Wi e soekoe — moro bijbelstudie

¹ Jehovah Gado e blesi en organisâsi na grontapoe nanga a gro di a e tan gro doronomo. Na ini a lasti dienstjari, 375.923 sma teki dopoe na heri grontapoe — dati na wan gemiddelde foe 1000 njoen disipel ibri dei, noso wan sani foe 43 njoen disipel ibri joeroe! Ala di wi brada kande kisi foe doe nanga someni tenti jari foe pina na difrenti pisi foe grontapoe, tokoe a Kownoekondre wroko e waka heri boen èn wi e ondrofeni toemoesi moi gro. A e gi wi prisiri srefisrefi foe leisi foe a go di a prati foe a boen njoensoe e go na fesi!

² Na ini a lasti dienstjari foe a bijkantoro foe Suriname, wi toe ben si taki den gemiddelde preikiman nanga jepi-pionier èn den nomroe foe pikin boekoe, brochure nanga tijdschrift di ben prati, kon moro foeroe. Wan heimarki ben de toe ini a nomroe foe sma di ben fisiti a Memrefesa. Fa a de nanga den gobaka èn a bijbelstudie aktiviteit? Wi ben si taki a totaal nomroe foe gobaka di ben meki kon moro mendri, èn wi ben si taki den bijbelstudie ben go na baka nanga 7 procent. Ma tokoe, den sani disi na prenspari sani na ini a diniwroko te wi wani meki disipel. San ibriwan foe wi kan doe foe kenki a go di den gobaka nanga bijbelstudie e go na baka?

³ Meki a wani di joe wani hori wan bijbelstudie, kon moro tranga: Wisrefi moesoe poti prakseri na tapoe a de di wi moesoe de tranga èn nanga faja na jejefasi. Den troe bakaman foe Krestes de „fajafaja gi toemoesi boen wroko” (Tit. 2:14). Te wi e loekoe wi diniwroko baka, dan wi kan taki dati wi de fajafaja srefisrefi foe go baka na ibri sma na ini a veld pe wi ben libi poeblikâsi? Wi de nanga faja foe pristeri ala sma di e sori belangstelling, wan oso-bijbelstudie? (Rom. 12:11) Noso, a de fanowdoe taki wi moesoe kweki wan moro bigi angri foe meki gobaka èn foe bigin oso-bijbelstudie?

⁴ A leisi di wisrefi e leisi bijbel, a go di wi e go na den konmakandra doronomo, èn a studeri di wi e studeri den poeblikâsi, sa meki wi tan libilibi na jejefasi èn a sa meki wi kisi a krakti foe Gado en jeje (Ef. 3:16-19). Disi sa tranga a bribi foe wi èn a froetrow di wi abi na ini Jehovah èn a lobi di wi abi gi den sma na wi sei. A sa boeweigi wi foe leri wan tra sma a waarheid èn na so fasi wi sa meki a diniwroko foe wi moi, a sa abi boen bakapisi, èn a sa gi wi deki-ati. Ija, wi moesoe wani moro bijbelstudie!

⁵ Studeri nanga osofamiri fosi: Kresten papa nanga mama di abi pikin di e libi na oso ete, moesoe broko den ede nanga a programa foe den foe wan osofamiri bijbelstudie di e hori doronomo (Deut. 31:12; Ps. 148:12, 13; Odo 22:6). A ben sa gi winimarki te papa nanga mama e studeri a San Gado e aksi-brochure èn dan a Sabi-boekoe nanga den pikin foe den, foe kan sreka den foe doro den markitiki foe de wan preikiman di no dopoe ete èn foe sreka den foe den kan gi densrefi abra na Gado èn teki dopoe. A no de foe taki, dati den kan studeri tra sani toe, ma dati e anga foe den sani di a pikin abi fanowdoe èn a jari di a pikin abi. Wan papa noso wan mama di e studeri nanga wan pikin di no dopoe, kan teri a studie, a ten, nanga a gobaka, soleki dati ben sori na ini na Aksi boksoe foe Wi Kownoekondre Dienst foe april 1987.

