Kompe wrokoman na ini a koti wroko
1. Fa wi kan si hebi vervolgoe foe wi wroko?
A NO altijd na koti wroko e pasa na wan makriki fasi ofoe dati ala sani e waka boen, ma hori-doro de vanoodoe. Na som presi, tranga oposisi e kom, ma na prinspari sani de dati na koti wroko e go doro. Ervaring e sori foeroe tron dati tangi foe na oposisi a kom dati som soema go loekoe na situati na wan tra fasi, soema di kande na wan tra fasi no bo habi belangstelling gi Getoigi foe Jehovah. Na a kaba foe na verslag foe na jaarboek foe Getoigi foe Jehovah 1978, dem e kari wan groepoe foe 18 tra kondre leki wan, kondre pe joe habi oposisi. En na ini dem 18 kondre disi wawan joe ben habi 9673 soema di teki dopoe, na ini na jari di pasa.
2. Soortoe hebi vervolgoe dem knegti foe Gado ben miti na ini na tem foe Nehemia en fa dem kaka foetoe gi disi?
2 Wroko, ja tranga wroko, nanga hebi oposisi, no de wan njoen sani gi dem knegti foe Jehovah. A de now now net soleki a ben de na ini dem dei foe Nehemia, di dem ben wroko faja faja na a bow foe na skotoe foe Jeruzalem en di dem volkoe di ben lontoe dem hopo wan moro hebi oposisi, dati dem meki wan mofo foe feti nanga na foto. Nehemia e taki: „En dem bow-man foe na skotoe nanga dem di ben e tjari lai leki sjow-man, alamala foe dem ben doe na wroko nanga wan hanoe en na tra hanoe ben hori na speer foe trowe ala dem bowman di ben habi dem feti ouroe na dem mindri, aladi dem ben e bow en na wan di ben e bro toe-toe ben e tanapoe na ini see”. — Neh. 4:17, 18.
3. (a) Fa na pipel foe Gado ben habi wan boen „ati foe wroko” na ini na tem dati? (b) Na soortoe fasi na profetsi foe Jesaja e gi wi dikhati na ini na tem disi toe?
3 Na ini na srefi kapitel disi vers 6 e taki: „Na pipel ben tan habi wan ati foe wroko.” Wi sabi na kibri tori foe so wan boen ati kondisi? Moro fara na ini Neh. 8:10 joe e feni hem: „Bika na prisiri foe Jehovah de joe kibri presi”. Dati dem kan taki foe wi toe na ini na tem disi, a no so? Disi no e memre wi na dem woortoe di Jehovah ben taki nanga jepi foe hem profeet Jesaja di a ben sori tapoe na kinki di de na mindri foe na troe en falsi knegti: „Loekoe. Mi knegti sa habi prisiri, ma joe sa habi sjem. Loekoe. Loekoe mi knegti sa hopo wan prisiri-babari, foe na boen ati kondisi foe dem, ma joe sa bari foe di joe sa habi pijn na ati en joe sa krei foe di joe habi wan broko jeje?” Jehovah go doro nanga dem woortoe: „Bikasi loekoe, mi e meki wan njoen hemel nanga wan njoen grontapoe . . . Ma habi bigi prisiri e breeti foe teego foe san mi e meki. Bikasi loekoe mi e meki gi Jeruzalem wan rede foe breti en hem pipel wan rede foe habi bigi prisiri.” — Jes. 65:13-18.
WROKO NANGA PRISIRI NANGA NA WOORTOE FOE GADO
4. Soortoe sani Jehovah sreka sodati wi kan de prisiri-wroko man?
4 Troe troe wi habi ala rede foe de prisiri wroko man. Wi habi na blesi foe Jehovah. Wi habi na jeje foe Jehovah, en „prisiri” de wan pisi foe froktoe foe na jeje dati (Gal. 5:22). Fa a de wan prisiri foe gebroiki na „feti howroe” disi foe preeki na „boen njoensoe” gi trawan. Dem troe tori di e kom now e sori disi.
