Kon foeroe nanga prisiri
„Den disipel ben tan kon foeroe nanga prisiri èn santa jeje.” — TORI FOE DEN APOSTEL 13:52.
1. (a) Sortoe froktoe prisiri de? (b) Gi sortoe prisiri seti Gado moesoe kisi glori?
PRISIRI! Na kresten eigifasi disi skrifi leki di foe toe leti baka lobi na ini san Paulus ben skrifi foe na froktoe foe na jeje (Galasia sma 5:22-25). Èn san e meki na prisiri dati kon? A de na boen njoensoe di na engel foe Gado ben bariwroko foe en gi sakafasi herder moro leki 1900 jari pasa kaba: „Loekoe! Mi e meki boen njoensoe bekenti gi oenoe foe wan bigi prisiri di a heri pipel sa njanboen foe en, bikasi wan froeloesoeman di de Krestes a Masra, kon gebore gi oenoe na ini a foto foe David.” Ne a hemel legre ben sori en srefi èn ben moksi en srefi na a engel ini a prisiri prèise foe Gado nanga den wortoe: „Glori na ini den moro hei presi na Gado, èn na grontapoe vrede a mindri sma foe boen wani.” — Lukas 2:10-14.
2, 3. (a) Foe san-ede a ben fiti taki Gado ben seni en fosi gebore Manpikin foe tron na Froeloesoeman foe na libismafamiri? (b) Na sortoe tra fasi Jesus ben dini na prakseri foe Gado aladi a ben de na grontapoe?
2 Na boen wani foe Jehovah gi libisma ben kon a fesi foe di a gi froeloesoe nanga jepi foe Krestes na Masra. Na fosigebore Manpikin foe Gado disi de ini persoon koni èn den e taki foe en taki a ben taki foe en Tata na a ten foe a meki foe sani: „Dan mi ben tron na en sei leki wan di e horidoro èn e hori wortoe, dan mi ben kon foeroe nanga bigi prisiri dei foe dei, e prisiri pasa marki na en fesi na ibri okasi; e prisiri pasa marki foe na fatoegron foe na grontapoe foe en, ija mi heri prisiri ben de nanga den manpikin foe libisma.” — Odo 8:30, 31, Rotherham.
3 A ben fiti, foe dati-ede, taki Jehovah ben seni na Manpikin disi di ben abi so wan bigi prisiri nanga den manpikin foe libisma, foe tron na Froeloesoeman foe libisma. Èn fa disi ben sa tjari glori gi Gado? A ben sa opo na pasi gi en foe doe na gran prakseri foe en foe foeroe na grontapoe nanga regtfardiki libisma di lobi vrede (Genesis 1:28). Boiti foe dati, di a ben de na grontapoe, dan na Manpikin disi, Jesus, ben sa sori ondro na moro hebi tesi taki wan volmaakti man kan gi jesi na wan loyaal fasi na Jehovah leki Soeverein Masra, èn na so wan fasi ben sa regtfardiki dorodoro na reti tirimakti foe en Tata na tapoe den Mekisani foe en (Hebrew sma 4:15; 5:8, 9). Na waka nanga libi foe Jesus foe kibri en soifri retifasi ben libi so srefi wan model gi ala troe kresten foe waka krosibei na ini den foetoestap foe en. — 1 Petrus 2:21.
4. Na horidoro foe Jesus ben abi sortoe bigi prisiri leki bakapisi, èn fa disi moesoe gi wi deki-ati?
4 Jesus ben feni prisiri pasa marki ini a doe foe na wani foe en Tata na so wan fasi, èn dati aladi a e froewakti srefi moro bigi prisiri, soleki na apostel Paulus e sori na ini Hebrew sma 12:1, 2: „Meki wi lon nanga horidoro na streilon di ben poti na wi fesi, aladi wi e loekoe boen na a Prenspari Wrokoman èn a Sma di e meki wi bribi kon boen dorodoro, Jesus. Foe na prisiri di ben poti na en fesi meki a ben horidoro ondro wan pina-oedoe, broko ai gi sjen, èn a go sidon na a reti-anoe foe na kownoe-stoeroe foe Gado.” San na a prisiri disi? Na a prisiri di Jesus abi, no wawan foe santa na nen foe en Tata èn foe bai na libismafamiri poeroe foe dede ma so srefi foe tiri leki Kownoe èn doe wroko leki Hei Priester, aladi a e meki den libisma di e gi jesi kon boen baka foe kisi libi di no abi kaba na ini wan paradijs grontapoe. — Mateus 6:9; 20:28; Hebrew sma 7:23-26.
