Prisiri na a heri grontapoe

„LOEKOE! Den foetoeboi foe mi sa bari wan prisiri babari foe di den abi wan boen toestand foe ati” (Jesaja 65:14). Na so Jehovah ben taki nanga mofo foe en profeiti Jesaja, èn fa den wortoe foe en abi wan toemoesi bigi kontroe a mindri Jehovah Kotoigi! Foe pe na prisiri foe den ati komoto? Foe na anbegi foe den, di den e gi Jehovah Gado na ini wánfasi. En de „na kolokoe Gado,” èn den wan di e anbegi en „abi prisiri ini Jehovah” (1 Timoteus 1:11; Sakaria 10:7). Na gi di den e gi den srefi ini a dini foe Gado nanga prisiri e tjari den kon na wán na ini wán nâsi, foedi makandra den e preiki a boen njoensoe foe a Kownoekondre èn e opo na a heri grontapoe wan babari foe prèise go na a Gado foe den. — Openbaring 7:9, 10.

„Wan prisiri di no wan sma kan teki poeroe”

A no de foe taki, taki a meki bekenti doronomo foe Gado nen de wan fonten foe prisiri gi Jehovah Kotoigi (Markus 13:10). Den e doe soleki den wortoe foe na psalm singiman e taki: „Meki bigi na ini en santa nen. Meki na ati foe den wan di e soekoe Jehovah prisiri.” — Psalm 105:3.

Foeroetron den e miti gens te den e doe disi. Na ini Spanjorokondre, Isidro ben gi en srefi abra na Jehovah, èn a ben wani foe taki foe En nanga trawan. Ma a de wan truck-rèiman nanga pikinso fri ten, di e meki langa rèis na neti èn e sribi na deiten. Isidro ben wani foe gi kotoigi na tra truck-rèiman, ma fa a ben sa doe disi?

A poti wan CB (wan sortoe walkitalki) radio na ini a truck foe en di a ben kan gebroiki foe taki nanga den tra rèiman. Esi-esi a ben feni wan kanaal di den no ben kobroiki someni, kanaal 13, èn ben teki a bosroiti foe meki kobroiki foe dati. A no de foe taki, taki di a ben aksi tra truck-rèiman foe taki nanga den foe a bijbel nanga jepi foe a CB radio, a piki foe den ben de pikinso negatief. Ma sonwan ben arki. A njoensoe ben panja, èn moro nanga moro foe den Spanjoro truck-rèiman disi ben arki kanaal 13. No so langa pasa, Isidro kon sabi taki seiker wán foe den e teki stap foe go moro fara nanga a bijbelstudie foe en.

Na ini Italiakondre wan man ben jere foe Jehovah Kotoigi nanga jepi foe wan takimakandra di a ben abi ini wan bus. Na wefi foe en ben miti nanga den nanga jepi foe wan mati. Alatoe ben studeri a bijbel èn den ben de fajafaja foe prati san den ben leri nanga trawan. Den ben de so nanga faja, taki a man ben weigri foe teki wan moro hei wroko na en wrokope èn a wefi foe en stòp nanga wan wroko di ben pai boen, sotaki den ben kan gi moro ten foe froeteri trawan foe a boen njoensoe foe a Kownoekondre. A ben warti dati? Ija. A man e taki: „Sensi wi kon sabi a waarheid, mi nanga mi wefi abi a prisiri foe jepi 20 sma foe kon kisi soifri sabi foe a prakseri foe Gado. Te neti doro, èn mi e drai kon baka na oso, baka wan dei ini Jehovah diniwroko, dan mi e firi weri, dati de troe. Ma mi e firi kolokoe, èn mi e taki Jehovah tangi foedi a gi mi na prisiri di no wan sma kan teki poeroe.”

„Na a moro farawe kontren foe grontapoe”

Den sma di de ini Gado nâsi èn di de nanga prisiri, e sori wan srefi sortoe faja awansi pe den de, srefi ini „den moro farawe kontren foe grontapoe” (Tori foe den Apostel 1:8). Foeroe presi no de, di de so fara leki a noordsei foe Groenkondre. Tokoe, srefi drape, 320 kilometer noordsei foe a Noordpool Cirkel, na pikin gemeente foe 19 sma de na ini Ilusissat. Den e preiki a srefi boen njoensoe leki a paar foe Italiakondre, èn a jari di pasa den ben abi a prisiri foe si fa seibi sma foe Groenkondre ben teki dopoe leki wan sinbôl foe a gi di den ben gi den srefi abra na Jehovah.

