Vrede — A sa kon nanga a puru fu fetisani?
„A DE A moro bigi fowtu fu bruya a puru fu fetisani nanga vrede”, Winston Churchill ben taki feyfi yari bifo den nâsi ben trowe den srefi go na ini na Di fu Tu Grontapufeti. „Te yu abi vrede, dan sma sa puru fetisani”, a ben taki moro fara.
Fa disi de wan sani di gersi leki a no e klop! Suma sa wani teki na risiko fu puru fetisani bifo vrede de wan seyker sani? Ma fa trutru vrede sa de efu den maksin furu nanga fetisani? A de wan situwâsi di politikman noyti feni wan lusu fu en.
Winston Churchill ben taki den wortu fu en na ini 1934, baka di na konmakandra fu Puru fetisani, di na Folkubontu ben kari kon makandra, ben kon na wan kba tu yari a fesi. Na konmakandra disi, di a sreka fu en ben teki 12 yari, ben abi leki marki fu tapu Europa fu go meki fetisani gi en srefi baka. Alape na grontapu den sma ben memre bunbun ete na takru-ati srakti fu so wan neygi milyun srudati na ini na Fosi Grontapufeti, fu no taki srefi fu den furu milyun sma di ben kisi mankeri èn na bigi nomru borgru di ben dede. Toku na puru fu fetisani noyti ben kon tru. Fu san-ede?
Muyti fu puru fetisani
Wan politik fu puru fetisani kan poti leki wan sani di musu, ma pikinmoro noyti a e wroko bun. Fu eksenpre, ondro na kruderi fu Versaille ini 1919 den ben puru fetisani na ini Doysrikondre ondro na bepaling taki „bun dyaranti ben musu gi èn ben musu kisi, taki na meki fu fetisani gi na nâsi musu tyari go te na a moro lagi punt di e kruderi nanga na nationaal tanbun”. Disi ben kruderi nanga wan fu den prakseri fu na Amerkan presidenti Woodrow Wilson, wan prakseri di bakaten ben poti na ini artikel 8 fu na kruderi fu na Folkubontu. Ma di Hitler ben kon na makti, a no ben abi bisi nanga na politik dati.
Den Verenigde Nâsi ben meki sani waka moro bun fu poti wan bun fondamenti fu na puru fu fetisani baka na Di fu Tu Grontapufeti? Nôno, ma taki sani no ben waka bun no ben kon fu na mankeri fu muyti di du nanga wan fasti bosroyti. Ma now di kern-fetisani de nanga wan krakti fu pori ipi-ipi sani, dan a puru fu fetisani ben tron wan afersi di ben de tranga fanowdu. „Na fositen prakseri taki den streylon fu kisi moro fetisani no ben de wan bun sani na ekonomiya sey èn ben tyari feti kon nomonomo,” na so The New Encyclopaedia Britannica ben taki „go na wan sey gi na prakseri taki na kobroyki fu bun furu kernfetisani ini na ten di e kon de wan kofar srefi gi na libisma libimakandra.”
Na ini 1952 den poti wan komte fu Puru Fetisani pe twarfu kondre ben teki prati na en, fu stòp na Owstu-West-streylon fu kisi moro fetisani. A no ben tyari bun bakapisi kon èn te fu kba den tu bigi makti ben meki a difrenti na ini den kanpu fu den di ben de abra sey fu makandra kon moro bigi. Te nanga a dey fu tide dan difrenti tra kruderi nanga frubontu ben meki. Toku na klimaat fu no frutrow makandra no e gi pasi fu puru ala fetisani krinkrin, na so The New Encyclopaedia Britannica e taki, wan denki „di denkiman di e si ala sani leki wan moy dren feni bun”.
Teri den kostu
Puru fetisani ofu no puru fetisani — sortu kostu de ini na tori? Kostu a no alaten yu kan teri ini moni. Okasi fu wroko na ini fabriki di abi fu du nanga na meki fu fetisani de so srefi wan tumusi prenspari sani. Na ini furu kondre den e kobroyki belastingmoni fu bay fetisani, di a meki fu den e meki okasi fu wroko kon moro. Fu puru fetisani so bun kan meki sma de sondro wroko. Fu dati-ede meki kondre di poti furu moni gi na defensie fu na kondre e beyfi na a prakseri fu puru ala fetisani. So wan prakseri de wan takru dren gi den na presi fu wan tumusi moy dren di noyti sa kon tru.
Toku unu no kan luku psa den bun furu moni di e meki den fetimasyin e dray. Leki fa den schat dan 10 procent fu na waarde fu ala sani di e meki na grontapu, e go na fetisani. Omeni dati de? Den trutru cijfer e difrenti leki wan bakapisi fu a kon moro diri fu sani, ma go prakseri pikinso taki na a fasi disi ibri miniti fu na dey Sƒ 3.265.000 e lasi gwe! Sortu sani ben sa kon na a fosi presi na yu efu yu ben abi someni moni ini yu anu? Na puru fu angriten? Sorgu fu a gosontu fu sma? Na tanbun fu pikin-nengre? Fu meki na ekologiya kon bun baka? Someni sani de di ben kan du ete!
Teki fu eksenpre na ’tank e tron traktor’ programa di U.S.S.R. ben bariwroko fu en no so langa psa kba, pe son fetisani fabriki kenki kon tron fabriki fu meki 200 „moro nyun wrokosani gi na agro-industriëel sector”. Fu san-ede sowan tranga fanowdu de gi pranigron masyin? Fu di, leki fa na Ingrisi Farming News taki, dan „soso wan di fu dri pisi fu den froktu nanga den gruntu di e prani tapu den gron fu lanti e doro na den bayman èn na tra pisi e tan pori tapu den gron ofu e lasi gwe na ini presi pe den e poti den tapu makandra èn pe den e kibri den!”
O moy a mag de tu fu meki traktor na presi fu tank, a de soso fesiseyblad nyunsu fu di a de so wan ongewoon sani. Boyti fu dati, na krakti fu en tapu ala den fetisani di e meki de wan sani di no abi waarde. Te now ete furu hondrohondro pontu, rubel, dollar, e tan gi fu meki fetisani na ini wan grontapu pe „libisma kon weri fu frede nanga fruwakti fu den sani di o kon tapu a grontapu pe libisma e libi”, so leki Yeyses ben taki na fesi. Fa so wan frede kan puru a pasi? Na puru fu ala fetisani sa tan soso wan dren? Efu dati no de so, san de dan fanowdu fu meki disi psa? — Lukas 21:26.