Ala troe kristensma moe de bedinari?
„Ala sani e kon foe Gado di ben verzoen oenoe nanga en nanga jepi foe Kristus èn ben gi oenoe na diniwroko foe na verzoening.” — 2 KORINTESMA 5:18.
1. Na ini a ten foe Paulus wan klasse foe kerkileriman ben de na ini na gemeente?
„WAN difrenti no ben de a mindri kerkileriman èn kerkisma [na ini a ten foe na apostel Paulus] bikasi kerkileriman no ben de.” Den verwondroe wortoe disi, di ben tanapoe ini na koranti Times foe Londen, e ferteri wan fundamenti waarheid foe na fosten kristendom. Wan difrenti no ben de na mindri kerkileriman èn kerkisma. Disi wani taki dati na ini na kristen gemeente sma no ben de di e teki fesi? Èn bedinari no ben de na no wan fasi ooktoe?
2. Sortoe tiri ben de na ini na fosi gemeente? (Filipisma 1:1)
2 Wan pisten baka pinksteren na ini 33 G.T., di moromoro na nomroe foe salfoe kristen ben kon gro nanga doesoendoesoen, na fanowdoe ben kon foe poti na ini ibri gemeente bekwaam man di ben sa dini leki opziener nanga dinari na ini na diniwroko. Ma den no ben de wan klasse foe kerkileriman. A poti foe den na ini na wroko no ben anga foe wan leri di den ben kisi na wan universiteit noso seminarie. Den no ben kisi wan paiman foe den dienst foe den. Den ben de sakafasi man di ben abi jeje égifasi, èn di santa jeje ben poti foe sorgoe gi na ipi. Ma den ben de den enkri wan di ben e préki na ’boen njoensoe foe na kownoekondre’? Den ben de den enkri bedinari a ini na gemeente? — Matt. 24:14; Tori foe den Apostel 20:17, 28; 1 Petrus 5:1-3; 1 Timotéus 3:1-10.
3, 4. Leki fa Paulus taki dan soema ben abi wan prati na a kristen diniwroko?
3 Den aksi disi e kisi wan piki nanga na rai foe Paulus ini en brifi na den kristen ini Korinte. Loekoe pikinso na den bigin wortoe foe en tweede brifi: „Paulus, . . . gi na gemeente foe Gado di de na Korinte, èn ooktoe na ala santa wan di de na ini Achaje.” No wan degedege de ini a tori — a ben skrifi gi na heri skin foe salfoe kristen ini Korinte nanga Achaje, no soso den sma di ben teki fesi. San a ben taki foe na kristen diniwroko, de foe dat’ede krinkrin tapoe „ala santawan”. Tapoe na fundamenti foe en égi wroko èn di foe Timotéus a ben redeneer: „Foe di wi abi na diniwroko disi akroederi na sari-ati di [Gado] ben sori wi meki wi no e lasi ati.” „Ma ala sani e kon foe Gado, di ben verzoen oenoe nanga en nanga jepi foe Kristus èn ben gi wi na diniwroko foe na verzoening . . . wi de foe dat’ede boskopoeman di e doe wroko na ini na presi foe Kristus, neleki nanga wi Gado e gi wan tranga kari.” A e go moro fara: „Na no wan fasi wi e gi wan réde foe naki foetoe fadon, sodati fowtoe no sa kan feni na tapoe wi diniwroko, ma na ibri fasi wi e rikomanderi oensrefi leki Gado dinari: nanga a ferdrage foe foeroe sani.” — 2 Korintesma 1:1; 4:1; 5:18-20; 6:3, 4.
4 Na ini den wortoe disi e kon na fesi dati ibri salfoe kristen moe de wan bedinari nanga wan boskopoeman foe Kristus. Foe sortoe réde ede? Foe di na grontapoe foe na sondoe foe en ede „kon de leki wan vreemde sma foe na libi di de foe Gado”, èn abi wan diniwroko foe verzoening fanowdoe, sodati loyaal sma foe ala naatsi di e gi jesi nanga jepi foe Kristus kan kon na ini wan boen matifasi nanga na Soeverein Masra Jehovah. — Efesesma 4:18; Romeinisma 5:1, 2.
