Yu e suku gudu di kibri?
„Meki no-frudini bunfasi nanga vrede kon moro furu na yu nanga yepi fu wan soyfri sabi fu Gado èn fu Yeyses, wi Masra.” — 2 PETRUS 1:2.
1, 2. Sortu sani e meki gowtu de wan warti èn diri sani?
FU SAN-EDE gowtu de so diri? A de soso wan safu metaal, èn toku na prèys fu en e doro den hondrohondro dala wan ons. A tru, a safu fu boigi èn leki wan linga ofu wan anu-buy, a de wan tumusi moy sani di e hari sma kon (1 Timoteyus 2:9; Yakobus 2:2). Ma efu yu ben lasi pasi na ini wan drey sabana èn e suku fu dede fu angri èn dreywatra, dan yu no ben sa kan nyan ofu dringi en. Ini na situwâsi dati wan pisi brede ofu wan preti aleysi nanga wan grasi watra ben sa warti moro srefi leki gowtu.
2 Fu san-ede dan sma e si gowtu leki wan sani nanga so wan bigi waarde? Wán reyde de taki a no de furu èn a de muylek fu kisi. Di fu eksenpre na Empire-gowtumijn na ini na noordsey fu Californiya ben tapu na ini 1957 fu di den no ben feni wini fu en moro langa, dan den mijnwrokoman ben diki go na wan dipi fu 1500 meyter, ma den ben musu go so wan 3000 meyter skoynsi na ondro fu doro na a gowtu. Te na a momenti dati a hey prèys fu gowtu ben meki a warti a muyti fu du ala sani fu tan suku fu en.
3. Sortu gudu wi kan suku?
3 Ma wi kan diki fu feni wan sani san de krinkrin moro diri leki gowtu. San na dati? Na koni kownu Salomo ben gi na piki so wan 3000 yari psa kba: „Efu boyti fu dati, yu e bari kari fu na frustan fu sani srefi èn e opo yu sten gi a koni fu man fu si fa fu du sani srefi, efu yu e tan suku en leki yu e suku solfru, èn yu e tan suku en leki yu e suku gudu di kibri, dan na ini na tori dati yu sa frustan na frede gi Yehovah, èn yu sa feni na sabi fu Gado.” Prakseri pikinso, taki kowôn sma di no de noti man fu feni „na sabi fu Gado”! — Odo 2:3-5.a
Fu san-ede ala sma abi soyfri sabi fanowdu
4. San musu de na ini a tori fu na soyfri sabi fu wan kresten?
4 Fu sensi na ten fu Krestes, dan na tumusi prenspari sabi dati kon abi moro na ini en leki san ben de fu kisi gi den kotrow Hebrew man nanga uma fu fositen. Paulus ben taki disi fu en: „So taki na Gado fu wi Masra Yeyses Krestes, na Tta fu glori, mag gi yu wan yeye fu koni èn fu openbaring na ini na soyfri sabi fu en, so taki den ay fu yu ati kisi leti, fu yu mag sabi san na a howpu pe a kari yu go, [èn] san na a glori gudu di a e kibri leki wan famirigudu gi den santawan.” — Efesiya sma 1:17, 18.
5. Fu san-ede den salfuwan doronomo musu poti prakseri tapu a sabi fu den fu na wani fu Gado?
5 Ini a ten dati dan disi ben de ray di ben gi langalanga na den santa salfu brada fu Krestes, èn dati a de te now ete ini a ten disi. Leki na di fu tu pisi fu na „siri” fu na pramisi, dan den disi de wan spesrutu sani gi Satan en muyti fu nyan sma na ondro na yeyefasi (Galasiya sma 3:26-29; Efesiya sma 6:11, 12). Salfuwan spesrutu musu meki a kari fu den fasti fu di den no e libi na sorgu fu na fri presenti fu Gado no frudini bunfasi a wan sey. Dati na fu san-ede den musu tranga doronomo den yeye fonten fu den fu krakti fu di den e meki na soyfri sabi fu den fu Gado wani èn Wortu kon nyun baka. — Efesiya sma 3:7; Hebrew sma 6:4-6; 2 Petrus 1:9-12.
