Kweki frede gi Gado
„Frede Jehovah èn drai joe baka gi san takroe.” — ODO 3:7.
1. Gi soema Odo ben skrifi?
A BIJBELBOEKOE Odo abi foeroe diri rai na jeje fasi. Ini a bigin Jehovah ben gi a tiriboekoe disi foe gi leri na en agersi nâsi Israèl. Ini a ten disi, a abi koni wortoe gi en santa kresten nâsi, „gi soema den kaba foe den seti foe sani doro”. — 1 Korentesma 10:11; Odo 1:1-5; 1 Petrus 2:9.
2. Foe san ede a warskow na Odo 3:7 e fiti srefisrefi ini a ten disi?
2 Te wi opo Odo 3:7, dan wi e leisi: „No kon de koni ini joe eigi ai. Frede Jehovah èn drai joe baka gi san takroe.” Sensi a ten foe wi fosi papa nanga mama di a Sneki ben kori Eva nanga a pramisi taki den ben sa „sabi boen nanga takroe”, soso libisma koni ben misi foe gi piki tapoe den fanowdoe foe libisma famiri (Genesis 3:4, 5; 1 Korentesma 3:19, 20). Na no wan ten ini historia disi ben de so krin foe si leki ini a di foe toetenti jarihondro disi — den „lasti dei” disi pe libisma famiri e koti den froktoe foe a prakseri di sma e prakseri taki Gado no de, èn a bribi ini evolutie, san e meki taki problema e miti den so leki a no wani si trawan na ai foe a difrenti foe ras ede, ogridoe èn ala sortoe fasi foe hoeroedoe (2 Timoteus 3:1-5, 13; 2 Petrus 3:3, 4). Disi no de wan ’njoen grontapoe orga’, ma wan ’njoen grontapoe broeja’ di no den VN, no den relisi foe grontapoe di broko na pisipisi, kan loesoe.
3. San ben taki na fesi foe a fasi fa sani ben sa waka ini a ten foe wi?
3 A profeiti Wortoe foe Gado e taigi wi taki legre foe ogri jeje ben go na „den kownoe foe a heri grontapoe pe libisma e libi, foe tjari den kon makandra na a feti foe a bigi dei foe Gado na Almaktiwan . . . na a presi di den e kari ini Hebrewtongo Har–Mágedon” (Openbaring 16:14, 16). Heri esi a doe foe Jehovah di e tjari skreki kon sa tapoe den kownoe noso den tiriman disi. A sa de leki a frede di ben fadon kon na tapoe den Kanansma di Josua nanga den Israèlsma ben kon foe tjari kroetoe kon na den tapoe (Josua 2:9-11). Ma ini a ten disi a de a Sma di de Josua na agersifasi, Krestes Jesus — a „Kownoe foe den kownoe èn Masra foe den masra” — di sa ’naki den nâsi èn sa wei den nanga wan isri tiki’, foe di a sa sori „a bigi atibron foe Gado na Almaktiwan”. — Openbaring 19:15, 16.
4, 5. Soema sa kisi froeloesoe èn foe san ede?
4 Soema sa kisi froeloesoe na a ten dati? Den sma dati di sa kisi fri no sa de den sma di frede teki den abra, ma ala den sma di kweki wan respeki frede gi Jehovah. Na presi foe de koni na ini den eigi ai, den sma disi „drai den baka gi san takroe”. Nanga sakafasi den e foeroe den prakseri nanga san boen, so taki den e jagi takroe prakseri komopo na den denki. Den e boboi wan gosontoe respeki gi a Soeverein Masra Jehovah, a „Kroetoeman foe heri grontapoe”, di de klariklari foe tjari strafoe kon na tapoe ala den sma di e tan hori na takroedoe, neleki fa a ben pori den Sodomsma di ben abi troetroe porifasi (Genesis 18:25). Foe troe, gi Gado eigi pipel „a frede gi Jehovah de wan fonten foe libi, foe drai den baka gi den trapoe foe dede”. — Odo 14:27.