5, 6. Fa Paulus bensori na ini en brifi gi den Romeini dati na fasi disi foe si sani ben de joisti?
5 Gi na gemeente ini Rome Paulus ben skrifi: „Ma san a e taki [a Wortoe foe Gado]? ’A wortoe de krosbé foe joe, na ini oen égi mofo èn ini oen égi ati’, a ’wortoe’ foe bribi, san wi e préki. Bika efoe joe ferteri a fesi foe alasma a ’wortoe dati di de ini joe égi mofo’, dati Jezus de Masra, èn sori bribi na ini joe ati dati Gado ben wiki en na. dede, joe sa kisi jepi. Bika nanga a ati wan sma e sori bribi foe kisi regtvaardikifasi, ma nanga na mofo wan sma e taki na fesi foe ala sma foe kisi jepi.” — Romeini 10:8-10.
6 Paulus ben taki den wortoe disi gi wan pikin groepoe sma di den ben teki poeroe? Na ini den fosi wortoe foe en e kon na krin dati disi no de so, bika a ben skrifi: „Gi ala sma di de na Rome leki den lobiwan foe Gado.” Èn a taki moro fara: „Mi e gi tangi na mi Gado nanga jepi foe Jezus Kristus ini a tori foe oenoe ala mala, foe di na a heri grontapoe den e taki foe oen bribi.” A de krin dati Paulus ben gi en rai nanga dek’ati na a heri gemeente, disi de so toe ini kapitel 10. Na grani foe ferteri fesi foe ala sma, ben de wan sani di ben opo gi ala sma. A ben poti srefi krakti na en bewijsi di a ben taki: „Ma fa den sa kari en na ini soema den no ben poti bribi? Dan fa den sa poti bribi ini en foe soema den no ben jere? Dan fa den sa jere sondro dati wan sma préki? Dan fa den sa préki efoe den no ben seni den go? Soleki skrifi: ’O switi den foetoe de foe den sma di e meki boen njoensoe bekenti foe boen sani.’” — Romeini 1:7, 8; 10:14, 15.
7. Na ini san na troe kristendom kenki foe tra fasi foe anbegi? (Lukas 19:36-40)
7 Disi na wan sani di e gi dek’ati srefsrefi na ibri salfoe krlsten! A wani taki den alamala moe firi switi foe na prisiri foe tjari na kownoekondre boskopoe foe jepi tra sma. Ija, na ini na ai foe Gado den foetoe foe den na agersifasi moe tan èn moe de „switi”. Foe san-ede? Foe di na troe kristendom no de wan fasi foe bribi pe wan sma e prakseri ensrefi wawan èn di e tjari wan sma foe go de tevréde nanga ensrefi nomo, ofoe poti ensrefi na wan sé èn gi pramisi foe tan tiri. Na presi foe dati, na troe kristendom e meki wan faja kristen diniwroko kon di e sori ensrefi na ini wortoe nanga doe! Dati Paulus ben ferstan dati boen srefsrefi, e kon na krin na ini san a bari taki: „Foe troe, heloe foe mi efoe mi no ben sa meki na boen njoensoe bekenti!” — 1 Korintesma 9:16; Jesaja 52:7.
8. Sortoe prenspari aksi abi foe doe nanga foeroe sma na ini a ten disi?
8 Ma fa a de nanga den miljoenmiljoen kristen di no ben kisi salfoe nanga santa jeje foe di na howpoe foe den de tégo libi na tapoe grontapoe èn no na ini hemel? Den srefi moe de bedinari? — Psalm 37:29; 2 Petrus 3:13.
