Dini Jehovah nanga wan prisiri ati
„Dini Jehovah nanga prisiri. Kon na en fesi nanga prisiribabari.” — Ps. 100:2.
1, 2. Sortoe fasi foe si a libi e poti dja abrasé foe makandra?
„MI BEN pori mi libi èn a de toemsi lati foe mi kenki en . . . Te mi wawan e go waka koiri, dan mi e prakseri mi libi, èn mi no e prisiri kwetkweti nanga san mi ben meki foe mi libi.” Disi wan moro owroe oema ben taki, di ben kisi barinen leki wan actrice (wan sma di e pré kino ofoe komedi) èn di leki fa a gersi ben abi boen rede foe ben de kolokoe. Ma a de krin dati den wortoe dati no ben komoto foe wan prisiri ati.
2 Ma te joe loekoe na a tra sé foe disi, na situwasi foe wan séker man di e feti moro léki dritenti-na-sébi jari nanga lan. Sowan sma soleki fa a gersi ben abi pikinso rede nomo foe de nanga prisiri. Tokoe ete a de taki dati a ben feni wan sani di ’e pai troetroe èn di wani taki wan sani’.
3. (a) Sortoe persoonlek ondrofeni ben sa kan meki wi aksi wisrefi efoe wan sma de di abi troetroe prisiri? (b) San wi kan taki na prisiri?
3 Moro foeroe foe wi no abi foe feti wan langa, skin-ati stré nanga wan ofoe tra siki. Sosrefi toe wi no ben de wan sma di kisi barinen ini na heri grontapoe ini na grontapoe foe njanpré. Séker kande wi e si gewoon sma di moe kaka-foetoe gi den aladé sorgoe nanga problema foe na libi. Wi ondrofeni e sori dati ’na libisma, di gebore foe wan oema, e libi sjatoe ten èn en bere e kon foeroe nanga djoegoedjoegoe’, èn sondro degedege wi e agri dati „na heri kriatoeroe te nanga now makandra e soktoe èn e njan pina” (Joh. 14:1; Rom. 8:22). Nanga dati wawan ini prakseri, wi ben sa kan aksi ofoe na grontapoe kan meki bigi foe abi troetroe prisiri — „na firi dati foe bigi prisiri ofoe bigi kolokoe di wan boen sani ofoe wan sani di e gi satisfaksi e meki kon”. Fa joe e denki foe disi? Prisiri de foe feni troetroe?
Joe kan feni prisiri?
4. Soema de den miljoenmiljoen sma di e ondrofeni troetroe prisiri?
4 Miljoen-miljoen sma e ondrofeni wel prisiri. Foe den regtvaardiki, hemel engel, wi e kisi foe jere ’dati den e doe a Wortoe foe Gado’ nanga foeroe prisiri (Ps. 103:20). Den e dini Jehovah Gado foeroe hondro-hondro jari kaba nanga troetroe prisiri. Ia, di na grontapoe ben poti tapoe en fundamenti, dan den „mamantenstari disi ben opo wan prisiri-babari”! (Job 38:4-7). Na getrow engel di ben kon ferteri foe na gebortoe foe Jezus, séker ben abi wan prisiri wroko, bikasi a ben meki „boen njoensoe bekenti foe wan bigi prisiri”. — Luk. 2:8-14.
5. San a wan enkri gebore Manpikin foe Gado ben ondrofeni ini a tori foe prisiri?
5 Ma fa a de nanga „na wan enkri gebore Manpikin foe Gado”? (Joh. 3:18) Bifo a ben tron na libisma Jezus Kristus, a ben de a „meesterwrokoman” foe Jehovah ini hemel. Na dienst dati ben de wan prisiri wan? Ia, séker, bikasi wi e lési: „Mi ben de na sma di a [Jehovah] ben lobi dé foe dé aladi alaten mi ben de nanga prisiri na en fesi (Odo 8:22-31). Di Jezus ben de na grontapoe leki libisma, a ben abi prisiri ini na doe foe na wani foe Gado (Ps. 40:6-8; Hebr. 10:5-10). Boiti dati, „foe na prisiri di ben poti na en fesi . . . a ben tjari wan pina-oedoe, ben wisiwasi sjen èn a ben go sidon na a reti-anoesé foe na troon foe Gado” (Hebr. 12:2). Leki „na prisiri èn wan enkri maktiman”, di djonsro sa tjari kroetoe foe Gado kon na grontapoe, Jezus Kristus e dini Jehovah now séker nanga wan prisiri ati. — 1 Tim. 6:13-16; 2 Thess. 1:6-10.
