Kweki joe pikin foe lobi Jehovah
„Mi manpikin, efi joe ati kon koni, dan mi ati sa prisiri, ia, di foe mi.” — Odo 23:15.
1. Sortoe spesroetoe prisiri papa nanga mama kan kisi, èn san joe leki bigisma kan doe ini a tori disi?
FA A de wan prisiri foe si fa pikinnengre e gro tron lepi dienstknekti foe Gado! Foetoe foe foetoe den e sori taki den e gridi foe sabi sani, den e teki sabi ini den, den e kisi koni, den e poti densrefi na a sé foe na kristen waarheid, den e kon lepi, den e gi densrefi abra na Gado èn den e tron en getrow dienstknekti. Efoe joe de wan bigisma foe den, fa joe kan jepi joe pikin dan foe go na fesi tapoe na toemsi moi pasi disi? A de krin taki moeiti de fanowdoe foe disi. Na apostel Paulus ben aksi fa sma „ben kan poti bribi ini en (Gado) foe soema den no ben jere foe en” èn fa den ben kan jere sondro taki wan sma ben leri den. — Rom. 10:14.
2. Fa wi kan jepi wi pikin foe abi warderi gi Jehovah?
2 Pikinnengre de foeroe nanga froewondroe. Wan kaperka, wan fowroe, wan bromki, wan pisi grasi, na loktoe, wan mankaw — ala den sortoe sani disi e meki den kon gridi foe sabi sani. Fa disi e gi wi wan toemsi moi okasi foe taki foe na Mekiman èn foe den rede di wi abi foe de en grantangi! Na psalmsingiman ben skrifi: „A boen foe gi Jehovah tangi” (Ps. 19:1). Joe kan taki en tangi foe den wondroe foe na natuur, foe den fanowdoe sani na skin sé foe tan na libi èn foe na waarheid foe en Wortoe. Joe pikin sa si joe grantangi èn den no sa frigiti disi noiti. — Ps. 8:3, 4; 19:1; Rom. 1:20; Deut. 8:10; Odo 22:6.
3. San de wan toemsi moi fasi foe leri wi pikin? Gi eksempre?
3 Pikinnengre lobi tori sref-srefi. Gado sabi disi. A ben meki den skrifi foeroe troe tori ini na bijbel — tori di kan meki boen foeroe jongoe pikin kon leri den pasi foe Gado. Den e sori foe eksempre dati wi moe abi net so wan bigi bribi leki Abraham, dati neleki Jozua èn Kaleb wi moe poti froetrow ini EN, dati ini wi jongoe jari wi moe gi jesi na EN soleki Samuël nanga Timoteus di ben de so, èn dati soleki den jongoe Sadrach, Mesach nanga Abednego wi moe tanapoe faste gi wi bribi. (Den tori disi nanga moro foeroe foe den de foe feni ini na boekoe: Mi boekoe foe bijbeltori).
4. Sortoe disiten nanga fosten eksempre wi abi foe pikin di ben leri sabi den pasi foe Gado?
4 Pikinnengre e leri sani gaw. Den e leri wortoe foe reclame nanga foeroe sani di sontron joe no ben wani dati den ben jere den. Fa de a moro prenspari foe jepi den foe kisi sabi foe Gado nanga en pasi! Foeroe sma ben si fa pikin kan gi boen kommentaar ini kristen konmakandra èn fa jongoe kaba den kan abi wan prati na a Theokratisch Diniwrokoskoro. Den sortoe boi nanga meisje disi de libilibi eksempre foe na waarde foe bijbel leri foe na kweki foe pikin. Den papa nanga mama foe Israël ben moe leri den plkin foe den alaten, èn srefi den „pikinwan” den ben teki go foe jere te den ben lési a wet foe Gado. Den manpikin foe den ben moe arki èn „leri foe frede Jehovah, joe Gado”. — Deut. 31:12, 13; 6:5-9.
5, 6. Fa joe kan jepi joe pikin foe leri sabi den pasi foe Gado?
5 Kande joe sabi boen foeroe foe a Wortoe foe Gado, ma dati no wani taki ete taki den pikin foe joe abi na sabi disi. Wan sma no e kisi sabi leki fa joe e kisi wan goedoe. A de gi joe leki papa èn mama foe leri den, den toemsi moi sani foe Gado èn disi tapoe wan switi fasi, sodati den wani leri nanga ala prisiri.