Den sma foe na „bigi ipi” de bedinari
9. Na sortoe aktiviteit den sma foe na „bigi ipi” e teki prati?
9 Na boekoe Openbaring e piki den aksi disi foe wan pisi. Johannes ben taki foe eksempre baka di a ben si ini wan visioen na salfoe gemeente foe den 144.000: „Baka den sani disi, mi ben si wan bigi ipi, di no wan sma ben kan teri, foe ala naatsi nanga lo nanga pipel nanga tongo, tanapoe na fesi na troon èn na fesi na Lam, weri langa weti krosi èn palmtaki ben de na ini den anoe èn den tan bari nanga wan tranga sten, taki: ’Jepi wi abi foe taki tangi na wi Gado, di sidon na tapoe na troon, èn na a Lam.’” A de krin taki den sma disi, di den e tjari kon now makandra foe psa libilibi na bigi benawtoe, no e kibri na de foe den foe sma sabi den leki kristen. Den e meki nanga „wan tranga sten” bekenti foe soema na jepi disi e komoto. Fa den e doe disi na ini a ten tisi? Wan fasi de foe di den e gi jepi na a pikin fika pisi foe salfoewan na ini na meki kon troe foe tra toemsi prenspari profétitori nanga komando di abi foe doe nanga na diniwroko. — Openbaring 7:9, 10, 14.
10, 11. (a) Sortoe komando Jezus ben gi en bakaman let bifo a ben opo go na hemel? (b) Sortoe profétitori kon troe na ini wi ten?
10 Na ipi foe sma disi, di a nomroe foe den no de wan sani foe sabi e pré foe eksempre wan prenspari rol ini a doe foe na komando di Jezus ben gi na en getrow discipel na ini Galiléa foe préki èn foe leri sma. Na na okasi dati Jezus ben taki: „Ala makti na ini hemel èn na grontapoe ben gi na mi. Go foe dat’ede èn meki discipel foe sma foe ala naatsi, dopoe den na ini na nen foe na Tata èn foe na Manpikin èn foe na santa jeje èn leri den foe hori ala sani san mi komanderi oenoe.” Na komando disi ben gi na ala kristen no na wan spesroetoe klasse foe kerki fesiman. — Mattéus 28:18-20; 1 Korintesma 15:6.
11 A komando foe Jezus abi foe doe ooktoe nanga na profétitori di a ben gi ini a tori foe na „bosroiti foe na seti foe sani”. A ben taki: „A boen njoensoe disi foe na kownoekondre sa préki na a heri grontapoe pe libisma e libi leki wan kotoigi gi ala naatsi èn dan na kaba sa kon.” Fa sma ben waka miti na tjalansi disi foe préki na kownoekondre boskopoe alape na grontapoe na ini wan keslagti? Den wantoe doesoendoesoen salfoe kristen — di a nomroe foe den dé foe dé e go na baka — no ben kan doe den wawan na wroko disi di e gi sma libi. Dati ben sa de wan wroko di no ben de mogelek! — Mattéus 24:3, 14; Lukas 21:32.
12. San de salfoewan e erken nanga ala prisiri?
12 Den salfoe „mede-erfgenaam foe Kristus” e erken nanga ala prisiri na rol foe den moro leki toe miljoen bedinari di de foe a „bigi ipi” èn di e panja na boskopoe foe na kownoekondre na ini so wan kefarlek sjatoe pisten na ini na heri grontapoe. Langa ten kaba na ini den jari 30, dan foeroe troe kristen sma ben si en leki a frantwortoe foe den foe doe na diniwroko na ini tra kontren èn ben pristeri densrefi foe go dini i pe na fanowdoe ben de moro bigi. Tangi foe na eksempre foe na offer di den brada nanga sisa disi offer densrefi, èn di ben de foe den salfoewan èn ooktoe na klasse foe den „tra skapoe”, meki na kownoekondrewroko nanga moro krakti ben meki roetoe na ini foeroe kondre na ini Europa, Afrika. Azië nanga Noord-, Zuid-Amerika. — Romeini 8:17.
13. (a) Fa Jehovah ben meki a wroko go a fesi es’esi sensi 1943? (Jesaja 60:22) (b) Sortoe prati den sma foe na „Bigi ipi” abi na a zendingwroko?