5. Soema na den brada foe Jesus, èn ini sortoe aparti prisiri den e teki prati?
5 Ija, na Manpikin foe Gado alaten ben feni prisiri ini a dini foe na libismafamiri. Èn a ben de en prisiri foe dini nanga en Tata foe piki poeroe na groepoe foe libisma di e kibri den soifri retifasi èn di a e kari en „brada” èn di te den dede e kisi opobaka foe go na hemel. Den disi e go nanga Jesus ini wan prisiri di no abi en speri. Den froeklari den „kolokoe èn santa,” èn den „sa de priester foe Gado èn foe na Krestes, èn sa tiri na doesoen jari nanga en leki kownoe.” — Hebrew sma 2:11; Openbaring 14:1, 4; 20:6.
6. (a) Sortoe prisiri kari na kownoe e seni gi den „tra skapoe” foe en”? (b) Sortoe grani foeroe foe den skapoe disi e njanboen foe en na ini na ten disi?
6 Morofara, wan bigi ipi foe „tra skapoe”, di na Kownoe di e tiri e poti aparti na en reti anoe di e sori taki a feni den boen, e kisi a kari foe en: „Kon, oenoe di mi Tata ben blesi, go na ini a kownoekondre di ben sreka gi oenoe foe sensi na fondamenti foe grontapoe ben poti” (Johanes 10:16; Mateus 25:34). Ija, a de wan grani di e gi prisiri! Foe den sma disi di o kisi na grontapoe kontren foe na Kownoekondre leki den porsi, foeroe e teki srefi now na sei den salfoewan frantiwortoe wroko di den gi den, neleki fa Jehovah ben taki a fesi: „Freimde sma sa tanapoe troetroe èn wei den ipi foe oenoe, èn den tra kondre-sma sa de oenoe gronman èn oenoe droifidjari-man. Èn foe taki foe oenoe, den sa kari oenoe priester foe Jehovah; den sa taki joe de den dinari foe wi Gado.” Ala den sma disi makandra nanga na profeiti foe Gado, e taki: „Sondro mankeri mi sa prisiri pasa marki ini Jehovah. Mi sili sa de nanga prisiri ini mi Gado. Bika a weri den krosi foe froeloesoe gi mi.” — Jesaja 61:5, 6, 10.
7. Foe san-ede na „dei” disi de wan spesroetoe wan foe sensi foe 1914?
7 Wi e libi now ini wan toemoesi spesroetoe dei. Foe sensi 1914 a ben de na dei foe na tiri foe Krestes leki Kownoe ini hemel, di Psalm 118:24, 25 ben skrifi foe en: „Disi na a dei di Jehovah meki; wi sa de nanga prisiri èn prisiri ini en. Ke Jehovah, jepi wi grantangi! Ke Jehovah, grantangi meki sani waka boen gi wi!” A de a dei di sa doro wan heimarki te Jehovah e tjari strafoe kon tapoe den relisi foe Babilon èn e tjari na bruid foe Krestes foe 144.000 brada kon na wán nanga a hemel kownoe foe den. A heri pipel foe Gado sa „prisiri èn sa de nanga prisiri pasa marki” foe disi. Den sa prisiri toe te na Mesias Kownoe foe den e feti na Armagedon foe froeloesoe na loyaal nâsi foe en go na ini en regtfardiki njoen grontapoe (Openbaring 19:1-7, 11-16). Jehovah e gi boen bakapisi te pipel foe en e meki na prisiri howpoe disi bekenti? Na rapport di e kon now sa froeklari dati.
Gro na a heri grontapoe
8. (a) Fa prisiri nanga santa jeje de foe si na ini a rapport na tapoe bladzijde 15 foe na tijdschrift disi? (b) San na wantoe foe den heimarki foe a rapport?