Na a subtropisch eilanti foe Mauritius na ini na Indische Oceaan, foeroe doesoendoesoen kilometer foe Groenkondre, Anjinee ben abi a srefi sortoe prisiri. Biginbigin sani ben de moeilek gi Anjinee. Na ini Mauritius sma no e feni en wan boen sani te wan jongoe wenke di de Hindoe e go na kresten konmakandra èn e preiki foe Gado na publiki. Ma Anjinee ben horidoro. Now, neigi jari baka a ben bigin nanga en kresten waka nanga libi, wantoe foe en famiriman e studeri so srefi a bijbel.

Nanga a tori foe Anjinee wi moesoe kari Emilio, na a tra sei foe grontapoe, na ini Honduras. Emilio ben jere fa konpewrokoman ben taki-go-taki-kon na wrokope foe a bijbel èn a ben aksi efoe a ben mag teki prati na disi. A no ben man leisi, ma a ben arki nanga prisiri te den ben leisi bijbeltekst. Di na kresten waarheid ben doro en ati, dan Emilio ben stòp nanga en hoeroedoe fasi foe libi èn ben tapoe foe dringi sopi pasa marki. Jehovah Kotoigi ben leri en foe leisi èn skrifi èn now a de wan bedinari na ini Gado nâsi di de nanga prisiri.

Doesoendoesoen kilometer noordwest foe Honduras, wan Eskimo mama na ini Alaska ben leri a srefi kresten waarheid. Na oema disi ben libi na wan dorpoe di sma no ben man doro so makriki, èn na wan enkri kontakti nanga Jehovah Kotoigi ben de nanga jepi foe brifi. Foe dati-ede a ben studeri nanga jepi foe brifi, a ben aksi den aksi foe en nanga jepi foe brifi èn now a e prati fajafaja san a sabi nanga den birtisma foe en. Eksempel leki den disi ben sa kan gi omeni tron moro sondro foe kon a wan kaba. Safri-ati sma na a heri grontapoe, e kon foe „dini Jehovah nanga prisiri.” — Psalm 100:2.

„Abi lobi a mindri makandra”

Wan sani di e hari den alamala, na a lobi di de na ini Gado nâsi di de nanga prisiri. Jesus ben taki: „Nanga disi ala sma sa sabi taki oenoe na mi disipel, efoe oenoe abi lobi a mindri makandra” (Yohanes 13:35). Wi kan si kresten lobi na ini na aladei libi foe den troe kresten disi, èn spesroetoe na ini ten foe rampoe.

Na ini wan kondre na ini Afrika pe, a sari foe taki, den stòp a wroko foe Jehovah Kotoigi, wan hebi dreiten ben de. Tindoesoen sma dede, èn heri ipi foe meti ben dede foe angri. Fa den Kotoigi ben tan na libi? Foedi den ben njan roetoe foe prani èn ben bori afkatikoko! Ma na nowtoe foe den ben kon lekti na wan toemoesi moi fasi di Kotoigi na ini tra kondre, nanga jepi foe Gado ben kisi sondro foe den ben froewakti dati, primisi foe seni moro leki 25 ton njansani foe jepi den. Ija, awansi lanti ben stòp a wroko, tokoe sroedati ben waka go nanga den sani disi foe djaranti taki den ben doro boen!

A de troe, den Kotoigi dati na ini Afrika ben de nanga prisiri pasa marki foe kisi a boeweisi disi foe a lobi, di den brada foe den abi gi den, foe di den ben ondrofeni a kontroe foe Jesaja wortoe: „Loekoe! Na anoe foe Jehovah no ben kon de toemoesi sjatoe taki a no ben man foe froeloesoe, èn en jesi no ben kon de toemoesi hebi, taki a no kan jere.” — Jesaja 59:1.

Wan pipel foe vrede

Gado nâsi di de nanga prisiri e hari so srefi den safri-atiwan kon, foe di den memre foe en ben libi a fasi fa a grontapoe disi e feti èn den ’ben naki den feti-owroe kon tron ploegoenefi’ (Jesaja 2:4). Na ini El Salvador, na oso foe wan man di fosi ben de wan sroedati, ben foeroe nanga sani di ben memre en foe na ten di a ben de sroedati. Ma di a ben bigin foe studeri a bijbel nanga Jehovah Kotoigi, a ben kweki belangstelling gi vrede. Bakaten, a ben poeroe ala sani di ben abi foe doe nanga orlokoe na ini en oso èn fajafaja a ben bigin nanga a preikiwroko.