6 Den pikin foe joe e froestan den leri foe na bijbel? Den ben leri sabi den gronprakseri di ben skrifi ini na bijbel gi na aladé libi foe den? Efi den pikin ete, joe stoeka nanga den na boekoe „Arki na a Bigi Leriman” nanga en 46 tori di skrifi tapoe a nivo foe den? Efi joe ben doe disi èn joe pikin e gro, joe stoeka na boekoe „Meki joe jongoe jari waka boen”, wan boekoe di abi toemsi moi bodoi foe jepi jongoe sma foe tanapoe fesi na libi? Na bijbel e taki dati na jongoe Timoteus ben kisi leri foe den sortoe sani disi „foe pikinnengreten” kaba. A broko-ede foe Jakob foe a „tempo foe den pikin” tapoe a pasi go na Seïr e sori o prenspari a de foe seti joe tempo na a man den man foe leri sani. Na makandra stoeka foe joe moe doe na a nivo di den kan froestan, akroederi nanga den jari foe den, èn moe langa na wan redelek fasi. — 2 Tim. 3:15; Gen. 33:14.
Na krakti foe na waarheid,
7, 8. (a) Foe san-ede sabi foe na waarheid de so prenspari? (b) Fa papa nanga mama kan jepi den pikin foe den foe abi warderi gi kristen konmakandra?
7 Gado waarheid de wan tranga krakti. A kan kenki na denki èn égifasi foe bigisma. Na bijbel e taki dati wi „moe poeroe na owroe égifasi, di e akroederi nanga wi fosten libifasi èn dati wi moe meki kon njoen ini na krakti di e poesoe wi denki” (Ef. 4:22-24; Kol. 3:9, 10). Foe di na kristen waarheid de so krakti, meki ai gi joe pikin wan bigi kibri. Jongoe sma alaten agen e tjari den warderi kon na fesi foe den geregeld moeiti foe den papa nanga mama foe teki den go na konmakandra pe den e taki foe a Wortoe foe Gado, ofoe den ben wani ofoe no wani disi sote na a bigin. Wan tini ben taki: „Na a bigin mi no ben wani go. Mi no ben froestan foeroe foe a tori. Ma dan mi ben bigin foe kisi troetroe faja, foe di mi ben si taki: Boi, mi e leri foeroe foe na bijbel!”
8 Foeroe papa nanga mama e sreka densrefi na fesi makandra nanga den pikin gi den konmakandra, sodati den pikin e froestan na stof. Trawan e gi den pikin tranga foe hori wantoe punt foe na konmakandra na ede, sodati te den e go na oso den kan taki foe den. Wi kan froestan dati den sortoe faja takimakandra disi ben e hori te den osofamiri foe Israël ben komoto foe na anbegi foe den ini Jeruzalem e go na oso. — Deut. 31:10-13; Luk. 2:41, 42.
Dienst gi Gado
9, 10. San joe kan doe foe jepi joe pikin foe abi warderi èn feni prisiri ini kristen dienst?
9 Ini a tori foe teki prati na a publiki prékiwroko, a de so dati joe pikin e si na dienst gi Gado kande leki fa Jeremia ben si en: „Ke, o Masra Jehovah! Mi no sabi troetroe fa mi moe taki, bika mi de wan boi nomo.” A de foe dat’ede prenspari foe tjari den foetoe foe foetoe. Akroederi nanga a jari foe den èn na go di den ben go na fesi, joe kan meki den naki wan doro, gi wan kari, lési wan bijbeltekst, presteri den sma ini den kontren boekoe di abi na bijbel leki fundamenti èn hori srefi kande wan bijbelstudie — Jer. 1:6, 7.
10 Joe égi fasi sa abi wan prenspari krakti tapoe joe pikin. Wan jongoe kotoigi e taki: „Mi mama e feni troetroe wan prisiri sani foe de ini na dienst. Ibri tron te a drai kon, a abi wan moi sani foe ferteri.” Te pikin di e gro e doe extra osowroko, sodati den mama kan doe dienst leki pionier, dan den abi na firi dati den abi wan prati na en activiteit èn den e loekoe na a ten foe njan boen foe den sortoe grani disi. Wan twenti-na-wan jari jongoewan e taki: „Mi papa nanga mama alaten ben meki wi sabi dati den e feni pionierwroko na moro moi libifasi.” Wan tra jongoewan e tjari kon na krin: „Mi no kan memre wan ten pe pionierwroko no ben poti na mi fesi leki wan marki.” Jongoe sma kan kisi prisiri ini na dini foe Jehovah èn ondrofeni moi tori, bika en de „na kolokoe Gado”, ala di Kristus Jezus den e kari „na kolokoe èn wan enkri Sma di abi makti”. — 1 Tim. 1:11; 6:15.