13 Bifo 1943 kaba na „getrow èn koni srafoe”-klasse foe salfoe kristen ben si na fanowdoe foe opo wan zendings-skoro sodati kristen bedinari ben kan kisi wan aanvullende opleiding èn den kan sreka densrefi moro fara gi na zendingwroko foe den opo èn meki go moro esi a fesi na prékiwroko na ini foeroe moro kondre ete. Foe sensi na inwijding ini 1943 te nanga 4 maart 1984 dan so wan 6100 zendeling kisi leri na a Gileadskoro (na ini Hebrewtongo a wortoe „Gilead” wani taki „kotoigi-howpoe”), èn a moro bigi pisi foe den, baka di den ben slaag ben kisi wan toewijzing foe go na wan presi na grontapoe. Soso 292 (4,8 procent) foe den sma di ben studeri komoto foe Gilead ben ferteri dati den de foe a salfoe klasse. A moro bigi pisi foe den bedinari disi di ben kisi speciale opleiding de soboen foe na „bigi ipi”. Net leki den tra kotoigi foe Jehovah na a heri grontapoe na so den, di den ben gi densrefi abra nanga jepi foe Kristus Jezus na Jehovah Gado, ben teki na kristen diniwroko leki wan pisi foe na kristen libifasi. — Mattéus 24:45-47; Hebrewsma 10:7.
Tapoe san na kari foe den abi den fundamenti
14, 15. Tapoe san na kristen kari gi na diniwroko abi en fundamenti? (Mattéus 22:37-40)
14 Disi wani taki dati Gado ben kari ibri kristen kon ini a diniwroko? A de troe dati na ini na kristenheid sma de di e ferteri foe na „kari” foe den leki wan toemsi kekarlek ondrofeni di abi foe doe nanga a firi foe den, neleki Gado langalanga ben kari den kon ini en dienst. Ma na kristen diniwroko moro fowroe abi en fundamenti na tapoe so wan sani foe wan sjatoe pisten leki a firi foe wan sma?
15 Tapoe san santa dienst gi Gado, leki fa na apostel Paulus ben taki abi en fundamenti? A ben skrifi: „Foe dat’ede, mi e begi oenoe tranga na den sari-atifasi foe Gado foe pristeri oenoe skin leki wan srakti-ofrandi di de na libi, santa èn di de wan switi sani gi Gado, wan santa dienst nanga oen denki [joe dini foe Gado nanga ferstan, Herziene Voorhoeve uitgave foe na Njoen Testamenti, voetnoot; „leki sma di abi ferstan”, The New English Bible voetnoot].” Santa dienst gi Gado soboen abi en fundamenti tapoe a denki. Fa so? Foe di a gi ensrefi abra foe wan sma èn en persoonlek matifasi nanga Jehovah Gado abi den fundamenti tapoe na sabi foe na troe Gado. Foe dat’ede na kari foe wan kristen go ini na diniwroko — di tapoe ensrefi de wan prisiri ondrofeni — no abi leki fundamenti soso wan reactie foe wan sma firi. A kari dati abi wan troetroe boewégi foe ati lobi gi Gado nanga lobi gi den tra sma. — Romeini 12:1; Johannes 17:3.
16. Wan sma no de wan bedinari efoe a abi wan foeroeten grontapoe wroko? (Tori foe den Apostel 18:1-5)
16 Ma na aksi kan kon na joe: Den fosten kristen dati ben de ooktoe bedinari efoe den ben abi wan foeroeten grontapoe wroko noso ben de oso-oema? Ija, foe troe. Kande den ben kan gi soso wan pikin pisi foe den ten na kristen diniwroko — a préki nanga a leri foe sma — ma na prékiwroko ben de na moro prenspari wroko na ini den libi. Den ben sabi taki den ben moe meki den ’leti skijn’ leki troe discipel foe Kristus. Te joe loekoe en boen dan den ben de langa ten kaba bedinari-wrokoman bifosi na kristenheid ben sabi den bewéging foe priesterwrokoman. — Mattéus 5:16; 1 Petrus 2:9.