6. (a) Fu san-ede wi alamala abi soyfri sabi fanowdu, awasi wi howpu de fu heymel ofu fu grontapu? (b) San de fanowdu fu kisi soyfri sabi?
6 Fa a de nanga den sma di abi na howpu fu libi fu têgo na grontapu? Fu san-ede soyfri sabi de fu bigi belang gi den? Fu di yu no abi hey nanga moro hey ini kresten soyfri-retifasi, neleki wan moro hey markitiki ben sa de gi den salfuwan, di abi wan heymel howpu, leki gi den tra skapu, di abi wan grontapu howpu (Yohanes 10:16; 2 Petrus 3:13). Kresten gronprakseri de a srefi gi alamala. Fu na reyde dati meki wi alamala abi na fanowdu fu lay wi yeye batterij alaten baka nanga soyfri sabi. Ma ten nanga muyti de na ini na tori. Wi musu du yeye dikiwroko, neleki fu feni gudu di kibri. — Psalm 105:4, 5.
Bay na ten fu diki
7. (a) Sortu muylekhèyt de di kan tapu pasi gi na muyti fu wi fu kisi soyfri sabi? (b) San kan de den bakapisi te wi no sorgu bun gi wi yeyefasi?
7 Moro furu sma na ini na ten disi e libi wan druk libi, èn leki kresten a gersi taki wi abi en moro druk ete leki trawan, nanga wi schema gi beybri konmakandra, velddienst, grontapu wroko, osowroko, skorowroko, èn so moro fara. Toku, neleki fa wi e teki ten fu nyan ibri dey, na so srefi wi musu poti ten na wan sey fu gi wi frustan èn wi yeyefasi nnyan. A no ben de wan soso taki fu Yeyses di a ben kobroyki den wortu fu Deuteronomiyum 8:3: „Buku taki: ’Libisma no musu libi fu brede wwan, ma fu ibri wortu di e komoto fu Yehovah mofo’” (Mateyus 4:4). Efu wi no e sorgu bun gi wi yeyefasi, dan wi no e sorgu bun gi wi yeye waarde èn wi howpu fu na ten di e kon. Dan wi kan bigin grati èn degedege. So bun fa wi kan meki ten gi doronomo beybri studi nanga wi srefi?
8. Sortu beybri ray e gi wi wan yoysti luku na tapu na studeri nanga wi srefi?
8 Den wortu fu na apostru Paulus fiti srefisrefi: „Luku . . . bun fa yu e waka, no leki sma di no abi frustan, ma leki koni sma, e bay na yoysti ten gi unu srefi, fu di den dey ogri. No de fu dati-ede moro langa onreydelek, ma tan si san na a wani fu Yehovah.” Wi kan si san na a wani fu Yehovah, soso efu wi e poti prakseri tapu en Wortu nanga yepi fu studi nanga wi srefi. Èn dati wani taki taki wi ’musu bay na yoysti ten’ ofu ’musu kobroyki wi ten so bun leki a kan’. — Efesiya sma 5:15-17; Phillips
9. Pe wi ben sa kan lasi ten di wi ben sa kan wini gi na studeri nanga wi srefi? Fruteri ondrofeni fu yu srefi.
9 Efu wi e ondrosuku den ala dey wroko fu wi di no de so prenspari, dan san wi e kon si fu fa wi e kobroyki wi fri ten? A de na fesi fu na telefisi? Na wrokosani disi, di kan hypnotiseer wan sma, kan fufuru ibri neti tu te srefi feyfi yuru puru na ini wi libi! Omeni yuru wan dey yu e kobroyki yu srefi fu luku telefisi? San den e pristeri furutron de pori sani fu di den e poti krakti a tapu tranga ogri-du nanga seks. Èn furutron a e poti na prakseri na tapu „na lostu fu na skin èn na lostu fu den ay èn a meki bigi nanga den sani di wan sma abi fu tan na libi” (1 Yohanes 2:15-17). Toku, furu sma e misi na krakti fu wani kiri na telefisi. Iya, na nyunten sani disi di sma kon feni kan swari na moro diri sani di wi abi, wi ten.
