Soema de den dinari foe Gado ini disi ten?
„Wi ben seni Timoteus, wi brada èn dinari foe Gado ini na boen njoensoe foe na Kristus.” — 1 THESS. 3:1, 2.
1, 2. (a) Na alasma di taki dati den de geordineerde dinari foe Gado, e doe na diniwroko foe den na wan joisti fasi? (2 Kor. 11:13-15) (b) Foe san-ede a de prenspari foe kan si soema de Gado troe dinari ini disi ten? (2 Kor. 5:18)
KERKI FESIMAN ini Mindri-Amerika no langa psa kaba ben jepi foe meki wan revo kon di ben meki wan tiri ben trowe na gron. Ini na fara Oostoe wan geordineerde kerkifesiman ben tjari sma di ben go kibri baka sani èn ben doe wan aanval nanga na baka-pisi dati toe sma ben feni dede. Ini na Zuidsé foe Asia kerkifesiman ben orga gronman di no ben abi gon ini na stré foe den tegen den „kwinsiman”.
2 Ala den man disi ben taki, taki den de kristen dinari foe Gado, ma den ben de disi troetroe? Na disi na den sani di wan bedinari foe Gado moe doe? Disi de wan prenspari aksi, foe di nanga den activiteit foe Gado troe dinari den sma moro foeroe e kon sabi moro foe en èn den e kisi na okasi foe kisi tégo libi (1 Kor. 3:5; Joh. 17:3). Wi moesoe foe kan si soema de Gado troetroe dinari. Ma fa wi kan doe disi? Soso na bijbel kan jepi wi nanga disi.
„Dinari” ini na bijbel
3. (a) Na sortoe fasi na Griki wortoe diákonos e gebroiki? (b) San de na moro hé diniwroko?
3 San de, foe bigin, wan dinari akroederi na bijbel? Ini na oorspronkelijke tongo foe den kristen Griki Boekoe a wortoe dinari ben de diákonos. Aladl difrenti prakseri de foe na bigin foe na wortoe disi, tokoe ala sma sabi san a wani taki. Wan dinari de wan sma di e dini. Ini den Evangeliën diákonos nanga wortoe di de famiri foe en, nofotron e gebroiki ini na tori foe a dini foe den sma di didon na tafra foe njan njanjan (Luk. 4:39; Joh. 2:5, 9). Ma ini na Griki tongo foe Jezus ten na wortoe nofotron ben gebroiki gi wan moro hé sani. Ini boekoe di no de foe bijbel a ben gebroiki gi bigiman foe kerki, èn ini na fosi vertaling foe den Djoe Skrifi ini na Grikitongo a ben gebroiki gi bigiman foe na oso foe kownoe èn gi knegti foe na kownoe foe Perzië Ahasveros (Esth. 1:10; 6:3, Septuaginta-vertaling). Na moro hé dienst ofoe diniwroko di wan sma kan abi wan prati na en, èn dati no de foe taki, de na dienst foe na moro Hé Gado, Jehovah.
4. Fa wan troe dinari foe Gado e si ensrefi?
4 Fa wan troe dinari foe Gado e si ensrefi, foe di a de so wan bigi grani foe tanapoe ini na dienst foe Gado? A no moe abi bigi memre ofoe firi ensrefi prenspari. Séker a no sa teki titel di e dodoi ensrefi, soleki „Santa Tata” ofoe „Weleerwaarde” (Matt. 23:8-12). Jezus ben sori moro foeroe dati wan troe kristen dinari foe Gado ben sa de nanga sakafasi. A ben taki: „Na soema na oen mindri di wani de bigi moe de oen dinari, èn na sma na oen mindri di wani de na fosiwan moe de oen srafoe”. — Matt. 20:26, 27.