5-7. Na soortoe fasi na blesi foe Jehovah kon krin na fesi na ini na ervaring nanga na waarheid-boekoe?
5 ’Wan dei, di wi e ben wroko hoso foe hoso, mi preeki-patna nanga mi miti wan jongoe oema di ben sori wan pikien belangstelling foe wi bijbel-taki en di teki na boekoe „De waarheid die tot eeuwig leven leidt” (waarheids boekoe) a ben habi ala soortoe aksi. Leki wan piki tapoe dem aksi wi poti hem prakseri tapoe na bijbel. A ben harki boen san na bijbel ben taki foe hem aksi. Foe di hem nanga hem masra ben de foe go na reis wi meki wan mofo foe kom baka na oso. Ma di wi ben de foe libi na oso, hem masra ben e rij e kom na ini na prasi. Mi dege dege foe wan momenti san foe doe en dan mi teki na besroiti dati a ben sa de moro boen foe taki now nanga hem, foe na habi problema baka tem. Sjatoe wi verteri foe san ede oen ben kom en wi taigi hem taki hem vrouw teki wan jepi foe studeer na bijbel en dati nanga prisiri wi ben sa wani foe kom baka na wan tra tem foe go moro fara nanga na taki-makandra foe na bijbel. Na piki foe hem ben switi srefi srefi, a taki dati hem nanga hem vrouw no ben sabi foeroe foe na bijbel, ma dati dem ben sa wani disi nanga prisiri.
6 Di mi masra nanga mi go baka tapoe na fosi satra na ini juni, dem taki wi odi nanga switi fasi en oen ben habi wan toemsi switi taki-makandra. Na a tra visiti foe wi oen jere dati ala toe ben lesi na Waarheid boekoe te na a kaba en dati dem ben habi wan heri blad foe aksi. Na wiki na baka foe na fosi tron dem kom na tapoe na publiki-taki nanga na Wachttoren-studi. Sjatoe tem na baka dati dem skrivi dem nem na tapoe na Theocratisch-skoro. Bifo dem bigin kom srefi tapoe ala kommakandra, dem ben bigin kaba foe tjari bigi kenki kom na ini dem libi, dem tapoe na tabaka gwenti en dem poti wan punt na baka dem grontapoe-mati. Dem leri dem pikin foe toe jari foe sidom pi na tapoe kommakandra en wan moen na baka dem ben bigin foe go tapoe ala kommakandra, dem ben prisiri nanga wi na ini na preeki-wroko. Wan 3 moen so na baka ala toe teki doopoe en ala tem dem e kisi moro grani na ini na gemeente.
7 Wan sani di foeroe foe wi miti kaba de dati wan soema e reageer esi en boen, ma na baka dati hem belangstelling e flouw, dat meki a no hebi foe verstan dati na ini na bigin na prakseri dati kom na ini mi. Ma na baka na di foe toe visiti, di a kom na krin dati ala toe ben habi na tranga lustoe foe dini Gado, dan mi nanga mi masra doro na bosroiti, dati no wan dege dege no de dati engel e tiri na wroko foe Jehovah na ondro na tiri foe Jezus. Di wi aksi dem foe san ede dem ben reageer so boen tapoe san wi verteri dem foe na boen njoesoe, dem piki: „Disi kom foe na bijbel”. Di dem si hem na ini na bijbel, dem ben sabi taki a ben troe; en dati meki dem ben doro na besroiti . . . Foe sainde wi sa wakti? Dem no ben wani foe tan na baka, en nanga dati dem no lasi tem. Jezus ben taki hem: „Mi sabi mi skapoe en mi skapoe sabi mi”.
POTI TRANGA TAPOE NA TEMA FOE NA BIJBEL
8, 9. Fa wi kan meki boen gebroiki foe na bijbel te wi e gi getuigenis?