6. Pe joe kan feni now prisiri?
6 We now, joe kan feni now prisiri? Ia, èn a siki-man di ben kari na fesi e ferteri fa disi kan te a e taki: „Mi ben si taki na moro bigi kolokoe e kon foe na dini foe Gado. Disi e meki na libi pai troetroe èn wani taki wan sani. Dati mi lan, no ben poeroe den grani nanga blesi di e go makandra nanga na dini foe na Mekiman na mi anoe.” Den sma di e dini Jehovah Gado wawan nanga den heri ati, e njan boen foe troetroe prisiri. Èn foe san-ede disi no ben sa de so? Den e barwroko gi ’boen njoensoe’ foe na „kolokoe Gado” — wan boskopoe di e gi tranga foe libi foe tégo na mindri foe den moro bigi blesi a ondro na tiri foe na kownoekondre foe hemel” (Matt. 24:14; 1 Tim. 1:11; Matt. 5:3). Soboen den abi ala rede foe dini „Jehovah nanga prisiri” èn ’nanga prisiri-babari kon na fesi foe en’. — Ps. 100:2.
7, 8. (a) Foe san-ede sma di e dini Jehovah srefsrefi no e de alaten nanga wan lafoefesi, aladi den de nnaga prisiri? (b) Fa a doe kon taki den problema foe a libi no e basi Jehovah pipel?
7 Disi no wani taki dati wan sma di e dini Gado wawan, alaten de nanga wan lafoefesi. Ini na onvolmaakti libisma libimakandra sontron Jehovah dienstknegti troetroe e ondrofeni sari sani (Rom. 5:12). Di Esau foe eksempre ben trow nanga den Hethiet oema „dan den ben de wan fonten foe bitafasi gi na jeje foe Izaäk nanga Rebekka (den mama nanga papa foe en di ben frede Gado)” (Gen. 26:34, 35). Boiti dati, Satan na Didibri e proberi nanga direkt ferfolgoe nanga indirekt „triki” foe pori na diri matifasi di wan kristen abi nanga Jehovah (Ef. 6:11; The Kingdom Interlinear Translation of the Greek Scriptures). Sma di lobi Gado, foe dat’ede kan froewakti dati den sa miti tapoe den libipasi foe den, moeilekheid. Tokoe den moeilekheid disi no e basi Jehovah pipel. Den e kisi „trowstoe foe den Boekoe èn den e begi nanga foeroe froetrow foe Gado jeje èn jepi te den e kweki prisiri, wan froktoe foe na jeje (Rom. 15:4; Luk. 11:13; Gal. 5:22, 23). Aladi den moeilekheid foe na libi de, tokoe den kristen kan njan boen foe a prisiri foe na santa jeje” (1 Thess. 1:6). Spesroetoe den blesi di komoto foe Jehovah e meki na prisiri dati kon.
8 Na blesi foe Jehovah e meki wan sma kon goedoe troetroe (Odo 10:22). Ma efoe joe de wan kristen, joe ben teri dan den blesi foe joe? Den kan meki joe séker „prisiri joesrefi ini Jehovah” (Ps. 32:11). Loekoe soso wantoe foe joe blesi, èn joe sa abi nofo reden foe dini Jehovah nanga wan prisiri ati.