Bewijsi gi na diniwroko foe den
17, 18. (a) Sortoe algemeen gronprakseri di abi foe doe nanga troe kristen Kristus ben poti? (b) Sortoe sani e rikomanderi troetroe sma leki bedinari?
17 Fa Jehovah Kotoigi e bewijsi taki den de bedinari efoe den no abi wan diploma noso héskoro papira? We, fa den fosten kristen ben bewijsi taki den de bedinari? „Ibri boen bon e [meki] toemsi boen froktoe”. Kristen bedinari moe meki „toemsi boen froktoe”, pe joe abi na ini dati den abi wan prati na a meki foe discipel. — Mattéus 7:17.
18 Na apostel Paulus ben taki en na a fasi disi: „Wi e bigin baka foe rikomanderi wisrefi? Noso wi abi leki son sma rikomanderi-brifi gi oenoe noso foe oen fanowdoe? Oensrefi de oen brifi, skrifi tapoe oen ati èn di sma sabi èn e lési. Bikasi a de krin dati oenoe de wan brifi foe Kristus, di oenoe ben skrifi leki dinari, no nanga enki, ma nanga jeje foe wan libi Gado, no tapoe stontafra, ma tapoe meti tafra, tapoe ati.” Fa na skrifi na tapoe ati ben doe kon? Nanga jepi foe na préki foe na wortoe foe bribi di gersi siri di ben prani na ini na ati. Na siri disi ben boewégi na sma di ben kisi en na a tra sé foe préki na srefi boskopoe foe jepi gi tra sma. — 2 Korintesma 3:1-3.
19. Sortoe boen rikomanderi leki bedinari Jehovah Kotoigi moe abi?
19 Jehovah Kotoigi kan meki sma si ’wan brifi foe Kristus’ di den ben skrifi leki bedinari? Den troe tori e taki foe densrefi. Di den ben teki na ini 1931 foe na fositron na aparti nen foe den, dan na a heri grontapoe sowan 50.000 Kotoigi ben e préki. Na bericht di e go foe 1983 e meki wi si wan hémarki foe moro leki 2.652.000 bedinari di de na ini 46.235 gemeente, èn di e préki a boen njoensoe foe na kownoekondre. Ija, joe abi now pikinmoro net someni gemeente leki kotoigi di joe ben abi ini 1931! Den ben skrifi na waarheid na ini den tintin jari di psa kaba troetroe na tapoe miljoenmiljoen sma ati èn dati de wan bewijsi di no kan poti na wan sé gi na diniwroko foe Jehovah Kotoigi. — Jesaja 43:10-12.
20. San den e aksi na ini a ten disi foe wi leki kristen bedinari? Sortoe aksi wi moe gi wan piki a tapoe ete?
20 Noiti ete sowan tranga fanowdoe ben de te now gi kristen bedinari. Na ten kon sjatoe èn na kotiwroko de bigi. Foe dat’ede meki someni moro réde de gi wi foe de bekwaam bedinari di e préki èn e leri sma na so wan fasi dati froktoe e kon. Fa wi kan doe dati? Fa wi kan de boen bedinari di e doro wan marki? Den eksempre foe Kristus nanga den apostel abi praktis waarde gi wi ini a ten disi? — Efesesma 5:15, 16; Mattéus 9:37, 38.
Punt foe loekoe baka
◻ Fa wi sabi taki ala salfoe bakaman foe Kristus ben moe de bedinari?
◻ Sortoe rol a „bigi ipi” pré a ini a disiten diniwroko?
◻ Tapoe san na kristen kari foe na diniwroko sdon leki fundamenti?
◻ Sortoe bewijsi Jehovah Kotoigi abi foe a diniwroko foe den?
[Prenki na tapoe bladzijde 1]
Ini a ten foe den apostel wan klasse foe geestelijken ben de?