Abi prisiri ini Jehovah!
„Ala ten abi prisiri ini Masra. Ete wan leisi mi sa taki: Abi prisiri!” — FILIPISMA 4:4.
1. Foe san ede wi sa kan aksi wisrefi san Paulus ben abi na prakseri di a ben taki dati kresten moesoe abi prisiri ala ten?
INI a ten disi, a no gersi leki foeroe reide de foe abi prisiri. Libisma di meki foe doti, srefi troetroe kresten, e tanapoe na fesi situwâsi di e tjari sari kon — situwâsi leki a feni di sma no man feni wroko, wan swaki gosontoe, a dede foe lobiwan, problema nanga a persoonlijkheid, noso a gens di osofamiri memre noso owroe mati di no de na ini bribi, e gens den. So boen, fa wi moesoe froestan a froemane foe Paulus: „Ala ten abi prisiri”? Disi man srefi, te wi e hori den omstandigheid na prakseri di no switi, di de wan tesi, èn di wi alamala moesoe feti nanga dati? Wan takimakandra foe a kontekst foe den wortoe disi sa jepi foe tjari na afersi kon na krin.
Abi prisiri — Foe san ede èn fa?
2, 3. O prenspari prisiri de, so leki fa a e kon na krin ini a kefal foe Jesus nanga den Israèlsma foe owroeten?
2 „Ala ten abi prisiri ini Masra. Ete wan leisi mi sa taki: Abi prisiri!” Disi e memre wi kande na den wortoe di den Israèlsma ben kisi foe jere so wan 24 jarihondro pasa kaba: „A prisiri foe Jehovah na oen fortresi”, noso so leki fa a Moffatt vertaling e taki: „Foe abi prisiri ini a Têgowan, na oen krakti” (Nehemia 8:10). Prisiri e gi krakti èn a de leki wan fortresi di wan sma kan go na ini foe kisi trowstoe èn foe kisi kibri. Prisiri ben de a sani di ben jepi srefi a volmaakti libisma Jesus foe hori doro. „Bika foe a prisiri di ben poti na en fesi, meki a ben hori doro na wan pina-oedoe, a ben wisiwasi sjen èn go sidon na a reti anoe foe a kownoestoeroe foe Gado” (Hebrewsma 12:2). A de krin, taki a man di wan sma man de nanga prisiri te a e kisi foe doe nanga problema, na wan prenspari sani foe kisi froeloesoe.
3 Leti bifo den Israèlsma ben go na ini a Pramisi Kondre, den ben kisi a komando: „Joe moesoe prisiri nanga ala den boen di Jehovah joe Gado, ben gi joe nanga joe osofamiri, joe nanga a Leifisma nanga a freimdesma di de na joe mindri.” Te den no ben sa dini Jehovah nanga prisiri, dan den bakapisi ben sa takroe. „Ala den froekoe disi seiker sa kon na joe tapoe èn den sa kon na joe baka èn teki joe abra, te leki joe dede . . . foe di joe no ben dini Jehovah joe Gado nanga prisiri èn breiti foe na ati foe ala den sani di joe ben kisi pasa marki.” — Deuteronomium 26:11; 28:45-47.
4. Foe san ede wi no ben sa kan de nanga prisiri?
4 Fa a de tranga fanowdoe, foe dati ede, taki a salfoe fikapisi ini a ten disi nanga den „tra skapoe” di de kompe foe den, de nanga prisiri! (Johanes 10:16) Di Paulus ben taki ete wantron a rai foe en, „ete wan leisi mi sa taki”, a ben poti krakti na tapoe o prenspari a de foe prisiri nanga ala den boen di Jehovah doe gi wi. Wi e doe dati troetroe? Noso wi e broko wi ede someni nanga den aladei sani foe a libi taki sontron wi e frigiti den foeroe reide di wi abi foe de nanga prisiri? Den problema e kon so foeroe taki den e tapoe wi foe si a Kownoekondre nanga den blesi foe en? Wi e gi tra sani pasi — trangajesi den wet foe Gado, no e teki notisi foe den gronprakseri foe Gado, noso e poti den wroko na wan sei di wi leki kresten moesoe doe — foe den e poeroe a prisiri foe wi?
