Dini Jehovah nanga wan ati foe prisiri
„Ala den floekoe disi troetroe sa kon na joe tapoe . . . foe di joe no ben dini Jehovah, joe Gado, nanga prisiri èn nanga wan ati foe prisiri.” — DEUTERONOMIUM 28:45-47.
1. Sortoe boeweisi de taki den sma di e dini Jehovah abi prisiri, awansi pe den e dini en?
DEN foetoeboi foe Jehovah e prisiri, awansi den e doe a wani foe en na hemel noso na grontapoe. Den engel „mamanten stari” ben bari foe prisiri ede di grontapoe ben meki, èn sondro misi den foeroe tindoesoen engel foe hemel ’e doe a wortoe foe Gado’ nanga prisiri (Job 38:4-7; Psalm 103:20). Na hemel, a wan-enkri gebore Manpikin foe Jehovah ben de wan „meester wrokoman” di ben abi prisiri, èn a ben feni en wan prisiri foe doe a wani foe Gado leki a libisma Jesus Krestes na grontapoe. Boiti dati, „foe a prisiri ede di ben poti na en fesi, meki a ben horidoro na wan pina-oedoe, a ben wisiwasi sjen, èn a go sidon na a reti anoe foe a kownoestoeroe foe Gado”. — Odo 8:30, 31; Hebrewsma 10:5-10; 12:2.
2. San ben meki taki den Israèlsma ben ondrofeni blesi noso floekoe?
2 Den Israèlsma ben prisiri te den ben plisi Gado. Ma fa a ben go te den ben trangajesi en? Den ben kisi a warskow: „[Den floekoe] moesoe tan na joe tapoe èn na joe bakapikin tapoe leki wan marki èn wan wondroe te ten di no abi marki, foe di joe no ben dini Jehovah, joe Gado, nanga prisiri èn nanga wan ati foe prisiri foe ala sani di a ben gi pasa marki. Èn joe sa moesoe dini den feanti foe joe, di Jehovah sa seni kon na joe tapoe, nanga angri èn nanga dreiwatra èn nanga soso-skin èn nanga wan mankeri foe ala sani; èn foe troe a sa poti wan isri tjatjari na tapoe joe neki, te leki a gi joe pori” (Deuteronomium 28:45-48). Den blesi nanga den floekoe ben sori krin soema ben de foetoeboi foe Jehovah èn soema no ben de dati. Den sortoe floekoe dati ben sori soifri toe taki sma no moesoe handri den gronprakseri nanga den prakseri foe Gado sondro lespeki, noso taki wan sma kan wisiwasi den. Foe di den Israèlsma ben weigri foe poti prakseri na tapoe den warskow foe Jehovah taki a ben sa pori den èn meki den go na ini katibo, meki Jerusalem ben tron „wan floekoe gi ala den nâsi foe grontapoe” (Jeremia 26:6). Foe dati ede, meki wi gi jesi na Gado èn njanboen foe a feni di a e feni wi boen. Prisiri na wan foe den foeroe blesi foe Gado di den sma e ondrofeni di lobi foe dini Gado.
Fa foe dini nanga „wan ati foe prisiri”
3. San na a agersi ati?
3 Den Israèlsma ben moesoe dini Jehovah „nanga prisiri èn nanga wan ati foe prisiri”. Na so a moesoe de toe nanga den disiten foetoeboi foe Gado. Foe abi prisiri wani taki „foe breiti; de foeroe nanga prisiri”. Ala di ini bijbel den e kari a troetroe ati, tokoe na ati disi no e denki noso e taki-go-taki-kon troetroe (Exodus 28:30). A moro prenspari wroko foe en na foe pompoe a broedoe di e gi njanjan na den cel foe a skin. Ma ini moro foeroe kefal, bijbel e sori go na a agersi ati, di de moro leki a presi na ini a skin pe firi foe lobi, a reide di e boeweigi sma, nanga a koni e komoto. Sma e taki dati na ati wani taki „a moro prenspari presi ini algemeen, na inisei, èn na so wan fasi a wani taki toe na inisei foe wan sma, so leki fa a sma e sori ensrefi na ini ala den difrenti wroko di a e doe, den lostoe foe en, en firi foe lobi, den firi foe en, den sani di abi en belangstelling troetroe, den prakseri foe en, a fasi fa a e denki foe sani, a man di a man si sani krin, a man di a man si ini en prakseri, a koni foe en, a sabi foe en, a bekwaamfasi foe en, san a e bribi èn fa a e taki-go-taki-kon, den sani di a e memre èn a de di a de boen na en froestan” (Journal of the Society of Biblical Literature and Exegesis, 1882, bladzijde 67). Na agersi ati foe wi abi foe doe nanga den firi foe wi, pe prisiri de na ini toe. — Johanes 16:22.