8 Di wan tra getoigi nanga mi ben e go foe oso foe oso, wan oema soema kari wi kom na ini en wi bigin foe taki nanga hem foe na „boen njoensoe” aladi wi aksi hem foe teki hem egi bijbel. Foe di a verteri dati a ben lesi na bijbel foeroe tron kaba en dati a ben e go na wan kerki, wi aksi hem efoe a ben si kaba san ben de na tema foe na bijbel. Oen lesi makandra Jesaja 9:6, Daniël 2:44, Matth. 6:10, en so moro fara. Dan wi ben aksi efoe a ben kan si now san ben de na tema foe na bijbel, a piki taki: „Ja, dati na a koonoekondre.” Baka dati wi lesi teksi di e verklaar san sa de dem blesi foe na koonoekondre rigeri tapoe na grontapoe. A moesoe de so dati wi tan drape moro leki wan joeroe. Di wi kari hem foe na lezing foe na sonde dati a taki efoe a bo teki na besroiti foe kom, dati a ben sa man foe kom hem wawan.
9 En foe troe. Bijna mi no ben man foe bribi mi ai di mi si hem na mamantem dati tapoe na kommakandra en a ben waka krosibei foe 5 kilometer foe hem oso na a koonoe-kommakandra presi. A tan na a heri progamma en a ben wani foe go doro nanga wi taki-makandra. Oen sreka sani foe wan studi nanga hem na ini na boekoe „Goed nieuws dat u gelukkig kan maken” (Boen njoensoe di kan meki joe kolokoe). Na moro mooi sani nanga na vrouw disi ben de dati te nanga na momenti dati a ben tegen na waarheid sref-srefi. Di wi e waka go na hem oso, na sisa di ben de nanga mi ben e prakseri ete fa na oema disi ben tegen na boskopoe. Disi a sori dati a de so troe dati libisoema e kenki.
NANGA JEPI FOE NA JEJE FOE GADO
10. Fa na bijbel e taki foe na makti foe Jehovah? (Jes. 46:9-11)
10 Na jeje foe Jehovah habi krakti te ai wroko. Ai taki foe hemsrefi leki na Mekiman foe ala sani di wi e si te wi hopo wi ai go na hemel, a taki: „Foe di a habi dynamisch krakti te a pasa en foe di a tranga na ini krakti, no wan foe dem no e mankeri.” Na apostel Paulus e verteri toe foe na wan verwondroe sori foe na krakti foe Jehovah, „Na magti foe hem tranga, di a meki wroko na ini Kristus, di a wiki hem komoto foe dede (foe no-de) en di a meki a sidon na hem reti hanoe see na ini hemel, moro hee . . . (leki ala tra sani), no wawan foe na seti foe sani disi, ma ooktoe foe na wan di e kom”. — Jes. 40:26; Ef. 1:19-21.
11. Fa Openb. 11:7-12 e taki na a srefi fasi disi foe wan mooi en onverwakti sani de pasa na ini wi tem?
11 Efoe wi loekoe moro na ini wi egi tem, dan wi e si dati na ini na froekoe drei tem foe 1918, na salvoe fika-pisi ageersi nanga toe getoigi, ben kisi wan dede naki foe na politiek „wilder meti” foe Openb. 11:7, sodati wan kaba kom na a wroko foe gi getuigenis di ben orga, aladi ala dem memre foe na Tiri-Pisi foe dem getoigi foe Jehovah di ben e gi tiri, ben sroto na ini doengroe oso foe 20 jari, baka wan haasti falsi kroetoe. Na ini na ai foe dem vijanti dem ben de leki dede-skin di no ben beri. Ma san pasa dan? Wan sani di dem no ben verwakti. Bika wan sjatoe ageersi-fasi „drie dee nanga halvoe” na ini na lente foe na jari 1919, „na libi-jeje foe Gado (na srefi libi-jeje di ben wiki Kristus komoto foe dede) go na ini dem (dem toe getoigi) en dem go tanapoe tapoe dem foetoe. En dem jere wan tranga stem komoto foe hemel taki nanga dem: ’Hopo kom djaso’ . . . En dem hopo go na hemel,” na fesi foe ala soema aladi dem kom boen baka na ini na boen-ati foe Gado en alasi dem ben kisi baka wan njoen jeje libi en wroko krakti. — Openb. 11:7-12.