⁶ Orga den sani di joe seti gi joesrefi, moro boen: Te wi e loekoe a nomroe foe tijdschrift, brochure, nanga boekoe di wi e libi na baka na sma, dan tweifri no de taki boen foeroe siri e panja. Den siri disi foe waarheid di ben sai, e opo foeroe okasi gi wi foe kan jepi sma foe kon tron njoen disipel. Ma wan gronman noso wan djariman ben sa firi satisfaksi troetroe, efoe baka ala a moeiti di a ben doe foe prani sani doronomo, noiti a no ben teki ten foe koti? Kwetikweti. Na a srefi fasi, a de fanowdoe taki na ini wi diniwroko wi e go baka na sma di abi belangstelling.

⁷ Joe e teki ten doronomo foe meki gobaka? Go baka wantewante na ala sma di sori belangstelling. Meki gobaka nanga a marki foe bigin wan bijbelstudie. Joe abi wan krin raport foe den gobaka foe joe, di orga boen èn di joe e meki kon njoen ibri leisi? Makandra nanga a nen nanga na adres foe na ososma, sorgoe taki joe e skrifi a datum foe a fosi leisi di joe ben go na a sma, iniwan sani di joe ben libi na baka, skrifi so srefi sjatoe foe san joe ben taki nanga en, èn wan penti di joe kan taki foe dati a tra leisi. Libi presi tapoe joe raport so taki joe kan skrifi wan toe sani ete baka ibri gobaka.

⁸ Ondrosoekoe fa foe tjari wan gobaka: San na wan toe penti foe hori na prakseri te wi e meki wan gobaka na wan sma di sori belangstelling? (1) Abi waranfasi, switifasi, de nanga faja, èn no de toemoesi strak. (2) Taki foe sani noso poti aksi di abi en belangstelling. (3) Taki na wan fasi di de makriki foe froestan èn den sani di joe e taki moesoe gron tapoe bijbel. (4) Na ibri fisiti foe joe, meki moeiti foe leri na ososma wan sani di a sa erken taki a de wan warti sani gi en. (5) Bow a froewakti na ini a sma gi a tori di joe sa taki foe dati na a tra fisiti. (6) No tan toemoesi langa. (7) No poti aksi gi na ososma di e meki taki a e firi sjen noso di e poti en na ini wan moeilek situwâsi. (8) Gebroiki a koni foe man si sani krin, so taki joe no e kroetoe a fowtoe fasi foe si sani di a sma abi noso takroe gwenti di a abi, bifo joe kweki warderi ini a sma gi jeje sani. — Loekoe na inlegvel foe Wi Kownoekondre Dienst foe maart 1997, pe joe e kisi moro jepi di e sori fa foe abi boen bakapisi ini a meki foe gobaka èn a bigin foe bijbelstudie.

⁹ Ondrosoekoe ala fasi: Na ini wan gemeente na ini Amerkankondre, den ben man kisi den nen nanga den nomroe foe den oso foe ala sma di e libi na ini wan gebow di beveilig boen. Den ben skrifi wan persoonlijk brifi gi ibri sma di ben libi drape, èn den poti so srefi toe traktaat na ini. Na a kaba foe a brifi, den ben pristeri wan oso-bijbelstudie, èn den ben skrifi wan telefon nomroe toe foe wan sma ini a birti so taki a sma di ben kisi a brifi, ben kan bel a nomroe dati. Na ini wan toe dei nomo, wan jonkoeman ben bel èn ben aksi wan studie. Den tjari wan gobaka na en a tra dei, èn den ben bigin wan studie ini a Sabi-boekoe. A srefi neti dati a ben go na a gemeente boekoestudie, èn a ben go doro foe fisiti ala den konmakandra. Pikinmoro wantewante, a ben bigin leisi bijbel ibri dei èn a ben meki go na fesi safrisafri foe man teki dopoe.