4. San kan jepi wi foe dini Jehovah Gado nanga wan ati foe prisiri?
4 San kan jepi wi foe dini Jehovah nanga wan ati foe prisiri? Wan positief loekoe nanga a warderi di wi abi gi den blesi foe wi nanga den grani di Gado gi wi, na wan sani di e jepi. Foe eksempre, nanga prisiri wi kan prakseri foe a grani di wi abi, foe doe „santa diniwroko” gi a troe Gado (Lukas 1:74). Wi abi a grani toe foe tjari a nen foe Jehovah leki den Kotoigi foe en (Jesaja 43:10-12). Na disi wi kan poti toe a prisiri foe sabi taki, te wi e doe san a Wortoe foe Gado e taki, dan wi e plisi en. Èn fa a e gi prisiri foe skèin a leti na jeje fasi èn na so wan fasi e jepi foeroe sma foe komoto na doengroe! — Mateus 5:14-16; teki gersi 1 Petrus 2:9.
5. San na a fonten foe a prisiri di e kon foe Gado?
5 Ma foe dini Jehovah nanga wan ati foe prisiri a no soso wan sani foe denki positief nomo. A boen foe de positief ini a fasi fa joe e si sani. Ma prisiri di e kon foe Gado, no de wan sani di wi e sori, foe di wi e meki wi eigifasi kon kenki. A de wan froktoe foe a jeje foe Jehovah (Galasiasma 5:22, 23). Efoe wi no abi a sortoe prisiri dati, dan a kan taki wi moesoe tjari kenki kon, so taki wi kan wai pasi gi a denki di wi e denki noso gi a handri di wi e handri na wan fasi di no gron tapoe bijbel èn di kan sari a jeje foe Gado (Efeisesma 4:30). Ma leki sma di gi densrefi ini a dini foe Jehovah, no meki wi frede taki te a prisiri foe na ati e mankeri wanwan leisi, dan dati na wan boeweisi taki Gado no feni wi boen. Wi no de volmaakti èn wi e ondrofeni pen, sari, èn srefi depressie wanwan leisi, ma Jehovah e froestan wi (Psalm 103:10-14). Foe dati ede, meki wi begi foe kisi en santa jeje, ala di wi e memre taki prisiri, a froktoe foe a jeje, na wan sani di Gado gi. Wi lobi-ati hemel Tata, sa piki den sortoe begi dati èn a sa meki taki wi man foe dini en nanga wan ati foe prisiri. — Lukas 11:13.
Te prisiri no de
6. San wi moesoe doe, te prisiri no de ini a dini di wi e dini Gado?
6 Efoe prisiri no de ini wi diniwroko, dan te foe kaba, a ben sa kan taki dati wi no de so fajafaja moro foe dini Jehovah noso taki wi e sori srefi foe no de getrow moro na en. Foe dati ede, a ben sa de wan koni sani foe loekoe na wan sakafasi na ondro begi, den reide di e boeweigi wi èn tjari kenki kon di de fanowdoe. Efoe wi wani abi a prisiri di Gado e gi, dan wi moesoe dini Jehovah foe di wi lobi en èn dini en nanga wi heri ati, sili nanga froestan (Mateus 22:37). Wi no moesoe dini en na wan fasi foe hori strei nanga trawan, bika Paulus ben skrifi: „Efoe wi e libi nanga jeje, dan meki wi tan waka na wan òrdefasi nanga jeje toe. No meki wi tron sma di e prakseri densrefi nomo, foe di wi e poesoe sma foe hori strei nanga makandra, èn e djaroesoe na tapoe makandra” (Galasiasma 5:25, 26). Wi no sa abi troetroe prisiri efoe wi e dini, foe di wi wani de moro hei moro trawan noso foe di wi e soekoe foe sma prèise wi.