10. Fu san-ede a de so prenspari ini a ten disi taki wi e kobroyki wi ten na wan frustanfasi?
10 Efu wi de opregti nanga wi srefi, dan wi sa èrken taki a kan taki ten kan meki fri gi prenspari activiteit so leki beybri studi. Èn studi nanga en srefi, di e gi soyfri sabi, de prenspari gi wan kresten na ini den tumusi muylek ten disi. Toku, na ini a leti fu moro leki 41.000 sma di sluit uit a yari di psa, a de krin taki furu brada nanga sisa no ben sorgu na yeyefasi fu den bun. A tyari nanga ondrow fu „na heri fetisani fu Gado”, no de soso wan oefening fu wawan tron. Neleki fa a de nanga wan srudati di e tyari wan trutru fetisani, na so a de wan ala dey prekti. — Efesiya sma 6:10-18; Rome sma 1:28-32; 2 Timoteyus 3:1.
11. Sortu eksenpre na Bethelfamiri e gi ini na abi fu wan ten gi osofamiri studi?
11 Na a heri grontapu den moro leki 9000 memre fu den 95 Bethelfamiri fu den bijkantoro fu na Watch Tower Society abi den osofamiri beybristudi ibri mundeneti. Den e studeri Na Waktitoren leki wan sreka na tapu na konmakandra na a kba fu na wiki, èn furutron den abi so srefi tu ete wan beybri lezing ofu wan klas gi den moro nyun memre fu na famiri. Iya, munde de na a heri grontapu na studineti fu Bethelfamiri. Oten a de na ten fu studeri nanga yu srefi ofu nanga yu osofamiri? — Hebrew sma 10:24, 25.
Wrokosani èn fa fu kobroyki den
12. San na wantu fu den tumusi bun marki di na beybri studenti e feni na ini na Nyun-Grontapuvertaling fu den Santa Buku fu a beybri — nanga studiverwijzing?
12 Neleki wan mijnwrokoman abi en wrokosani, na so wi abi den wrokosani fu diki na ini na gowtumijn fu Gado Wortu. Luku fu eksenpre pikinso na Nyun-Grontapuvertaling fu den Santa Buku fu a beybri — nanga studi-verwijzing. Na a momenti disi den tyari en kon na doro na ini Doysritongo, Ingrisitongo, Fransitongo, Italiyantongo, Japantongo, Bakratongo, Potogisitongo èn Spanyorotongo. Moro furu fu den Kotoygi fu Yehovah abi so bun wan tumusi moy wrokosani fu kisi soyfri sabi fu na tru Gado. Na beybri uitgave disi abi dusundusun verwijstekst nanga heri ipi futuwortu. A abi so srefi wan appendix di e teri 36 bladzijde nanga finifini bodoy fu difrenti prenspari beybri aksi.b
13. Sortu moy tori e gi na ini a tori fu na kobroyki fu „sabi” èn „soyfri sabi” na ini den Hebrew Buku èn Griki Buku fu a beybri?
13 Na a bakasey na Studi-beybri abi wan index fu prenspari beybri wortu. Fa wi kan meki kobroyki fu dati? Efu yu suku den wortu „soyfri sabi” na ini a di fu yu, dan yu e feni na ini na index dati 12 tekst di den skrifi. Ma no wan fu den de na ini den Hebrew Buku fu a beybri. Dati wani taki taki den Hebrew Buku fu a beybri no e poti krakti tapu na fanowdu fu so wan sabi? Nono. Bikasi na ondro na wortu „sabi” 24 verwijzing de, pe yu abi na ini 18 fu den Hebrew Buku fu a beybri. Ma na Hebrewtongo no abi wan spesrutu wortu gi „soyfri sabi”. So leki fa yu sa si nanga yepi fu den verwijzing, dan sontron den e poti krakti tapu na fanowdu fu moro leki frafra sabi na ini na Hebrewtongo fu di den e tay „sabi” nanga wortu so leki „koni fu man fu si fa fu du sani” nanga „inzicht” ofu fu di den e taki fu sabi di de „psa marki”. — Danièl 1:4; 12:4; Yeremiya 3:15.