5. Na den komando foe soema den dinari foe Gado e gi jesi, èn soema e njan boen foe a diniwroko foe den?
5 Wan dinari e gi jesi na den komando foe en masra. Ma te a e doe disi, dan en wroko kan tjari boen gi wan tra sma. Efoe en masra foe eksempre kisi fisitiman, dan na dinari e gi jesi na en masra foe sorgoe gi den sani di den fisitiman abi fanowdoe. Foe di kristen bedinari foe na Evangelium de „dinari foe Gado” èn „dinari foe Kristus”, den e gi jesi na den komando di Gado ben gi nanga jepi foe en Manpikin Jezus Kristus (2 Kor. 6:4; 11:23). Ma a wroko di den e doe e tjari boen gi tra sma. Paulus foe eksempre ben de wan dinari gi „sma foe den naatsi” (Ef. 3:1-7). A diniwroko foe en ben tjari bigi blesi gi den sma di ben teki en na wan boen fasi. Èn en diniwroko ben de leki wan grani gi Jehovah Gado èn gi Jezus Kristus, èn a ben gi jesi na den komando foe en.
Na moro bigi dinari foe Gado
6. (a) Soema ben de na moro bigi dinari foe Gado? (b) Den komando foe soema a ben jere, èn foe na boen foe soema a ben doe dienst?
6 Ma san wan kristen dinari foe Gado moe doe troetroe? Wi kan piki na aksi disi te wi loekoe na den activiteit foe na moro bigi dinari foe Gado di ben libi wanten, Jezus Kristus. Jezus ben taki: „Na Manpikin foe libisma no ben kon foe sma dini en, ma foe dini èn foe gi en libi leki wan loesoe-prijs ini na presi foe foeroe sma” (Matt. 20:28). A den komando foe soema, Jezus ben gi jesi leki wan sma di ben kon foe dini? Gi soema a ben doe dienst? Èn fa? Jezus ben gi jesi na den komando foe en hemel Tata (Joh. 8:28). Ma te foe kaba en diniwroko ben tjari boen kon gi ala reti-ati sma. — Joh. 3:16.
7. (a) San Jezus ben doe leki dinari foe Gado? (Mark. 1:38) (b) San Jezus no ben doe?
7 San Jezus ben doe leki wan dinari foe Gado? A ben tan farawe foe politiek. Na moro pikinso toe okasi a ben kisi na tjans foe go ini politiek, ma a ben wégri disi (Mark. 12:13-17; Joh. 6:15). Foe san-ede? Foe di en diniwroko ben de moro hé leki na politiek èn den winimarki di e kon foe dati, makandra nanga tégo libi ben de moro bigi leki den di ben kon te wan sma ben go bemoei nanga politiek. Boiti dati wan dinari foe Gado no kan de wan dinari foe disi grontapoe (Matt. 6:24). Foe dat’ede meki Jezus no ben de èn no ben tan „wan pisi foe na grontapoe” (Joh. 17:14; Jak. 4:4). Na a tra sé, Jezus ben hori ensrefi bezig nanga triki èn a leri foe sma. A ben barwroko gi na nen foe Gado ini publiki. A ben préki taki Gado Kownoekondre de na wan enkri howpoe gi na libisma-famiri. A ben leri en discipel ini den hé moreel markitiki foe Gado èn a ben gi den leri foe waka na en baka ini na diniwroko. Te foe kaba a ben poti wan kron tapoe en diniwroko foe di a ben moe offer en libi gi na libismafamiri. — Matt. 4:17; 5:27-32; 20:28; Joh. 17:3-6.
8. Foe san-ede den disiten dinari foe Gado e ondrosoekoe na diniwroko foe Jezus finfini?
8 Jezus ben libi wan model na baka sodati wi alamala „ben sa waka soifri ini en foetoemarki” (1 Petr. 2:21). Soso den sma di e waka soifri baka na diniwroko foe Jezus Kristus, kan kari densrefi ini disi ten troetroe dinari foe Gado. Te wi e go ondrosoekoe na activiteit foe kristen dinari foe Gado ini den jari baka na dede foe Jezus, dan wi sa si san ben de ini na tori disi.