8 Den disiten Kotoigi foe Jehovah „de pasa marki ini howpoe nanga krakti foe santa jeje” (Rome sma 15:13). Disi de foe si ini na tabel na tapoe bladzijde 15 te 18 foe na tijdschrift disi, pe na rapport foe Kownoekondredienst di doe na a heri grontapoe ini 1990, tjari kon a krin finifini. Fa wi e prisiri foe si wan njoen heimarki foe 4.017.213 fajafaja bedinari ini na veld! Disi e marki wan gro foe 77 procent ini den 10 jari di pasa, aladi na tjari kon makandra foe den skapoe e go na fesi esi-esi na ini 212 kondre na a heri grontapoe. Baka 15 jari, a nomroe foe sma di ben teki dopoe ben doro agen wan heimarki di noiti ete ben de — 301.518! Joe ben abi wantoe aparti heimarki ini den nomroe foe sma di teki dopoe na foeroe kongres, spesroetoe den wan di Kotoigi foe Owstoe Europa ben fisiti. A mindri den disi foeroe jongoe sma ben de, di ben boeweisi taki na socialistis froeklari no de troe, taki relisi ben sa dede makandra nanga na owroe pipel.
9. (a) Sortoe prisiri bakapisi a froekoe kweki foe pikin foe na sei foe papa nanga mama e tjari kon? (b) Sortoe ondrofenitori foe na presi pe joe de ofoe trawan e sori disi?
9 Ipi-ipi jongoesma e piki tapoe na kari foe Psalm 32:11: „Prisiri ini Jehovah èn de nanga prisiri, oenoe regtfardiki sma; èn bari foe prisiri, oenoe alamala di de opregti foe ati.” A gersi taki foeroe papa nanga mama e doe san na rai e taki foe oefen den pikin-wan foe den „foe pikin-nengre ten” kaba (2 Timoteus 3:15). Boen gebroiki e meki foe boekoe nanga cassette lolo di ben meki gi den wan di de na ini den pikin-nengre jari. Te den jongoewan disi e bigin go na skoro, dan heri esi den e gi wan moi kotoigi, soleki foe eksempel na Japan oemapikin foe aiti jari di ben skrifi: „Baka na bigi fakansi, mi go na mi juffrouw èn ben aksi en: ’Joe ben go na a grebi foe joe papa na ini a fakansi?’ A ben piki: ’Ija, mi papa ben abi toemoesi switifasi, èn mi e fisiti na grebi foe en ibri jari.’ Mi ben taki: ’Efoe joe e studeri na bijbel èn waka baka den leri foe Gado, joe sa man foe si joe lobi papa na ini wan paradijs na grontapoe.’ Dan mi ben gi en Mi boekoe nanga bijbeltori. Now ibri wiki na ini pauze, na juffrouw foe wi e leisi wan kapitel foe na boekoe disi gi na heri klas.”
10. Sortoe boen prakseri na boekoe Jongoesma e aksi ben dini, èn san na wantoe eksempel?
10 Jongoesma na ini den tini jari meki boen gebroiki foe na boekoe San jongoesma e aksi — Praktis piki (Bakratongo), ini a studeri nanga den srefi èn ini a preiki gi tra jongoewan. So srefi papa nanga mama ben warderi na boekoe disi. Wan sisa na ini Switzerland, di ben gi en nen leki wan jepi-pionier, ben bosroiti foe fisiti den papa nanga mama foe den skoro mati foe na pikin foe en. Disi ben opo wan pasi gi moi takimakandra nanga foeroe papa nanga mama, en 20 boekoe (moro foeroe Jongoesma e aksi) èn 27 tijdschrift ben libi na den. Di wan skoro-meisje na ini Trinidad ben gi a boekoe disi na en meester a skoro, dan a mama foe en ben go doro nanga a tori èn, prati 25 foe den boekoe na a groepoe foe 36 meester. A ben go doro na moen na baka foe poti spesroetoe prakseri na papa nanga mama di en srefi ben sabi, èn a ben prati 92 boekoe baka èn ben bigin njoen oso-bijbelstudie. Na ini Korea wan middelbaar skoro meester ben gebroiki na boekoe Jongoesma e aksi foe gi sjatoe lezing nanga jepi foe den takimakandra disi soleki „Fa mi kan meki den cijfer foe mi kon moro boen?” èn „Fa mi kan wroko moro boen makandra nanga mi meester?” èn dan a ben pristeri na boekoe. Bakadi studenti ben teki 39 boekoe, dan wantoe papa nanga mama ben bigin foe kragi. Ma na edemeester ben ondrosoekoe wán foe den boekoe, èn ben froeklari taki a de „toemoesi moi”, èn ben bisteri wán gi en eigi oemapikin.