5 Na a dei disi foe a kroetoe foe Gado, alasma di gi densrefi krinkrin na Jehovah foe di den e frede foe doe wan sani di no e plisi en, sa kon froestan a waarheid di skrifi na agersifasi na Odo 3:8: „Meki [a frede gi Jehovah] kon tron wan dresi gi joe koemba èn wan kowroe-ati gi joe bonjo.”
Gi grani na Jehovah
6. San moesoe boeweigi wi foe poti prakseri tapoe Odo 3:9?
6 A frede di wi abi gi Jehovah nanga warderi, makandra nanga wan dipi lobi gi en, moesoe boeweigi wi foe poti prakseri na tapoe Odo 3:9: „Gi Jehovah grani nanga den warti sani foe joe èn nanga den fosi froktoe foe ala san joe ben meki.” No wan sma e froeplekti wi foe gi grani na Jehovah nanga den ofrandi foe wi. Wi moesoe doe den sani disi nanga wi eigi fri wani, so leki fa a kon na krin so wan 12 leisi ini Exodus 35:29 te nanga Deuteronomium 23:23 ini a tori foe ofrandi ini Israèl foe owroeten. Den fosi froktoe disi gi Jehovah moesoe de den moro betre presenti di wi kan òfer, foe di wi e erken a boen-ati nanga lobi boen-atifasi di wi e kisi foe en anoe (Psalm 23:6). Den moesoe sori a bosroiti di wi teki foe „tan . . . soekoe a kownoekondre nanga en regtfardikifasi fosi” (Mateus 6:33). Èn san de a bakapisi te wi e gi grani na Jehovah nanga den warti sani foe wi? „Dan den maksin foe joe sa kon foeroe pasa marki; èn den pers-baki foe joe sa kon foeroe nanga njoen win te den e lon abra.” — Odo 3:10.
7. Sortoe fosi froktoe wi moesoe òfer gi Jehovah, èn san sa de a bakapisi?
7 A moro prenspari fasi fa Jehovah e blesi wi, de na jeje fasi (Maleaki 3:10). Foe dati ede, den fosi froktoe di wi òfer gi en moesoe de na a fosi presi na jeje fasi. Wi moesoe gebroiki wi ten, energie nanga wi skin krakti ini a doe foe en wani. Disi foe en sei sa gi wi krakti, na a srefi fasi fa so wan aktiviteit ben tron „njanjan”, di ben tranga Jesus (Johanes 4:34). Wi maksin na jeje fasi sa kon foeroe, èn a prisiri foe wi, di na wan agersi fasi de a njoen win, sa lon abra. Boiti dati, efoe wi e begi nanga a froetrow foe kisi nofo njanjan na skin fasi gi ibri dei, dan alaten wi kan gi nanga wi heri ati bijdrage foe a moni di wi wroko, foe horibaka gi a Kownoekondre-wroko na heri grontapoe (Mateus 6:11). Ala sani san wi abi, den goedoe na skin fasi toe, komopo na wi lobi hemel Tata. En sa kanti moro blesi na wi tapoe akroederi a fasi fa wi sa gebroiki den warti sani foe wi foe prèise en. — Odo 11:4; 1 Korentesma 4:7.
Piri-ai di e sori lobi
8, 9. Fa wi moesoe si piri-ai èn tranga leri?
8 Ini vers 11 nanga 12, Odo kapitel 3 e taki agen foe a kolokoe matifasi di de na mindri papa nanga manpikin di de ini famiri di dini Gado, so boen leki na mindri Jehovah nanga den lobi pikin foe en na jeje fasi na grontapoe. Wi e leisi: „A tranga leri foe Jehovah, o mi manpikin, no trowe en; èn no tegoe gi en piri-ai, bikasi a sma di Jehovah e lobi na en a e piri-ai gi, neleki wan papa e doe nanga wan manpikin di a e prisiri nanga en.” Sma foe a grontapoe disi e tegoe gi piri-ai. Jehovah pipel moesoe teki disi. Na apostel Paulus ben teki den wortoe disi foe Odo, taki: „Mi manpikin, no teki a tranga leri foe Jehovah leki wan soso sani èn no lasi-ati te joe e kisi piri-ai foe en, bikasi a sma di Jehovah lobi, na en a e gi tranga leri . . . Foe troe, no wan tranga leri de tapoe a momenti disi prisiri, ma a e gi sari; tokoe bakaten a e meki wan froktoe foe vrede, gi den sma di ben oefen densrefi nanga dati, dati wani taki, regtfardikifasi.” — Hebrewsma 12:5, 6, 11.