Prisiri grani di no abi den speri
9. San a wani taki foe sabi Jehovah, èn fa disi abi foe doe nanga prisiri?
9 Na sabi èn a dini foe Jehovah de blesi di no abi den speri. Gado ben taki nanga mofo foe na proféti Jeremia: „A sma di e gafa, meki a gafa tapoe disi, dati a abi froestan èn sabi foe mi dati mi de Jehovah, na Sma di e sori lobi boenfasi, geregtigheid nanga regtvaardikifasi na grontapoe” (Jer. 9:24). A no de foe taki dati a no nofo te wi sabi nomo na nen foe Gado. Sabi Jehovah, wani taki dati wi e froestan en égifasi, en doe, fasi fa ai si sani nanga en prakseri. A wani taki dati wi e gi en jesi èn dati wi e erken en makti èn e poti wi na ondro (1 Joh. 5:3). Wan opregti stoeka foe den Boekoe èn go prakseri foe den wortoe nanga doe foe na Manpikin foe Gado, di de krinkrin ini wanfasi nanga en Tata, e meki a kan, dati wi kon tanapoe ini wan krosbé persoonlek matifasi nanga Gado (Joh. 1:18; 14:9-11). Den sma di sabi Jehovah na a fasi dati, séker de nanga prisiri. Ia, „na a sma di de boen na en fesi Jehovah ben gi koni nanga sabi nanga prisiri”. — Prék. 2:26.
10. San de na moro prenspari èn moro satisfaksi fasi fa wan sma kan gebroiki en libi?
10 Na diri goedoe foe doe „santa dienst” gi na troe Gado, de ete wan blesi pe Jehovah Kotoigi e prisiri densrefi na ini. No wan enkri sma no ben sa kan gebroiki en libi tapoe wan moro prenspari fasi èn wan fasi di e gi moro satisfaksi. Zacharias (na papa foe Johannes na Dopoeman) e tjari na afersi kon boen na ondro wortoe te a de blesi Jehovah foe di a ben gi en pipel ala den dé foe den libi „na grani foe doe dienst gi en sondro frede èn nanga loyaliteit èn regtvaardikifasi”. — Luk. 1:67-79; teki gersi Rom. 12:1; Openb. 7:9, 13-15.
11. Nanga sortoe prisiri grani na doe foe „santa dienst” foe Gado e go makandra?
11 Na grani foe de kotoigi foe Jehovah èn foe tjari en nen abi foe doe nanga na grani foe doe „santa dienst” gi Gado (Jesaja 43:10-12). Dati séker moe meki prisiri kon moro foeroe soleki Jeremia ben taki: „A wortoe foe joe de gi mi leki bigi prisiri èn prisiri foe ati; bikasi joe nen ben kari poti na mi tapoe, o Jehovah Gado foe den legre.” — Jeremia 15:16.
12. Foe sortoe kontrari sani wi kan prakseri foe den ini ten foe lasaati foe kan kisi wisrefi baka?
12 Te joe lasi ati leki dienstknegti foe Gado wawantron, dan wan sjatoe teki prakseri foe son kontrari sani kan meki wi kisi wisrefi. Foe eksempre te wi e loekoe dati den ogri engel „ben kibri poti na ondro den tégo banti ondro deki doengroe” gi na takroe kroetoe foe Gado, dan na lot foe den regtvaardiki engel di e tanapoe ini Jehovah dienst de moro prisiri (Jud. 6). Èn fa a de wan bigi kontrari a mindri a prisiri positie foe Jezus èn di foe Satan na Didibri, di tégo pori e wakti en! (Openb. 20:10, 14) Boiti dati, a sorgoe foe Jehovah nanga sarifasi nanga blesi e meki en séker makriki „foe di na difrenti na mindri wan regtvaardikiwan èn wan ogriwan, a mindri wan sma di e dini Gado èn wan sma di no e dini en” (Mal. 3:17, 18). Meki wi loekoe moro blesi ete di e gi wi boen reden foe dini Jehovah nanga wan prisiri ati.
Troe fri èn jeje leti
13, 14. Ini sortoe troe fri èn ini sortoe jeje leti Jehovah dientknegti e prisiri densrefi ini a tori foe a dini foe Gado?