Warderi
11-13. San de wantoe foe den winimarki di joe pikin e kisi nanga jepi foe joe bribi ini a tori foe (a) frede foe a ten di e kon? (b) frede gi na dede?
11 A de prenspari foe de séker taki joe pikin abi warderi gi den sani di den abi èn di kande trawan no abi.
12 Wán foe den sani di den abi na sékerfasi. Den disiten jongoe sma e taki na skoro foe den problema foe na grontapoe èn den e si den na televisie. Den e taki foe vervuiling (a doti di sma e doti watra, loktoe nanga na gron), atoomfeti èn a pori di grontapoe kan pori. Kontrari den jongoe sma disi ini algemeen, a de so taki jongoe Kotoigi abi froetrow èn wan firi foe sékerfasi. Den sabi taki Gado no sa gi pasi dati den sani kon so fara, ma dati a „sa pori den sma di e pori na grontapoe”. — Openb. 11:18.
13 Foeroe foe den mati foe den e de nanga skreki te den e prakseri dede. Wan tina-dri jari jongoe wan ben taki: „Soso foe gro nanga na howpoe foe dede, no gersi wan reti sani gi mi.” Den pikin foe joe sabi taki na bijbel e taki dati den dedewan „no sabi noti kwetkweti” èn dati „den prakseri lasi gwe”, sodati den dedewan no kan ondrofeni pina. Den sabi toe taki den Santa Boekoe e pramisi libi — dati foeroe sma di didon ini den grebi „sa kon na doro”, foe di „na a laatste dé wan opobaka” sa de. Joe pikin kan feni den trowstoe wortoe disi ini na bijbel, soleki ini Prékiman 9:5, 10; Psalm 146:4; Johannes 5:28, 29 nanga Johannes 11:11-25.
14. Foe san-ede na abi foe na waarheid moe de prenspari gi joe pikin?
14 Joe pikin e froestan moro fara o prenspari na waarheid de di den abi? Wan jongoe Kotoigi ben taki: „A sani di ben hari mi kon na a waarheid, de dati a waarheid de na sani di a de taki a de — na waarheid. Foe ala sani den ben moe gi mi bodoi; mi ben aksi alaten: Foe san-ede? Na bijbel de krin, joe kan hori en tranga.” Jezus ben taki: „Na waarheid sa meki joe kon fri.” A waarheid ben meki doesoen-doesoen sma kon fri, no wawan foe kerki katibo, ma sosrefi toe foe drug, hoeroedoe, na gevaar foe siki foe a sjenpresi, bijgeloof, falsi leri èn den sorgoe èn problema, di de wan marki foe na ogri grontapoe disi. — Joh. 8:32.
15. Fa den waarheid di tanapoe ini (a) 1 Joh. 4:9, 10 èn (b) 2 Petr. 3:13 moe poesoe papa, mama nanga pikin?
15 Joe ben leri joe pikin na prenspari fasi foe Gado lobi nanga sar’ati? Den e froestan san a ben wani taki gi en foe seni en pikin kon na a grontapoe leki wan loesoeprijs? (1 Joh. 4:9, 10; Rom. 8:38, 39). Den e warderi na froewakti foe tego libi ini a grontapoe paradijs? (2 Petr. 3:13). Joe égi warderi gi den sortoe blesi disi sa gi joe pikin tranga foe go warderi den moro nanga moro. Den Santa Boekoe e taki dati papa nanga mama moe frede Gado èn moe hori en komando „sodati a kan go den nanga den manpikin boen te ten di no abi marki!” — Deut. 5:29.
16. San joe moe jepi joe pikin foe froestan foe na waarde foe a Wortoe foe Gado ini joe osofamiri?
16 Joe pikin e froestan san a sabi foe Gado Wortoe ben doe gi joe osofamiri kande? Joe pikin abi kande skoromati, di leki wan bakapisi foe brokotrow abi toe ofoe dri papa ofoe mama. Efoe joe osofamiri de a makandra ini wanfasi, pe papa nanga mama tai densrefi na makandra foe den heri libi, dan joe pikin e froestan taki disi de ini akroederi nanga bijbel gronprakseri? (Hebr. 13:4) Den e froestan taki den gronprakseri di de foe feni ini na bijbel e jepi den foe abi wan firi foe sékerfasi, matifasi èn wanfasi èn dati den moro fara e kisi na okasi foe abi wan marki na den fesi, foe kisi tiri, foe doe wan sani, èn foe abi wan firi foe égi waarde, sani di foeroe jongoe sma no ben abi noiti ete?