9 Ija, piri-ai èn tranga leri de wan fanowdoe pisi foe a leri di ibriwan foe wi e kisi, awansi wi e kisi en foe wi papa nanga mama, nanga jepi foe a kresten gemeente, noso te wi e prakseri dipi foe sani di skrifi ini den Boekoe foe bijbel na wi persoonlijk studie. A de wan afersi foe libi nanga dede foe waka na baka tranga leri, so leki Odo 4:1, 13 e taki toe: „Arki, o manpikin, na a tranga leri foe wan papa èn poti prakseri na tapoe, so taki joe kan kon leri sabi froestan. Graboe hori a tranga leri; no meki a lasi gowe. Kibri en, bikasi ensrefi na joe libi.”
A moro bigi kolokoe
10, 11. San na wan toe sani foe den prisiri wortoe foe Odo 3:13-18?
10 Fa den wortoe di e kon now de heri moi, foe troe ’switi èn joisti wortoe foe waarheid’! (Preikiman 12:10) Den wortoe disi na wortoe foe Salomo, di skrifi nanga jepi foe santa jeje, di e taki foe troetroe kolokoe. Den wortoe disi na wortoe di wi moesoe kerfoe ini wi eigi ati. Wi e leisi:
11 „Kolokoe a libisma de di feni koni, èn a libisma di e kisi a koni foe si sani, bikasi foe abi en leki wini, de moro boen leki foe abi solfroe leki wini, èn foe abi en leki ala san joe ben meki, moro boen leki gowtoe srefi. A moro diri leki koraal, èn ala joe tra prisiri sani no kan kon de a srefi leki en. Langa ten foe dei de ini a leti-anoe foe en; ini en kroektoe-anoe goedoe nanga glori de. Den pasi foe en na pasi foe prisiri, èn ala den pasi foe en na vrede. A de wan bon foe libi gi den sma di e graboe en hori, èn den sma di e hori en steifi den sa kari den kolokoe.” — Odo 3:13-18.
12. Fa koni nanga a koni foe man si sani moesoe de wan wini gi wi?
12 Koni — omeni tron a wortoe disi kari na ini a boekoe foe Odo, 46 tron ala nanga ala! „A frede gi Jehovah na a bigin foe koni.” Disi na a praktis koni di komoto na Gado di abi en gron tapoe a sabi foe Gado Wortoe di e meki taki a pipel foe en kan tan hori densrefi na a joisti pasi foe kan pasa den kefarlek bigi winti di e wai ini Satan grontapoe (Odo 9:10). A koni foe si sani, di 19 tron den e sori go na tapoe dati ini Odo, de a foetoeboi foe koni, di e jepi wi foe feti nanga den triki foe Satan. Foe doe den triki wroko foe en, a bigi Gensman abi doesoen nanga doesoen jari ondrofeni. Ma wan sani di warti krinkrin moro leki foe abi ondrofeni leki wan leriman, na a koni foe man si sani di komoto na Gado, a man di wi man si a difrenti na mindri san boen èn san ogri èn foe teki a joisti pasi foe waka. Disi na san Jehovah e leri wi nanga jepi foe en Wortoe. — Odo 2:10-13; Efeisesma 6:11.