5. Foe san ede wan sma di no reidelek e feni en wan moeilek sani foe de nanga prisiri?
5 „Meki ala sma kon sabi a reidelekfasi foe oenoe. Masra de krosibei” (Filipisma 4:5). Wan sma di no reidelek, no de ini balansi. Kande a e misi foe sorgoe boen gi a gosontoe foe en, èn a e meki en skin kon na ondro toemoesi bigi druk noso broko-ede sondro foe disi de fanowdoe. Kande a no leri foe teki den skotoe di a abi èn foe libi akroederi den skotoe dati. Kande a e poti den marki foe en toemoesi hei èn baka dati a e proeberi foe doro den marki dati, awansi san a sa teki toe. Noso kande a e gebroiki den skotoe di a abi leki wan reide foe no wroko so tranga moro noso foe no de so fajafaja moro. Foe di a no de ini balansi èn a no reidelek, meki a e feni en wan moeilek sani foe de nanga prisiri.
6. (a) San kompe kresten moesoe si ini wi, èn oten wawan disi sa de so? (b) Fa den wortoe foe Paulus ini 2 Korentesma 1:24 nanga Romesma 14:4 e jepi wi foe de reidelek?
6 Srefi te gensman e si wi leki fanatieksma, dan ala ten kompe kresten moesoe man si a reidelekfasi foe wi. Èn den sa si dati efoe wi de ini balansi èn no e froewakti volmaaktifasi foe wisrefi noso foe trawan. Boiti dati, wi no moesoe poti hebi na tapoe tra sma, di e go moro fara leki san a Wortoe foe Gado e aksi. Na apostel Paulus ben taki: „No taki wi na basi foe oen bribi, ma wi na kompe wrokoman foe oen prisiri ede” (2 Korentesma 1:24). Leki wan sma di fosi ben de wan Fariseiman, Paulus ben sabi heri boen taki te denwan di abi makti ben sa poti seti na sma tapoe di strak, dan a prisiri ben sa lasi gowe, ma te kompe wrokoman ben sa gi rai foe jepi sma, dan dati ben sa meki moro prisiri kon. Taki „Masra de krosibei”, moesoe memre a reidelek sma taki wi no moesoe ’kroetoe na oso-srafoe foe wan trawan. A e tanapoe noso e fadon gi en eigi masra’. — Romesma 14:4.
7, 8. Foe san ede kresten moesoe froewakti taki den sa abi problema, ma tokoe fa den man foe tan de nanga prisiri?
7 „No broko oen ede foe noti, ma meki ini ala sani nanga jepi foe begi nanga djeme makandra nanga a taki foe tangi, oen tranga begi kon bekènti na Gado” (Filipisma 4:6). Ini a ten disi wi e ondrofeni den „moeilek ten di tranga foe pasa” di Paulus ben skrifi foe den (2 Timoteus 3:1-5). Foe dati ede kresten moesoe froewakti taki den sa kisi foe doe nanga problema. Den wortoe foe Paulus, „ala ten abi prisiri” no wani taki dati wanwan leisi wan loyaal kresten no kan abi wan pisi ten pe a lasi-ati noso brokosaka krinkrin kande. Paulus ben taki eerlijk foe ensrefi: „Wi e kisi kwinsi na ala fasi, ma no so, taki wi no man boeweigi moro; pikinmoro wi no sabi san foe doe moro, ma no so, taki wan pasi no de foe komoto kwetikweti; den e froefolgoe wi, ma den no e libi wi na baka sondro foe loekoe wi; den e naki wi trowe, ma wi no e kisi pori” (2 Korentesma 4:8, 9). Ma a prisiri foe wan kresten e meki taki den pisi ten foe broko-ede nanga sari no de so hebi moro èn te foe kaba a prisiri e wini den. Prisiri e gi wi a krakti di wi abi fanowdoe foe tan go na fesi nanga wan fasti bosroiti, èn foe noiti no frigiti den foeroe reide di wi abi foe de nanga prisiri.
8 Te problema e kon, osortoe problema den de toe, dan a kresten di de nanga prisiri, na wan sakafasi e aksi foe kisi a jepi foe Jehovah nanga jepi foe begi. A no e gi ensrefi abra foe broko en ede pasa marki. Baka di ensrefi doe san a man doe na wan reidelek fasi foe loesoe a problema, a e libi a bakapisi ini den anoe foe Jehovah, so leki fa a kari e taki: „Trowe joe lai na tapoe Jehovah èn ensrefi sa jepi joe.” Disiten, a kresten e go doro foe gi Jehovah tangi foe ala den boenfasi foe En. — Psalm 55:22; loekoe toe Mateus 6:25-34.
