’Wi kan prisiri ini ala den dé di wi de na libi’
„Gi wi satisfaksi ini na mamanten nanga joe lobi boenfasi, sodati wi kan bari wan prisiri babari èn wi kan prisiri ini ala den dé foe wi libi.” — Ps. 90:14.
1. Fa Jehovah e sori taki en pipel de kolokoe?
JEHOVAH GADO wani taki en pipel de kolokoe. A sabi dati wan prisiri di wi e firi dipi de fanowdoe foe kan de tevréde èn gesontoe (Odo 17:22). Foe dat’ede meki Jehovah ben e sorgoe, leki wan Gado foe lobi boenfasi, ini tiri di sa meki wi de nanga prisiri te wi sa poti disi ini wi libi.
2. Foe san-ede troe kristen nanga froetrow kan begi foe prisiri?
2 Foe di Jehovah kotoigi e libi ini wan ogri seti foe sani èn moe kaka-foetoe gi den difrenti fasi foe druk di de ini na libi, meki den kan begi leki troe kristen foe prisiri. Prisiri de wan froktoe foe Gado santa jeje èn a de gi na jeje dati na getrow dienstknekti di gi densrefi abra èn di e aksi dati foe en (Luk. 11:13; Gal. 5:22, 23). Den ben sa kan tjari sosrefi toe heri boen den firi kon na fesi di e akroederi nanga na begi foe a proféti foe Gado, Mozes: „Gi wi satisfaksi ini na mamanten nanga joe lobi boenfasi, sodati wi kan bari wan prisiri babari èn wi kan prisiri ini ala den dé foe wi libi” (Ps. 90:14). Den sma di e poti den froetrow tapoe Jehovah kan abi na froetrow dati a sa jere den sortoe opregti begi disi. — 1 Joh. 5:13-15
3. Sortoe toe fundament sani wi moe hori ini prakseri, te wi wani foe „kan prisiri ini ala den dé foe wi libi”?
3 Tokoe wi moe hori toe fundament sani ini prakseri, boiti dati wi e poti prakseri na begi, te wi wani „prisiri ini ala den dé foe wi libi”. Krakti ben poti tapoe disi di na pipel foe Gado ini owroeten ben kisi foe jere dati floekoe ben sa kon na tapoe den efoe den no ben sa arki „na a sten foe Jehovah foe di den ben moe hori en komando” èn efoe den ’no ben dini Jehovah nanga prisiri èn prisiri foe ati’ (Deut. 28:45-47). Te wi wani foe dat’ede de kolokoe ini wi heri libi, dan wi moe (1) gi jesi na Jehovah (2) dini en nanga prisiri.
4. (a) San Jehovah e gi sodati en dienstknekti kan dini en nanga wan prisiri ati? (b) Sortoe koni taki wi kan loekoe èn nanga sortoe bakapisi?
4 Jehovah e gi na dek’ati nanga na jepi di en dienstknekti ben abi fanowdoe foe dini en nanga prisiri. Boiti dati, a de gi tapoe wan boenfasi betrouwbaar gronprakseri di sa tjari prisiri leki bakapisi. Loekoe foe eksempre fa koni taki di de ini bepaalde pisi foe na bijbelboekoe Odo kan meki wan dipi prisiri kon. Ia, efoe sowan rai sa poti ini na libi, dan disi kan abi leki bakapisi dati wi e ’prisiri ini ala den dé foe wi libi’.
Prisiri ini na osofamiri
5. (a) San Jehovah e froewakti foe papa nanga mama? (b) Sortoe krakti pikin kan abi tapoe wan osofamiri te den gi ofoe no gi jesi?
5 Foe kisi osofamiri-kolokoe èn foe hori en, a de fanowdoe foe gi jesi na Gado èn firi èn teki esi na rai di de foe feni ini en Wortoe. Jehovah e froewakti foe eksempre foe papa nanga mama dati den doe den moeiti foe kweki den pikin. Na papa moe teki fesi ini disi, ma na mama toe moe abi wan actief prati na ini (Odo 22:6; 31:1). Èn fa a de nanga den bigi pikin? We now, wan pikin „di e spotoe wan tata èn di e wisiwasi a gi jesi na wan mama”, no sa kon boen èn sa gi en papa nanga mama sari-ati, presi foe gi den prisiri (Odo 30:17; 17:21). Koni man- nanga oemapikin di e gi jesi na a tranga leri di papa nanga mama e gi di e frede Gado èn e libi ini wanfasi nanga gronprakseri foe na bijbel, e meki na osofamiri na a tra sé kon goedoe nanga prisiri èn grani. — Odo 10:1; 15:20; 23:15, 16.
