Fu san-ede a de fanowdu fu abi soyfri sabi
„Na fu dati-ede tu, fu sensi na dey di wi ben yere fu en, wi no tapu fu begi gi unu èn fu aksi taki unu mag kon furu nanga na soyfri sabi fu en wani na ini ala koni nanga na frustan fu sani na yeyefasi.” — KOLOSE SMA 1:9.
1. Gi wan eksenpre fu na difrenti a mindri frafra èn soyfri sabi?
PIKINSOMORO ibri sma sabi san na wan oloysi, ma omeni sabi fa a e wroko? Yu abi kande wan frafra ideya fu en, ma yu ben sa man fu lusu wan oloysi na pisipisi, fu repareer en èn fu seti en baka? Wan man di e meki oloysi seyker kan du dati. Fu san-ede? Fu di a abi wan soyfri èn bradi sabi fu fa wan oloysi e wroko. Èn dati e sori na difrenti a mindri wan frafra nanga soyfri sabi fu wan tori.
2. Sortu difrenti a mindri ala den tu sortu sabi yu ben si tapu na kontren fu relisi?
2 Milyunmilyun sma abi wan frafra ideya fu Gado. Den e taki taki den e bribi ini Gado, ala di den du fu den nofotron e sori taki san den e taki no de so. Wan zendeling ben aksi sontron wan ososma: „Leki wan katolik sma yu musu fu e bribi na ini Gado, a no so?” Èn dan a piki ben de, nanga wan anu buweygi go na heymel: „Iya, mi e bribi taki wan sani musu fu de drape na tapusey.” Yu ben sa kari dati soyfri sabi, èn wan frustan fu sani fu Gado? Pikinmoro no. Èn furutron a bakapisi fu so wan frafra bribi de taki a libi nanga waka fu den sma dati, di taki den de kresten, no de wan krestenwan. (Teki gersi Titus 1:16.) A situwâsi di de na bakapisi fu disi de so leki Paulus ben skrifi: „Neleki fa den no ben feni en bun fu hori fasti na wan soyfri sabi fu Gado, na so Gado gi den abra na wan yeye toestand di no bun.” — Rome sma 1:28.
3. San de na bakapisi te sma e poti soyfri sabi fu Gado wani na wan sey?
3 San ben de na bakapisi fu a mankeri dati fu soyfri sabi ini na fosi yarihondro? Sma ben e du „den sani . . . di no ben fiti, ala di den ben furu nanga ala no-regtfardikifasi, godelowsufasi, bigi-ay, takrudu, furu nanga dyarusu, kiri, trobi, bidrigifasi, ogri-atifasi, ala di na wan kibrifasi den e fruteri ogri fu trawan, konkruman, sma di no wani si Gado na ay, sondro syen, nanga heymemre, asranti, sma di e feni nyun ogri fu du, no e gi yesi na ppa nanga mma, sondro frustan, no e hori den srefi na kruderi, sondro natuurlek firi fu lobi, sondro sari-atifasi”. A mankeri di den mankeri soyfri sabi ben wani taki taki na ati fu den no ben buweygi den fu handri regtfardiki. — Rome sma 1:28-31; Odo 2:2, 10.
San na a difrenti?
4, 5. San na wantu difrenti a mindri gno’sis nanga e.pi.gno’sis so leki fa koniman fu na Grikitongo e taki?
4 Taki wan difrenti de a mindri frafra nanga soyfri sabi, e kon na krin na ini den Griki buku fu a beybri. Na Grikitongo di ben de biginbigin ben taki fu gno’sis, sabi, èn e.pi.gno’sis, soyfri sabi. Na fosi wortu, leki fa na sabiman fu Grikitongo W. E. Vine e taki, wani taki „na a fosi presi wan pruberi fu kon sabi sani, aksi fu kon sabi sani, na ondrosuku fu sani finifini”, spesrutu fu yeye waarheid ini na kontekst fu den buku fu beybri.