17, 18. Fa pikin kan si taki Gado Wortoe abi waarde gi den (a) ini wan prati osofamiri? (b) ini wan wán-bigisma-osofamiri?
17 Ma kande joe e denki now: ’Mi e libi ini wan prati osofamiri — mi masra ofoe wefi no e gebroiki den sortoe gronprakseri disi.’ Ma dati no moe tapoe joe foe poti den ini joe libi. Na bijbel e taki dati masra di no e bribi (den oema) kan wini „den sondro wortoe, nanga na libifasi foe den oema”. Efoe joe boen eksempre kan abi wan bigi krakti tapoe joe trowpatna di no e bribi, prakseri dan pikinso foe na krakti di a ben sa kan abi tapoe joe pikin te joe poti gronprakseri foe Gado getrow ini joe libi! — 1 Petr. 3:1, 2.
18 Joe ben sa kan de wan papa ofoe mama di moe kweki joe wawan joe pikin. Efoe disi de so, meki joe pikin sabi taki disi de wan problema gi joe. Jepi makandra. Meki den si na difrenti na mindri den libi èn di foe tra wán-bigisma-osofamiri di den sabi. Fa a de wan blesi gi den foe libi ini wan oso pe droengoe, sopi, hoeroedoe nanga tra wroko foe na skin no de! — 1 Kor. 6: 9, 10; Gal. 5:19-21.
Gesontoe activiteit
19, 20. (a) Fa papa nanga mama kan seti na fanowdoe di den pikin abi foe abi takimakandra nanga demakandra? (b) Nanga sortoe bakapisi?
19 Pikinnengre moesoe man foe pré. Wan foe den prisiri sani di a bijbel e tjari kon ini akroederi nanga na kon boen baka foe Jeruzalem de taki „boi nanga meisje ben sa pré tapoe den publiki plen” (Zach. 8:5). Pikinnengre abi so toe na ten foe joe fanowdoe. Soso te joe e psa ten nanga den èn joe e meki den taki èn joe e arki troetroe na san den e taki, joe kan abi takimakandra nanga den, leri sabi den problema èn gi jepi. Ala di kristen pikin no e go na bepaalde féstidé, den papa nanga mama e seti sani nofotron foe orga wan switi ten gi den — go koiri, wan prisiri demakandra ofoe wan tra gesontoe ontspanning ini na osofamiri. Ten foe ten den e kisi kado, prati abra na heri jari. Son osofamiri e orga wan sani leki wan fésti efoe granpapa nanga granmama kon loekoe den. Papa nanga mama e gi tranga foe gesontoe demakandra nanga tra jongoe kristen. Te na osofamiri e libi farawe den wawan, dan den pikin abi mati di den e skrifi brifi gi èn di den e miti tapoe moro bigi kristen konmakandra.
20 Wan papa e aksi en pikin foeroetron: „Oenoe e firi a wan bepaalde sé taki oenoe e misi wan sani foe na bribi foe oenoe ede?” Na piki: „Kwetkweti!” Wan jongoe wan di ben teki en libi gersi nanga di foe en mede-skoromati, ben taki: „Na wan enkri sani di mi ben misi, de wan lo problema.”
Jepi foe dorosé
21. Fa trawan kan gi jepi, ala di den e froestan taki na kweki foe pikin de na frantwortoe foe papa nanga mama?
21 Na frantwortoe foe leri wi pikin, de wi frantwortoe. Na bijbel e sori taki na papa moe teki fesi èn dati na mama moe jepi. Wi e lési: „Arki mi manpikin, na a tranga leri foe joe papa èn no libi na wet foe joe mama” (Odo 1:8; Ef. 6:4). Ma disi no wani taki dati trawan no kan jepi. Na gemeente de leki wan bigi osofamiri èn lepi, owroe man e ferteri alaten baka foe a spesroetoe jepi di wan sma ini na gemeente ben gi den di den ben de jongoe. Faja Kotoigi nanga firi foe lobi e prakseri sma di langa ten psa kaba ben meki den go ini na kristen dienst. Jongoe sma abi troetroe warderi te moro owroewan e sori so wan belangstelling gi den èn e jepi den foe tan tapoe na joisti pasi. — Odo 13:20.