14. Sortu moy penti sma e feni ondro „sabi” na ini Yepi fu frustan na beybri? (Bakratongo)
14 So leki wi ben leri na ini na artikel a fesi, dan a Grikitongo fu a beybri ben tyari wan finifini difrenti a mindri den tu sortu sabi kon abra. Èn ala di wi e diki, wi wani sabi moro fu na difrenti a mindri den tu wortu disi so leki den abi fu du nanga kresten. Fu san-ede sabi, gno’sis, nanga soyfri sabi, e.pi.gno’sis, de fanowdu gi kresten? Pe wi kan feni na piki? Na ini na beybri encyclopedie Hulp tot begrip van de bijbel (Yepi fu frustan na beybri Bakratongo). Fa den pisi disi de leki wan kamra nanga gudu! Suku na trefwortu „sabi”. Yu e feni drape wan heri artikel fu den wortu di wi e taki fu den èn den eygifasi koni, frustan, a koni fu man fu si fa fu du sani èn krakti fu denki di abi fu du nanga sabi. Èn ala na „gowtu” disi, ala den tori disi, wi feni fu di wi kobroyki soso wantu studi-yepisani! Ma moro de ete. — Psalm 19:9, 10.
15. Sortu tra wrokosani fu ondrosuku sani wi abi, èn fa sma kan kobroyki den?
15 Efu yu ben sa wani meki wan moro dipi studi fu „sabi” èn den wortu di abi fu du nanga dati, dan yu ben sa kan meki kobroyki fu den index fu Waktitoren-publikâsi di de fu kisi na ini wantu tongo. Èn neleki fa wi ondrosuku na wortu sabi, na so yu kan waka na baka na srefi fasi fu ondrosuku sani gi hondrohondro tra tori. Prakseri na gudu fu bodoy pikinso di yu sa feni na ondro na nen Yehovah! Èn fa abi soyfri sabi psa marki de fu kisi fu na Soeverein Masra fu na universum! — Psalm 68:19, 20; Tori fu den Apostru 4:24.
16. San den Buku fu a beybri e taki fu na wortu suku?
16 Fa wi kan feni tumusi moy „gudu di kibri” nanga yepi fu den studi-yepisani disi èn trawan, di na Watch Tower Bible and Tract Society ben tyari kon na doro! Yu wani na „gowtu”? Yu denki taki a warti na muyti? Yu sa meki ten fri fu diki fu feni en? — Odo 2:1-5.
Suma e teki fesi ini a diki na yeyefasi?
17. San wi musu du fu kisi sabi fu Gado nanga Krestes?
17 San na a sroto fu kisi na diri sabi disi fu Gado nanga Krestes? Buweygi fu ati — wan tranga angri fu abi wan bun posisi na fesi fu Yehovah nanga en Manpikin èn a lostu fu kisi na presenti fu têgo libi. Yeyses ben taki en na a fasi disi: „Tan aksi, èn den sa gi yu; tan suku èn yu sa feni; tan naki doro, èn den sa opo gi yu. Bika ala sma di e aksi, e kisi, èn ala sma di e suku, e feni, èn ala sma di e naki doro, den sa opo gi.” Ma luku na kondisi pikinso. Yeyses ben taki: ’Tan aksi, suku èn naki doro.’ A no de wan afersi fu soso wan leysi. A suku fu sabi musu tan go doro. — Mateyus 5:6; 7:7, 8.
18. Suma musu teki fesi na ini wan osofamiri ini na suku fu soyfri sabi, èn fu san-ede?
18 Suma musu teki fesi na ini wan kresten osofamiri na ini na diki fu feni soyfri sabi? Paulus e piki: „Unu ppa, no tergi unu pikin, ma tan kweki den na ini na tranga leri nanga seryusu frumane fu Yehovah.” Iya, ppa nanga mma, spesrutu na ppa, musu teki fesi na ini na sori fu warderi gi yeye waarde. Èn disi e memre wi baka fu a fanowdu fu wan fasti seti, so taki na osofamiri kan fruwakti na studiten èn kan luku go na dati. — Efesiya sma 6:4.