13 A ferloesoe komoto foe „Babylon a Bigiwan”, na grontapoe makti foe falsi bribi, de séker ete wan blesi di e tjari prisiri kon. Troe kristen e bréti dati den no ’sa teki afoe foe en sondoe èn no sa kisi afoe foe en plaag’ (Openb. 18:2, 4). Boiti dati, Jehovah dienstknegti e njan boen foe na fri di den abi ini a tori foe na frede èn den anansitori foe falsi bribi. „Oenoe sa kon sabi na waarheid èn na waarheid sa meki oen kon fri” (Joh. 8:32). Na troe fri dati e gersi taki a de moro diri te wi prakseri foe na katibo foe den sma di de ini jeje doengroe.
14 Kontrari foeroe bakaman foe na falsi bribi, den anbegiman foe Jehovah no e boigi èn begi popki di no kan taki, si, jere, smeri, firi ofoe waka (Ps. 115:4-8). Sosrefi toe kristensma di na jejefasi kon fri èn abi leti no e frede gi den dedewan, soleki disi de nanga foeroe sma dja na grontapoe. Na falsi-kerkileri, dati libisma abi wan sill di no e dede noiti, e meki na frede disi kon dati den sma di dede ben sa kan drai kon baka foe fisiti den libiwan ofoe foe tergi den. Ma nanga jepi foe na jeje leti di komoto foe Gado meki den sortoe frede disi poeroe gwe, bika troe kristen sabi dati den dedewan „no sabi noti kwetkweti” (Prék. 9:5, 10). Fa a de moro boen foe sabi taki lobiwan foe wi di dede di e libi ini na memre foe Gado sa kisi wan opobaka! (Joh. 5:28, 29; Tori. 24:15) Den kotoigi foe Jehovah kan prisiri séker dati na hemel Tata, di den e dini ini wan-fasi ben „tjari den dipi sani foe Gado” kon na krin gi den nanga jepi foe en santa jeje (1 Kor. 2:10). Ia, a ben gi en pipel jeje leti nanga jeje waarheid di e gi den foeroe prisiri. — Ps 43:3.
Na prisiri foe jepi trawan
15, 16. (a) San ben psa di Jezus fosi discipel ben meki „den leti skijn”? (b) San kristen ini disi ten e ondrofeni te den e meki discipel?
15 A de so toe wan blesi foe kan skijn jeje leti. Jezus ben taigi en bakaman: „Oenoe de na leti foe na grontapoe . . . Meki . . . oen leti skijn gi den sma, sodati den sa si oen toemsi boen wroko èn gi oen Tata, di de ini hemel glori” (Matt. 5:14-16). San ben psa, te den fositen discipel dati ben meki „den leti skijn” nanga wortoe èn nanga den doe? Dan tra sma ben njan boen foe dati, ma sowan sortoe activiteit ben e gi den bakaman foe Kristus sosrefi toe prisiri (Luk. 10:1, 17-20; Tori. 8:4-8). Ala den prékiman disi di ben meki discipel, ben dini Jehovah séker nanga wan prisiri ati. — Matt. 28:19, 20.
16 Ini a ten disi kristen e ondrofeni wan srefi prisiri ini na wroko di de foe na meki bekenti foe na Kownoekondre boskopoe. Disi de spesroetoe so te den e feni sma di den kan jepi foe kisi wan sabi foe a waarheid foe Gado. Na apostel Paulus ben abi sowan prisiri, bikasi a ben taki dati den sma foe Filipi di a ben jepi, ben de „en prisiri èn en kron” (Fil. 4:1). Foe den sma di a ben jepi ini Thessalonika na apostel ben skrifi: „San de na howpoe foe wi ofoe prisiri ofoe kron foe prisiri — ia, a no oenoe? — na fesi foe wi Masra Jezus na a ten foe en de-noja? Troetroe oenoe de wi glori èn prisiri” (1 Thess. 2:19, 20). Ia, neleki fa a de ini na tori foe kristen ini disi ten, dan den sma di Paulus ben jepi na jejefasi, ben de wan fonten foe prisiri gi en. Span joesrefi krakti ini na dienst foe Jehovah èn ondrofeni sowan sortoe prisiri?