Na moro moi leri
11, 12. San na wantoe sani di e kotoigi taki a de sotaki den publikâsi foe Na Waktitorengenootschap e gi na moro moi leri?
11 Foeroe sma ben warderi toe na waarde foe den tijdschrift foe wi foe leri sma, soleki foe eksempel wan skoro foe Verenigde Staten di ben bisteri 1200 Ontwaakt! foe 22 juli 1990 (di ben taki foe a de foe wan srafoe foe crack) foe gebroiki na den les foe den. Boiti foe dati, na fasi fa pikin foe Kotoigi foe Jehovah e tjari den srefi na skoro, san de leki wan eksempel e tan wroko na wan toemoesi moi fasi tapoe trawan. Na ini wan klas na ini Tailand, na juffrouw ben kari na 11-jari Racha kon a fesi na klas èn ben prèise en foe na fasi fa a e tjari en srefi, nanga den wortoe: „Foe san-ede oenoe alamala no e teki en leki wan eksempel? A de fajafaja na ini en studeri èn e tjari en srefi na wan boen fasi”. Dan na oema ben taki morofara: „We, mi denki taki oenoe ben sa moesoe tron Kotoigi foe Jehovah neleki Racha foe meki na fasi foe tjari oenoe srefi kon moro boen.” — Teki gersi Odo 1:8; 23:22, 23.
12 Wan jongoe sisa na ini na Dominican Republiek skrifi: „Di mi ben abi soso fo jari, mi ben de sofara foe over foe wan kerki josijosi-skoro, pe mi ben leri foe leisi nanga skrifi, go na wan tra skoro. Leki wan presenti, mi ben gi na non di ben de mi juffrouw a boekoe Joe kan libi foe têgo na ini wan Paradijs a grontapoe nanga na boskopoe: ’Mi de grantangi taki joe ben leri mi foe leisi nanga skrifi. Mi e winsi taki joe ben sa froestan na bribi foe mi toe èn ben sa kon abi na howpoe foe mi foe libi foe têgo na a grontapoe disi te a kon tron wan paradijs.’ Foe a sani disi meki den jagi mi poeroe foe skoro. Aiti jari na baka mi miti na juffrouw disi agen. A ben froeteri fa a ben man foe leisi na boekoe, aladi a ben kisi foeroe gens foe na sei foe na priester. A ben froisi go na a mamafoto, pe a ben man foe studeri na bijbel nanga wan Kotoigi. Makandra nanga mi a ben teki dopoe na a „Soifri Tongo”-distriktkongres. So leki ben taki na profeiti fasi, dan koni kan kon srefi „foe na mofo foe beibi”! — Mateus 21:16; Psalm 8:1, 2.
13. Fa foeroe tini e doe na tapoe na rai foe Salomo èn fa disi de foe si na ini a rapport foe na heri grontapoe?
13 Salomo ben gi na rai di e gi deki-ati: „Prisiri, oenoe jongoeman, ini oenoe jongoe jari, èn meki joe ati doe oenoe boen na ini den dei foe oenoe jongoe man dei, èn waka ini den pasi foe joe ati” (Preikiman 11:9). A de wan prisiri sani ini a ten disi foe si someni pikin foe Kotoigi foe Jehovah e doe san den wortoe disi e taki, foe gebroiki den tinijari foe den foe sreka den srefi gi wan libi foe foeroeten dienst gi Jehovah èn te den komoto fo skoro foe go na ini a moro moi wroko disi foe ala wroko. Den groepoe foe pionier e tan gro esi-esi, nanga 821.108 di ben gi rapport na heri jari. Makandra nanga den 11.092 brada nanga sisa di ben dini na ini Bethel, dan dati e teki presi gi 21 procent foe ala den preikiman!
14. Sortoe bijdrage den sisa foe wi e gi, èn sortoe prèise den fiti foe kisi?
14 A de moi foe si taki na ini foeroe kondre, soleki den Verenigde Staten, so wan 75 procent foe ala den pionier preikiman na sisa, di e meki den wortoe foe Psalm 68:11 kon reti: „Jehovah srefi e gi a wortoe; den oema di e froeteri na boen njoensoe de wan bigi legre.” Den sisa foe wi fiti foe kisi prèise foe di den e doe na moro bigi pisi foe na velddienst wroko. Na toemoesi koni fasi foe preiki foe den na den oso-bijbelstudie e tjari foeroe sma kon na a waarheid, èn trowsisa di e hori baka na wan loyaal fasi gi den trowmasra di abi foeroe gemeente frantiwortoe moesoe kisi prèise toe na wan waran fasi. — Odo 31:10-12; Efeisia sma 5:21-25, 33.