19. Fa osofamiri studiten kan meki tron wan moy sani? San na ondrofeni de na ini yu osofamiri?
19 Osofamiri studi kan meki kon tron wan moy sani. Fu eksenpre, efu yu abi pikin, fu san-ede yu no e meki den teki wan tori èn dan gi den akruderi den libi yari nanga a man di den man du sani, na wroko fu ondrosuku den tori dati na ini difrenti publikâsi. Dan kon makandra baka so wan afu yuru èn luku san ibriwan feni fu na tori di den ben kisi fu ondrosuku. Efu wan concordantie de, dan wan yongu pikin ben sa kan teri omeni leysi wan bepaalde wortu e kon na ini den Hebrew Buku fu a beybri èn den Griki Buku fu a beybri. Kande wan moro bigi pikin kan suku wantu moy penti na ini na Hulp-buku (Yepi-buku bakratongo). Ppa nanga mma sabi san den pikin fu den man èn, a man di den man fu poti prakseri tapu sani èn musu bow den studiten nanga den sani disi na prakseri. Fiti yu srefi na den èn sori warderi gi san den e du. Gi yu osofamiri deki-ati na ini na yeye diki wroko fu den — èn abi na yoysti buweygi fu ati.
Diki nanga na yoysti buweygi fu ati
20. Gi sortu buweygi fu ati wi musu kibri wi srefi na ini wi studi nanga wi srefi?
20 Bescheidenfasi na wan bun kresten fasi (Odo 11:2; 1 Timoteyus 2:9). Wi musu studi dan fu meki bigi nanga san wi kon sabi? Ofu wi musu ’sori na publiki’ san wi sabi èn kande sori taki trawan no sabi noti? Ofu wi musu tyari wi eygi denki kon a fesi ofu sani di wi e fruwakti taki a o de so? Paulus ben gi na ray: „Bikasi fu na no frudini bunfasi ede di den ben gi na mi, mi e taygi ibriwan a mindri unu, fu no prakseri moro fu en srefi leki de fanowdu, ma fu prakseri nanga gosontu frustan, ibri sma akruderi na marki fu bribi di Gado gi en.” — Romen 12:3.
21, 22. Fa soyfri sabi musu abi krakti na wi tapu?
21 Seryusu muyti èn na kobroyki fu soyfri sabi kan tyari bribi, bunfasi, dwengi yu srefi, horidoro, gi yu srefi ini na dini fu Gado, brada lobi èn lobi kon. Petrus ben sori na prensparifasi fu disi di a ben skrifi: „Bikasi efu den sani disi de na ini yu èn de psamarki, dan den sa tapu yu fu de sondro fu du wroko ofu sondro froktu ini a tori fu soyfri sabi fu wi Masra Yeyses Krestes.” — 2 Petrus 1:2-8.
22 Na sabi fu wi musu wroko na tapu na ati. A musu buweygi wi fu sori lobi gi Gado èn gi sma na wi sey èn fu tron kresten di e meki froktu na ini a fasi fa wi e tyari wi srefi èn na ini wi diniwroko. Disi sa abi leki bakapisi wánfasi èn na frustan moro krin fu na eksenpre fu Krestes (Efesiya sma 4:13). Fa dati de wan moy payman gi na suku fu gudu di kibri!
[Futuwortu]
a A de wan moy sani fu si taki den wortu „na sabi fu Gado” na ini Odo 2:5 poti abra na ini na Griki Septuaginta nanga e.pi.gno’sis, ofu „soyfri sabi”, wan fu den ayti leysi di na Griki wortu dati e kobroyki na ini na Septuaginta.
b Fu kisi wan fini fruklari fu na fasi fa fu kan nyan moro bun fu na Studibeybri, luku Na Waktitoren fu 1 november 1988 (Bakratongo), blz. 10-14.
Aksi fu prakseri fu en
◻ San de so leki fa Kownu Salomo taki moro warti leki gudu di kibri?
◻ Fu san-ede soyfri sabi de fu bigi belang gi den salfuwan èn gi den tra skapu?
◻ Fa wi kan bay na ten kon fri gi studi nanga wi srefi?
◻ Sortu spesrutu wrokosani wi abi fu diki fu feni soyfri sabi?
◻ Suma musu teki fesi na ini na osofamiri studi, èn nanga sortu buweygi fu ati wi musu studeri?