Na kristen dinari foe Gado
9. Fa Jezus nanga Paulus ben kon de bekwaam foe de geordineerde dinari foe Gado?
9 Fa wan sma di, ini na ten dati, ben de wan dienstknegti foe Gado, ben kisi na bekwaamheid foe de wan geordineerde dinari foe Gado? Ini na ten disi na moro bigi pisi foe den kerkifesiman ini na kristenheid e kisi papira foe na wan ofoe tra seminarium ofoe na wan ofoe tra héskoro pe a status foe den skrifi na ini. Disi de den bewijsi taki den boen foe doe na wroko. Ma Jezus no ben abi sowan papira. A ben de wan bevoegtoe dinari foe Gado foe di Gado ben salfoe en foe dati (Luk. 4:18, 19). Na a srefi fisi na apostel Paulus ben taki: „Dati wi de nofo bekwaam, e kon foe Gado di e meki wi de nofo bekwaam foe de dinari foe wan njoen-verbontoe” (2 Kor. 3:5, 6). Gado e gi en égi dinari foe dat’ede na fanowdoe bekwaamheid. Fa a de doe disi?
10. Fa Timoteus ben kisi en fundament opleiding foe de wan kristen dinari foe Gado?
10 Loekoe na eksempre foe Timoteus, di a ben de „Gado dinari ini na boen njoensoe foe na Kristus” (1 Thess. 3:2). Paulus ben skrifi en: „Ma tan ini den sani di joe ben leri èn nanga overtoigi joe ben go bribi na ini den, aladi joe sabi foe soema joe ben leri den èn dati foe joe jongoe jari kaba joe ben sabi den santa boekoe di ben meki joe kon koni foe kisi ferloesoe nanga jepi foe na bribi di de nanga Kristus Jezus.” — 2 Tim. 3:14, 15; loekoe toe den vers 16, 17.
11. Foe soema Timoteus ben kisi jepi foe kon de bekwaam gi na diniwroko?
11 Disi wani taki dati Timoteus wawan ben lési na bijbel èn na so fasi ben tron wan dinari foe Gado? Nono. Na a fosi presi a „ben go bribi nanga overtoigi” foe di tra dinari foe Gado ben tak-go-tak-kon nanga en. Soema ben de den dinari disi? Foe di a ben sabi den boekoe foe jongoe jari kaba, dan moro pikinso a ben moe kisi fundament leri foe en mama èn granmama, foe di en papa no ben de wan bribi sma (2 Tim. 1:5). Boiti dati di Paulus ben miti Timoteus foe na fosi tron „dan den brada ini Lystra nanga Ikonium ben tjari wan boen bericht kaba foe en” (Tori. 16:2). En bribi foe dat’ede ben gro moro fara nanga na demakandra foe en nanga medekristen ini den gemeente disi. Ini a ten dati a ben de boiti dati na gwenti, taki difrenti brada di ben kon moro na fesi èn spesroetoe na tiriskin foe na kristen gemeente ini Jeruzalem, ben skrifi brifi gi den difrenti gemeente foe tranga na bribi foe den memre foe den gemeente, aladi opzieners di ben waka lontoe ben bow den op nanga den fisiti foe den. — Hebr. 10:23; Tori. 15:22-32; 1 Petr. 1:1.
12. Oten Timoteus ben tron wan geordineerde dinari foe Gado, èn fa a ben tan go na fesi baka dati?
12 Na wan séker momenti na bribi foe Timoteus, di ben kon tranga nanga jepi foe sowan studi nanga demakandra ben kon tjari en foe a teki dopoe leki wan marki foe a gi di a gi ensrefi abra na Gado foe gi na tra pisi foe en libi na a dini foe Gado (Matt. 28:19, 20; Hebr. 10:5-9). A de wan logisch sani dati na a okasi dati a ben tron wan geordineerde dinari foe Gado. A go na fesi foe en no ben stop drape. Den bekwaamheid foe en leki dinari foe Gado ben kon tranga moro fara nanga jepi foe wan spesroetoe jeje presenti èn nanga jepi foe persoonlek leri nanga opleiding di a ben kisi foe na apostel Paulus. Èn Timoteus ben tan go na fesi nanga jepi foe en persoonlek studi èn nanga jepi foe demakandra nanga kristen (1 Tim. 4:14; 2 Tim. 2:2). A so fasi Timoteus ben de wan ’dinari foe na boen njoensoe’. San a ben doe ini na positie dati?