Di legre, di ben de kontrari lanti, ben teki sani abra na ini en dorpoe, den ben kisi en — soleki fa a ben sori, dan wan sma ben froeteri taki a ben de wan man di fosi ben de sroedati. Ma a ben froeklari taki a no ben de moro langa wan sroedati ma wan Kotoigi foe Jehovah. Den revoman ben taki taki a ben abi fetisani na ini en oso, ma di den go soekoe, den no ben feni noti. Na sma di ben teki fesi gi den revoman aksi birtisma fa a ben de. Wan aparti komentaar ben de: „A e go na strati foe preiki nomo a bijbel dei foe dei.” Den ben loesoe a man. Sondro tweifri, a ben de a faja foe en di jepi en.

Wan tori foe wan kondre ini Afrika e froeteri foe toe sroedati di ben studeri a bijbel nanga Jehovah Kotoigi. A wan ben dini ini na legre foe lanti, a trawan ben feti gi den oproeroeman. Bakaten, den alatoe ben bosroiti foe „naki den feti-owroe kon tron ploegoenefi” èn den libi a sroedatiwroko. Di den ben go na den kresten konmakandra foe a fosi tron, dan a sroedati di ben de kontrari lanti aksi a trawan: „San joe e doe djaso?” A ben piki: „Èn joe, san joe e doe djaso?” „Dan”, a tori e bosroiti, „den brasa makandra, èn den krei foe prisiri ede foedi den ben kan de makandra na ini vrede.” Sondro tweifri den toe man disi di fosi ben de sroedati ben begi Gado: „Froeloesoe mi foe broedoepaiman, O Gado, a Gado foe mi froeloesoe, sotaki na tongo foe mi mag froeteri nanga prisiri foe a regtfardikifasi foe joe.” — Psalm 51:14.

„Joe ben si a nowtoe foe mi”

„Mi sa breiti èn de nanga prisiri ini joe lobi boenfasi, foe di joe ben si a nowtoe foe mi; joe ben sabi foe den kwinsi foe mi sili” (Psalm 31:7). Na so a psalm singiman ben begi, èn na ini na ten disi foeroe sma e prisiri foedi Gado Wortoe jepi den foe kakafoetoe gi den nowtoe foe den. Na ini Fransikondre wan Kotoigi foe Jehovah e lèi wan studie nanga wan oema di e pina foe schizophrenie. Na oema disi ben kisi jepi foe senwedatra wan pisiten kaba, ma disi no ben jepi. Na wiki bakadi a bigin nanga a studie, a senwedatra ben aksi: „Joe e froestan troetroe san a oema disi e froeteri joe foe a bijbel?” Soboen a wiki na baka, a Kotoigi go na a kantoro foe a datra èn ben studeri a bijbel nanga na oema aladi a datra ben de drape.

Baka a studie, a senwedatra froeteri a Kotoigi: „Foeroe jari kaba mi ben abi belangstelling gi a relisi foe den sikiman foe mi, ma mi ben si taki no wan foe den relisi disi gi troetroe jepi. Ma na ini a tori foe joe sani de tra fasi. Mevr. P — e kon dja toe tron wan wiki foe kisi datra jepi, èn a e pai mi foe disi. Tokoe, nanga joe bijbel leri èn joe boen rai, joe e doe moro boen wroko sondro foe aksi moni foe disi. A oema e go boen a fesi. Go so doro, èn joe kan de seiker taki mi sa gi joe mi jepi doronomo efoe joe oiti sa abi disi fanowdoe.”

Bijbel e taki: „Kolokoe na pipel de di sabi a prisiri babari. O Jehovah, ini na leti foe joe fesi den e tan waka. Ini joe nen den de nanga prisiri na heri dei” (Psalm 89:15, 16). Ibriwan Kotoigi foe Jehovah sabi taki na psalm disi de troe. Foe den mofo wan babari foe prisiri di e gi Jehovah prèise de foe jere na a heri grontapoe. Moro nanga moro sma e kon foe den nâsi foe prèise Gado makandra nanga den. Foe san-ede joe no e go makandra nanga den èn ondrofeni joe srefi na prisiri dati?

[Prenki na tapoe bladzijde 6]

Jehovah Kotoigi na ini Owstoe Europa e prisiri now ini na njoen fri foe den foe kisi èn foe studeri „Na Waktitoren” ini den eigi tongo