13. San kan kibri wi te wi abi hebi ten na ekonomia séi, èn fa?
13 A broeja di a disiten grontapoe broeja na ekonomia sei, na a sani di e waka na fesi a kontroe foe a profeititori na Esekièl 7:19: „Na tapoe strati srefi den sa trowe a solfroe foe den, èn wan tegoe sani den eigi gowtoe sa tron. No den solfroe noso a gowtoe foe den sa froeloesoe den na tapoe a dei foe na ati-bron foe Jehovah.” Wi no kan agersi ala den goedoe foe grontapoe nanga a krakti foe man froeloesoe di koni nanga a koni foe man si sani abi. Koni kownoe Salomo ben taki na wan tra okasi: „Koni de foe gi kibri na a srefi fasi leki moni de foe gi kibri; ma a wini foe sabi de taki koni srefi e hori den sma di abi en, na libi” (Preikiman 7:12). Kolokoe foe troe ala den sma de di e waka ini den pasi foe prisiri foe Jehovah ini a ten disi èn di nanga koni e teki a sei foe „langa ten foe dei”, a têgo libi di de wan presenti foe Gado gi ibri sma di e poti bribi ini a froeloesoe-ofrandi foe Jesus. — Odo 3:16; Johanes 3:16; 17:3.
A kweki foe troe koni
14. Na sortoe fasi Jehovah ben sori koni di de wan eksempre?
14 A de wan sani di fiti taki wi libisma, di meki na a prenki foe Gado, e meki moeiti foe kweki koni nanga a koni foe si sani, eigifasi di Jehovah srefi ben sori te a ben meki den heri moi mekisani foe en. „Jehovah srefi ben poti a fondamenti foe grontapoe nanga koni. Na wan steifi fasi a ben meki den hemel nanga a koni foe si sani” (Odo 3:19, 20). A ben go moro fara foe meki libi mekisani, a no ben gebroiki wan toe kibri proces foe evolutie di sma no man froeklari, ma a ben meki den langalanga, ibri sani „akroederi en eigi sortoe” èn gi wan koni marki (Genesis 1:25). Te foe kaba, libisma ben meki nanga koni èn nanga a fasi foe man doe sani di ben de krinkrin moro hei leki a di foe den meti. Di disi pasa, dan a naki di den engel manpikin foe Gado ben naki den anoe, ben moesoe de so tranga, taki a babari foe dati ibritron baka ben de foe jere boen fara na hemel. (Teki gersi Job 38:1, 4, 7.) A koni di Jehovah abi foe man si sani na fesi, en koni, èn en lobi, wi kan si krin ini ala den sani di a meki na grontapoe. — Psalm 104:24.
15. (a) Foe san ede a no de nofo foe kweki koni nomo? (b) Sortoe froetrow Odo 3:25, 26 moesoe wiki ini wi?
15 A no de so taki wi moesoe kweki den eigifasi foe Jehovah foe koni nanga a koni foe si sani nomo, ma wi moesoe tan hori tranga na den, noiti wi no moesoe kon slak ini wi studie foe a Wortoe foe en. A e froemane wi: „Mi manpikin, meki a de so, taki den no drifi komopo na joe ai. Kibri praktis koni nanga a man di wi man denki, èn den sa boeweisi foe de libi gi joe sili èn wan moimoi sani gi joe neki” (Odo 3:21, 22). So boen, wi kan waka ini seikerfasi èn nanga vrede foe jeje, srefi ini a dei foe „a wantronso pori” di e kon krosibei leki wan foefoeroeman èn di sa broko kon tapoe Satan grontapoe (1 Tesalonikasma 5:2, 3). Na a ten foe a bigi banawtoe srefi, „joe no sa abi foe frede gi no wan enkri sani di sa meki joe skreki wantronso, noso foe a bigi winti di sa kon tapoe den ogriwan, bikasi a e kon. Bikasi Jehovah ensrefi sa boeweisi foe de a froetrow foe joe, èn a de seiker taki ensrefi sa hori joe foetoe, so taki noti sa graboe en”. — Odo 3:23-26.
