Gesontoe tiri gi den disiten jongoewan
„Arki, mi manpikin, èn teki mi wortoe. . . . Mi wani leri joe srefi ini na pasi foe koni.” — Odo 4:10, 11.
1, 2. (a) Sortoe aksi jongoe sma e kisi foe piki? (b) Pe piki kan feni, di joe kan bow na tapoe?
JOE e broko joe ede leki jongoewan foe a ten di e kon? Na grontapoe wawan tron e de wan skreki sani? Joe ben sa wani sabi fa joe moe doe nanga den problema foe na libi èn pe joe kan feni troetroe koni èn tiri di joe kan bow a tapoe?
2 A sortoe jepi disi, joe kan feni ini wan owroe boekoe, di e taki taki a man foe gi „na wan jongoe man sabi nanga denkipowa”. Sortoe boekoe na dati? A de na bijbelboekoe ODO. Efoe joe de wan jongoesma, dan a ben sa boen foe lési na bijbelboekoe dati, bika a kan jepi joe foe de kolokoe èn foe meki sani waka boen. Efoe joe de wan bigisma, spesroetoe wan papa noso mama, dan a boekoe dati kan jepi joe foe si fa joe kan jepi joe pikin ofoe jongoe mati moro boen. Den fosi négi kapitel foe Odo e gi rai soleki wan lobi papa ben sa gi na en manpikin. A papa disi e taki: „Arki, mi manpikin, èn teki mi wortoe. . . . Mi wani foe leri joe srefi ini na pasi foe koni.” — Odo 1:1-4; 4:10, 11.
3. Sortoe bodoi, di abi foeroe waarde gi jongoe sma, joe kan feni ini na boekoe Odo?
3 A no de foe taki, taki a no ibriwan sma wani kisi so wan jepi. Son sma wani foe doe den sani sote na den fasi. Den no wani kisi rai — srefi no foe Gado. Ma a boekoe Odo e taki: „Wan koniman sa arki èn teki moro leri ini en” (Odo 1:5). A boekoe disi e sori fa wan sma kan libi wan moro kolokoe libi. Moreel wet e behandel na ini èn a e meki wi si san den kolokoe bakapisi de foe wan joisti libifasi. A kan jepi joe foe teki koni besroiti. A de kon na krin taki koni nanga sabi sa gi prisiri èn taki a komoto na a pasi foe trobiman, kan kibri joe libi. A boekoe Odo e gi koni tiri, no wawan na jongoe sma leki joe, ma sosrefi toe na joe papa nanga mama.
Koni nanga sabi
4, 5. (a) O fara koni de foe kisi? (b) Foe san-ede meki foeroe sma no wani foe arki? (c) San joe denki de wan koni libifasi? San-ede?
4 Gado, di ben meki ala sani, de sosrefi toe na fonten foe koni. A wani meki den sma sabi en koni pasi. A de meki den barwroko gi disi „na tapoe den strati”, sodati ibriwan sma kan jere en. Ma moro foeroe sma no wani arki. Foeroe sma no lobi na fonten pe a de komoto. Odo e taki: „Na frede foe Jehovah de na bigin foe sabi. Koni nanga tranga leri — soso lawman ben wiswasi den.” — Odo 1:20; 9:10; 1:7.
5 Foeroe sma no wani foe gi jesi na Gado. Gi den no wan enkri kenki abi foe kon, bika den e feni en switi soleki fa a de, ala di na „frede foe Jehovah wani taki foe no wani si ogri na ai” (Odo 8:13). Te den sa frede Jehovah, dan disi sa tapoe den foe doe sani di no e plisi en. A de wan koni libifasi foe leri en pasi nanga gronprakseri èn gi en jesi moro leki ala tra sma. Disi sa tapoe joe foe doe sani di kan meki taki sjen kisi joe, taki joe kisi mankeri ofoe abi pen na ati, ofoe di srefi kan meki joe lasi joe libi.