5 E.pi.gno’sis, leki fa na tongosabiman Thayer e taki, wani taki „soyfri nanga yoysti sabi”. Èn na werkwortu di abi fu du nanga disi wani taki „kon de bekenti dorodoro nanga, sabi dorodoro; sabi soyfri, sabi bun”. W. E. Vine e fruklari taki e.pi.gno’sis „e sori tapu soyfri sabi ofu sabi krinkrin, na koni fu si sani, herken wan sani”. A e sori morofara tapu „sabi wan sani moro krin ofu sabi krinkrin, na sabiman e teki prati moro bigi na na tori di a kon sabi, èn di na so wan fasi e wroko moro krakti na en tapu”. (Wi e skrifi skoynsi.) So leki wi sa si, dan den lasti wortu disi de fu tumusi bigi belang gi wan kresten.
6. Sortu beybri skrifiman e kobroyki den wortu gi „sabi” nanga „soyfri sabi” èn fu san-ede soyfri sabi de prenspari?
6 Soso tu beybri skrifiman e kobroyki na Griki wortu e.pi.gno’sis. Dati na Paulus nanga Petrus, di e kobroyki na wortu ala nanga ala 20 tron.a Boyti Lukas, dan den de so srefi tu den wan enkriwan di e kobroyki na wortu gno’sis, Paulus e kobroyki en 23 tron èn Petrus 4 tron. Den buku fu den de fu dati-ede tu wan warti tyariman ini a tori fu na prensparifasi fu soyfri sabi nanga wi frulusu na prakseri. Paulus ben skrifi Timoteyus fu dati: „Disi de tumusi bun èn prisiri ini na ay fu wi Frulusuman, Gado, di wani taki ala sortu fu sma kisi frulusu èn kon kisi wan soyfri sabi fu na waarheid.” — 1 Timoteyus 2:3, 4.
Fu san-ede soyfri sabi de prenspari
7. (a) Efu sabi wani abi waarde dan fa sabi musu abi krakti na wi tapu? (b) Sortu kofar de efu wi libi sabi na wan sey?
7 A kisi fu soyfri sabi fu na waarheid so leki den e gi leri fu disi na ini na beybri, de fu dati-ede wan sroto fu kisi frulusu. Ma na sabi dati musu doro na ati, na presi fu den buweygi fu na ati. Na stuka no mag de soso wan wroko fu na frustan ofu wan teyoretis sani. Boyti fu dati te wan sma kisi sabi fu na waarheid kba, dan a musu kobroyki en èn poti san mankeri a tapu dati. Fu san-ede dati de so? Fu di na memre de neleki wan ttey fu a skin di te a no kobroyki kan kon swaki èn malengri, èn na ini so wan kofal makriki a kan, taki wi libi wi yeyefasi na wan sey èn e bigin fu drifi gwe èn fu degedege na ini wi bribi. Wi ben sa kan meki na hori di wi hori „na sabi fu Gado” kon slap. Na degedege disi heri esi kan go sori en srefi ini wan lesi fasi fu denki èn ini waka nanga libi di no de wan krestenwan. — Odo 2:5; Hebrew sma 2:1.
8. Sortu waarde Salomo ben si na ini koni nanga sabi?
8 Wi kan frustan so srefi heri bun fu san-ede Salomo, di a ben de kotrow ete, ben si koni, a koni fu man fu si fa fu du sani, èn na krakti fu denki hey. A ben skrifi: „Te koni e kon na ini yu ati èn na sabi srefi e kon de switi gi yu sili, dan krakti fu denki srefi sa hori wakti tapu yu, èn na koni fu man fu si fa fu du sani srefi sa kibri yu, fu frulusu yu fu na takru pasi”b (Odo 2:10-12). Den wortu disi wani taki taki wi musu kweki wan tranga angri gi soyfri sabi, di kan abi krakti tapu na ati, iya tapu wi sili. Boyti fu dati, a de wan fondamenti gi wan bun krakti fu denki. Èn fu san-ede disi de so prenspari ini a ten disi?