7. Fa wi kan meki wan ati foe prisiri kon baka?
7 A de wan prisiri sani foe libi akroederi a gi di wi gi wisrefi abra na Jehovah. Di wi ben gi wisrefi abra na Gado ini a bigin, dan nanga faja wi ben bigin a kresten fasi foe libi. Wi ben studeri den Boekoe foe bijbel èn doronomo wi ben teki prati na den konmakandra (Hebrewsma 10:24, 25). A ben gi wi prisiri foe teki prati na a diniwroko. Ma san wi moesoe doe te a prisiri foe wi kon saka? Bijbel studie, a go di wi e go na den konmakandra, a teki di wi e teki prati na a diniwroko — ija, foe doe ibri pisi foe a kresten diniwroko — moesoe meki wi libi kon de ini balansi na jeje fasi èn moesoe meki a lobi nanga na ati foe prisiri di wi ben abi fosi, kon baka (Openbaring 2:4). Dan wi no sa de leki son sma di abi pikinso prisiri nomo èn di nofotron abi jepi na jeje fasi fanowdoe. Owroeman e prisiri foe gi jepi, ma ibriwan foe wi persoonlijk moesoe libi akroederi a gi di wi gi wisrefi abra na Gado. No wan tra sma kan doe disi gi wi. Foe dati ede, meki wi poti en leki wan marki gi wisrefi foe libi a normaal kresten fasi foe libi, so taki wi kan libi akroederi a gi di wi gi wisrefi abra na Jehovah èn abi troetroe prisiri.
8. Foe san ede wan krin konsensi de prenspari efoe wi wani foe de nanga prisiri?
8 Efoe wi wani foe abi a prisiri di de wan froktoe foe a jeje foe Gado, dan wi abi wan krin konsensi fanowdoe. So langa leki kownoe David foe Israèl ben proeberi foe kibri a sondoe foe en, a no ben firi ensrefi boen srefisrefi. Foe taki en leti, a ben gersi leki a libi foe en ben e drei gowe, èn kande a ben kon siki na skin fasi. Fa a ben de wan bigi froelekti gi en di a ben abi berow èn a ben erken en fowtoe! (Psalm 32:1-5) Wi no kan abi prisiri efoe wi e kibri wan serjoesoe sondoe. A ben sa kan meki taki wi e libi wan libi di foeroe nanga sorgoe. Foe troe, dati a no a fasi foe ondrofeni prisiri. Ma foe erken joe fowtoe èn foe abi berow, e tjari froelekti kon èn a e meki wan jeje foe prisiri kon baka. — Odo 28:13.
E wakti nanga prisiri
9, 10. (a) Sortoe pramisi Abraham ben kisi, ma fa a bribi nanga a prisiri foe en ben kisi tesi kande? (b) Fa wi kan abi wini foe den eksempre foe Abraham, Isak, nanga Jakob?
9 Wi kan abi prisiri te fositron wi e leri foe a prakseri foe Gado, ma a de wan heri tra sani foe tan de nanga prisiri te wi de foeroe jari kaba ini waarheid. Wi kan agersi disi nanga a kefal foe a getrow Abraham. Baka di a ben proeberi foe òfer en manpikin Isak foe di Gado ben gi a komando, dan wan engel ben tjari a boskopoe disi kon gi en: „’Mi e sweri na misrefi foe troe’, na so Jehovah e taki, ’dati foe di joe doe a sani disi èn joe no hori joesrefi foe gi joe manpikin, joe wan-enkri wan, meki foe troe mi sa blesi joe èn foe troe mi sa meki joe siri kon foeroe leki den stari na hemel èn leki den ai-santi di de na sekanti; èn joe siri sa teki a portoe foe en feanti abra. Èn nanga jepi foe joe siri ala nâsi foe grontapoe foe troe sa blesi densrefi, foe di joe arki mi sten’” (Genesis 22:15-18). Sondro misi, Abraham ben prisiri pasa marki nanga a pramisi disi.