12. Na soortoe sani di sreka, dem knegti foe Jehovah kan poti dem vertrouw alatem en fa disi e wroko?
12 Na santa jeje ofoe na wroko krakti foe Gado nooiti e komoto foe dem knegti foe Jehovah di gi dem libi abra. Jezus ben taki foe hem hemel Tata di alatem de klari foe gi hem santa jeje, na dem di e aksi hem, en na a jeje dati di e jepi wi foe tan prisiri-wroko-man. (Luk. 11:13). A de soleki Jezus ben taki: „Aksi en joe sa kisi, foe na prisiri foe oen moe de wan reti prisiri” (Joh. 16:24). Wroko makandra nanga na santa jeje dati en vertrouw na hem tapoe. Paulus skrivi foe disi di a taki: „Foe ala sani mi habi na krakti nanga jepi foe na wan di e gi mi krakti” (Fil. 4:13). En prakseri pikinso san a taki na ini Rom. 8:11: „En efoe na jeje foe Gado, di ben wiki Kristus na dede, e libi na ini oen, dan na srefi (Gado), di ben wiki Kristus na dede, sa meki oen dede skin kisi libi toe, foe di hem jeje e libi na oen ini.” Fa disi e gi wi wan bigi vertrouw.
13. Soema, boiti dem di habi wan hemel hoopoe, kan teki prati moro na ini dem sani di Jehovah sreka, en kan habi prisiri na ini disi?
13 Aladi a de so troe taki som wan foe dem tekst disi habi spesroetoe krakti tapoe dem di habi wan hemel hoopoe, dem jeje Israël soema, na woortoe foe Gado e taki toe foe wan bigi hipi trawan, di soso na wan ageersi fasi ai kari dem „dorosee soema”, ma di e kisi na kari toe foe de prisiri wroko-man. „En dem dorosee-soema di kom na see Jehovah foe dini hem en foe lobi na nem foe Jehovah, foe tron knegti gi hem (en foe wroko gi hem) . . . dem dati mi wani tjari toe tapoe mi santa bergi en gi dem prisiri toe na ini mi oso foe begi. Bikasi dem sa kari mi oso wan oso foe begi gi ala volkoe.” — Jes. 56:6, 7.
KOMPE WROKOMAN FOE GADO NANGA KRISTUS
14. Wan tem kan de dati wi moesoe firi dati wi e doe na wroko wi wawan?
14 Fa ai gi wi dikhati foe sabi wi no e doe wi wroko wi wawan. A de so leki Jezus ben taki hem na wan gi kari-fasi: „Kom na mi oen alamala, di weri en di lai nanga hebi, mi sa meki oen kisi kouroe ati. Teki na tjatjari foe mi na oen tapoe (voetnoot na ini na njoen Engelse uitgave foe 1971: „Kom nanga mi ondro mi tjatjari”) en tron mi discipel, bikasi mi habi wan safri-ati en wan reti zakkafasi, dan oen sa feni rustoe gi oen zieli. Bikasi na tjatjari foe mi safoe en na lai foe mi likti.” — Matt. 11:28-30.
15. Na soortoe fasi dem opziener foe na pipel foe Gado moesoe gi boen tiri?
15 Wi alamala moesoe habi na srefi jeje disi — na jeje foe wroko makandra nanga Jehovah nanga hem Manpikin. Dem ouroeman e si na exempel di Jezus ben gi en dem moesoe teki fesi na ini na wroko makandra nanga trawan, spesroetoe na ini na oso-foe-oso wroko. Fa a de wan prisiri te na jeje disi de foe si. Paulus ben taki nanga dem Filipi-soema nanga dem woortoe disi: „Dan meki mi kan habi prisiri toe foe di oen alamala e akroederi makandra en sori na srefi lobi, . . . No doe wan sani foe stree ede, efoe foe kisi bigi nem, ma nanga zakkafasi wan moe loekoe trawan moro hee leki hemsrefi” — nanga safri-fasi, zakka-fasi. — Fil. 2:2, 3.