Lobi foe di sma e doe boen
16. San wan kresten moesoe doe toe boiti taki a abi faja ini a diniwroko?
16 Disi na den dei foe sori faja ini a preiki foe a boen njoensoe disi foe a Kownoekondre leki wan kotoigi gi ala den nâsi. Ma tra krestenwroko moesoe horibaka gi a kotoigi wroko disi, so leki fa Odo 3:27, 28 e taki foe dati: „No hori na baka san boen gi den sma di moesoe kisi dati, te a de so taki joe abi a makti ini joe anoe foe doe dati. No taigi a sma na joe sei: ’Go, èn kon baka, tamara mi sa gi’, te wan sani de na joe.” (Teki gersi Jakobus 2:14-17.) Foe di wan bigi pisi foe grontapoe de na ini a makti foe pôtifasi nanga angriten, foeroe kari ben de di ben de tranga fanowdoe foe wi jepi den sma na wi sei, spesroetoe den brada foe wi na jeje fasi. Fa Jehovah Kotoigi ben doe wan sani na tapoe disi?
17-19. (a) Sortoe tranga fanowdoe den ben loesoe ini 1993, èn san den ben doe na tapoe dati? (b) San e sori taki den brada foe wi di ben de ondro hebi tesi, „e kon de winiman krinkrin”?
17 Teki wan eksempre: Ini a jari di pasa, wan kari foe jepi di ben de tranga fanowdoe ben komopo na a kondre di ben de fosi Joegoslavia. Den brada ini den krosibei kondre ben doe wan sani na wan toemoesi moi fasi na tapoe dati. Ini den troetroe kowroe moen foe a lasti kowroe pisi foe a jari, difrenti groepoe wagi nanga sani foe jepi ben kan rèi pasa ini a kontren pe orlokoe ben de, ala di den ben tjari njoen boekoe, waran krosi, njanjan nanga dresi di ben de gi den kotoigi, di ben abi den sani tranga fanowdoe. Na wan okasi, den brada ben aksi a primisi na a grenswaktiman foe teki 15.000 kilo foe den sani foe gi jepi, ma di den ben kisi a primisi, a ben de gi 30.000 kilo! Den Kotoigi foe Jehovah na Oostenrijk ben seni esi-esi ete dri bigi wagi. Ala nanga ala, 25.000 kilo ben doro na a presi pe den ben moesoe go. Fa den brada foe wi ben abi foeroe prisiri foe kisi den bogobogo sani na jeje fasi nanga na skin fasi di ben seti gi den!
18 San den brada disi di ben kisi den sani ben doe na tapoe dati? Moro froekoe a jari disi, wan owroeman ben skrifi: „Den brada nanga sisa ini Sarajevo de na libi èn den de gosontoe, èn san de moro prenspari, wi alamala de tranga na jejefasi ete foe kan hori doro na ondro a law orlokoe disi. A situwâsi ben hebi srefisrefi na a sei foe njanjan. Meki Jehovah blesi èn gi oenoe oen pai foe den moeiti di oenoe ben doe gi wi. Den tirimakti abi spesroetoe respeki gi Jehovah Kotoigi, bikasi den e sori wan boen eksempre ini den fasi foe libi èn foe di den abi respeki gi den tirimakti. Wi de grantangi foe a njanjan na jeje fasi di oenoe ben tjari kon gi wi toe.” — Teki gersi Psalm 145:18.
19 Den brada disi di de ini bigi kefar, ben sori warderi toe nanga a velddienst di den ben doe nanga faja. Foeroe birtisma e kon na den foe aksi den foe wan oso-bijbelstudie. Ini a foto Tusla, pe den ben kisi 5000 kilo njanjan-sani foe jepi den, 40 preikiman ben seni raport foe 25 joeroe leki gemiddelde ibri moen, dati ben de wan boen horibaka gi den neigi pionier ini a gemeente. Den ben abi wan aparti nomroe foe fisitiman foe 243 tapoe a Memrefesa foe a dede foe Jesus. Den lobi brada disi foe troe „e kon de winiman krinkrin nanga jepi foe en di lobi wi”. — Romesma 8:37.