6, 7. (a) Sortoe rai e gi ini Odo 23:22-25, èn disi e meki san kon te wi waka baka na rai disi? (b) San na rai wani taki: „Bai waarheid èn no seri en”?
6 Papa nanga mama di frede Gado èn di e kweki den pikin na sowan fasi dati disi e meki den waka baka wan regtvaardiki libifasi, nanga leti kan prisiri foe troe. Wi e lési foe disi ini den boekoe: „Arki na joe papa, di ben meki joe gebortoe kon, èn no wisiwasi joe mama soso foe di a kon owroe. Bai waarheid èn no seri en. Koni nanga tranga leri nanga froestan. Na papa foe wan regtvaardikiwan sondro mankeri sa bréti; a sma di tron papa foe wan koniwan sosrefi toe sa prisiri foe en. Joe papa èn joe mama sa prisiri èn den di ben meki joe sa bréti.” — Odo 23:22-25.
7 Wan koni pikin sa poti prakseri na tapoe na jeje leri di en kristen papa e gi en èn no sa poti na wan sé a sani di en mama di e frede Gado e taki, awansi kande a kon owroe. Wan bigisma di de frantwortoe foe en égi doe, alaten ete kan leri wan sani foe en papa nanga mama di kon grani. Na rai foe ’bai waarheid èn no seri en’, wani taki krin taki wi moe hori wisrefi na joisti gronprakseri leki wan tjariman ini na libi. Wan reti-ati pikin no sa libi na waarheid foe prisiri, goedoe ofoe bigi nen ede. Èn wan osofamiri pe ala memre foe en de anga na Jehovah, séker sa njan boen foe prisiri di e tan. — Deut. 10:20, 21.
Hori kibri prisiri awinsi ogri sma de
8, 9. Fa a gebroiki foe koni foe Gado kan kibri wi tegen ogrisma, soleki Odo 2:10-14 e sori?
8 Gi jesi na a rai foe Jehovah e jepi wi foe hori kibri prisiri na ondro difrenti omstandigheden. Na so wi kan kisi kibri tegen ogri sma, te wi e poti koni foe Gado ini wi libi. Den boekoe e ferteri: „Te koni kon ini joe ati èn na sabi srefi kon de switi gi joe sili, dan na denki-powa srefi sa hori wakti abra joe, na koni foe si sani srefi sa kibri joe, foe fri joe foe na takroe pasi, foe na man di e taki fowtoe sani, foe den di e libi den pasi foe opregtifasi foe go waka den pasi foe na doengroe, foe den di e prisiri ini a doe foe ogri, di e bréti foe den fowtoe sani foe takroe-doe.” — Odo 2:10-14.
9 Na boen-ati foe Jehovah e tan tapoe den sma di e warderi troe koni èn e meki a wroko tapoe den ati. Den de so koni foe tan farawe foe na demakandra nanga wan „di e taki fowtoe sani”, dati wani taki sani di de kontrari san de troe èn joisti. Wan denki-powa di oefen boen èn koni foe si sani e gi kibri tegen den sma di e trowe a koni foe Gado, e abi prisiri ini takroe-doe èn di e poti na den prakseri foe meki trawan go ini pori. — Teki gersi Odo 4:16.
10. Fa wan takroe sma e kon ini wan trapoe foe en sondoe?
10 Na ogri sma kan „prisiri ini na doe foe ogri”, ma soema de na sma di abi troetroe prisiri? Wan tra Odo e piki: „Ini na sondoe foe wan takroe man wan trapoe didon, ma en di de regtvaardiki, e bari wan prisiri babari èn a de bréti” (Odo 29:6). Ia, wan takroe libisma e go ini en sondoe neleki ini wan trapoe. Na wan sondoe foeroe tron e waka baka wan trawan, èn onfroewakti ala sortoe rampoe kan miti en. Na so foe eksempre a kan meki plan foe trowe wan trawan go ini pori, ma disi sa meki nomo dati en ogri plan sa drai kon tapoe en égi ede. Ini na Israël foe owroeten dan wan falsi kotoigi ben sa proeberi meki na dede foe wan soema di no doe wan fowtoe doe kon foe di a e koioigi falsi tegen en. Ma efoe den ben kon si en ogri plan, dan na konkroeman srefi den ben kiri. — Deut. 19:16-21.