6. San joe moe doe foe kisi koni?
6 Ala di koni de gi alasma foe kisi, tokoe joe moe doe moeiti foe kisi en. Joe moesoe wani en, wroko tranga foe en èn si en leki wan bigi goedoe. Disi e teki ten nanga moeiti. A ben sa boen foe aksi joesrefi: ’San mi e doe troetroe nanga mi libi’? San de den marki di mi abi ini prakseri? Mi e gi foeroe ten na soso sani, ofoe mi e gebroiki na ten di mi abi ini mi jongoe jari, foe diki dipi foe feni sabi nanga koni? Koni de moro warti leki gowtsani èn „ala tra switi sani srefi no kan kon na en bakafoetoe” (Odo 8:1, 5, 6, 11). Joe e diki foe en soleki joe e doe disi nanga solfroe ofoe nanga goedoe di kibri? Ini Odo wi e kisi foe jere: „Efi joe e tan soekoe en leki solfroe, èn joe e tan soekoe en leki goedoe di kibri, dan joe sa froestan na frede foe Jehovah, èn joe sa feni na sabi foe Gado. Bika Jehovah srefi e gi koni; foe en mofo sabi nanga koni foe si sani komoto.” Joe e doe someni moeiti foe leri moro foe a Wortoe foe Gado? — Odo 2:4-6.
7. (a) San joe kan doe foe meki stoeka nanga leri kon moro makriki? (b) Foe san-ede disi warti a moeiti?
7 Kande joe e prakseri: ’Ma mi no lobi stoeka — lési de so wan soi sani!’ Ma o moro joe e lési o moro makriki a e de foe lési. O moro joe e leri, o moro makriki a e de foe leri. Joe e tjari njoen bodoi miti nanga sani di joe sabi kaba, èn joe e froestan den moro boen. Te joe e doe moeiti foe en, dan Gado e gi joe en blesi. Te joe sabi nanga a froestan foe sani e gro, dan a leri foe sani sa gi joe foeroe prisiri, èn den sani di joe e leri foe a Wortoe foe Gado, sa kibri joe ini na grontapoe foe tide. Disi no de soso moi wortoe nanga winsi. A de wan troe tori, na waarheid, soleki tanapoe ini Odo: „Te koni kon ini joe ati èn na sabi srefi kon de switi gi joe sili, dan na denkipowa srefi sa hori wakti gi joe, a koni foe si sani srefi sa kibri joe, foe ferloesoe joe foe na takroe pasi, foe na man di e taki fowtoe sani, foe den di e libi na pasi foe opregti fasi foe go waka den pasi foe na doengroe.” — Odo 2:10-13.
Takroedoe no e pai
8, 9. Sortoe problema di de now ini den foto foe now, Odo e behandel, èn sortoe prenspari rai na boekoe e gi ini disi?
8 Ini na boekoe disi (Odo), problema èn tesi e behandel di no wawan jongoewan ini bijbel ten ben abi foe doe nanga den, ma di jongoewan ini disi ten tanapoe toe na den fesi. Den disiten foto de nesi foe takroedoe, a doe foe ogri, gang foe jongoesma èn sma di e loeroe tapoe jongoesma. Sortoe warskow di e gi ini na owroe boekoe disi, sa meki taki joe kisi kibri foe den sortoe problema disi?
9 A de gi na warskow foe komoto ini na birti foe den takroe sortoe foe sma disi. Wi e lési: „Mi manpikin, efoe sondari e proeberi foe kori joe, no agri nanga den. Efoe den e tan taki: ’Go nanga oenoe. . . . Meki wi feni ala sortoe diri, warti sani. Meki wi foeroe wi oso nanga foefoeroesani. Joe lot joe moe iti na wi mindri. Meki soso wan saka de gi wi alamala’ — mi manpikin no go nanga den na pasi. Hori joe foetoe farawe foe den pasi. Bika a de soso den foetoe foe den di e waka esi go na takroedoe, èn den e tan hasti densrefi foe trowe broedoe.” — Odo 1:10-16.
10. San Odo e taki foe na pasi foe den ogrisma èn foe san-ede disi de prenspari?
10 Efi joe miti nanga sma di e doe takroedoe, dan joe moe lon gwe. Salomo ben skrifi: „No djaroesoe nanga takroe man, èn no angri foe go na mindri den. Bikasi den ati e tan prakseri foe foefoeroe, èn foe soso moeiti den égi mofoboeba e tan taki” (Odo 24:1). Hori ini prakseri: Takroedoe no e pai, srefi efoe sma no kisi joe, Gado e si alasani. Fa a de wan don sani foe lasi joe tego libi soso foe wan toe winimarki di joe kisi na wan takroe fasi! Odo e gi jongoewan leki owroe sma na rai: „No go ini na pasi foe den ogrisma, èn no waka stret go ini na pasi foe den takroesma. Tan farawe foe dati, no waka go abra en; komoto foe en èn waka psa. . . . Poeroe joe foetoe foe san de takroe.” — Odo 4:14, 15, 27.