10 Kande Abraham froewakti taki Isak ben sa de a „siri” di ben sa tjari den pramisi blesi kon. Ma a pasa di den jari ben pasa sondro foe wan-enkri wondroe sani pasa nanga jepi foe Isak, kan de wan tesi tapoe a bribi nanga a prisiri foe Abraham nanga na osofamiri foe en. A pramisi di Gado ben pramisi Isak so srefi èn baka ten en manpikin Jakob, ben gi den a djaranti taki a kon di a Siri ben moesoe kon, ben de wan sani gi a tamara ete, èn disi ben jepi den foe tan hori a bribi nanga a prisiri foe den. Ma Abraham, Isak nanga Jakob dede sondro foe si a kontroe foe den pramisi foe Gado, ma den no ben de foetoeboi foe Jehovah di no ben abi prisiri (Hebrewsma 11:13). Wi toe kan tan dini Jehovah nanga bribi èn nanga prisiri, ala di wi e wakti tapoe a kontroe foe den pramisi foe en.
Prisiri ala di wi e kisi froefolgoe
11. Foe san ede wi kan de nanga prisiri ala di wi e kisi froefolgoe?
11 Leki foetoeboi foe Jehovah, wi kan dini Jehovah nanga wan ati foe prisiri, ala di wi e kisi froefolgoe. Jesus ben froeklari denwan di e kisi froefolgoe foe en ede, kolokoe, èn na apostel Petrus ben taki: „Tan abi prisiri, foe di oenoe abi prati ini a pina di Krestes pina, so taki oenoe kan abi prisiri èn kan prisiri pasa marki, so srefi te a e tjari en glori kon na krin. Efoe joe e kisi sjen foe a nen foe Krestes ede, dan oenoe de kolokoe, foe di a jeje foe glori, srefi a jeje foe Gado, de na oenoe tapoe” (1 Petrus 4:13, 14; Mateus 5:11, 12). Efoe joe e horidoro ondro froefolgoe èn e pina foe regtfardikifasi ede, dan joe abi a jeje foe Jehovah èn a feni di a feni joe boen, èn dati troetroe e tjari prisiri kon.
12. (a) Foe san ede wi kan kakafoetoe nanga prisiri gi tesi na tapoe wi bribi? (b) Sortoe prenspari sani wi kan leri foe a kefal foe wan Leifisma di ben de na ini katibo?
12 Nanga prisiri wi kan kakafoetoe gi tesi tapoe wi bribi bika Gado na wi Kibripresi. Disi e kon na krin na Psalm 42 nanga 43. Foe a wán noso tra reide, wan Leifisma ben de na ini katibo. A ben misi na anbegi ini a santa presi foe Gado someni, taki a ben firi leki wan oema-dia di ben dreiwatra, di e angri foe watra ini wan drei kontren di gersi wan sabana. A „ben dreiwatra” noso ben angri foe Jehovah, èn foe a grani foe anbegi Gado ini En santa presi (Psalm 42:1, 2). A sani di a Leifisma disi ben ondrofeni, moesoe boeweigi wi foe sori warderi gi a demakandra di wi abi nanga a pipel foe Jehovah. Efoe so wan situwâsi leki a sroto di den sroto wi, foe di den e froefolgoe wi, e tapoe wi foe de nanga den foe wan pisi ten, dan meki wi go prakseri baka foe a prisiri di wi ben abi makandra ini a santa diniwroko èn begi foe wi man horidoro, ala di wi „e wakti tapoe Gado” foe a meki wi wroko baka doronomo nanga den sma di e anbegi en. — Psalm 42:4, 5, 11; 43:3-5.