Joe égi eksempre
22. O prenspari na eksempre de di joe e gi?
22 A de wan prenspari sani gi joe pikin foe si taki joe e loekoe na Gado foe tiri èn dati joe ben meki en Wortoe de wan pisi foe joe — dati joe e bribi en troetroe èn e poti en ini joe libi (Ps. 143:10). Den e si joe fasi. Efoe joe e si konmakandra leki wan hebi lai, e kosi owroeman, e feni fowtoe na sma foe na gemeente èn nanga tegoe e psa ten ini na dienst foe Jehovah, dan a de wan sani foe bribi taki joe pikin sa waka baka na takroe eksempre foe joe. Ma te na a tra sé joe e si den theokratis seti disi leki moi blesi foe Jehovah, dan joe kan bribi taki joe pikin sa doe disi toe. Ini na kweki foe pikin a no e go ini na fosi presi dati joe doe wantoe bigi sani, ma dati joe doe wan lo pikin sani. Efi ibri dé joe doe den pikin sani boen, dan joe kan kaka foetoe séker kande gi den bigi sani, di ben sa kan opo ede kon. — Luk. 16:10; Matt. 25:21.
23. Fa a sani di joe e froewakti foe joe pikin kan abi krakti tapoe den?
23 A de toemsi prenspari dati joe pikin sabi taki den e teki wan spesroetoe presi ini joe ati. Den moe sabi taki joe lobi den troetroe èn dati joe ben sa mandi te den ben sa misi foe waka baka gronprakseri foe Gado. Salomo ben skrifi: „Mi manpikin efi joe ati kon koni, dan mi ati sa prisiri, ia di foe mi.” Sosrefi toe: „Na papa foe wan regtvaardikiwan sondro mankeri sa prisiri” (Odo 23:15, 24). Ma san foe doe efoe joe pikin — te e gro èn kande e firi wan lostoe foe srefidensi e kon ini den ati — doe wan sani di joe ben warskow den foe en èn di soboen den sabi taki a de fowtoe ini na ai foe Gado? No lasi ati eseesi tapoe den èn no stop joe moeiti foe jepi den. Hori ini prakseri taki den toe de onvolmaakti èn e psa kande wan toemsi moeiliki ten foe gro komoto foe jongoesma tron bigisma. Tan sori, awinsi joe mandi taki na waka baka den gronprakseri foe Gado de troetroe a moro boen sani gi den, ma doe disi tapoe wan fasi di den e froestan, ma tokoe tapoe wan krakti fasi di krin. — Jak. 3:2.
24. Sortoe paiman papa nanga mama kan howpoe foe kisi te den e kweki den pikin akroederi den gronprakseri foe Gado?
24 A de gi foeroe satisfaksi foe si wi pikin e gro tron boen jongoe man nanga oema èn foe si taki den e teki den égi frantwortoe na den tapoe èn dati den e poti ini den libi den sani di wi ben proeberi foe leri den. Neleki fa Paulus nanga krakti ben taki gi na jongoe Timoteus, a so wi e taki gi wi pikin: „Doe ala moeiti foe presenteri joesrefi na Gado, leki wan wrokoman di no abi foe sjen foe noti, di e handri na wortoe foe waarheid na wan joisti fasi” (2 Tim. 2:15). Dan wi kan taki foe wi pikin a skin fasi, di de sosrefi toe wi jeje pikin: „Mi abi wan moro bigi rede foe de grantangi leki den sani disi, dati mi e jere dati mi pikin e go doro foe waka ini na waarheid.” — 3 Joh. 4.
Joe e memre den punt disi?
□ Foe san-ede wi moe leri wi pikin getrow foe Gado èn en waarheid?
□ Fa joe kan meki kristen konmakandra de wan switi sani gi joe pikin?
□ Fa wi leki lobi papa èn mama sa tjari wi pikin foetoe foe foetoe ini a dienst foe Gado?
□ Spesroetoe sortoe blesi bigisma séker moe meki den pikin warderi?
[Faki na tapoe bladzijde 8]
Pikinnengre abi pir’ai, tiri èn skotoe fanowdoe. A bijbel e taki: „Donfasi tai na na ati foe wan boi” (Odo 22:15). Ma efoe papa nanga mama abi nofo belangstelling foe poti skotoe èn loekoe taki den pikin froestan den èn tan inisé foe den skotoe disi, dan den pikin sa firi densrefi boen — den papa nanga mama no sa gi pasi dati den doe sani di ben sa kan doe den ogri.
[Prenki na tapoe bladzijde 8, 9]
Te wan jongoe sma e gro na skin fasi . . . dan en papa nanga mama kan jepi en foe go na fesi na jeje fasi