9. Fa a sabi di wan sma sabi waarheid e gi vrede foe a froestan, èn sortoe boen bakapisi disi abi na tapoe wan kresten?
9 „A vrede foe Gado di e pasa ala prakseri, sa kibri na ati nanga a koni foe joe froestan nanga jepi foe Krestes Jesus” (Filipisma 4:7). A sabi di wan kresten abi foe bijbel waarheid e fri en froestan foe lei èn e jepi en foe kweki wan gosontoe fasi foe denki (2 Timoteus 1:13). Na so fasi a e kisi jepi foe tan fara foe go doe san no boen noso foe abi wan don fasi foe tjari ensrefi, di ben kan tjari boen matifasi di a abi nanga trawan, kon ini kefar. Na presi foe meki en prakseri kon broeja foe onregtfardikifasi nanga ogridoe ede, a e poti en froetrow na tapoe Jehovah foe A loesoe den problema foe a libisma famiri nanga jepi foe a Kownoekondre. So wan vrede foe a froestan e kibri en ati, e meki den boeweigi foe en ati tan soifri èn e tjari a denki foe en go na regtfardikifasi. Soifri boeweigi foe ati nanga wan joisti denki, foe en sei, e gi heri ipi reide foe de nanga prisiri, awansi den problema nanga druk di wan broeja grontapoe e tjari kon.
10. Soso te wi e taki noso e denki foe sortoe sani, wi kan ondrofeni troetroe prisiri?
10 „Te foe kaba, brada, ala sani di troe, ala sani di de foe serjoesoe belang, ala sani di regtfardiki, ala sani di krin, ala sani di switi, ala sani di sma e taki boen foe en, ala sani di abi boen maniri, ala sani di de foe prèise, tan poti prakseri na tapoe den sani disi” (Filipisma 4:8). Wan kresten no e feni en wan prisiri sani foe taki noso foe denki foe sani di no boen. Disi foe ensrefi, e sorgoe taki foeroe foe na ontspanning di grontapoe abi, den no man doe. No wan sma kan tan abi a prisiri foe wan kresten efoe a e foeroe a prakseri nanga na ati foe en nanga lei, nanga a taki foe morsoe sani, nanga afersi di no regtfardiki, di no de akroederi boen gwenti nanga wet, di de sondro boen maniri, di de nanga ogri-ati, èn di de wan tegoe sani. Foe taki en krin, no wan sma kan kisi troetroe prisiri te a e foeroe en froestan nanga en ati nanga doti sani. Fa a de wan sani di e bow sma foe sabi taki ini a pori grontapoe foe Satan, kresten abi someni boen sani foe denki foe den èn foe taki foe den!
Wan heri ipi reide foe de nanga prisiri
11. (a) Sortoe sani wi noiti no moesoe si leki wan soso sani èn foe san ede? (b) Sortoe bakapisi a ben abi na tapoe wan man nanga en wefi, di den ben go na wan internationaal kongres?
11 Te wi e taki foe reide foe de nanga prisiri, dan wi no moesoe frigiti na internationaal bradafasi foe wi (1 Petrus 2:17). Ala di nationaal groepoe nanga ras foe grontapoe e sori krinkrin taki den no wani si makandra na ai, tokoe a pipel foe Gado e kon moro krosibei na makandra foe di den lobi makandra. A wánfasi foe den de foe si spesroetoe na den internationaal kongres. Wan man foe Verenigde Staten di ben go na a kongres di ben hori ini 1993 na Kiev, Oekraine, ben skrifi: „Den watra-ai foe prisiri ede, den ai di ben brenki, a brasa di sma ben brasa makandra doronomo leki wan famiri, nanga den odi di groepoe na ala toe sei foe a stadion ben gi makandra nanga prasoro èn nanga saka-anjisa di ben lai nanga kloroe, ben de wan krin boeweisi foe a theokrasia wánfasi. Na ati foe wi e kon foeroe foe di wi breiti foe san Jehovah doe na wan wondroefasi ini a bradafasi na heri grontapoe. Disi ben abi foeroe krakti na tapoe mi nanga mi wefi èn a meki a bribi foe wi wani taki wan njoen sani baka.”
12. Fa Jesaja 60:22 e kon troe leti na fesi wi ai?
12 Fa a e tranga a bribi foe kresten ini a ten disi foe si taki den bijbel profeititori e kon troe, leti na fesi den ai! Prakseri foe eksempre, den wortoe foe Jesaja 60:22: „A pikinwan srefi sa tron wan doesoen èn a pikinwan wan makti nâsi. Misrefi, Jehovah, sa meki a pasa moro gaw na en reti ten.” Di a Kownoekondre ben opo ini 1914, soso 5100 sma — wan pikinwan — ben e preiki fajafaja. Ma ini den feifi jari di pasa, a nomroe foe a bradafasi na heri grontapoe kon moro bigi nanga wan gemiddelde foe 5628 njoen Kotoigi di teki dopoe ibri wiki! Ini 1993 den ben doro wan heimarki foe 4.709.889 fajafaja bedinari. Prakseri foe disi nomo! Disi wani taki dati „a pikinwan” foe 1914 troetroe de foe doro „wan doesoen”!
