Dini Jehovah nanga prisiri

„Dini Jehovah nanga prisiri. Kon na en fesi nanga prisiri babari.” — PSALM 100:2.

1, 2. (a) Fa na si foe a wan ras moro leki a trawan ben tjari kon na fesi na ini Berlijn, Doisrikondre, ma fa na kruistocht gi wan „Doesoen Jari Tiri” ben waka? (b) Sortoe difrenti nanga 1936 ben de foe si na ini na Olympisch Stadion ini juli 1990, èn na ini san na prisiri foe na internationaal groepoe di ben kon makandra drape ben ankra?

NA TONEEL na a Olympia Stadion, Berlijn. Feifi tenti na fo jari a fesi, na moi stadion disi ben tron wan presi foe strei di nazi dictator Adolf Hitler, soleki sma e taki, ben afrontoe wan blaka Amerkan streilonman di ben wini fo gowtoe medaille. Troetroe, wan hebi klap, gi san Hitler ben taki foe „na hei di na Aris ras hei moro tra ras”!a Ma now, tapoe 26 juli, 1990, blaka, weti, geri — wan pipel di tjari kon na wán komoto foe 64 nationaal groepoe, 44.532 sma ala nanga ala — kon makandra dja gi na „Soifri Tongo”-distriktkonmakandra foe Jehovah Kotoigi. Fa prisiri ben de pasa marki na a fodewroko bakadina dati! Baka na dopoetaki, 1018 sma ben piki, „Ja” èn ete wan leisi „Ja”! foe poti krakti tapoe a gi di den gi den srefi na Jehovah Gado foe doe en wani.

² A e teki 19 miniti foe na langa rij foe den njoen Kotoigi disi waka komoto foe na stadion go na den pasi di e go na a dopoepresi. Èn na ini ala den miniti dati, krakti klòp na ini anoe ben de foe jere na ini a kefarlek bigi preigron dati. Winiman na den Olympia Prei noiti ben ondrofeni so wan klòp na ini anoe leki disi, di ben e gi wan switikon na den hondrohondro sma disi di komoto foe foeroe nationaal groepoe, di e sori na bribi di e wini na grontapoe (1 Johanes 5:3, 4). Na prisiri foe den ankra tranga na ini a froetrow taki na kownoekondre tiri dati foe Gado na ini anoe foe Krestes sa tjari troetroe wan doesoen jari foe glori blesi kon gi na libismafamiri. — Hebrew sma 6:17, 18; Openbaring 20:6; 21:4, 5.

3. Na froetrow foe den sma di ben kon na konmakandra ben poti krakti tapoe sortoe waarheid èn fa?

³ Feiantifasi foe ras ofoe nâsi no de dja, bika ala sma e taki na soifri tongo foe na Wortoe foe Gado, sotaki na so fasi krakti e poti na tapoe den wortoe foe Petrus: „Mi e si troetroe taki Gado no e loekoe sma persoon, ma ini ibri nâsi, a e teki na sma di e frede en èn di e doe reti.” — Tori foe den Apostel 10:34, 35; Sefanja 3:9.

4. Na ondro sortoe situwâsi no moro bigi pisi foe den sma di ben kon na a konmakandra ben tron bribiman, èn fa Gado ben piki den begi foe den?

⁴ Wan bigi groepoe foe den sma disi di ben go na a kongres na ini Berlijn ben tron bribiman na ini den langa jari foe kwinsi, di ben de na a pisiten foe den nazi (1933-1945) èn na pisiten foe a socialisme di ben kon baka dati na ini Owstoe Doisrikondre, pe na tapoe di lanti ben tapoe a wroko foe den Kotoigi foe Jehovah ben poeroe tapoe 14 maart 1990 na wan fasi di fiti na wet. Ma tokoe foeroe foe den „ben teki na wortoe na ondro foeroe banawtoe nanga prisiri foe santa jeje” (1 Tesalonika sma 1:6). Den abi now moro bigi fri foe dini Jehovah, èn a prisiri foe den no sabi no wan enkri skotoe. — Teki gersi Jesaja 51:11.