Poti Jehovah tapoe na fosi presi
11. Sortoe blesi joe sa kisi te joe e waka ini getrowfasi èn foe doe den sani na a fasi foe Jehovah?
11 Na libifasi foe na ogrisma de krinkrin kontrari na libifasi foe den koni-wan. Ini Odo tanapoe taki Jehovah de wan „skild” gi den sma di e waka ini getrowfasi èn dati a „de tan hori wakti srefi gi na pasi foe en loyaalwan” (Odo 2:7, 8). A de poti na froewakti foe tego libi na a fesi foe den sma di e handri joisti. „Bika a de den opregtiwan di sa tan na grontapoe, èn a de den di de sondro flaka di sa tan abra” (Odo 2:21). Te joe e poti Jehovah na a fosi presi, joe sa kisi bigi blesi. „Gi Jehovah grani nanga joe warti sani èn nanga den fosi froktoe foe joe wroko. Dan joe maksin sa foeroe pasamarki; èn foe njoen win joe égi persbaki sa lon abra.” — Odo 3:9, 10.
12. Sortoe eksempre wi abi foe jongoe sma di e poti Jehovah na a fosi presi, èn sortoe paiman den ben kisi?
12 Foeroe jongoe sma ini disi ten e doe en troetroe. Den e poti Jehovah ini den libi na a fosi presi. Den e spèn den jongoe jari ini na foeroetendienst, èn e wroko leki pionierbedinari ofoe e doe dienst ini Betheloso, pe den e jepi ini a meki foe bijbel nanga boekoe, sodati tra sma e kisi jepi foe leri moro foe Gado. Aksi den efi Jehovah ben blesi den. Den sa ferteri joe foe a dipi foe den ati taki a ben doe disi pasa marki èn dati den abi foeroe moro ini na fasi foe jeje goedoe leki den jongoe sma foe a jari foe den di ben poti na prakseri foe kisi goedoe na skin fasi. — Odo 10:9; 15:16.
Moreel tesi
13, 14. (a) Foe sortoe tra lostoe Satan ben meki gebroiki? (b) Disi de now ini joe birti wan bigi problema?
13 Barwrokoman e gebroiki seks foe seri den sani foe den. Satan ben gebroiki seks di no mag foe tesi Gado dienstknekti. Doesoendoesoen Israëlsma, di ben spèn foeroe jari ini na gran sabana èn di te foe kaba ben kon let na a Pramisi Kondre, ben fadon foe eksempre go ini hoeroedoe èn den ben lasi den libi. — Num. 25:1-9.
14 Sma di no wani taki den jongoe sma kisi warskow gi na gevaar disi, e tapoe den ai gi den toestand di de ini na grontapoe. Fisti tijdschrift nanga film, sekswenkri, pornografie, nanga motjolibi de wan normaal sani di joe e si na den strati foe wi. Ini den fosi kapitel foe na boekoe Odo, krakti warskow e gi kontra den sortoe tesi disi foe hoeroedoe.
15. Sortoe warskow Odo e gi ini a tori foe hoeroedoe?
15 Na ini a e taki foe wan hoeroe oema di e kori wan jongoeman di no abi ondrofeni. Wi e lési: „Bika leki wan pisi foe wan onigodo den mofoboeba foe wan freemde oema e tan droipi èn a tapoesé foe en ini mofo grati moro leki oli. Ma a bakapisi foe en bita, leki kwasibita; a de net so srapoe leki wan fet’owroe di e koti nanga ala toe sé. En foetoe e saka go na dede. . . . Hori joe pasi farawe foe en, èn no kon krosbé foe na doromofo foe en oso, sodati joe no gi na trawan na wartifasi foe joe, noso den jari foe joe na wan sani di de nanga ogri-ati.” — Odo 5:3-14; 2:16-19; 6:27-29, 32.
16. San kan psa nanga sma di no e lon gwe wantewante gi hoeroedoe rai?
16 Na ini a e ferteri toe foe wan jongoeman sondro „ondrofeni, di e mankeri ati”. A de poti jesi na triki nanga prakseri di e sori san a moe doe èn na wan sjen fasi a de stop foe dwengi ensrefi. „Nanga na grati foe en mofoboeba a de kori en. Wantronso a de go na en baka, leki wan mankaw di foe troe e go na srakti, . . . èn a no ben sabi taki en égi sili de ini a tori.” A no en de na enkriwan di e lasi na boen-ati foe Jehovah, bika „foeroe den sma de di a kiri.” — Odo 7:6-27.