13. (a) San e pasa foe sensi 1914? (b) Fa Jehovah Kotoigi e hori densrefi na a gronprakseri foe Paulus wortoe ini 2 Korentesma 9:7?
13 Foe sensi 1914, a Mesias Kownoe go doro foe poti na en ondro na mindri den feanti foe en. Libisma bakaman di de klariklari, hori baka gi a tiri foe en, foe di den e gi ten, krakti nanga moni foe go doro nanga a preikiwroko na heri grontapoe èn nanga wan internationaal bowprograma (Psalm 110:2, 3). Jehovah Kotoigi e prisiri taki bijdrage foe moni e gi, foe kan tjari den wroko disi kon na wan kaba, srefi ala di pikinmoro noiti den no e taki foe moni na den konmakandra foe den.a (Teki gersi 1 Kroniki 29:9.) Den no abi foe poesoe den troe kresten foe gi; den e si en leki wan grani foe hori baka gi a Kownoe foe den, so leki fa den omstandigheid foe den e gi pasi foe dati, èn ibriwan foe den e doe „so leki fa a ben bosroiti ini en ati, no sondro prisiri noso foe di sma dwengi en”. — 2 Korentesma 9:7.
14. Sortoe situwâsi di de na mindri a pipel foe Gado, kon de foe si foe sensi 1919, èn sortoe reide a e gi den foe de nanga prisiri?
14 A meki di den ben o meki a troe anbegi kon boen baka na mindri a pipel foe Gado, so leki fa a ben froeteri na fesi, abi leki bakapisi taki wan paradijs na jeje fasi kon. Foe sensi 1919, a paradijs gro safrisafri kon bigi (Psalm 14:7; Jesaja 52:9, 10). San na a bakapisi? Troe kresten „e breiti èn e prisiri” (Jesaja 51:11). Den boen froktoe di e kon foe dati, e boeweisi san a santa jeje foe Gado man doe nanga jepi foe onvolmaakti libisma. Na Jehovah moesoe kisi ala grani, ma sortoe moro bigi grani ben kan de leki foe tron Gado en kompe wrokoman? (1 Korentesma 3:9) Jehovah tranga nofo foe meki den ston bari a boskopoe foe waarheid, efoe dati de fanowdoe. Ma tokoe a froekisi foe no meki gebroiki foe a fasi disi, ma, na presi foe dati, foe poesoe mekisani di meki foe doti èn di de klariklari, foe doe a wani foe en. — Lukas 19:40.
15. (a) Sortoe sani di e pasa ini a ten disi wi e hori na ai nanga belangstelling? (b) Na sortoe sani di sa pasa, wi e loekoe go nanga prisiri?
15 Den foetoeboi foe Jehovah di foeroe nanga lespeki, e loekoe now den sani di e pasa na grontapoe, di abi foe doe nanga toemoesi aparti bijbel profeititori. Den nâsi e proeberi boen tranga — ma a de foe soso — foe tjari vrede kon di e tan. Den sani di pasa e dwengi den foe soekoe a jepi foe na organisâsi foe den Verenigde Nâsi, foe doe wan sani ini den pisi foe grontapoe pe bigi problema de (Openbaring 13:15-17). Disiten, a pipel foe Gado e loekoe kaba, nanga foeroe froewakti, go na wan foe den moro prisiri sani di pasa wan ten, wan di e kon krosibei dei nanga dei. „Meki wi prisiri èn de nanga prisiri pasa marki, èn meki wi gi en a glori, bika a trow foe a Pikin Skapoe doro èn en wefi sreka ensrefi.” — Openbaring 19:7.
Preiki — Wan hebi noso wan prisiri sani?
16. Sori fa a kan poeroe a prisiri foe wan kresten, efoe a no e doe san a leri.
16 „Den sani di oenoe ben leri èn di oenoe ben teki, ben jere èn ben si ini a tori foe mi, doe den; èn a Gado foe vrede sa de nanga oenoe” (Filipisma 4:9). Foe di kresten e doe san den leri, meki den kan froewakti foe kisi a blesi foe Gado. Wan foe den moro prenspari sani di den leri na, taki a de fanowdoe foe preiki a boen njoensoe na tra sma. Ija, soema kan njanboen foe vrede foe a froestan noso abi prisiri, efoe a no e froeteri opregti sma, di a libi foe den srefi e anga foe a jere di den e jere a boskopoe? — Esekièl 3:17-21; 1 Korentesma 9:16; 1 Timoteus 4:16.