17. Foe san-ede a meki foe discipel e gi Jehovah kotoigi prisiri, awinsi den no e abi foeroe winimarki ini bepaalde kontren?
17 A winsi fa den bakapisi di Jehovah kotoigi e feni now ini son kontren de pikinso, tokoe a de gi den prisiri foe sabi taki den e prisiri èn prijse den Gado. Dati de srefi so te bepaalde ososma no wani foe abi Jehovah kotoigi na den doro. Jehovah dienstknegti no e lasi ati nanga dati, bika den e froestan dati na dini foe Gado de a moro moi grani di wan sma kan abi na grontapoe.
Srefi ferloesoe e gi prisiri
18. Foe san-ede kristen kan de nanga prisiri awinsi den e ondrofeni ferfolgoe?
18 Kristen e dini Jehovah nanga wan prisiri ati, aladi nofotron den e ondrofeni ferfolgoe. Jezus ben taki dati den sma di foe en nen ede e kisi ferfolgoe ben de kolokoe èn na apostel Petrus ben taki: „Tan prisiri joesrefi, foe di joe abi wan prati na a pina foe na Kristus, sodati sosrefi toe joe kan prisiri èn bréti na a ten foe na kon na krin foe en glori. Efoe foe na nen foe Kristus ede joe e kisi sjen, dan joe de kolokoe.” Foe san-ede? „Bikasi na jeje foe na glori, na jeje foe Gado de na joe tapoe” (1 Petr. 4:13, 14; Matt. 5:11, 12). Te wan sma e ondrofeni ferfolgoe foe di a de wan kristen, dan kande disi gersi a no de wan blesi. Ma efoe joe e hori doro na ondro sowan sortoe pina, dan joe abi na bewijsi dati joe abi Gado jeje nanga boen-ati — èn dati séker sa gi prisiri.
19. (. . . ?)
19 Foe di Kristen di kisi ferfolgoe abi Gado santa jeje èn den abi na krakti di Jehovah ben gi, meki den kan kibri srefi na prisiri foe den na ondro toemsi moeiliki omstandigheden (Fil. 4:13). Foeroe jari psa kaba wan jongoe kotoigi di ben kisi na onregtvaardiki kroetoe foe dede ben skrifi, komoto foe wan nazi-concentratiekampoe gi en papa nanga mama: „Mindri-neti psa kaba. Mi abi ten ete foe kenki mi prakseri. O, mi ben sa kan de oiti moro kolokoe ini na grontapoe disi baka te mi ben taki dati mi no sabi wi Masra? Kwetkweti! Ma now oen kan abi na djaranti dati mi e gwe libi na grontapoe disi ini kolokoe èn vréde.” Ia, kristen di e kisi ferfolgoe séker moe dini Jehovah nanga wan prisiri ati.
Tra reden foe prisiri
20. Sortoe krakti, demakandra nanga mede-bribiman abi tapoe prisiri?
20 Aladi Jehovah kotoigi e horidoro ondro ferfolgoe, tokoe den e ondrofeni ini na demakandra nanga den medebribiman foe den troetroe prisiri. Fa disi de wan blesi! Fa a de wan boen sani foe abi demakandra nanga opregti, waarheidgetrow kompe, di weri na „njoen égifasi” ini wan grontapoe di foeroe nanga bidrigifasi, lé, èn ogri libifasi! (Kol. 3:8-11). Moro fara a de gi sosrefi toe wan toemsi bigi satisfaksi foe sabi dati wan sma e prisiri Jehovah ati nanga en libifasi. — Odo 27:11.