Beibri leri e abi boen bakapisi
15. (a) Fa wantoe kondre di kari na ini na rapport foe heri grontapoe de heri boen ini na oso-bijbelstudie? (b) Sortoe ondrofenitori joe kan froeteri, foe sori fa bijbelstudie kan gi froktoe?
15 Na bijbel leriwroko e abi boen bakapisi, ibri moen studie e hori na a heri grontapoe tapoe wan gemiddelde foe 3.624.091 presi. Bijbel waarheid kan kenki na sma di wan sma de, soleki den e sori na ini wan rapport foe Australia. Froekoe ini januari 1987, dan den ben seni wan man foe Australia go na wan strafoekampoe na ini Nieuw Zeeland, bakadi a ben de 25 moen na doengroe-oso foedi a ben foefoeroe èn ben meki falsi papira. A ben de wan srafoe foe drug èn ben seri den so srefi foe moro leki 17 jari. Na tra jari en wefi ben bigin foe studeri na bijbel nanga Kotoigi foe Jehovah, èn omoro na sabi foe a oema ben gro, a ben si aparti kenki ini a fasi fa na oema ben tjari en srefi. A ben tron wan moro betre wefi nanga mama. Foe di en wefi ben gi en deki-ati, meki a ben fisiti wan kringkonmakandra ini juni 1989. Now a teki wan oso-bijbelstudie, èn bigi kenki ben bigin de foe si na ini a fasi fa a tan na dorosei nanga en fasi foe libi. Ala seibi memre foe na famiri ben bigin fisiti den konmakandra. A ben teki dopoe ini januari 1990 leki wan sma di ben waka baka na toemoesi boen rai foe Paulus na ini Efeise sma 4:17-24.
16. (a) Fa den rapport foe na 1990 Memrefesa de wan fonten foe prisiri? (b) Sortoe tranga fanowdoe de foe si, èn sortoe moeiti wi moesoe meki foe gi jesi?
16 Wan toemoesi moi pisi foe na jari rapport na den heimarki ini a nomroe foe 9.950.058 sma di ben de na a Memrefesa, di ben hori toedewroko, 10 april 1990. Moro leki 70 foe den 212 kondre ben skrifi foe a nomroe foe sma di ben de dri tron moro leki na heimarki foe den preikiman foe den! Foe eksempel, aladi skotoe ben de, tokoe seibi Afrikan kondre di makandra ben abi wan heimarki foe 62.712 preikiman ben froeteri foe 204.356 sma di ben de na a Memrefesa. Den 1914 preikiman na ini a Liberia di strei ben prati, ben prisiri foe abi 7811 na a Memrefesa. Haiti, nanga wan heimarki foe 6427 preikiman, ben gi rapport foe 36.551. Den 886 preikiman na tapoe den eilanti foe Micronesia di panja foe makandra ben abi 3958. Den 1298 preikiman foe Sri Lanka ben gi rapport foe 4521 èn Zambia, nanga 73.729 preikiman, ben abi 326.991 sma di ben fisiti na Memrefesa, wan gemiddelde foe wán sma tapoe 25 sma di e libi na ini Zambia. Na rapport foe heri grontapoe e tjari kon na krin agen, taki miljoenmiljoen opregti sma de e wakti foe sma tjari den konmakandra na ini na skapoepen. Ma opregti fasi no de nofo. Wi kan meki na kwaliteit foe wi oso-bijbelstudie wroko kon moro boen èn foe jepi moro sma di ben fisiti na Memrefesa foe bow wan tranga bribi? Wi wani taki den moesoe tron wi kompe wrokoman di de nanga faja, foe prèise Jehovah. A wani taki a libi foe den! — Psalm 148:12, 13; Johanes 17:3; 1 Johanes 2:15-17.
