A geest foe na kristen diniwroko
„De faja foe geest. Dini Jehovah leki srafoe.” — ROMEINI 12:11.
1. Fa wan sma e sori taki a de wan kristen dinari foe Gado?
WAN SMA kan sori tapoe soso wán fasi taki a de wan kristen dinari foe Gado — nanga jepi foe wroko. Disi wi kan si foe san na Griki wroko gi dinari, diákonos, wani taki. Wan sabiman e taki: „Diákonos e taki foe na knegti di de ini faja gi a wroko . . . a wortoe e taki foe wan sma di e doe den komando foe wan trawan, spesroetoe di foe wan masra” (Studies in the Vocabulary of the Greek New Testament, foe na anoe foe Kenneth S. Wuest). Na skrifiman e poti dja krakti a tapoe dati a de foe wan dinari ofoe wan bedinari, no wani taki someni taki wan sma e de ini wan positie leki dati wan sma de fajafaja e doe wan sani.
2. Sortoe bewijsi de taki Timoteus nanga Paulus ben de troe dinari foe Gado?
2 Na apostel Paulus foe eksempre ben taki gi Timoteus: „Ma joe sabi sortoe bewijsi a ben gi foe ensrefi, dati en, leki wan pikin nanga en papa, ben dini leki wan srafoe nanga mi foe meki na boen njoensoe go na fesi” (Fil. 2:22). Timoteus ben wroko tranga ini na diniwroko. No wan sma di ben si na wroko foe en, di a ben doe sondro gridifasi, ben kan degedege taki a ben de wan troetroe dinari foe Gado. Paulus ben skrifi foe dat’ede toe gi den kristen ini Korinte: „Oen srefi de wi bribi, di skrifi tapoe wi ati èn di ala sma ben sabi èn ben lési. Bikasi a de krin taki oenoe de wan brifi foe Kristus, di wi ben skrifi leki dinari, no nanga enki, ma nanga jeje foe wan libi Gado” (2 Kor. 3:2, 3). Te wan sma ben si na gemeente disi di ben go na fesi èn ben sabi dati Gado ben meki a kon gebore leki wan froktoe foe na diniwroko foe Paulus, fa a ben sa degedege dan taki Paulus ben de wan dinari foe Gado?
3. Ferteri san de na geest foe wan kristen dinari foe Gado?
3 Ma hori ini prakseri taki foe de wan dinari foe Gado, no de nomo a doe foe „agersi” dienst, net someni dati sma kan taki i de wan toe. Wi moe meki na geest foe kristen diniwroko gro. Timoteus ben dini „leki wan srafoe” na a sé foe Paulus. Na apostel ben taki srefi: „Heloe foe mi efoe mi no barwroko gi na boen njoensoe!” (1 Kor. 9:16) Boiti dati, a ben skrifi: „Na no wan fasi wi e gi wan rede foe stotoe foetoe fadon, sodati sani ben kan taki foe na diniwroko foe wi, ma na ibri fasi wi e presteri wisrefi leki Gado dinari: nanga hori-doro, nanga benawtoe, nanga nowtoe, nanga moeilekheid.” Ia, Paulus ben sori a frede foe dini Gado faja, wan geest foe a tranga fanowdoe foe a ten èn foe de klari foe teki san de fanowdoe. Srefi na „lasi foe ala sani”, foe kan tjari en diniwroko leki kristen kon na wan kaba (2 Kor. 6:3-10; Fil. 3:8). Ala troe kristen bedinari foe na evangelium moe sori sowan srefi geest. — Luk. 9:23, 24.
4. Fa wan sma kan de wan bedinari foe na evangelium te a de gi na moro bigi pisi foe en ten foe doe tra verprekti?
4 Soleki fa a ben de ini den dé foe den apostel, na so son bedinari foe na evangelie ini disi ten de man ofoe oema di e doe wroko na grontapoe foe kan sorgoe gi den osofamiri. Trawan de ete na skoro. Fa wi kan taki dati den de troetroe dinari foe Gado? We now, den e doe den tra verprekti foe den èn den e prisiri srefi ini wan redelek fasi foe ontspanning. Ma a no de so taki a diniwroko foe den no de so prenspari gi den leki tra sani. Moro fara a no de so dati den e si a diniwroko foe den so boen leki den kan ini na programma foe den foe ontspanning èn sosrefi toe a no de so dati den e gi so pikinso ten ini wan moen, leki wan sortoe foe gebaar. Den „e tan soekoe fosi na kownoekondre èn en regtvaardikifasi”. — Matt. 6:33
Pionierwroko nanga na kristen-diniwroko
5. San de wan toemsi moi fasi foe sori a geest foe na kristen diniwroko?
5 Den sma di e sori sowan geest de troe kristen dinari foe Gado, srefi efi den abi osofamiri-frantwortoe ofoe grontapoe verprekti. Ma sonsma kan sori na geest foe na diniwroko na wan spesroetoe fasi di e tjari pai kon. Fa so? Foe di den e pionier (teki prati na a foeroeten prékiwroko), kande ini wan sjatoe pisiten leki jepi-pionier ofoe ini wan moro langa pisiten. Kande den kan wroko srefi tapoe wan foe den bijkantoro foe na Wachttoren genootschap ofoe abi wan prati na a zendingwroko ofoe na a diniwroko foe waka lontoe pe den e go fisiti èn bow difrenti gemeente ini bribi.