Okasi foe prisiri

5. Fa Israèl ben njanprei foe na froeloesoe di den ben kisi foe Jehovah na a Redi Se?

⁵ Na kon fri foe den brada foe wi na ini Owstoe Europa, èn no so langa pasa kaba na ini pisi foe Afrika nanga Asia, e memre wi na den fri di Jehovah ben tjari kon na ini fositen. Wi e memre na makti wroko foe Jehovah na a Redi Se, èn fa a singi foe Israèl foe gi tangi ben doro wan heimarki ini den wortoe: „Soema na mindri den gado de leki joe, o Jehovah? Soema de leki joe, di e sori joe srefi makti ini santafasi? Na Sma di joe moesoe frede nanga prèise singi, na Sma di e doe wondroe” (Exodus 15:11). Na ini a ten disi, wi no e go doro foe prisiri foe den wondroe sani di Jehovah e doe gi en pipel? Seiker wi e prisiri!

6. San wi kan leri foe na babari foe prisiri foe Israèl ini 537 bifo G. T. ?

⁶ Prisiri ben de pasa marki ini 537 bifo G. T. di Israèl ben tjari kon baka na ini en kondre baka na katibo na ini Babilon. Na nâsi foe Jehovah ben kan meki now bekenti, soleki Jesaja ben taki na profeitifasi: „Loekoe! Gado na mi froeloesoe. Mi sa abi froetrow èn no sa de nanga frede; bika Jah Jehovah na mi tranga èn mi makti, èn en ben tron na froeloesoe foe mi.” Fa a de wan bigi prisiri! Èn fa na nâsi ben sa sori na prisiri dati? Jesaja e go moro fara: „Na ini a dei dati seiker joe sa taki: ’Oenoe gi Jehovah tangi! Kari en nen. Meki den doe foe en bekenti na mindri den folkoe. Froeteri taki en nen poti hei. Singi gi Jehovah, bika a doe pasa marki.’” Now den ben kan „bari foe prisiri” foe meki den makti wroko foe en „kon bekenti na ini a heri grontapoe,” neleki fa den foetoeboi foe Jehovah na ini a ten disi di ben kon fri. — Jesaja 12:1-6.

Prisiri ini na wroko foe Jehovah

7. Sortoe froeloesoe ben aksi foe sma prisiri pasa marki ini 1919?

⁷ Na ini a ten disi den foetoeboi foe Jehovah ben bigin foe bari foe prisiri di na ini 1919 a ben gi den wan wondroe froeloesoe. Na tapoe 26 maart foe na jari dati, den ben loesoe memre foe na Tiri Skin foe na doengroe-oso foe Verenigde Staten pe den ben poti den na strafoe foe neigi moen ondro falsi kragi taki den soetoe faja gi sma foe meki oproeroe. Fa a ben de wan bigi fesa di ben feni presi foe gi den wan switikon baka na Brooklyn, Bethel! Boiti foe dati, ala den wan foe na salfoe fikapisi ben kan prisiri now foe di den ben kon fri na jeje fasi foe Babilon na Bigiwan, na seti foe relisi pe Satan kisi na heri grontapoe go na ini. — Openbaring 17:3-6; 18:2-5.

8. Sortoe onfroewakti tjari kon a doro foe wan boekoe ben meki bekenti na a kongres foe Cedar Point, Ohio ini 1919, èn sortoe kari foe doe wroko ben gi?