13. Sortoe frantwortoe Timoteus ben tjari leki dinari foe Gado?
13 Foe di a ben de wan mati foe Paulus di ben reis nanga en, a ben abi spesroetoe wroko foe doe. Leki owroeman Timoteus ben wroko tranga foe leri èn tranga en medekristen. Disi ben de wan pisi foe en diniwroko (1 Tim. 4:6). Na moro prenspari pisi foe en diniwroko, ben de neleki ini a tori foe Jezus, na préki foe na boen njoensoe (Matt. 4:23). Na apostel Paulus ben taigi Timoteus „ma ini ala sani hori joe prakseri na wan, njan pina foe ogri ede, doe na wroko foe wan evengelium prékiman, doe joe diniwroko dorodoro.” — 2 Tim. 4:5.
14. Fa ini na bijbel e kon na krin fa bribi de nanga préki-diniwroko?
14 Boiti Timoteus nanga Paulus, foe soema moro den ben froewakti dati den ben sa abi wan prati na a kristen diniwroko? Na soso den owroeman ofoe den spesroetoe vertegenwoordiger di ben reis? Nono. Na apostel Paulus ben sori tapoe na sani disi dati na préki foe na boen njoensoe ben poesoe go na fesi nanga jepi foe na bribi di ala kristen abi soleki joe kan denki. A ben taki: „Nanga na ati wan sma e sori bribi foe kisi regtvaardikifasi, ma nanga na mofo wan sma e meki wan publiki bekenti foe kisi ferloesoe.” — Rom. 10:10.
15, 16. Soema ben tjari na frantwortoe foe abi wan prati na a kristen diniwroko, èn foe san-ede joe e piki so?
15 Disi wani taki dati ala sma di abi troetroe na kristen bribi, moe de kristen bedinari di abi wan prati na a préki foe na boen njoensoe? Ja. Den wortoe foe Paulus ben taki gi na heri gemeente ini Rome no soso gi den owroeman (Rom. 1:1, 7). Na heri gemeente na Efese ben moesoe „weri soesoe na den foetoe nanga na sreka foe na boen njoensoe foe vréde” (Ef. 6:15; 1:1). Èn gi ala den sma di ben jere di den ben lési na brifi gi den Hebrewsma, den ben taki ’foe hori faste sondro toe seki na a publiki bekenti foe den howpoe’ (Hebr. 10:23). Hori toe ini prakseri taki na a pinksterdé ala sma — man leki oema — ben teki prati na a publiki meki bekenti foe den „bigi wroko foe Gado”. — Tori. 2:1-21; 1:14.
16 Boiti dati, Jezus ben taigi en bakaman sjatoe bifo a ben opo go na hemel: „Go foe dat’ede èn meki discipel foe sma foe ala naatsi, dopoe den ini na nen foe na Tata èn foe na Manpikin èn foe na santa jeje èn leri den foe hori ala sani di mi ben komanderi oenoe” (Matt. 28:19, 20). A no ben de na prakseri dati den sma ini difrenti naatsi di ben teki na préki na wan boen fasi ben sa tron soso arkiman. Den ben moe tron discipel, nanga ala sani di ben abi foe doe nanga dati. — Luk. 10:1; 14:27, 33; Joh. 13:35; 15:8; Tori. 1:8.
Den dinari foe Gado ini disi ten
17. Sortoe prenspari sani abi so foe doe nanga na kristen diniwroko? (Matt. 22:37-39)
17 Te so fara wi ben si taki wan troe kristen dinari foe Gado e tan farawe foe politiek èn e hori ensrefi apart foe na grontapoe. A abi sakafasi èn a e hori ensrefi na den hé moreel markitiki di Jezus ben leri en bakaman. A de Gado dinari èn a de waka baka Kristus. Foe dat’ede a no moe waka baka en égi prakseri ofoe meki na waarheid kon watra soso foe meki trawan teki en moro esi. Ma ete en diniwroko e meki sma di de na en sé njan boen — den bribiwan soleki den wan di no e bribi. — Matt. 20:28; 26:39; 1 Petr. 4:8-10.