11. Foe san-ede wan reti-ati sma kan ’bari wan prisiri babari’?
11 O moro boen na lot foe wan regtvaardiki soema de! Noiti a de meki ogri plan tégen sma di de na en sé èn sosrefi toe a no de doe sondoe. A de tan farawe foe dat’ede foe kon ini na trapoe foe sondoe èn a no de ondrofeni den moeilekheid di e go makandra nanga takroe libifasi ofoe na strafoe di de na bakapisi te a bere foe en e poeroe kon na doró leki wan ogri konkroeman. Foe dat’ede meki wan reti-ati sma e „bari wan prisiri babari èn a e bréti”. Foe eksempre, wan konsensi di fowtoe, no e trobi en. Boiti dati, a abi na boen ai foe Gado, „bika na sma nanga triki de wan tegoe sani gi Jehovah, ma en fertrow demakandra de nanga den opregtiwan.” — Odo 3:32.
Joe moe bréti te a de go takroe nanga wan feanti?
12. Fa wan kristen moe doe te sani e waka takroe nanga wan féanti? Foe san-ede?
12 Ma fa wan kristen moe doe te a de go takroe nanga wan féanti? „Te joe féanti fadon”, wan tra odo e taki, „no prisiri dan; èn te den meki en naki foetoe fadon, joe ati no moe bréti dan.” Foe san-ede? „Sodati Jehovah no si en èn a de wan ogri sani ini en ai èn a poeroe en atibron séker foe en” (Odo 24:17, 18). Nanga disi ibri ogri-ati prisiri foe a wan ofoe a tra rampoe di e miti wan féanti e poeroe na pasi. Foe di a ben sa de wan fowtoe sani foe winsi gi wan féanti rampoe soso foe persoonlek satisfaksi foe joe, dan wan sma di sa prisiri ensrefi na a fasi disi, sa moe gi frantwortoe foe en sondoe na Jehovah. Gado ini a tori disi kan lési na ati èn sabi foe dat’ede efoe wi ini kibrifasi e prisiri foe na pina foe wan trawan. Na fowtoe jejefasi dati kan de wan sani di kibri gi tra sma, ma a de krin gi Jehovah di e taki: „Refensi nanga na paiman na foe mi” (Deut. 32:35; Hebr. 10:30). Gado kan strafoe na sma foe dat’ede tapoe wan ofoe tra fasi di e prisiri foe na ongolokoe foe wan trawan. — Teki gersi Odo 17:5.
13. San Odo 11:10 wani taki?
13 Na a tra sé wi e kisi foe jere toe: „Foe na boenfasi foe den regtvaardikiwan meki wan foto abi bigi prisiri, ma te den ogri sma e lasi gwe, prisiri babari de” (Odo 11:10). Fa wi moe froestan disi? We now, regtvaardiki sma ini algemeen sma lobi den èn den e meki sma di e libi na den sé bréti. Ma nowan sma lobi „ogrisma”. Wan ogri-ati sma e tjari froekoe kon tapoe ensrefi (Odo 11:17). Te den ogri sma dede, dan den sma ini algemeen boiti dati no sa low foe den ede, èn séker sari no sa de foe den te Jehovah e pori den ogrisma disi. Moro foeroe prisiri sa de foe di den poeroe komoto na grontapoe. Wi e tjari wisrefi tapoe wan fasi di e meki „bigi prisiri” kon gi trawan?
Wan prisiri ati de wan blesi
14. Fa a gi jesi na Jehovah e jepi wi, foe prisiri ini ala den dé foe wi libi, foe so fara wi ben taki foe en kaba?
14 Te wi e gi jesi na Jehovah, dan wi e kisi na okasi foe „prisiri ala den dé foe wi libi”. Soleki wi ben taki na fesi kaba, dan na poti ini wi libi foe rai foe Gado e meki wan kolokoe bigisma-pikin-nengre-matifasi kon. Te wi e teki na tiri foe Gado, dan wi e kisi kibri tegen den takroe krakti foe ogrisma èn wi e kon kisi prisiri. Te wi e hori wisrefi na den wet foe Jehovah, dan disi e stop wi, boiti dati, foe kweki wan fowtoe libifasi foe rampoe di kan miti den ogrisma, sodati wi e kon ini a okasi foe tan hori wi prisiri. Ia, te wi e gi jesi na Jehovah Gado, dan wi ati sa kon foeroe nanga prisiri. Disi tapoe ensrefi de kaba wan blesi.
