deki-ati na prakseri foe preiki na sma awinsi pe wi miti den, a ben go na den oema di ben e waka na strati. Den ben sori belangstelling gi a Kownoekondre boskopoe, èn ibriwan foe den ben teki wan Sabi-boekoe. A jongoe brada ben teki na adres foe den, ben go na den toe dei na baka, èn ben bigin wan bijbelstudie nanga ibriwan foe den.

²³ Wan sisa e seti sani foe go baka a wiki na baka. Ma wán dei noso toe dei na baka a fosi fisiti, a e stòp na a ososma foe gi en wan tijdschrift foe a tori foe san den ben taki a leisi di pasa. A e taigi na ososma: „Mi ben si na artikel disi èn ben prakseri taki joe ben sa wani leisi en. Mi no man tan foe taki now, ma mi sa kon baka na tapoe dridewroko bakadina soleki fa wi ben taki. A ten di wi ben taki boen gi joe ete?”

²⁴ Te wan sma e sori belangstelling gi waarheid, dan wi kan de seiker taki a sa miti gens na wan noso tra fasi. A go di wi e go baka esi-esi na baka a fosi leisi sa gi en krakti foe kakafoetoe gi ala druk di a e kisi foe famiri, krosibei mati, nanga trawan.

²⁵ Wiki belangstelling gi den wan di joe ben miti na poebliki presi: Foeroe foe wi lobi foe doe stratiwroko, na parkeer presi, na ini bus, na presi pe wenkri lai, na presi pe sma e koiri, èn go so moro fara. Boiti a prati di wi e prati lektuur, wi moesoe wiki belangstelling. Foe doe dati, moeiti moesoe meki foe kisi a nen, na adres èn efoe a kan, a telefon-nomroe foe ibri sma di abi belangstelling èn di wi e miti. A no moeilek, soleki fa joe ben kan prakseri, foe kisi a bodoi disi. Te a takimakandra de foe kaba, teki joe notisi boekoe èn aksi: „Wan fasi de fa wi kan go doro nanga a takimakandra disi na wan tra ten?” Noso taki: „Mi ben sa wani foe joe leisi wan artikel gi san mi de seiker taki joe sa abi belangstelling. Mi kan tjari en gi joe na oso noso na joe kantoro?” Wán brada e aksi nomo: „Na tapoe sortoe nomroe mi kan bèl joe?” A e froeteri taki na ini dri moen ala den sma, boiti dri nomo, ben wani foe gi en a telefon-nomroe foe den.

²⁶ Gebroiki a telefon foe feni èn wiki a belangstelling foe sma: Wan pionier sisa e gebroiki a telefon foe miti sma di e libi na ini gebow di beveilig boen. Na tapoe a srefi fasi a e tjari gobaka. A fosi leisi a e taki: „Mi sabi taki joe no sabi mi. Mi e meki spesroetoe moeiti foe miti sma na ini joe birti foe prati wan prakseri foe bijbel nanga den. Efoe joe abi pikinso ten mi ben sa wani leisi gi joe a pramisi di de foe feni na . . . ” Baka te a leisi a tekst, a e taki: „A no ben sa moi efoe wi ben kan njan boen foe a ten dati di e kon? Mi feni en wan prisiri sani foe leisi a sani disi gi joe. Efoe joe feni en wan prisiri toe mi ben sa wani bèl baka èn taki foe wan tra tekst.”

²⁷ Te a bèl go baka, a e memre na ososma foe a takimakandra di den ben abi a leisi di pasa èn a e taki dati a ben sa wani leisi komoto foe bijbel fa den situwâsi sa de te Gado sa poeroe godelowsoefasi. Baka dati, a e abi wan sjatoe bijbel takimakandra nanga na ososma. Foe ala den takimakandra di feni presi nanga jepi foe telefon, 35 sma gi en a kari foe kon na den oso èn a bigin seibi bijbelstudie! A moeilek gi joe son tron foe tjari gobaka na sma di abi belangstelling, na ini den moen pe alen e fadon foeroe noso foe di joe siki? Efoe dati de so, foe san ede joe no e hori kontakti nanga den nanga jepi foe telefon?

²⁸ Go baka na sma di abi belangstelling èn di joe miti na bisnis presi: Foeroe sani de moro ini a tori foe wroko wenkri-foe-wenkri leki a pristeri foe tijdschrift nomo. Foeroe wenkriman abi wan opregti belangstelling gi waarheid, èn wi moesoe wiki a belangstelling dati. Na ini wan toe kefal, a kan foe abi wan bijbel takimakandra noso srefi wan studie leti na a bisnis presi foe den. Na ini tra kefal, joe nanga a sma di abi belangstelling kan miti na a brekten pauze noso na tapoe wan tra ten di boen gi a sma.