17. O ernstig hoeroedoe de ini na ai foe Jehovah?
17 Ala di den warskow disi taki gi jongoe man, den de sosrefi toe gi jongoe oema. Awinsi san sma e denki foe na bakapisi foe hoeroedoe, na fasi fa Jehovah e si a tori de krin. Na doe foe hoeroedoe na wan pasi foe dede. A kan hori joe na dorosé foe na paradijs di Gado sa meki kon baka. „San! Joe no sabi taki onregtvaardiki sma no sa kisi Gado kownoekondre? No kori oensrefi. No den hoeroeman, no den afkodréman, no soetaman, no den man di den e hori foe tegennatuurlijk marki, no den man di e didon na man . . . sa kisi Gado kownoekondre.” — 1 Kor. 6:9, 10; Ef. 5:5.
18. (a) Na rai foe seksueel hoeroedoe de wan hebi? Foe san-ede joe e piki so? (b) Sortoe boen rai Odo e gi ini disi?
18 Nowan sma moe denki taki na koni rai di a bijbel e gi foe seksueel hoeroedoe, de wan hebi. A wani taki moro pikinso brokotrow, moro pikinso osofamiri di e panja, moro pikinso ogri pikin, moro pikinso motjolibi, moro pikinso djaroesoefasi, moro kolokoe osofamiri èn wan moro prisiri libi. Na koni libifasi disi na bijbelboekoe Odo ini toemsi moi poewema wortoe e taki foe wi teki. A de gi na rai foe no go soekoe prisiri na strati èn foe no kisi disi foe na demakandra nanga hoeroedoe sma ofoe nanga difrenti hoeroedoe sma, sodati wan sma e panja en fonten na dorosé foe na oso. Na rai e gi taki wan sma di trow, moe prisiri ensrefi nanga en égi patna na presi dati joe fadon makandra nanga trawan go ini hoeroedoe leki wan trapoe. Ibri swaki sma kan gi ensrefi abra na a tranga firi foe seks, ma na libifasi foe wan troe kristen wani taki dati te na a dé foe a trow wan sma e hori ensrefi farawe foe seks libimakandra èn dati te a trow kaba, moe abi soso nanga en trowpatna seks libimakandra. — Odo 5:15-23.
Wroko èn bigimemre
19. Sortoe rai Odo e gi ini a tori foe wroko?
19 Na boekoe Odo e jepi wi toe na tra fasi. A de taigi wi wan sani foe doe di jongoe sma dati wani taki foeroe foe den, no lobi kwetkweti — foe tron wan tranga wrokoman. Disi abi foe doe nanga skoro, wan wrokope, ofoe na kristen foeroetendienst. „Go na a mira”, na rai de. „Loekoe en pasi èn kon koni.” Neleki wan mira, na so wan kristen sa doe wan opregti déwroko sondro dati wan basi abi foe loekoe en. — Odo 6:6-11; Ef. 6:5; Tit. 2:9, 10; Hebr. 6:10-12.
20. (a) San Jehovah no wani si moro na ai? (b) Fa joe kan gebroiki na rai disi ini joe libi?
20 Sosrefi toe a de prenspari foe no de noiti nanga bigimemre ofoe meki moeilijkheid kon. „Siksi sani de di Jehovah no wani si srefsrefi na ai; ia, sébi na sani di en sili e tegoe foe den: bigimemre ai, wan létongo, èn anoe di e trowe broedoe di no doe fowtoe, wan ati di e denki ogri plan, foetoe di e hasti den foe lon go na san takroe, wan falsi kotoigi di e ferteri lé èn ibri wan sma di e meki trobi kon na mindri brada.” — Odo 6:16-19.
Joe bigisma
21. Sortoe rai Odo e gi joe ini a tori foe joe papa nanga mama èn foe san-ede disi de prenspari?
21 No loekoe psa na jepi di joe e kisi foe joe bigisma. Ini Odo tanapoe: „Kibri, o mi manpikin, na komando foe joe papa, èn no libi na wet foe joe mama. . . . Te joe e waka lontoe, a sa tjari joe; èn te joe wiki, a sa meki joe de na sani di abi ala en prakseri” (Odo 6:20-22). Disi de spesroetoe so te joe bigisma de dienstknekti foe Gado. Ma srefi efoe den no de bribiwan, dan tokoe den ben ondrofeni foeroe sani di joe no ben ondrofeni ete, sodati a tiri foe den kan kibri joe foe foeroe moeilijkheid.
22. (a) San wi kan taki foe na prensparifasi foe de ini wan froetrow fasi nanga joe bigisma ini na pisi ten foe na puberteit? (b) San joe kan leri foe Hebrewsma 12:11 èn Odo 4:10-13?