⁸ Den sani di ben e gro kon na historia sei ini 1919 ben kisi wan kownoe-ati nanga a kongres foe na pipel foe Gado di ben hori foe 1-8 september na Cedar Point, Ohio, VS. Na di foe feifi dei foe na kongres dati, „Kompewrokoman dei”, na presidenti foe na Waktitorengenootschap, J. F. Rutherford, ben taki nanga 6000 sma ini wan span lezing foe na tori „A e bariwroko gi na Kownoekondre”. Baka di a taki foe Openbaring 15:2 nanga Jesaja 52:7, a ben taigi den arkiman foe en taki wan njoen tijdschrift, The Golden Age (di sma sabi now leki Ontwaakt!), ben sa tjari kon na doro ibri toe wiki, spesroetoe foe prati ini na velddienst. Ini na bosroiti a ben taki: „Den wan di e gi den srefi dorodoro ini a dini foe Masra; den wan di de sondro frede, di den ati foe den de soifri, di lobi Gado nanga Masra Jesus nanga den heri froestan, krakti, sili èn ala san den de, soleki na okasi e gi pasi foe dati, sa prisiri foe teki prati na ini a wroko disi. Aksi Masra foe na tiri foe en sotaki a kan meki joe tron wan troe, kotrow èn boen boskopoeman. Dan, go doro foe dini en nanga wan singi foe prisiri na ini joe ati.”

9, 10. Fa Jehovah meki a tjari kon na doro foe Na Waktitoren nanga Ontwaakt! tijdschrift ben waka boen?

⁹ Na „singi foe prisiri” dati, sma ben jere na a heri grontapoe! Foeroe foe den leisiman foe wi teki prati, sondro degedege, ini a meki kon moro foeroe foe na prati foe na Ontwaakt! tijdschrift kon miti 12.980.000 eksemplaar foe ibri uitgave na ini 64 tongo na ini a ten disi. Leki wan krakti wrokosani foe tjari sma di abi belangstelling go na a waarheid, Ontwaakt! e dini leki wan konpe foe Na Waktitoren. Na ini wan kondre foe na Owstoesei, wan pionier sisa, di ben e wroko wan geregelde tijdschrift route ben kisi wan onfroewakti prisiri foe si taki ibri tron di a ben tjari den lasti tijdschrift go, na ososma ben gi wan moni di ben de a srefi leki $7 (Amerkan dala) foe na wroko foe Jehovah Kotoigi na a heri grontapoe — seiker a e sori boen warderi gi na Kownoekondrewroko!

¹⁰ Now foe di na Waktitoren tijdschrift e bigin en di foe 112 jari di a e kon na doro, meki a abi so wan 15.290.000 ini 111 tongo, 59 foe den uitgave disi e kon na doro na a srefi ten na a heri grontapoe nanga den srefi sani na ini. Leki na kotrow èn koni srafoe, na salfoe fikapisi e go doro foe gi den leisiman di ben sori tangi „den marki foe [jeje] njanjan na a reti ten” (Lukas 12:42). Na ini 1990, den Kotoigi foe Jehovah ben gi rapport taki den prati 2.968.309 njoen abonnement tapoe den toe tijdschrift, wan 22.7 procent gro abra 1989.

Prisiri de pasa marki

11. (a) Sortoe kari den ben gi na pipel foe Gado na Cedar Point ini 1922? (b) Fa na babari foe prisiri ben kon moro bigi?

¹¹ Prisiri ben de sosrefi pasa marki di na pipel foe Gado, di ben de now 10.000 ini nomroe, ben kon makandra gi na di foe toe kongres na Cedar Point, ini september 1922, nanga 361 sma di ben teki dopoe. Ini a taki foe en „Na Kownoekondre foe hemel kon krosibei”, di ben abi en gron na ini Mateus 4:17, brada Rutherford ben tjari en go na wan heimarki: „Na grontapoe moesoe sabi taki Jehovah na Gado èn taki Jesus Krestes na a Kownoe foe den kownoe èn Masra foe den masra. Disi na a dei foe ala den dei. Loekoe, na Kownoe e tiri! Oenoe na en bariwrokoman na publiki. Foe dati-ede, preiki, preiki, preiki, na Kownoe nanga en kownoekondre”. Den wan di ben bigin wan prisiri babari di ben opo na a kongres dati, gro na ini nomroe te leki ini 1989 moro leki 6.600.000 ben kon makandra na 1210 kongres foe Kotoigi foe Jehovah na a heri grontapoe, pe 123.688 ben teki dopoe.