21. San de wantoe foe den fasi fa wan sma kan meki den afersi foe na troe anbegi go na fesi nanga prisiri?
21 A de sosrefi toe wan blesi foe meki den afersi foe na troe anbegi go na fesi na wan prisiri fasi foe di foe eksempre, joe abi wan prati na na bow, na krin èn na jepi foe wan kristen komakandrapresi (Ex. 36:17; 2 Kon. 12:4-15). Den sortoe moeiti disi e gi wan sma séker wan prisirifasi. Èn fa wan sma kan froestan oiti krinkrin omeni waarde den blesi nanga prisiri de, di a de kisi te alaten a de komakandra nanga Jehovah pipel èn e wroko makandra nanga den ini na kotoigi wroko di Gado ben gi den. — Ps. 122:1; 1 Kor. 3:5-9.
22. San getrowfasi e tjari ini a doe foe wroko di e sori a frede foe Gado?
22 Getrowfasi ini na doe foe wroko di e sori dati wan sma frede Gado abi sosrefi toe bigi blesi leki bakapisi — na froewakti foe kisi ferloesoe èn wan ten di de na wi fesi foe prisiri ini a njoen seti foe sani di Gado pramisi (2 Petr. 3:11-13). O, fa joe abi wan difrenti a mindri den dienstknegti foe Jehovah di foeroe nanga howpoe èn den sma di „no abi howpoe èn di de sondro Gado ini na grontapoe”! (Ef. 2:11, 12). A pipel foe Jehovah kan taki séker now nanga David gi Gado: „Foe mi sé mi ben froetrow tapoe joe lobi boenfasi; meki mi ati bréti ini joe ferloesoe” (Ps. 13:5). Ia, te kristen e teri den blesi foe den, dan den e feni foeroe reden foe dini Jehovah nanga wan prisiri ati.
’Tan dini Jehovah nanga prisiri’
23. San wi moe doe na presi dati wi gi pasi dati a druk di e kon moro bigi basi wi geest?
23 Aladi den kotoigi foe Jehovah now e njan boen foe foeroe blesi, tokoe den no kan lon komoto foe na druk foe na owroe seti foe sani disi di e kon moro bigi. Den moe kaka-foetoe na tapoe den wroko, tapoe skoro nanga tra presi gi disi èn den sortoe sani disi kan meki wan sma lasi ati. Ma na presi dati wi gi pasi dati den sani disi di no switi abi krakti tapoe wi froestan èn alaten e tjari wi ini djoegoedjoegoe, meki wi e doe boen foe poti wi prakseri tapoe positief sani di kan bow wi bribi. Ia, meki wi, na presi foe wi lasi ati ofoe de nanga sari, „de nanga faja gi toemsi boen wroko” èn go prakseri foe wi blesi leki Jehovah dienstknegti (Tit. 2:14). Dan wi sa de nanga wan prisiri geest, neleki wi sidon na wan fesa-njanjan. Ini Odo 15:15 tanapoe foe disi: „Ala den dé foe na mofinawan de takroe; ma wan sma di de prisiri foe ati, abi alaten wan fesanjanjan.”
24. (a) Fa joe libi kan dini wan marki di e pai? (b) Sortoe aksi wi e aksi nanga reti?
24 A de troe dati foeroe sma no e prisiri nanga na libi foe den. Ma efoe joe lobi Gado èn è gi jesi na en èn e hori doro nanga faja ini en dienst, dan a libi foe joe abi wan marki di e tjari pai kon. Boiti dati, nanga na jepi foe Jehovah wi sa man foe hori-doro ondro den problema nanga druk foe na libi tapoe wan boenfasi. Soboen abi dek’ati èn tan warderi den blesi di Gado e gi joe te joe e dini en nanga wan prisiri ati (Ps. 100:2). Ma san de fanowdoe foe kan tan prisiri ini na anbegi foe Jehovah?
Joe kan memre den punt disi?
□ Foe san-ede den problema foe na libi no e basi Jehovah dienstknegti?
□ San a wani taki foe sabi Jehovah èn sortoe krakti disi abi tapoe prisiri?
□ Sortoe verband de a mindri a meki foe discipel nanga prisiri?
□ Fa wi kan meki a troe anbegi go na fesi nanga prisiri?