16, 17. Soortoe dikhati wi kan kisi te wi e doe dieni-wroko na a moro faja pisi foe na dee?
16 Fa dem knegti foe Gado e kisi wan wondroe zeegi efoe dem e dieni nanga srefi jeje foe offer hemsrefi leki Jezus ben sori. Foe troe dem e tron prisiri wroko-man soleki fa dem exempel disi e sori.
NA A MORO FAJA PISI FOE NA DEE
17 Mi oema nanga mi nanga wan toe tra-getoigi ben de na ini na dieni-wroko, na a moro faja pisi foe na dee. Wan oso nomo ben libi ete en mi oema go dape. Dem fosi woortoe foe hem na a oema-pikin di ben kom na a doro ben e go over dem grontapoe-toestand foe wi tem en a aksi hem efoe a prakseri taki wan soema ben kan loesoe dem grontapoe-problema. Na jongoe-dame disi piki dati a de wan vreemde sani dati mi oema e poti so wan aksi, foe di hem nanga hem mama pas pas ben kaba sidon taki foe na tori dati. Mi oema bigin wan studi wantron wantron en foe di wi e visiti drape nomo, a gi na studi na wan tra sisa. A no langa di wi jere dati a no na meisje disi wawan ma dati fo trawan nanga soema a ben habi foe doe, gi dem abra na Jehovah leki wan baka pisi foe na di foe laatste visiti tapoe wan faja bakadina
PRISIRI FOE NA PIONIERWROKO
18-22. Foe soortoe winimarki dem ala tem-knegti e njam boen en soortoe egi-fasi spesroetoe dem habi fanoodoe? (Fil. 3:16)
18 Mi ben moesoe foe skrivi oenoe, omeni prisiri mi ben habi na ini mi velddienst. A de troe troe wan prisiri foe pionier, spesroetoe dem moen di pasa de. Mi e si na (kenki na ini dem joeroe) leki wan blesi foe Jehovah . . . Foeroe foe dem brada nanga dem sisa e seti dem afeersi so dati wi kan wroko makandra na ini na dieni-wroko. Mi e si na mi srefi dati mi no e broko mi ede nanga na joeroe. Mi e fenni hem wan switi sani foe prakseri foe mi go-baka nanga bijbelstudi.
19 Jehovah gi mi ete wan zeegi na ini na fasi dati a gi mi wan bijbelstudi di e go na fesi. Nanga prisiri mi e wani verteri oenoe na ervaring disi. Wan satra-mamantem na ini na moen foe juli, mi ben e wroko oso-foe-oso. Dem kari mi kom na ini see na wan foe dem oso en aladi wi ben e taki foe na bijbel, Carol, na buurvrouw kom na ini. Di a si taki wi ben de Getoigi foe Jehovah, a ben wani foe sabi wantem wantem san wi e bribi, foe di, soleki a ben taki, a ben soekoe na troe fasi foe dieni Gado, ma dati a no ben feni hem ete. Mi si dati a ben de opregti, dus mi meki wan mofo foe kom na hem oso en foe sori hem fa a kan studeeri na bijbel.
20 Wan moen pasa fosi mi miti hem baka; na lesi disi a ben de na ini wan winkri foe wan man di e seri groentoe. Mi aksi hem foe tjari hem go na oso en mi aksi hem efoe a ben wani foe studeer na bijbel ete, en efoe a de so, o tem mi ben kan miti hem na oso. Wan toe wiki na baka mi miti hem na hem oso en wi studeer toe joeroe langa; a ben habi foeroe aksi. Baka wan toe wiki na getoigi di e go nanga mi, kari hem kom na koonoekondre kommakandra-presi en sensi 10 oktober a no djompo no wan kommakandra . . . Ai si o prinspari a de foe habi wan krosibei mati-fasi nanga Jehovah en nanga hem pipel. A taki dati na waarheid tjari hem nanga hem pikin kom moro krosibei foe makandra. A meki hemsrefi moro gerostoe nanga moro kolokoe. Ai taki dati a sabi dati disi de na waarheid, bika ala sani di wi e sori hem nanga jepi foe na bijbel.
