A tjalensi foe tjari gobaka
1 Leki dinari foe a boen njoensoe wi kisi a komando foe meki disipel (Mat. 28:19, 20). Disi wani taki toe foe tjari gobaka. Joe e loekoe a prenspari pisi disi foe wi Kresten diniwroko na wan positief fasi? Foe kon bekwaam ini a tjari foe gobaka kan de wan tjalensi di e poesoe joe. — Odo 22:29.
2 Ibri kresten di gi ensrefi abra, moesoe firi taki a abi wan frantiwortoe foe teki prati na a wroko foe meki disipel. Disi kan aksi taki wi moesoe poti pikinso foe a switilibi foe wi na wan sei, so taki wi kan prati a Kownoekondre howpoe nanga trawan. Gobaka e gi wi na okasi foe jepi opregti sma foe satisferi den jeje fanowdoe.
3 Go baka na ala sma di ben sori belangstelling: Wi moesoe tjari gobaka na ala sma di ben sori belangstelling ini a Kownoekondre boskopoe, srefi efoe den no ben wani teki den poeblikâsi foe wi. Foeroe sma de di e sori belangstelling foe di den wani foe taki bijbel tori nanga wi. Jesus nanga den disipel foe en ben sori fa joe kan kweki sma belangstelling gi a Kownoekondre boskopoe, foe di joe moesoe meki den teki prati ini bijbel takimakandra di e go foe spesroetoe tori. — Mark. 10:21; Tori. 2:37-41.
4 Na marki foe wi foe go baka na foe bigin wan bijbelstudie. Kande wi man sori na ososma fa wi e hori wan oso bijbelstudie. Joe kan de seiker taki Jehovah sa piki a begi foe joe, foe jepi joe foe feni wan opregti ati sma foe gi en leri. Jehovah sa blesi den serjoesoe moeiti foe joe di joe e meki ini en diniwroko. Foe san ede joe no e soekoe a jepi foe Jehovah èn poti leki marki foe bigin wan bijbelstudie?
5 Meki boen gebroiki foe traktaat: Wi kan gebroiki traktaat na wan fasi di abi boen bakapisi te wi e opo bijbelstudie. Foeroe preikiman ben man foe bigin wan takimakandra soso foe di den ben taki foe a prenki tapoe a kafti. Leisi wan paragraaf nanga na ososma ibri tron. Te wan aksi e poti, stòp èn aksi na ososma foe a taki fa en e denki. Soekoe den tekst èn sori fa den e fiti. Joe kan tjari a takimakandra go na a poeblikâsi ini san joe o hori a studie.
6 Gebroiki a Taki-go-taki-kon-boekoe: Joe kan tjari gobaka nanga boen bakapisi nanga a Taki-go-taki-kon-boekoe. Te joe e go loekoe a lijst nanga prenspari tori noso ini na index, dan dati kan jepi joe foe feni bodoi di e fiti, te joe e go baka na a sma pe joe ben abi takimakandra a fesi. Wi kan gebroiki a pisi „Bijbel tekst di foeroetron den e gebroiki na wan fowtoe fasi” foe poeroe genstaki di kan opo ede kon. Pionier e taki dati den abi foeroe boen bakapisi foe bigin bijbelstudie foe di den gebroiki bodoi so leki joe kan feni dati ini a Taki-go-taki-kon-boekoe tapoe bladzijde 221 ondro „Fa Jehovah Kotoigi e kon na den froeklari di den e gi foe bijbel?” Den e sori a sma di abi belangstelling fa bijbel e gi en eigi froeklari. Disi e wroko boen èn ben abi leki bakapisi taki den ben kan opo wan toe bijbelstudie.
7 Neleki Jesus nanga den apostel foe en, wi moesoe sori wan opregti belangstelling gi den skapoe foe Jehovah (Luk. 9:11). Lobi gi sma sa jepi wi foe go na den nanga den Kownoekondre waarheid (2 Kor. 2:17). Te wi e poti moro foeroe krakti tapoe a gi foe wisrefi foe a boen foe trawan na jejefasi, wi man teki a tjalensi foe tjari gobaka.