22 No meki spesroetoe na puberteit — na pisi ten a mindri den pikinnengre jari nanga a tron foe wan bigisma — meki joe hari joesrefi poeroe foe joe bigisma, soleki someni jongoe sma e doe. Kande joe e feni taki joe papa nanga mama de nanga owroeten fasi ofoe dati „den no e froestan noti foe a tori”. Ma den kan jepi joe foe hori joe balans ini na pisi ten disi foe go abra foe pikinnengre na bigisma. Taki nanga den. Proeberi foe tjari den so fara foe arki na joe problema. Den no wani gens èn kwinsi na libipasi foe joe, ma . . . den wani foe jepi joe foe meki joe libipasi moro makriki. A troe taki jongoe sma e wani doe den sani tapoe den égi fasi èn foeroetron ati e bron nanga rai. Ma foe de nanga sakafasi, sa meki foeroe foe na tranga pisi gwe. Wan sma di de nanga sakafasi, sabi taki a de meki fowtoe èn a de warderi den moeiti di trawan e doe foe jepi en. Ini Odo tanapoe: „Gi wan koni sma wan piri ai èn a sa lobi joe.” — Odo 9:8, 9; Hebr. 12:11; Odo 4:10-13.
23. San de den moro prenspari punt ini na les disi di abi foe doe nanga joe?
23 Soboen, gi jongoe sma ini disi ten koni foe Gado de foe kisi. Awinsi joe de sondro ondrofeni, tokoe joe kan leri èn froestan. Koni e bari taki nanga joe. A de taki foe „sani di de toemsi prenspari” èn „ala tra prisiri sani srefi no kan kon na en bakafoetoe” (Odo 8:6, 11). Foe kisi sabi èn meki koni gro, joe moe stoeka èn diki, soleki joe ben sa doe disi te joe ben sa go soekoe na wan aparti goedoe. „Na sma di feni koni, sa feni séker na libi èn e kisi boen wani foe Jehovah.” — Odo 8:35.
Baka te joe lési na artikel disi, joe sa wani lési kande Odo 1 te nanga 9, pe a stoeroe a tapoe.
Joe e memre den punt disi?
□ Sortoe jepi a boekoe Odo e gi na den jongoe sma?
□ Foe san-ede meki someni sma e wégri na jepi dati?
□ Fa a de di koni de foe kisi moe wroko tapoe joe libi?
□ Odo e warskow wi foe sortoe tesi ini den disiten foto?
□ Foe san-ede na rai foe seksueel moraliteit no de wan hebi?
□ Sortoe jepi jongoe sma kan kisi foe den bigisma?
[Faki na tapoe bladzijde 3]
SABI, KONI NANGA FROESTAN
A boekoe Odo abi foeroe foe taki foe den dri wortoe disi. Sortoe difrenti de a mindri den?
SABI e sori tapoe na sabi foe troe tori, di joe ben leri kande nanga jepi foe stoeka, a si foe sani ofoe égi ondrofeni. Wan koni sma ’e tjari sabi kon makandra leki goedoe’ èn a abi wan maksin foe en, pe a kan teki poeroe foe en. — Odo 10:14.
KONI e tai sabi kon makandra nanga wan gesontoe kroetoe. Koni e sori tapoe na kan di wan sma kan foe gebroiki sabi tapoe wan boen fasi nanga wini marki, èn foe loesoe problema èn foe tan farawe foe gevaar. Disi wani taki toe na abi foe wan bradi sabi èn wan dipi foe froestan, di e meki wan gesontoe èn krin si foe sani man. Efoe joe ben sa abi sabi, ma no ben sa sabi fa foe gebroiki disi, dan a ben sa mankeri koni. „Koni de na moro prenspari sani”, bikasi sondro koni sabi no warti foeroe. — Odo 4:7.
FROESTAN Joe abi now froestan foe na difrenti na mindri sabi nanga koni — joe kan poeroe na wan foe na trawan ofoe joe kan kroetoe den. Kande joe e waka baka wan libifasi, foe di Gado ben gi komando foe dati, ma efoe joe e froestan na rede foe en, a boen marki di a e dini èn sortoe winimarki a e tjari, dan joe besroiti e kon de moro tranga. Na boekoe Odo e gi praktis bodoi foe jepi joe foe no froestan wawan sortoe libifasi de joisti ofoe fowtoe, ma sosrefi toe foe san-ede disi de so.