9. Suma na wantu feyanti fu na kresten yeyefasi?
9 Wi e libi na ini „den lasti dey”, so leki fa Paulus ben taki a fesi, taki „ten fu spanning” ofu „wan ten fu muylekhèyt” ben sa kon (2 Timoteyus 3:1, Revised Standard Version; The New English Bible). A e kon muylek moro nanga moro fu kibri wi kresten soyfri-retifasi na ini na pori grontapu disi. Sma e spotu èn e wisiwasi kresten bun maniri, waarde nanga markitiki. Fu ala sey sma e opo kon feti nanga na bribi fu Yehovah Kotoygi — fu na sey fu kerki fesiman fu na krestenhèyt di no lobi na Kownukondre boskopu srefisrefi di wi e tyari go oso-fu-oso, fu na sey fu sma di fadon komoto fu bribi èn di e wroko makandra nanga den kerki fesiman fu na krestenhèyt, fu na sey fu den bigiman fu gosontu-afersi di nanga tranga wani gi wi nanga wi pikin brudu transfusi, fu na sey fu atheïst koniman di e poti na bribi ini Gado èn ini na meki di a meki sani na wan sey èn fu na sey fu den di e pruberi fu dwengi wi fu broko na neutraliteit fu wi. Satan, na tiriman fu dungru èn donfasi, na feyanti fu soyfri sabi, e seti ala den gens disi. — 2 Korente sma 4:3-6; Efesiya sma 4:17, 18; 6:11,12.
10. Sortu fasi fu druk wi kan go ondrofeni moro tranga, èn san wi abi fanowdu kontrari den?
10 Na ini na ala dey libi druk kan opo kon fu abi krakti tapu wan kresten fu a du san trawan e du, efu dati de now a kobroyki fu drugs, dringi psa marki, hurudu nanga tranga ogridu, fufuru, ley, bidrigifasi, libi skoro bifosi a yuru doro, ofu fu feti soso baka wan libi pe a e suku prisiri gi en srefi. Fu dati-ede meki soyfri sabi de so prenspari. Wan sabi fu sani moro krin fu Gado Wortu nanga prakseri kan wroko moro krakti tapu na denki nanga fasi fu handri fu na bun fu wi. — Rome sma 12:1, 2.
Wan disiten lasi manpikin
11, 12. Sortu tori di psa trutru e agersi na donfasi fu na poti na wan sey fu soyfri sabi?
11 Wi kan agersi disi nanga wan tori di psa trutru, fu wan yongu man di na a ten di a ben de so wan 14 yari èn ben de wan dopu kresten kba, ben kisi tesi tapu en lobi gi na waarheid. So leki a de nanga furu yongu sma a ben lobi sport, spesrutu futubal. Ma wan problema ben de. En skoro ben prey futubal tapu a srefi neti te na gemeente ben abi en konmakandra. En yeyefasi no ben tranga nofo fu meki a wegi go-kon na wan yoysti fasi na soso waarde fu futubal te yu teki en gersi nanga na waarde, di e tan, fu a fisiti fu kresten konmakandra nanga en weduwe mma, èn en moro yongu brada nanga sisa. A ben tapu so bun fu handri akruderi soyfri sabi èn ben teki na bosroyti fu gwe libi na waarheid. Te fu kba den ben sluit en uit. Bakaten a ben go na ini srudati wroko, pe a ben kon abi fu du nanga drug.
12 Ini 1986 baka di a yongu man disi ben komoto fu na legre, a ben kisi en srefi, èn a ben skrifi wan brifi gi wan mati fu na osofamiri di ben dini ini na krutu komte di ben sluit en uit. Ini a brifi a ben skrifi: „Mi prisiri fu kan fruteri yu prenspari nyunsu: Mi dray kon baka na a waarheid. . . . Mi kon frustan san na apostru Paulus ben taki na ini 2 Korente sma 4:4, taki wan gado de fu na seti fu sani disi di e breni na yeye. Wan langaten mi ben breni na yeyefasi gi den sani di ben psa lontu mi. Di mi ben gwe libi na waarheid, mi no ben sabi sortu tyans mi ben teki . Ma baka wan seyker ten èn tangi fu Yehovah mi go si krin taki mi ben fowtu na ini mi takru fasi fu du.” — Teki gersi Lukas 15:11-24.
