Te wi e tyari gobaka, dan wi sa man bigin bijbelstudie
1. Fu san ede a de so prenspari fu tyari gobaka?
1 Yesus gi den bakaman fu en a komando fu preiki, ma a taigi den sosrefi fu ’meki sma tron disipel . . . , èn fu leri den’ (Mat. 28:19, 20). Wan preikiman e meki sani bekènti, ma wan leriman e du moro. Wan leriman e sori fa fu du wan sani, a e fruklari den sani di a e leri so taki sma kan frustan en, èn a e gi buweisi fu sori taki den sani di a e leri na tru sani. Wan fasi fa wi e leri trawan, na te wi e tyari gobaka na den sma di wani sabi moro, nanga a marki fu bigin wan bijbelstudie nanga den.
2. Na sortu sma wi musu go baka?
2 Na sortu sma yu musu go baka? Yu no musu frigiti fu go baka na ala den sma di ben teki wan publikâsi noso iniwan sma di sori taki a wani sabi moro fu a bun nyunsu, awansi a sma sori dati pikinso nomo. Te yu e gi kotoigi na publiki èn e miti sma di wani sabi moro, dan yu musu du muiti fu kisi na adres fu a sma noso en telefon-nomru so taki yu kan yepi a sma fu kon sabi moro. No denki taki yu no sa man bigin wan bijbelstudie. Tan suku sma di wani studeri Bijbel, èn kande yu sa feni den tu.—Mat. 10:11.
3, 4. San wi musu du efu wi wani abi bun bakapisi te wi e tyari gobaka?
3 Teki ten fu yepi a sma: A fosi leisi te yu de na wan sma, yu musu bigin sreka yusrefi fu go baka na en. Preikiman di abi bun bakapisi e luku sortu sani e hari a prakseri fu na ososma. Den e gebroiki a sani dati fu taki go moro fara nanga a sma. Tra preikiman abi bun bakapisi te den e poti wan aksi gi na ososma na a kaba fu a takimakandra. Na so wan fasi na ososma sa wani sabi moro te den e go baka na en. Fu di wi wani yepi sma trutru, meki wi sa tan prakseri den, srefi te wi gowe libi den oso, èn wi sa go baka na den sondro fu draidrai. Efu a kan, dan pruberi fu go baka na a sma baka wán noso tu dei, fu di den sani di ben hari en prakseri sa de krin na ini en frustan ete.
4 Te yu e go baka na wan sma, dan pruberi fu go doro nanga a takimakandra di yu ben abi nanga en a fosi leisi. Poti leki marki ibri leisi fu sori a sma awinsi wán penti na ini Bijbel di kan yepi en, èn de klariklari fu arki a sma. Leri sabi na ososma moro bun. Dan te yu e go baka na a sma, yu sa sabi den broko ede fu en èn yu sa man teki den yoisti tru tori fu Gado Wortu fu prati dati nanga en.
5. Na sortu makriki fasi yu kan bigin wan bijbelstudie?
5 Suku okasi fu bigin wan bijbelstudie: Tyari gobaka nanga a marki fu bigin wan bijbelstudie. Fa yu kan du dati? Taigi a sma taki yu wani sori en wan moi penti. Sori a sma wan paragraaf na ini a Sabi-buku noso a San Gado e aksi-brochure, di sa hari en prakseri kande. Leisi a paragraaf, luku na aksi, èn taki nanga a sma fu wán noso tu tekst di kari drape. Yu kan du disi na ini feifi noso tin miniti leti na a mofodoro fu a sma. Tapu a takimakandra nanga wan tra aksi di yu e poti èn seti sani fu go baka na a sma fu taki moro fara fu a penti disi.
6. Fa wi kan sori taki wi e frustan o prenspari a de fu tyari gobaka?
6 Wan tumusi prenspari sani na ini wi diniwroko na fu yepi ala den sma di wani sabi moro. Fu dati ede, poti wan spesrutu ten ibri wiki fu tyari gobaka. Te yu sa du disi dan yu sa abi moro bun bakapisi na ini yu diniwroko èn yu sa kisi trutru prisiri.