17. Foe san ede a preikiwroko foe wi moesoe de wan fonten di e gi prisiri ala ten?
17 Fa a de wan prisiri sani foe feni sma di joe kan teki gersi nanga skapoe, èn di de klariklari foe leri sani foe Jehovah! Ija, denwan di e dini nanga a joisti boeweigi foe ati, ala ten sa si taki a Kownoekondre diniwroko na wan fonten di e gi prisiri. Disi de so, foe di a moro prenspari reide foe de wan Kotoigi foe Jehovah na foe prèise En nen èn foe hori a posisi foe En leki Soeverein Tiriman, hei (1 Kroniki 16:31). A sma di e erken a tori disi sa de nanga prisiri, srefi te sma sa de so don foe weigri foe arki a boen njoensoe di a e tjari. A sabi taki a preiki di a e preiki gi sma di no e bribi, wan dei sa kon na wan kaba; a prèise di sma e prèise Jehovah nen sa go doro foe têgo.
18. San e boeweigi wan kresten foe doe a wani foe Jehovah?
18 A troe relisi e boeweigi denwan di e libi akroederi a relisi disi, foe doe den sani di Jehovah e aksi, no foe di den moesoe, ma foe di den wani (Psalm 40:8; Johanes 4:34). Foeroe sma e feni disi wan moeilek sani foe froestan. Wan leisi wan oema ben taigi wan Kotoigi di ben kon na en oso: „Joe sabi, mi moesoe foe prèise joe. Mi de seiker taki noiti mi no ben sa go oso foe oso foe preiki foe a relisi foe mi, so leki fa joe e doe en.” A Kotoigi ben lafoe di a ben piki: „Mi kan froestan fa joe e firi. Fosi mi ben kon tron wan Kotoigi foe Jehovah, joe no ben sa kan dwengi mi foe go na tra sma foe taki foe relisi. Ma now mi wani foe doe disi.” Na oema ben denki pikinso èn baka dati a ben kon na a bosroiti: „A de krin taki a relisi foe joe abi wan sani di a relisi foe mi no abi. Kande mi moesoe foe go ondrosoekoe san na dati.”
19. Foe san ede now a de a ten foe de nanga prisiri moro leki wan ten na fesi?
19 A jaritekst foe 1994 di ala sma kan si ini den Kownoekondrezaal foe wi, e memre wi doronomo: „Froetrow tapoe Jehovah nanga joe heri ati” (Odo 3:5). Wan moro bigi reide kan de foe de nanga prisiri leki foe man poti wi froetrow tapoe Jehovah, wi fortresi pe wi e soekoe kibri? Psalm 64:10 e tjari kon na krin: „A regtfardikiwan sa prisiri ini Jehovah èn troetroe a sa go soekoe kibri na en.” Disi a no a ten foe tweifri noso foe broko kindi. Ibri moen di e pasa, e tjari wi moro krosibei na san foetoeboi foe Jehovah ben angri foe si sensi a ten foe Abel. Now a de a ten foe froetrow tapoe Jehovah nanga wi heri ati, foe di wi sabi taki noiti ete wi no ben abi someni reide foe de nanga prisiri!
[Foetoewortoe]
a Na den kongres èn wán tron wán moen ini den gemeente, den e leisi wan sjatoe froeklari di e sori omeni den ben kisi foe friwani bijdrage èn den kostoe di meki. Wanwan leisi den e seni brifi foe gi rai fa foe gebroiki den bijdrage disi. Na so fasi den e memre ala sma fa a situwâsi na moni sei de ini a tori foe a wroko di Jehovah Kotoigi e doe na heri grontapoe.
Fa joe ben sa piki?
◻ Foe san ede, so leki fa Nehemia 8:10 e taki, wi moesoe de nanga prisiri?
◻ Fa Deuteronomium 26:11 nanga 28:45-47 e sori o prenspari a de foe de nanga prisiri?
◻ Fa Filipisma 4:4-9 kan jepi wi foe de nanga prisiri ala ten?
◻ Sortoe reide a jaritekst foe 1994 e gi wi foe de nanga prisiri?
[Prenki na tapoe bladzijde 16]
Kotoigi foe Rosiakondre nanga Doisrikondre e prisiri foe de wan pisi foewan internationaal bradafasi
[Prenki na tapoe bladzijde 17]
Foe prati a waarheid nanga trawan na wan reide foe de nanga prisiri