13. San kan de na positief bakapisi gi son sma di fadon komoto na bribi, efu den abi trutru berow? (2 Timoteyus 2:24-26)
13 Na yongu man disi dray kon baka na a futupasi fu soyfri sabi. Now a man fu „waka na wan fasi di warti Yehovah, fu plisi en dorodoro”. So srefi a kan ’tan e gi froktu ini ibri bun wroko èn tan e gro ini soyfri sabi fu Gado’, ala di a e go doro fu de makandra nanga na kresten gemeente. Èn fa a tron wan blesi di e gi kowru-ati na en famiri, fu di a tron agen wan bakaman fu Yeyses! Yu sabi moro fu den sortu eksenpre disi? — Kolose sma 1:9, 10; Mateyus 11:28-30.
Sari bakapisi fu libi yeye sani na wan sey
14. (a) San wi musu du fu no fadon komoto na bribi? (b) San psa nanga son kresten?
14 Sortu leri wi kan kisi fu na tori disi nanga tra srefi sortu tori? Disi, taki te wi kisi wan soyfri sabi fu na waarheid kba, dan doronomo wi musu meki den yeye ’edetonton circuit’ kon nyun baka fu no drifi gwe. Den yeye fonten fu wi kan go na baka efu wi libi en a wan sey fu stuka nanga wi srefi nanga wi osofamiri, fu go na kresten konmakandra nanga ini na diniwroko. San kan psa dan? Wan kresten di ben tranga wan dey kan drifi komoto fu bribi, kande fadon srefi go na ini fowtu fasi fu tyari en srefi, so leki hurudu, ofu kan bigin fu grati go na ondro psa na grati skoynsi platasey fu tweyfri èn fowtu bodoy èn te fu kba tron wan sma di fadon komoto na bribi (Hebrew sma 2:1; 3:12; 6:11, 12). Ini na lawfasi fu den, son sma dray srefi go baka na den Babilon leri fu na Driwanfasi èn taki na sili no kan dede!
15. Sortu warskow Petrus ben gi ini a tori fu a fadon komoto fu na bribi?
15 Den wortu fu Petrus seyker fiti: „Efu, baka di nanga yepi fu wan soyfri sabi fu Masra nanga na Yepiman Yeyses Krestes, den lon komoto fu na doti-libi fu na grontapu, èn dan toku den kon abi fu du baka nanga den srefi sani disi di wini den, dan den lasti situwâsi seyker kon moro ogri gi den leki den fosiwan. Bikasi a ben sa de moro betre gi den fu no ben kon sabi soyfri na futupasi fu regtfardikifasi, leki baka di den kon sabi en soyfri den dray komoto fu na santa komando di ben gi na den. San na tru odo e taki psa nanga den: ’Na dagu dray go baka na en eygi piyo, èn na mma-agu di ben wasi go lolo ini a tokotoko.’” — 2 Petrus 2:20-22.
16. (a) Fa den ben kori son sma na ini den ten di no psa so langa ete? (b) Na ini sortu du den wan di den ben kori fadon go?
16 Den wan di e poti wan soyfri sabi fu na waarheid na wan sey, e teki furutron na pasi di abi moro mendri problema. Den no e teki moro langa na frantiwortu fu fisiti doronomo den kresten konmakandra ofu fu teki prati na a oso-fu-oso-diniwroko. Sonwan e go smoko srefi baka! Trawan e prisiri taki den no abi fu de moro langa trafasi ini na afersi fu kresten neutraliteit èn a fowtu kobroyki fu brudu. O, fa dati de wan fri! Now den kan stèm srefi tapu wan fu den politik partèy fu na „ogri meti” (Openbaring 13:1, 7). Na so den sma di e ’pramisi den fri, ala di den srefi de srafu fu na pori’ ben bidrigi èn kori son sma leki sili di no de stanfaste, komoto fu na reti pasi fu soyfri sabi. — 2 Petrus 2:15-19.