„Dini Jehovah nanga prisiri”
13. Fa Psalm 100:1, 2 e sori taki prisiri moesoe de wan eigifasi foe a dini di wi e dini Gado?
13 Prisiri moesoe de wan prenspari eigifasi foe a dini di wi e dini Gado. Disi ben de foe si ini wan pokoe foe taki tangi pe a psalm singiman ben singi: „Bari wan wini babari gi Jehovah, oen pipel foe grontapoe. Dini Jehovah nanga prisiri. Kon na en fesi nanga wan prisiri babari” (Psalm 100:1, 2). Jehovah na „a kolokoe Gado” èn a wani foe den foetoeboi foe en feni prisiri, te den e doe den plekti foe den di abi foe doe nanga a gi di den e gi densrefi abra na en (1 Timoteus 1:11). Pipel foe ala nâsi moesoe prisiri srefisrefi ini Jehovah, èn den wortoe foe prèise di wi e taki, moesoe de tranga, neleki a ’wini babari’ foe wan legre di wini. Foe di a diniwroko gi Gado e kowroe wi ati, meki a moesoe go makandra nanga prisiri. Foe dati ede, a psalm singiman ben gi sma tranga foe kon na Gado fesi „nanga wan prisiri babari”.
14, 15. Fa Psalm 100:3-5 e fiti a pipel foe Jehovah di de nanga prisiri ini a ten disi?
14 A psalm singiman ben taki moro fara: „Sabi [erken] taki Jehovah na Gado. Na En na a sma di meki wi, a no wi wisrefi. Wi na en pipel èn den skapoe foe en wei” (Psalm 100:3). Foe di Jehovah na wi Mekiman, meki wi na foe en so leki fa skapoe na foe wan skapoeman. Gado e sorgoe so boen gi wi, taki wi e prèise en nanga tangi (Psalm 23). A psalm singiman ben singi toe foe Jehovah: „Kon na ini den portoe foe en nanga tangi, na ini den fesisei djari foe en nanga prèisesingi. Taigi en tangi, blesi en nen. Bika Jehovah boen; en lobi boen-atifasi de te ten di no abi marki, èn a getrowfasi foe en foe geslakti baka geslakti.” — Psalm 100:4, 5.
15 Ini a ten disi, pipel foe ala nâsi di abi prisiri, e kon na ini den fesisei djari foe a santa presi foe Jehovah foe taigi en tangi èn foe prèise en. Nanga prisiri wi e blesi Gado en nen, foe di wi e taki boen foe Jehovah ala ten, èn den moi eigifasi foe en e poesoe wi foe prèise en. En na wan boen Sma dorodoro, èn sma kan froetrow ala ten tapoe a lobi boen-atifasi foe en noso a sari-ati di a abi nanga den foetoeboi foe en, bika dati e tan te ten di no abi marki. „Geslakti baka geslakti”, Jehovah de getrow ini a sori di a e sori lobi na denwan di e doe en wani (Romesma 8:38, 39). Foe dati ede, wi abi boen reide foe „dini Jehovah nanga prisiri”.
Abi prisiri ini a howpoe foe joe
16. Ini sortoe howpoe nanga froewakti kresten kan abi prisiri?
16 Paulus ben skrifi: „Abi prisiri ini a howpoe” (Romesma 12:12). Salfoe bakaman foe Jesus Krestes abi prisiri ini a glori howpoe foe libi na hemel sondro foe man dede, di Gado ben meki den man kisi nanga jepi foe en Manpikin (Romesma 8:16, 17; Filipisma 3:20, 21). Kresten di abi a howpoe foe libi foe têgo ini wan Paradijs na grontapoe, abi wan gron toe foe san ede den abi prisiri (Lukas 23:43). Ala getrow foetoeboi foe Jehovah abi wan reide foe abi prisiri ini a Kownoekondre howpoe, bika den sa de wan pisi foe a hemel tiri noso libi ini en kontren na grontapoe. Fa dati na wan prisiri blesi! — Mateus 6:9, 10; Romesma 8:18-21.