20. Sortoe „srefi fasi foe prati sani” ben feni presi ini a kondre di ben de Sovjet Unie fosi?
20 A fasi foe lobi foe gi di ben sori ini den bigi groepoe wagi nanga jepi foe njanjan nanga waran krosi di ben seni go na a kondre di ben de Sovjet Unie fosi, ben fiti nanga a faja foe den brada drape. Foe eksempre, na Moskow a nomroe foe sma di ben fisiti a Memrefesa a jari disi ben de 7549, efoe joe teki en gersi nanga 3500 a jari di pasa. Ini a srefi ten, den gemeente ini a foto dati ben gro foe 12 te kon miti 16. Ini a heri kondre di ben de Sovjet Unie fosi (poeroe den Baltis Staten) a gro foe den gemeente ben de 14 procent, Kownoekondre preikiman 25 procent èn pionier 74 procent. Fa dati ben de wan jeje foe sori faja èn foe òfer joesrefi! A e memre wan sma na a fosi jarihondro di „wan srefi fasi foe prati sani” ben de. Den kresten di ben abi goedoe na jeje fasi èn na skin fasi, ben gi nanga den heri ati na den wan di ben de na ini presi pe den no ben abi someni, ala di a faja foe den wan di ben pina ben tjari prisiri nanga deki-ati kon gi den wan di ben gi. — 2 Korentesma 8:14.
No wani si san takroe na ai!
21. Fa den koniwan nanga den wan sondro froestan ben poti kontrari makandra ini a lasti pisi foe Odo kapitel 3?
21 Baka dati, a di foe dri kapitel foe Odo e pristeri nanga den froemane disi wan ipi tori di de kontrari makandra, di a e tapoe nanga: „No abi bigi-ai gi a man foe ogridoe, èn no teki no wan foe den pasi foe en. Bikasi a sma di abi triki de wan tegoe sani gi Jehovah, ma En krosibei matifasi de nanga den opregtiwan. A floekoe foe Jehovah de tapoe na oso foe na ogriwan, ma a tanpresi foe den regtfardikiwan a e blesi. Efoe den na sma di e spotoe trawan, ensrefi sa spotoe; ma gi den safri-atiwan a sa sori boen-ati. Grani na san den koniwan sa kisi, ma denwan di de sondro froestan, no sa kisi grani.” — Odo 3:29-35.
22. (a) Fa wi kan tan farawe foe den no teri wi na mindri den wan sondro froestan? (b) San den koniwan no wani si na ai, èn san den e kweki, nanga sortoe pai?
22 Fa wi kan tan fara so taki den no teri wi na mindri den wan di de sondro froestan? Wi moesoe leri foe no wani si san takroe na ai, ija, tegoe foe san Jehovah e tegoe — ala den triki fasi foe a takroe grontapoe disi di abi broedoe-paiman. (Loekoe Odo 6:16-19 toe.) Kontrari foe dati, wi moesoe kweki san boen: opregtifasi, regtfardikifasi, nanga safri-atifasi, so taki ini sakafasi nanga frede gi Jehovah wi kan kisi „den goedoe nanga glori nanga libi” (Odo 22:4). Disi sa de a pai di wi alamala sa kisi di na wan loyaal fasi e poti a froemane disi na ini wi libi: „Froetrow tapoe Jehovah nanga joe heri ati.”
San na joe komentaar?
◻ Fa a thematekst foe a studie disi e fiti ini a ten disi?
◻ Fa wi kan gi Jehovah grani?
◻ Foe san ede wi no moesoe teki tranga leri leki wan soso sani?
◻ Pe wi kan feni a moro bigi kolokoe?
◻ Fa wi kan lobi san boen èn no wani si san takroe na ai?
[Prenki na tapoe bladzijde 25]
Den sma di e òfer den moro betre sani foe den ini ofrandi gi Jehovah sa kisi blesi pasa marki