17. Sortu kofar de gi den wan di e poti soyfri sabi fu na waarheid a wan sey?
17 Efu den sortu sma dati no abi berow èn no dray kon baka na a waarheid, dan den e poti den srefi gi na krutu di Paulus ben tyari kon na krin: „Bikasi efu wi e du sondu fu espresi baka di wi kisi na soyfri sabi fu na waarheid, dan no wan srakti-ofrandi no e tan abra moro gi sondu, ma wan seyker takru fruwakti fu krutu e de èn wan faya dyarusu e de di sa pori den gensman.” Fa a de wan don sani èn wan denki di no bradi, fu libi na soyfri sabi fu Yehovah Gado nanga Yeyses Krestes èn teki na leri fu na krestenhèyt di no e kruderi nanga a tru bribi! — Hebrew sma 6:4-6; 10:26, 27.
Faya fu du sani nanga soyfri sabi
18. So leki fa Paulus e taki, dan fu san-ede den dyu kerki fesiman ben misi fu teki Krestes?
18 Den dyu kerki fesiman fu Paulus dey seyker ben abi sabi fu den Hebrew Buku fu a beybri. Ma a ben de soyfri sabi? A ben hari den kon na Krestes leki na pramisi Mesiyas? Paulus ben gi buweysi fu sori taki den ben seti den srefi na so wan fasi nanga yepi fu na Wèti fu poti den eygi regtfardikifasi steyfi, èn taki den no ben wani saka den srefi na „Krestes ondro [di de] na kba fu na Wèti”. Fu dati-ede Paulus ben kan taki fu den: „Bika mi e kotoygi fu den taki den abi faya fu du wroko gi Gado, ma no akruderi soyfri sabi.” — Romen 10:1-4.
19, 20. (a) Fa wi kan kisi soyfri sabi? (b) Sortu aksi musu kisi piki ete?
19 So bun fa wi kan kisi na soyfri sabi disi? Nanga yepi fu stuka nanga wi srefi èn go denki dipi fu sani, nanga begi èn a fisiti fu konmakandra. Disi wani taki te yu luku en bun taki wi e span den yeye batterij fu wi doronomo. Wi no kan gi wi srefi pasi fu bow soso tapu na sabi di wi ben kisi na a bigin di wi ben teki na waarheid. Ala ten baka, wi musu teki tranga yeye nnyan na ini wi nanga yepi fu stuka nanga wi srefi nanga wi heri konsensi. Fu dati-ede Paulus ray fiti: „Tranga nnyan de . . . gi lepi sma, gi den di nanga na kobroyki fu na koni fu man si sani gaw ben oefen fu si bun nanga ogri. Fu dati-ede, now di wi libi na fondamenti leri di e go fu Krestes na wi baka, meki wi go moro fara fu kon lepi, sondro fu poti agen wan fondamenti, namku, berow fu dede wroko, èn bribi na ini Gado . . . Èn disi wi sa du, efu Gado so srefi gi pasi fu dati.” — Hebrew sma 5:14–6:3.
20 Den aksi di e kon now, de: Sortu wrokosani wi abi fu yepi wi fu kisi soyfri sabi? Èn, nanga wi druk libi na ini prakseri, oten wi kan stuka Gado Wortu? Na tra artikel sa luku den afersi disi nanga trawan di abi fu du nanga dati.
[Futuwortu]
a So leki skrifi na ini na Comprehensive Concordance of the New World Translation of the Holy Scriptures, blz. 17; so srefi Filémon 6. (Luku The Kingdom Interlinear Translation of the Greek Scriptures.)
b Fu frustan moro betre den difrenti sani di den wortu „sabi”, „krakti fu denki”, „koni” èn tra wortu ete di de fu feni na ini Odo wani taki, luku Yepi fu frustan na beybri (Bakratongo), blz. 272, 853, di na Watchtower Bible and Tract Society of New York, Inc. ben tyari kon a doro.
Aksi fu gi piki
◻ San na a difrenti na mindri „sabi” èn „soyfri sabi”?
◻ Fu san-ede soyfri sabi de so prenspari ini den lasti dey disi?
◻ Fa son sma ben sa kisi kori fu fadon komoto fu na waarheid?
◻ Sortu warskow Petrus e gi wi ini a tori fu a poti na wan sey fu soyfri sabi?
◻ San wi musu du fu kisi soyfri sabi èn fu hori en?