17, 18. (a) San Jesaja 25:6-8 ben froeteri na fesi? (b) Fa a profeititori disi foe Jesaja e kon troe now, èn san de foe taki a kontroe foe en ini a ten di e kon?
17 Jesaja ben froeteri na fesi toe foe wan prisiri tamara gi a libisma famiri di e gi jesi. A ben skrifi: „Jehovah foe den feti-legre troetroe sa poti gi ala pipel tapoe a bergi disi, wan fesa-njanjan foe preti di lai nanga oli, wan fesa-njanjan foe win di den kibri na tapoe a sakasaka, foe preti di lai nanga oli èn di foeroe nanga bonjo fatoe, foe win di den kibri na tapoe a sakasaka èn di meki kon krin. Èn na tapoe a bergi disi troetroe a sa swari a fesi foe a wensre di e lontoe ala pipel èn a frekti wroko di frekti abra ala nâsi. Foe troe a sa swari dede foe têgo, èn a Soeverein Masra Jehovah troetroe sa figi den watra-ai poeroe foe ala fesi. Èn a sjen di en pipel e kisi, a sa teki poeroe foe heri grontapoe, bika Jehovah srefi taki so.” — Jesaja 25:6-8.
18 A fesa na jeje fasi di wi abi wan prati na en ini a ten disi leki anbegiman foe Jehovah, foe troe na wan prisiri fesa-njanjan. Te joe loekoe en boen, dan a prisiri foe wi de pasa marki, ala di wi e dini Gado fajafaja ini a froewakti di wi e froewakti a fesa-njanjan foe troetroe boen sani di a pramisi gi a njoen grontapoe (2 Petrus 3:13). Tapoe a gron foe Jesus en srakti-ofrandi, Jehovah sa poeroe „a frekti wroko” di e lontoe a libisma famiri, foe di Adam ben sondoe. Fa a sa de wan prisiri foe si fa Jehovah sa poeroe sondoe nanga dede! Fa a sa de wan prisiri foe gi den lobiwan di kisi wan opobaka wan switikon, foe si taki watra-ai no de moro, èn foe libi na tapoe wan paradijs grontapoe, pe a pipel foe Jehovah no sa kisi sjen, ma sa gi Gado wan piki gi a bigi spotoeman, Satan Didibri! — Odo 27:11.
19. Fa wi moesoe handri na tapoe den froewakti di Jehovah poti na fesi foe wi leki den Kotoigi foe en?
19 A no e foeroe joe nanga prisiri èn nanga tangi foe sabi san Jehovah sa doe gi den foetoeboi foe en? Ija, den sortoe bigi froewakti dati e meki taki wi e prisiri! Boiti dati, a blesi howpoe foe wi e meki wi loekoe go na a kolokoe, wi lobi-ati Gado, èn di lobi foe gi sani, nanga den switi wortoe leki den disi: „Loekoe! Disi na wi Gado. Wi howpoe tapoe en, èn a sa froeloesoe wi. Disi na Jehovah. Wi howpoe tapoe en. Meki wi breiti èn prisiri ini a froeloesoe di a sa gi” (Jesaja 25:9). Meki wi doe ala moeiti fajafaja foe dini Jehovah nanga wan ati foe prisiri, nanga a kefalek moi howpoe foe wi di poti steifi na ini wi prakseri.
Fa joe ben sa piki?
◻ Fa wi kan dini Jehovah nanga „wan ati foe prisiri”?
◻ San wi kan doe efoe prisiri no de ini a dini di wi e dini Gado?
◻ Foe san ede a pipel foe Jehovah kan abi prisiri ala di den e kisi froefolgoe?
◻ Sortoe reide wi abi foe prisiri ini a howpoe foe wi?
[Prenki na tapoe bladzijde 27]
Efoe wi abi prati na ala den pisi foe a kresten libi, dan a prisiri foe wi sa kon moro bigi