12. (a) Na ini sortoe bigi prisiri na pipel foe Gado e teki prati ini na ten disi? (b) Fa wi e balansi na dienst foe wi gi Jehovah nanga a gi di wi e gi jesi na „den hei tirimakti”?

¹² Jehovah Kotoigi e boboi na fri foe den. Moro ala sani, den e prisiri ini na disiten kontroe foe den wortoe foe Jesus: „Èn oenoe sa sabi na waarheid èn na waarheid sa meki oenoe kon fri”. Fa a de wan prisiri foe kon fri foe den dangra dipibere tori nanga kroektoebribi foe falsi relisi! Fa a de wan bigi prisiri foe sabi Jehovah èn en Manpikin èn foe tron kompewrokoman nanga den, nanga na froewakti foe têgo libi! (Johanes 8:32; 17:3; 1 Korente sma 3:9-11) Den foetoeboi foe Jehovah e warderi en toe te den „hei tirimakti” disi foe grontapoe, di den e libi na den ondro, e respeki na fri foe den foe meki na glori howpoe foe na Kownoekondre foe Jehovah ondro Krestes bekenti. Nanga prisiri den e „pai keiser baka den sani foe keiser”, aladi na a srefi ten den e pai „Gado den sani foe Gado”. — Rome sma 13:1-7; Lukas 20:25.

13. Fa Kotoigi foe Jehovah ben sori na prisiri foe den di den kon fri foe druk?

¹³ Ma, efoe libisma tirimakti e proeberi foe skotoe den froeplekti disi na Gado, dan den Kotoigi foe Jehovah e piki so leki fa den apostel ben doe: „Wi moesoe gi jesi na Gado leki Tiriman moro leki na libisma”. Na a okasi dati, bakadi den tiriman ben loesoe den apostel, den disi „ben go den pasi . . . nanga prisiri”. Fa den ben sori na prisiri dati? „Ibri dei na ini na tempel èn foe oso-foe-oso den ben go doro sondro foe stòp foe leri sma èn foe meki na boen njoensoe foe a Krestes, Jesus bekenti” (Tori foe den Apostel 5:27-32, 41, 42). Na a srefi fasi, den Kotoigi foe Jehovah na ini wi njoenmodo ten e prisiri te den e kisi moro bigi fri foe go doro nanga a diniwroko foe den. Na ini foeroe kondre pe Jehovah opo na pasi, den e sori wan dipi prisiri foe di den e gi kotoigi finifini foe Jehovah nen èn kownoekondre di e kon ondro Krestes Jesus. — Teki gersi Tori foe den Apostel 20:20, 21, 24; 23:11; 28:16, 23.

Horidoro nanga prisiri

14. Fa na prisiri disi di de wan froktoe foe na jeje e pasa san wan wortoe boekoe e taki foe prisiri?

¹⁴ San na a dipi prisiri disi di troe kresten e ondrofeni? A de moro dipi èn moro fasti leki na prisiri di e pasa foe wan winiman na den Olympic Wega. A de wan froktoe foe na santa jeje foe Gado, di Gado e gi den sma „di e gi en jesi leki tiriman” (Tori foe den Apostel 5:32). Webster’s Dictionary e taki foe prisiri leki wan sani di „roetoe moro dipi leki feni wan sani boen, moro moi ofoe krin foe si leki breitifasi’. Gi a kresten, prisiri abi srefi moro dipi betekenis. Foe di wi ankra ini wi bribi, a de wan krakti, eigifasi di e gi tranga. „Na prisiri foe Jehovah, na joe fortresi” (Nehemia 8:10). Na prisiri foe Jehovah, di na pipel foe Jehovah e kweki, e pasa na frafra krakti di sma e kisi foe grontapoe prisiri na skinfasi krinkrin. — Galasia sma 5:19-23.