15. San wi moe doe, na presi foe gi pasi taki „skreki broko-ede” „boigi” wi ati nanga sari, èn foe san-ede?
15 Na koni kownoe Salomo ben taki: „Wan prisiri ati e wroko tapoe wan boen fasi tapoe na fesi, ma na sari foe na ati e meki wan broko geest kon” (Odo 15:13). Ia, prisiri nanga sari de firi di wi kan lési tapoe na fesi foe wan sma. A no de foe taki dati foeroe sorgoe foe a libi de di ben sa kan meki wi abi toemsi foeroe sari. „Skreki broko-ede ini na ati foe wan man, dati kan meki a boigi”, wan tra Odo e taki, „ma na boen wortoe de san e meki a e prisiri” (Odo 12:25). Foe dat’ede a de wan moro koni sani, na presi foe gi pasi dati „skreki broko-ede” meki wi ati „boigi” nanga sari, foe go na Jehovah èn go prakseri dipi foe na maksin dati foe boen sani, en Wortoe di skrifi nanga santa jeje! Disi sa meki wan sari ma regtvaardiki ati séker kon foeroe baka nanga prisiri.
16. (a) Fa wan boen boskopoe kan „meki den bonjo kon fatoe”? (b) Fa wi moe si a de nanga prisiri alaten — ala di ’wan prisiri ati de wan boen dresi’?
16 Salomo ben taki toe: „Na brenki foe ai e prisiri na ati, wan njoensoe di boen e meki den bonjo kon fatoe” (Odo 15:30). Boen njoensoe „e meki den bonjo kon fatoe”, dati wani taki, e foeroe den nanga fatoe. Na so fasi na heri skin e kisi njoen krakti aladi wan ati di foeroe nanga prisiri kan de foe si ini den ai di e brenki. Aladi wan broko froestan ofoe wan „broko geest” kan wroko na wan takroe fasi na skinfasi, wan „prisiri ati de wan boen dresi” (Odo 17:22; teki gersi na Willibrordvertaling). A no de foe taki dati a no de na bedoeling dati wan ati e gi ensrefi abra alaten na prisiri di no abi waarde, bikasi Salomo „ben taki gi na lafoe: ’law sani!’ èn gi na prisiri: ’San disi e doe?’” (Prék. 2:2). Ma a de doe wan sma séker boen te en ati e prisiri ensrefi ini a doe foe na wani foe Gado.
17, 18. (a) Foe san-ede wi kan teki wan loyaal mati gersi nanga ’oli èn switi smeri-wroko di e prisiri na ati’? (b) Fa Jezus Kristus sori taki a de wan hemel mati di e taki nanga en heri ati? (c) Sortoe persoonlek aksi wi e aksi?
17 Wan tra Odo e sori tapoe ete wan tra sani di e meki prisiri kon te a de taki: „Oli nanga switi smeri-wroko de sani di prisiri na ati, sosrefi toe na switifasi foe wan kompe foe wan sma foe na rai foe en sili ede” (Odo 27:9). Neleki oli kan wroko leki wan sani di e meki wan sani kon safoe èn switi smeri-wroko e gi prisiri foe na switi smeri foe en ede, na so wan loyaal mati di e gi rai nanga na prakseri foe gi jepi e gi na ati foe na sma di e kisi a rai prisiri. „Switi fasi” e de ini sowan matifasi, bikasi den sma di e taki nanga makandra na wan opregtifasi, kan jepi makandra foe kenki den libi ini bepaalde sani, tjari kenki kon èn kon moro tranga tapoe kontren foe na libi pe den de swaki na ini. Ia, te wan sma abi wan boen mati di e denki opregti èn di e taki nanga en heri ati, dan disi kan de wan sani di e gi prisiri.