18. Soema de ini disiten den troe dinari foe Gado èn foe san-ede joe e piki so?
18 Neleki fa a ben de ini a tori foe Jezus nanga Timoteus na so na prékiwroko de wan prenspari pisi foe na dienst ofoe na diniwroko foe wan kristen ini disi ten. San a de préki? We now, ferloesoe sma kan kisi ete tapoe na gron foe Jezus srakti-ofrandi. Èn den sma di wani kisi ferloesoe, moesoe kari na nen foe Jehovah te now ete (Tori. 4:12; Rom. 10:13). Boiti dati, na kownoekondre de te now ete na wan enkri howpoe gi na libismafamiri di e pina. Foe dat’ede Jezus ben taki na fesi: „Na boen njoensoe disi foe na Kownoekondre sa préki na a heri grontapoe pe sma e libi leki wan kotoigi gi ala naatsi èn dan na kaba sa kon” (Matt. 24:14). Den troe dinari foe Gado de den sma di e meki na profétitori disi kon troe èn e leri sma den waarheid disi. Èn soema e doe a wroko disi di Gado ben gi? Soso Jehovah Kotoigi. — Jes. 43:10-12.
19. Sortoe difrenti sani abi foe doe nanga a de foe wan dinari foe Gado ini disiten?
19 Fa wan sma e kon bekwaam foe de wan geordineerde dinari foe Gado? Na a srefi fasi leki Timoteus: Te a bow wan krakti bribi ini den pramisi foe Gado, tapoe na gron foe wan studi foe na bijbel; te a meki na bribi dati kon tranga nanga jepi foe demakandra nanga tra kristen; te a teki dopoe ini watra leki wan marki dati nanga begi a ben gi ensrefi wantronwantron abra na Gado foe dini en now èn foe a teki na tiri foe na tiriskin foe na kristen gemeente (Hebr. 10:23-25; Matt. 24:45-47). Soema na den sma di abi wan prati na a diniwroko disi? Ala sma di e poti wan opregti actief bribi ini den prakseri foe Gado, tapoe na gron foe wan soifri sabi. Te wan sma leki kristen kotoigi foe Jehovah abi wan prati na a evangelium-préki, dan a de gi na bewijsi foe na troetroe fasi foe na bribi dati. — Jak. 2:17.
20, 21. (a) Nanga sortoe fadon foe a diniwroko foe a kristenheid ini prakseri, a boen dati Gado wiki kon ini disi ten bedinari foe na evenagelium? (b) O fara èn o bigi na kontren foe den kristen activiteit de?
20 Ini den laatste dé disi foeroe kerkifesiman foe na kristenheid de druk bezig foe préki „wan sociaal evangelium”, èn nanga disi den e boemoei nanga na politiek ofoe e degedege dati Gado de èn ofoe na bijbel abi praktisch waarde. Èn den sma foe na kristenheid di de leek e sori pikinso belangstelling foe doe wroko leki dinari foe Gado. Foe dat’ede meki wi de grantangi dati Gado ben moe wiki bedinari kon foe na evangelium di e hori en nen hé na fesi na libisma-famiri èn di e jepi reti-ati sma foe leri sabi den toemsi prenspari waarheid foe Gado Wortoe, na bijbel. Na a heri grontapoe moro leki toe miljoen foe den dinari disi foe Gado e wroko fajafaja èn nanga na jepi foe Gado den e doe dienst gi na heri libismafamiri.
21 Ma fa wan sma kan bewijsi taki a de wan foe den sma disi? Disi wi sa go loekoe moro fini ini na tra artikel di wi sa behandel.
San den tekst di e kon now e taigi wi foe na kristen diniwroko?
[Prenki na tapoe bladzijde 3]
Diniwroko kan de a gi foe leri ini na gemeente
[Prenki na tapoe bladzijde 4]
Alasma di abi wan opregti bribi, moe doe dienst leki kristen bedinari foe na evangelium