Prisiri dorodoro
17. Sortoe fosi jarihondro eksempel moesoe jepi foe tranga na bosroiti foe wi foe hori wi prisiri steifi?
17 Awansi sortoe tesi e miti wi, meki wi teki na bosroiti foe hori faste na a prisiri foe wi. Kande wi no abi foe pasa so wan moeiliki ondrofeni leki di foe Stefanus, ma tokoe na eksempel foe en kan gi wi tranga. Aladi den ben kragi, tokoe nanga prisiri a ben man foe dwengi en srefi. Den feianti foe en „ben si taki na fesi foe en ben de leki na fesi foe wan engel.” Gado ben tanapoe na en sei na ini a hebi tesi foe en. A ben kotoigi fri èn sondro frede, foe di a ben „foeroe nanga santa jeje” te na en dede foe en bribi ede. Di Paulus nanga Barnabas ben drai go na den nâsi nanga na preiki foe den, den disi toe „ben bigin foe prisiri èn foe gi na wortoe foe Jehovah glori.” Froefolgoe ben opo kon agen. Ma a no ben meki den wan di ben e bribi lasi-ati. „Den disipel ben go doro foe kon foeroe nanga prisiri èn santa jeje” (Tori foe den Apostel 6:15; 7:55; 13:48-52). Awansi san den feianti foe wi e doe nanga wi, awansi den aladei tesi foe wi na ini wi libi, noiti wi moesoe meki na prisiri foe wi foe santa jeje kon kowroe. Paulus e gi rai: „Prisiri ini na howpoe. Horidoro na ondro banawtoe. Horidoro na ini begi.” — Rome sma 12:12.
18. (a) San na a Njoen Jerusalem, foe san-ede na pipel foe Gado moesoe prisiri nanga en? (b) Fa „njoen hemel èn wan njoen grontapoe” sa blesi na libisma famiri?
18 Fa na howpoe dati de toemoesi moi! Gi ala sma foe na pipel foe en, Jehovah e froeklari: „Loekoe, mi e meki njoen hemel nanga wan njoen grontapoe; èn den fosi sani no sa kari kon na ini prakseri, èn den no sa kon na ini na ati. Ma prisiri pasa marki èn de nanga prisiri foe têgo gi san mi e meki.” Krestes na Masra makandra nanga na „Njoen Jerusalem” (now na mamafoto foe na hemel organisâsi foe Gado, „na Jerusalem foe tapoesei”) èn na njoen grontapoe maatschappij na grontapoe sa tjari prisiri pasa marki gi na libismafamiri (Galasia sma 4:26). Opobaka foe den dedewan foe libisma, na opo foe ala den wan di ben gi jesi foe kisi têgo libi ini libisma volmaaktifasi, wan têgofasi foe boen, èn krakti libi na wan paradijs grontapoe — fa disi de wan toemoesi moi howpoe èn wan sani di e meki sma e prisiri pasa marki! Foedi Jehovah srefi e feni „prisiri ini Jerusalem èn e prisiri pasa marki na ini a pipel foe en’, na so a profeiti foe en e meki na tra kari go na a pipel foe Gado: „Prisiri nanga Jerusalem èn de nanga prisiri nanga en, oenoe alamala di lobi en. Prisiri toemoesi nanga en” (Jesaja 65:17-19; 66:10; Openbaring 14:1; 20:12, 13; 21:2-4). Meki wi foeroe alaten nanga prisiri èn santa jeje aladi wi e gi jesi na a froemane foe na apostel Paulus: „Prisiri alaten na ini Masra. Ete wan leisi mi sa taki, prisiri!” — Filipi sma 4:4.
Loekoe sjatoe na prisiri foe wi:
◻ Sortoe model foe horidoro nanga prisiri Jesus libi gi wi?
◻ Sortoe reide foe prisiri toe groepoe di gi den srefi abra abi?
◻ Fa jongoewan nanga owroewan e prisiri pasa marki ini na waarheid na ini a ten disi?
◻ Te wi loekoe na 1990 rapport baka, dan sortoe piki e gi now tapoe na begi, „Jehovah, grantangi meki sani waka boen”?
◻ Oten èn fa sma sa kisi prisiri dorodoro?
[Raportoe na tapoe bladzijde 15-18]
1990 DINIWROKO RAPORTOE FOE JEHOVAH KOTOIGI NA HERI GRONTAPOE
(Loekoe a tijdschrift)
[Prenki na tapoe bladzijde 13]
Na engel foe Jehovah ben meki na geborte foe Krestes na Masra bekenti leki „boen njoensoe foe wan bigi prisiri”