18 Na glori, hemel Jezus Kristus de wan hemel Mati di e taki nanga en heri ati èn di ben seni bepaalde boskopoe gi den sébi gemeente di e kari ini Openbaring kapiter 2 nanga 3. Wortoe ben taki foe prijse, te disi ben fiti, ma fermane ben gi toe. Na gemeente ini Efese foe eksempre no ben abi moro langa na faja foe kristen lobi gi Jehovah di a ben abi na a bigin. Jezus ben proeberi foe wiki na lobi dati agen (Openb. 2:1-7). Ibri kristen foe Efese di ben loekoe na rai foe na hemel Mati disi ondro begi èn ben doe sani foe kenki, ben kan tan dini Jehovah nanga wan prisiri ati. Joe persoonlek e si pe joe moe kenki wan-toe sani foe bewijsi taki joe abi lobi gi Gado foe di joe e dini en tapoe wan moro betre fasi?
Prisiri ini „na santa wroko”
19. Foe san-ede meki ibriwan sma di gi ensrefi abra na Jehovah moe prati na „boen njoensoe” nanga trawan makandra?
19 Ete wan aksi de: Joe e teki nanga joe heri ati alaten èn nanga prisiri prati „na a santa wroko foe na boen njoensoe foe Gado”? (Rom. 15:16) No wan tra disiten activiteit na grontapoe kan pasa en. Ja a de wan prenspari reden gi noti moro leki na de foe na kristen gemeente! (Matt. 24:14; Matt. 28:19, 20) Ibriwan sma di ben gi ensrefi abra na Johovah, foe dat’ede moe teki prati na wan geregelde basis foe prati na „boen njoensoe”. Èn faja Kownoekondre barwrokoman foeroe tron ben abi den sortoe ondrofeni nanga blesi disi ini Jehovah dienst di e gi pai, dati dati ben troesoe den foe „bari wan prisiri babari”. — Ps. 90:14; Mal. 3:10.
20. Fa faja gemeente prékiman nanga hebi bijbel frantwortoe ben meki den prisiri ini Jehovah dienst nofotron kon moro bigi?
20 Faja gemeente prékiman nanga hebi frantwortoe foe na bijbel ben meki a prisiri foe den kon moro bigi nofotron foe di den ben meki a kwaliteit foe den dienst foe Jehovah kon moro boen. Boiti dati, son kristen osofamiri ben kisi foeroe satisfaksi foe na dienst ini kontren pe na fanowdoe foe kownoekondre barwrokoman de bigi. Trawan ini bepaalde moen foe na jari ben teki na foeroeten-wroko tapoe den, aladi trawan baka ben kan teki prati geregeld na a foeroeten diniwroko. Johovah lobi srefsrefi den sortoe opregti moeiti disi di e komoto foe na ati. — Mark. 12:39.
21. Sortoe rede foe prisiri den sma, di studeri komoto foe na Wachttoren-Bijbelskoro Gilead, abi?
21 Foeroe kristen man nanga oema ben studeri komoto foe na Wachttoren-Bijbelskoro Gilead èn a de gi den prisiri foe gebroiki den krakti foe dini Jehovah ini difrenti pisi foe grontapoe. Den e prisiri psa marki fod dd foeroeten bedinari di kan jepi foeroe sma foe leri sabi Jehovah Gado èn en wondroe prakseri. Wan foe den ben skrifi foe eksempre baka sowan twenti jari di a ben dini leki zendeling ini tropisch West-Afrika: „Mi abi now a firi taki na ten ben doro foe stop nanga na wroko disi èn meki den jongoewan teki en abra? Nono, te mi e loekoe den blesi nanga na gro foe Johovah organisati, dan disi e gi mi na firi leki di foe Kaleb, baka di fotenti-na-féfi jari langa a ben kisi kibri ini na waka psa na gran sabana èn go te ini na Pramisi Kondre. A ben taki: ’Ma ete te nanga a dé foe tide mi de nanga a srefi tranga leki tapoe na dé di Mozes ben seni mi. Soleki fa mi krakti ben de na a ten dati, a so mi krakti de now’ (Joz. 14:11). Awinsi den sani di no makriki nanga pina de, tokoe den jari di psa ben gi wan toemsi moi opleiding nanga sreka na fesi gi na ten di e kon.”