15. (a) Ini na ondrofeni foe kotrow kresten, fa horidoro ben kon moksi nanga prisiri? (b) Kari wantoe beibri tekst di e gi tranga djaranti ini na tori foe na tan hori foe prisiri.

¹⁵ Loekoe pikinso den brada foe wi na ini na Oekraine. Di na ’hei tirimakti’ ben seni doesoendoesoen foe den go na Siberia na a bigin foe den jari 1950, den ben njanpina srefisrefi. Bakaten di na tirimakti ben gi den amnesti (gi pardon foe ala strafoe), den ben de grantangi, ma a no den alamala ben drai go baka na a kondre pe den ben libi. Foe san-ede? Na wroko foe den na ini na Owstoesei ben memre den na Jakobus 1:2-4: „Loekoe en leki wan prisiri, mi brada, te joe e miti nanga difrenti tesi, foe di joe sabi taki na bribi foe joe di psa tesi e tjari horidoro kon.” Den ben wani foe tan horidoro ini na prisiri koti foe njanjan dati, èn fa a ben de wan prisiri na den kongres foe Jehovah Kotoigi na ini Polen di no so langa ben hori, foe gi den kotoigi wan switikon di kon foe den libimakandra di de boen fara ini Owstoesei na sjoro foe na Bigi Se. Horidoro èn prisiri ben go anoe nanga anoe foe meki na froktoe disi. Foe troe, wi alamala di horidoro nanga prisiri ini na dienst foe Jehovah kan taki: „Tokoe ete foe mi sei, mi sa prisiri srefisrefi ini Jehovah; mi sa de nanga prisiri ini na Gado foe mi froeloesoe. Jehovah, na soeverein Masra, na mi prenspari krakti”. — Habakuk 3:18, 19; Mateus 5:11, 12.

16. Fa den moi eksenpre foe Jeremia nanga Job moesoe gi wi deki-ati ini wi velddienst wroko?

¹⁶ Ma fa wi kan hori na prisiri foe wi te wi e preiki na mindri tranga-ede gensman? Memre taki den profeiti foe Gado ben tan hori wan prisiri loekoe sani ini den sortoe situwâsi disi. Jeremia ben froeklari na ondro froefolgoe: „Den ben feni den wortoe foe joe èn mi ben bigin njan den; èn den wortoe foe joe e tron bigi prisiri gi mi èn prisiri foe mi ati; bikasi na nen foe joe bari poti na mi tapoe, o Jehovah Gado foe den legre” (Jeremia 15:16). Fa a de wan grani foe den kari wi nanga a nen foe Jehovah èn foe preiki foe na nen dati! Wi fajafaja studeri nanga wi srefi èn a teki prati dorodoro na den kresten konmakandra e bow wi foe go doro foe e prisiri ini na waarheid. Na prisiri foe wi sa de foe si ini na fasi fa wi e tjari wi srefi ini na velddienst èn ini wi kownoekondre lafoefesi. Srefi ondro bita froefolgoe Job ben kan taki foe den gensman foe en: „Mi ben lafoe alaten nanga den — den no ben sa bribi dati — èn na leti foe mi fesi den no ben sa brokosaka” (Job 29:24). Neleki na kotrow Job, wi no moesoe kon brokosaka te gensman e lafoe wi. Tan lafoe! Na bedarifasi foe wi kan sori na prisiri foe wi èn so wi kan kisi jesi di e arki.