¹⁰ Preikiman di ben de makandra na ini wán oto ben meki plan foe tjari wan toe gobaka makandra. Di wan sisa ben tjari wan foe den gobaka foe en, a sma di a ben soekoe, no ben de na oso, ma wan tra jongoe oema ben opo a doro, èn a ben taki: „Mi ben wakti oenoe.” Na ososma ben kisi a Sabi-boekoe bifo dati kaba foe wan sma di a sabi boen. Na a ten di den sisa ben kon na en doro, a ben leisi a heri boekoe toe leisi kaba, èn den bodoi di de na ini ben naki na ati foe en. A ben taki dati a no ben froewondroe foe si den Kotoigi na en doro a dei dati, foe di a ben begi taki den ben kan kon èn studeri bijbel nanga en. Den ben bigin wan studie, na oema ben bigin fisiti den gemeente konmakandra, èn a ben meki go na fesi esi-esi.

¹¹ Wan sisa di dopoe pikinmoro 25 jari kaba, ben gi a mama foe en wan Sabi-boekoe no so langa pasa ete. A mama foe en, di de wan memre foe kerki, ben bigin leisi a boekoe. Baka di a ben kaba nanga toe kapitel, a kari na oemapikin foe en di ben froewondroe srefisrefi, èn a ben taki: „Mi wani tron wan foe den Kotoigi foe Jehovah!” A mama ben bigin studeri èn a dopoe now.

¹² Proeberi den rai disi: Oiti joe proeberi a fasi disi foe bigin wan studie wantewante? Joe kan taki nomo: „Efoe joe wani foe abi wan oso-bijbelstudie sondro foe pai gi dati, dan mi kan sori joe ini wan toe miniti fa dati e doe. Efoe joe e prisiri foe en, dan joe kan go doro nanga dati.” Foeroe sma no e draidrai foe teki wan studie te joe e pristeri en na so wan fasi èn den de klariklari foe loekoe fa a bijbelstudie e hori.

¹³ Na ini a bigin foe a studie, sori a studenti fa foe sreka na fesi foe di a e leisi den tekst di skrifi drape èn foe di a e poti strepi na ondro prenspari wortoe di de wan piki na tapoe den aksi. Poti prakseri na tapoe den moro prenspari penti nomo. Ala di a sa de fanowdoe foe no de toemoesi strak tapoe den fosi takimakandra, tokoe a de prenspari taki a bijbelstudie e hori doronomo. Abi na prakseri fa joe ben sa bigin nanga wan begi leki wan prenspari pisi foe a studie, èn fa joe ben sa sreka a studenti gi gens nanga jepi foe san bijbel e taki foe dati. Ma moro prenspari, meki a studie de nanga faja!

¹⁴ A troe, taki a no ala studenti foe bijbel e go na fesi na a srefi fasi. Sonwan no abi a firi gi jeje sani leki trawan noso den no de so gaw foe teki den sani di den e leri na ini den. Trawan abi wan toemoesi druk libi èn kande den no ben man gi a ten di de fanowdoe foe kaba wan heri kapitel ibri wiki. So boen, na ini son kefal a kan de fanowdoe foe teki moro leki wán studie-joeroe foe studeri son kapitel nanga a sma èn a kan teki wan toe moen moro foe kaba a boekoe. Na ini son kefal wi kan studeri a San Gado e aksi-brochure fosi èn dan go doro nanga a Sabi-boekoe. Disi, èn a de di den studenti de na den gemeente konmakandra toe, sa jepi ibriwan foe den foe kisi wan steifi fondamenti na ini waarheid.

¹⁵ A de wan prenspari sani srefisrefi, foe begi gi wan bijbelstudie! (1 Joh. 3:22) Wan foe den ondrofeni di e gi moro satisfaksi gi wan kresten na taki Jehovah e gebroiki en foe jepi wan sma foe kon tron wan disipel foe Jesus Krestes (Tori. 20:35; 1 Kor. 3:6-9; 1 Tes. 2:8). Now na a ten foe de fajafaja srefisrefi na ini a bijbelstudie wroko, ala di wi e froetrow troetroe taki Jehovah sa blesi na wan bogobogo fasi den moeiti di wi e doe foe bigin moro studie!

[Prenspari pisi na tapoe bladzijde 3]

Joe e begi foe bigin wan njoen bijbelstudie?