22. San de na Betheldienst, èn fa wan oema di ben kisi bigi grani ben taki foe Bethel?
22 Ete wan prisiri grani, di de gi ala sma di doro den marki, de na doe foe dienst tapoe Bethel. A wroko di e doe dja abi direkt foe doe nanga na tjari kon na doro foe boekoe di abi bijbeltori na ini èn foe meki den Kownoekondre-afersi go na fesi. Den sma di e njan boen foe na grani disi, e doe dienst ofoe leki wan pisi foe na Bethelfamiri foe na Wachttorengenootschap ini na Amerkan district New York ofoe de wan pisi foe wan srefi sortoe famiri tapoe bijkantoro na a heri grontapoe. Wan oema di ini januari 1924 ben bigin ini Zwitserland nanga en foeroeten dienst èn di de now leki wan memre foe na Bethelfamiri ini na Bondsrepubliek Doisrikondre e doe dienst, ben skrifi: „Mi wani taki Jehovah tangi foe ala en boenfasi di a ben sori mi foe di a ben gi mi wan kolokoe èn goedoe libi nanga toemsi moi okasi ini en dienst.” Ia, a de prisiri ini Jehovah dienst.
23. Fa joe kan sori nanga jepi foe a bijbel taki den sma di e poti Gado dienst ini na fosi presi ini den libi, abi rede foe prisiri?
23 Den sma di e meki na dienst foe Gado teki na fosi presi ini den libi foe troe abi alaten rede foe prisiri. A de troe taki den libi no de krinkrin fri foe den problema di foeroe sma abi foe doe nanga den. Ma Jehovah ben skraki den ini den ten foe den tesi (1 Kor. 10:13; 2 Kor. 4:8, 9). A de go boen nanga den foe di ’na prisiri foe Jehovah de den fortresi’ (Neh. 8:10). Loekoe a sani di e kon now pikinso: Mozes ’ben teki a bosroiti foe kisi wan takroe behandeling nanga na pipel foe Gado’ èn a ben kisi pai nangi bigi grani (Hebr. 11:23-29). Na Moabiet Ruth ben libi en pipel èn en gado di a ben teki na bosroiti foe dini Jehovah, èn leki paiman a ben kisi na grani foe tron wan foe den fosten mama foe Jezus Kristus (Ruth 1:14-17; 4:13-17; Matt. 1:1, 5). Foe di na respeki, grani Simeon leki na getrow, grani Anna ben broko den ede nanga na troe anbegi èn den ben de alaten ini na tempel meki den ben kisi na prisiri foe si na pikin Jezus. — Luk. 2:25-38.
24. Sortoe fundamenti wi abi ’foe prisiri ini ala den dé foe wi libi’?
24 Soboen wi kan abi na froetrow dati den moro bigi grani nanga blesi sa kon de foe wi te wi poti Jehovah anbegi nanga dienst na a fosi presi ini wi libi (Matt. 6:33). Èn srefi te wi abi foe pasa moeilekheid, dan wi sabi dati Jehovah „e meki ala wroko wroko makandra foe na boen foe den di lobi Gado” (Rom. 8:28). Foe dat’ede meki wi teki na faste bosroiti foe gi jesi na wi hemel Tata èn foe dini en nanga wan prisiri ati. Efoe wi lobi Jehovah nanga wi heri ati, dan séker wi abi boen reden foe ’bari wan prisiri babari èn prisiri ala den dé foe wi libi’. — Ps. 90:14.
Joe kan memre disi ete?
□ Sortoe toe fundamenti sani wi moe hori ini prakseri, te wi wani ’prisiri ala den dé foe wi libi’?
□ San papa nanga mama èn pikin moe doe, te prisiri wani foe de ini na osofamiri?
□ Fa kristen kan hori prisiri awinsi den doe foe ogrisma de?
□ Fa wan prisiri ati de wan blesi?
□ San de wan toe foe den prisiri grani ini Jehovah dienst, èn san wi moe doe foe dat’ede nanga wan faste bosroiti?
[Prenki na tapoe bladzijde 8]
Foe kisi kolokoe gi na osofamiri di e tan, dan papa, mama nanga pikin moe waka baka na rai di den e feni ini a Wortoe foe Gado
[Prenki na tapoe bladzijde 10]
Prisiri kan teki na presi foe sari efoe wi e doe a wani foe Jehovah getrow
[Prenki na tapoe bladzijde 11]
Jehovah getrow dienstknekti ini a ten di psa èn ini disi ten alaten ben abi rede foe ’prisiri ala den dé foe den libi’