17. Fa horidoro nanga prisiri kan tjari froktoe kon?

¹⁷ Te wi e wroko na gebied ten na ten baka, na horidoro foe wi èn prisiri kan abi krakti tapoe sma di abi reti-ati èn kan gi den deki-ati foe ondrosoekoe na glori howpoe di wi e hori na en. Fa a de wan prisiri foe hori wan doronomo bijbelstudie nanga den! Èn te den e teki na diri waarheid foe na Wortoe foe Gado na ini den ati, fa wi e firi prisiri te den e tron te foe kaba wi konpe na ini na dienst foe Jehovah! Dan wi man foe taki, soleki na apostel Paulus ben taigi njoen bribiman na ini a ten foe en: „San na wi howpoe noso prisiri, noso kownoe-ati foe bigi prisiri — ija, a no oenoe de disi, te joe loekoe en boen? — na fesi foe wi Masra Jesus Krestes na a ten foe en denoja? Oenoe de seiker na glori nanga prisiri foe wi” (1 Tesalonika sma 2:19, 20). Foe troe, wan prisiri di e gi satisfaksi de foe feni na ini a tjari foe njoen sma kon na a waarheid foe na Wortoe foe Gado èn na ini a jepi foe den foe tron Kotoigi di gi den srefi abra, èn teki dopoe.

Prisiri di e horidoro

18. San sa jepi wi foe kakafoetoe gi difrenti problema foe na ten disi?

¹⁸ Na ini wi aladei libi, foeroe situwâsi kan aksi foe wi horidoro. Siki na skinfasi, firi brokoskin, èn tranga ekonomia ten na soso wantoe. Fa wan kresten kan hori en prisiri foe kan kakafoetoe gi den sortoe tesi disi? Disi a kan doe foe di a e go na a Wortoe foe Gado foe kisi trowstoe nanga tiri. Leisi den psalm noso arki te den e leisi den kan gi foeroe kowroe-ati ini ten foe tesi. Èn poti prakseri tapoe na koni rai foe David: „Poti joe lai na tapoe Jehovah, èn en srefi sa horibaka gi joe. Noiti a sa gi pasi foe a regtfardiki sma seki” (Psalm 55:22). Jehovah de foe troe na „Jereman foe begi”. — Psalm 65:2.

19. Sortoe froetrow wi kan abi neleki David nanga Paulus?

¹⁹ Na organisâsi foe Jehovah, nanga jepi foe den publikâsi èn den gemeente owroeman, e tanapoe alaten klari foe jepi wi, swaki libisma di wi de, foe feti nanga den problema foe wi. David ben gi rai na wan waran fasi: „Lolo den pasi foe joe poti na tapoe Jehovah, èn froetrow na en tapoe, èn en srefi sa handri”. A ben kan taki so srefi: „Wan dei mi ben de wan jongoewan, so srefi mi ben kon grani, èn tokoe mi no ben si wan regtfardiki sma di den ben libi na wan sei krinkrin, noso en bakapikin e soekoe brede”. Makandra nanga na kresten gemeente, wi sa froestan taki „na froeloesoe foe den regtfardikiwan kon foe Jehovah; en de den fortresi ini ten foe nowtoe” (Psalm 37:5, 25, 39). Meki wi waka alaten baka na rai foe Paulus: „Foe dati-ede wi no e gi abra, . . . aladi wi e hori wi ai, no tapoe den sani di sma e si, ma tapoe den sani di sma no e si. Bika den sani di sma e si, de foe wan pisiten, ma den sani di sma no e si, de foe têgo”. — 2 Korente sma 4:16-18.

20. San wi e si nanga na ai foe bribi, èn fa disi e boeweigi wi ati?

²⁰ Nanga den ai foe wi foe bribi, wi kan si na njoen seti foe Jehovah leti na wi fesi. Ija prisiri nanga blesi di no abi en speri wi sa abi drape! (Psalm 37:34; 72:1, 7; 145:16) Meki wi gi jesi na den wortoe foe Psalm 100:2 foe sreka gi na glori ten dati: „Dini Jehovah nanga prisiri. Kon na en fesi nanga wan prisiri babari”.

[Foetoewortoe]

Aksi foe loekoe san wi ben leri:

◻ Sortoe prisiri wini foe rasisme sma e si ini na ten disi?

◻ San ben meki na fositen pipel foe Gado singi èn bari foe prisiri?

◻ Fa troe prisiri ben kon moro bigi na ini den njoenmodo ten disi?

◻ Fa horidoro nanga prisiri e go anoe nanga anoe?

◻ Nanga jepi foe san wi kan hori baka gi na prisiri foe wi horidoro?