21 Mi no kan gi Jehovah moro tangi dati mi mag foe habi grani foe studeer nanga wan soema en foe si fa na soema e go na fesi na ini na waarheid. Mi e si omeni waarde a habi foe habi wan bijbelstudi. A meki dati mi teki wan moro vasti besroiti foe tan pionier, sodati mi kan habi moro okasi foe jepi dem di habi dree-watra foe na waarheid.
NA KOTI WROKO MOESOE GO DORO
22 Mi teki doopoe na ini augustus foe na jari 1960. Ala nanga ala disi sa de di foe 5 jari dati mi de na ini na gewoon pionier wroko en mi ben habi na grani foe jepi moro leki 50 soema foe kisi wan sabi foe na waarheid. Mi gwenti foe habi so wan 6 bijbel-studi, ma na moen disi mi kan skrivi 8 tapoe mi rapport. Mi si dati na moro boen fasi foe hopo bijbelstudi, na te joe e go hoso foe hoso na ini na velddienst. Fosi joe e miti belangstelling, dan joe e tjari wan go-baka en dan joe e hopo wan bijbelstudi.
NA KOTIWROKO MOESOE GO DORO
23. Fa dem laatste woortoe foe Jezus na ini Matt. 28:20 de wan warskow nanga wan dikhatti?
23 Soema de ete di moesoe kom na ini ete na ini na tem foe koti disi? Bericht foe na gron na ini heri grontapoe e sori dati disi de so troe. San wi e go doe? Oen sa tan wroko makandra nanga Kristus Jezus, na ondro hem tjatjari? Wi habi na sekerfasi dati a sa de nanga wi te na a kaba foe na seti foe sani disi. Dus meki wi tan wroko te na heri koti-wroko doe, aladi wi alamala e wroko makandra nanga Kristus en ala di wi e wroko nanga prisiri nanga makandra. Disi na a wroko foe Jehovah gi hem pipel na ini na tem disi.
24, 25. (a) Na soortoe fasi wi habi moro rede leki Paulus foe habi prisiri? (b) San e gi wi wan bigi dikhatti foe teki prati na ini na wroko foe Jehovah? (1 Kor. 3:9).
24 Paulus ben breti foe di a ben kisi na „Glori boen njoensoe foe na Kolokoe Gado” (1 Tim. 1:11). Troe troe wi habi moro reden foe habi prisiri, bikasi wi kisi na boen njoensoe foe na koonoekondre di hopo kaba, di moesoe preeki na heri grontapoe gi ala natie meki no wan soema kan taki dati a no ben sabi bifo na kaba sa kom (Matt. 24:14). Efoe na gebore foe Jezus, a ben fiti dati wan engel ben moesoe meki bekenti „na boen njoensoe foe wan bigi prisiri di na heri pipel sa kisi, dan wi habi wan moro bigi reden foe habi prisiri en dati de foe di dem poti hem tapoe wan troon leki na hemel Kooning en dati teki presi di na koonoekondre foe grontapoe tron di foe hem Kristus en a sa rigeri leki koonoe foe teego” (Luk. 2:10; Openb. 11:15). Na preeki foe na „boen njoensoe” de na wroko di Jehovah wani hem pipel doe na ini na tem disi. Efoe wi hori vaste na a see foe na Koonoekondre dati nanga wan vertrouw fasi wi e meki dem belang foe hem go na fesi, dan na ati foe Jehovah srefi sa prisiri. „Sori joesrefi koni, mi manpikin en meki mi ati habi prisiri, sodati mi kan habi wan piki gi na wan di e spotoe mi”. — Spr. 27:11.
25 Fa na grani di wi habi bigi. Fa wi kisi dikhati foe nanga prisiri teki prati nanga Jezus Kristus na a wroko foe Jehovah.