Pristeri na boen njoensoe — Na go-baka
1 Leki bedinari foe na boen njoensoe wi kisi na komando toe meki discipel (Matt. 28:19, 20). A tjari foe gobaka de foe dat’ede wan toemsi prenspari pisi foe na wroko di de ini a meki foe discipel. Te wi e tjari gobaka, dan wi e go na sma di sori belangstelling kaba gi na Kownoekondre-boskopoe. Den abi ekstra jeje njanjan fanowdoe foe go a fesi ini a waarheid. Den moe kon sabi moro krin na jeje fanowdoe foe den (1 Petr. 2:2; Matt. 5:3). Gobaka e gi wi na okasi foe lekti na fanowdoe disi te wi e jepi sma foe kisi koni foe a Wortoe foe Gado.
2 Meki plan a fesi. Poti ten a sé foe gobaka. Foeroe sma e seti en so dati baka a oso-foe-osowroko den e tjari gobaka. Boiti foe dati ala wiki sani kan seti gi na activiteit disi. Son sma abi na prakseri dati den abi moro kans foe feni sma na oso èn foe miti den na ini wan jeje fasi pe den de ontspannen, klarklari foe arki, te den drai go baka froekoe ini a neti. Joe kan poti ten ini joe schema foe meki gobaka? Te joe hori doro foe joe sé dan na kans foe opo wan osobijbelstudie sa de moro bigi.
KAKAFOETOE GI NA TJALANSI
3 Na tjari foe gobaka kan de gi son sma wan tjalansi di den e skreki foe en. Den kan taki dati ooktoe foe joe? Efoe dati de so, dan a sreka na fesi na a dresi. Foe di wi e fisiti den sma di abi pikinso belangstelling, dan wi abi kaba wan fundamenti foe wan takmakandra. A de prenspari foe skrifi wan soifri bericht foe san ben taki na a fosi fisiti. A de moro makriki foe a belanstelling wiki foe di joe e kon buka na tapoe na takmakandra na fesi èn e bow a tapoe go doro. Poti prakseri na tapoe ala san den e taki, sodati joe abi punt pe joe e agri nanga a sma foe bepaal pe a belangstelling foe den e go èn sortoe marki den poti ini den libi. Tjari moro fara nanga jepi foe na Tak-go-tak-kon-boekoe, ekstra bodoi kon makandra. Taki foe den punt disi te joe e fisiti den baka èn ferteri san joe ben soekoe. Nanga disi na ososma sa si dati joe abi opregti belangstelling gi den èn den sa kisi dek’ati foe doe tapoe wan boenfasi wan sani tapoe a boskopoe foe howpoe.
4 Gi trawan a de wan tjalansi foe miti na sma di abi belangstelling baka na oso. Wan sisa ben libi tijdschrift na wan man ma no ben kan miti en moro na oso ini den toe jari di ben kon. Te foe kaba a ben miti en baka, a ben ferteri dati a ben njanboen foe den tijdschrift èn a ben wani tan kisi den. Ma nanga a wroko foe en a ben de te now ete moeilek foe miti en na oso. Te foe kaba na sisa ben miti en baka foeroe moeiti foe kon meki kontacti nanga en baka na oso èn a ben de klari foe taki. A ben bari en wan switi kon nanga den aksi: „San mi moe doe foe tron wan kotoigi?” A ben teki wan studie èn a e doe wroko now leki wan owroeman. Foe feni den sortoe sma disi e gi troetroe prisiri. A e meki den moeiti foe wi de a moeiti warti. Jehovah ben blesi na tranga wroko foe na sisa disi (Pré. 11:1). A no sa loekoe psa ooktoe na tranga wroko foe wi. Wi kan kisi den sortoe ondrofenitori disi. Ma pe wi kan kisi moro jepi èn dek’ati?
5 Dienstopziener kan gi jepi èn poti wan toemsi moi eksempre ini a tjari foe gobaka. Te den e fisiti den boekoestudiegroepoe den kan hori wan lezing foe na prensparifasi foe go-baka. Den kan meki wi si fa wi kan opo bijbelstudie. Te den e wroko nanga wan groepoe ini na velddienst den kan jepi persoonlek prékiman foe tjari gobaka èn opo bijbelstudie. Efoe joe abi jepi na ini a pisi disi foe na dienst, aksi dan na dienstopziener foe joe foe jepi joe.