²⁹ Wan opziener di e rèis ben go na a eiginari foe wan pikin groentoe-wenkri èn ben aksi foe demo wan bijbelstudie. Di na eiginari ben aksi o langa a demonstrâsi ben o de, na opziener di e rèis ben taki dati a ben o teki 15 miniti nomo. Baka di a ben taki dati, na eiginari foe a zaak ben poti wan bord na a doro nanga a sani disi na tapoe: „Baka 20 miniti wi e opo baka.” Baka dati a ben teki wan toe stoeroe èn den toe ben taki foe den fosi feifi paragraaf foe a Sabi-boekoe. Den sani di na opregti man disi ben leri ben naki en ati so kefalek taki a ben go na a poebliki konmakandra nanga a Waktitoren-studie a sonde dati èn ben agri foe go doro nanga a studie a wiki na baka.

³⁰ Foe pristeri wan studie na wan bisnis presi, joe ben sa kan taki disi: „A bijbelstudie programa foe wi e teki 15 miniti nomo foe demo. Efoe joe abi a ten mi sa sori joe fa a e doe.” Baka dati, hori joesrefi na a ten di gi. Efoe a no kan foe abi wan langa takimakandra na wan bisnis presi, kande a fiti moro foe go na a wenkriman na en oso.

³¹ Go baka srefi te joe no prati lektuur: Ibri pikinso belangstelling warti foe kisi wan gobaka, awinsi lektuur prati noso no prati. A no de foe taki, dati efoe a de krin foe si taki na ososma no abi belangstelling srefisrefi gi a Kownoekondre boskopoe, dan a moro boen foe gi joe krakti na wan tra presi.

³² Na ini na oso-foe-oso wroko wan sisa ben miti wan dame di ben abi switifasi srefisrefi ma di no wani den tijdschrift di a sisa ben pristeri en kwetikweti. A preikiman e skrifi: „Omeni dei mi ben prakseri foe en èn mi ben teki a bosroiti taki mi ben wani taki nanga en baka.” Te foe kaba, a sisa ben begi, ben teki deki-ati, èn ben klòp na a oso foe a dame. Foe en prisiri, na ososma ben kari en kon na inisei. Den ben bigin wan bijbelstudie èn a dei na baka a studie ben hori baka. Baka ten, na ososma ben kon na ini waarheid.

³³ Sreka sani na fesi foe kisi a moro boen bakapisi: Wi e rikomanderi taki oenoe gebroiki ten ibri wiki foe tjari gobaka. Foeroe kan pasa efoe wi sreka sani boen na fesi. Seti sani foe tjari gobaka na ini a srefi gebied pe joe sa wroko oso-foe-oso. Te oenoe e wroko nanga oto, dan hori a groepoe pikin so taki ibri sma sa abi nofo okasi foe tjari gobaka. A sjafeur moesoe sabi na fesi pe den gobaka sa tjari so taki a no abi foe rèi foe soso.

³⁴ Den wan di abi boen bakapisi foe tjari gobaka èn foe opo oso-bijbelstudie e taki, dati a prenspari foe sori troetroe persoonlijk belangstelling gi sma èn foe tan prakseri foe den srefi baka te wi ben go baka. A de fanowdoe toe foe hori takimakandra foe wan bijbeltori di e hari prakseri èn foe poti a fondamenti foe gobaka bifo joe gowe a fosi leisi. Moro fara, a de prenspari foe tjari gobaka wantewante baka te a belangstelling sori. Joe moesoe hori joe marki foe bigin wan bijbelstudie na prakseri ala ten.

³⁵ Wan toemoesi prenspari eigifasi foe abi boen bakapisi na gobaka, na deki-ati. Fa wan sma e kisi dati? Na apostel Paulus e piki te a e taki dati wi ’moesoe teki deki-ati’ foe meki a boen njoensoe bekènti na trawan „nanga jepi foe wi Gado”. Efoe joe moesoe gro na ini a kontren disi, begi Jehovah foe jepi dan. Baka dati, akroederi den begi foe joe, go baka na ala sma di sori belangstelling. Jehovah sa blesi den moeiti foe joe seiker!

[Faki na tapoe bladzijde 3]

Fa foe abi boen bakapisi nanga a tjari foe gobaka

■ Sori opregti persoonlijk belangstelling gi sma.

■ Teki wan bijbeltori di e hari prakseri foe taki foe en.

■ Poti a fondamenti na ibri fisiti di joe e tjari.

■ Tan prakseri foe a sma baka te joe gowe foe en.

■ Go baka na ini wán noso toe dei baka di a belangstelling sori.

■ Hori na prakseri taki a marki foe joe na foe bigin wan bijbelstudie.

■ Begi foe kisi jepi foe teki deki-ati gi a wroko disi.