6. San de wantoe boen réde foe san-ede ibri kotoigi foe Jehovah di de ini a positie, moe pionier? (Luk. 6:46-49)
6 Foe san-ede foeroe kotoigi foe Jehovah e pionier, aladi den kan meki a libi moro switi gi densrefi, efoe den ben no sa gi so foeroe ten na a dini foe Gado? Foe di den wani prijse Jehovah èn wani foe ferteri trawan foe en prakseri. Sosrefi toe den sabi dati ’na grontapoe e pasa gwe èn sosrefi toe en lostoe, aladi na sma di e doe a wani foe Gado, e tan foe tégo’ (1 Joh. 2:17). Foe di den e bribi ini den wortoe disi èn sosrefi toe den pramisi foe Gado, a de na winsi foe den f oe gi someni ten leki den kan na a ferteri foe na boen njoensoe gi tra sma sodati den sma di e teki en na wan boen fasi, kan doe sosrefi toe na wani foe Gado èn kan kisi tégo libi. Boiti dati, den sabi dati wi e libi ini na ten pe ’na boen njoensoe disi foe na kownoekondre sa préki na a heri grontapoe leki wan kotoigi gi ala naatsi èn dan na kaba sa kon’ (Matt. 24:14). Den e memre taki Jezus ben taki gi en bakaman: „A kotiwroko bigi, ma pikinso wrokoman de. Begi foe dat’ede na Masra foe a kotiwroko dati a seni wrokoman go na ini en kotiwroko” (Matt. 9:37, 38). Den e froestan dati a begi disi srefi now e fiti moro ete leki ini Jezus ten. Ma fa den ben sa kan taki a begi disi opregti efoe den ben sa hori densrefi a baka foe teki prati na a kristen diniwroko dorodoro?
7. San ibri kristen dinari foe Gado moe aksi ensrefi?
7 Ia, ibri kristen dinari foe Gado moe loekoe ondro begi ofoe en kan pionier ofoe no kan pionier. Wan man nanga oema ini Zuid-Afrika di e pionier kaba tinaféfi jari, ben taki: „Foe san-ede wi e pionier? Wi ben sa kan frantwortoe en gi Jehovah te wi no ben doe disi?” Foeroe sma di no de pionier, nanga leti ben kan aksi na aksi disi: ’Mi kan frantwortoe en troetroe gi Jehovah taki mi no de wan pionier?’
Gebroiki wi presenti
8. Fa foeroe jongoe sma, neleki Timoteus, kan de ini na positie foe pionier?
8 Timoteus ben abi wan spesroetoe jeje presenti di a ben gebroiki boen ini en diniwroko (2 Tim. 1:6). Ini disi ten wi no e kisi spesroetoe presenti foe na jeje, ma wi abi wel tra presenti, èn nofotron den presenti disi e opo na pasi gi na pionierwroko. Jongoe sma di komoto foe skoro, abi foe eksempre presenti. A skoro opleiding ben gi den wan boen ontwikkeling. Densrefi de jongoe toe, neleki Timoteus, èn dati na wan bigi wini. Den abi gesontoe èn krakti èn sosrefi toe wan fris èn opo jeje-fasi. A moro bigi presenti foe alamala de kande dati den abi ten. Ini algemeen den no e go boekoendoen na ondro foeroe frantwortoe. Den jongoe jari de foe dat’ede wan toemsi moi ten foe go denki ernstig foe na pionierwroko. — Prék. 12:1.
9. Sortoe presenti moro owroe sma nanga tra sma kan abi, sodati den e de ini na okasi foe pionier?
9 Moro owroe sma abi sosrefi toe presenti. Wan trowman nanga masra di kisi pensioen èn di abi bigi pikin kan abi ten toe di ben sa kan gebroiki foe pionier. Nofotron den abi en boen na monisé, den abi warti ondrofeni foe libi èn den ben bow wan langa bericht foe getrow dienst (Odo 16:31). Ala den sani disi ben sa kan gebroiki boen ini na pionierwroko. Tra sma kande abi sosrefi toe presenti. Son oso-oema abi na presenti dati den kan orga sani boen, sodati den kan doe den osofamiri frantwortoe èn kan doe pionierwroko ete. Son oso-papa di abi na srefi presenti disi, e man foe pionier èn foe sorgoe gi den osofamiri ini jeje fasi èn na fasi foe san de fanowdoe. Joe abi na presenti taki joe kan taki boen, joe kan leri sma ofoe joe kan go boen makandra nanga tra sma? Go prakseri pikinso fa na wan moro bradi fasi den sortoe presenti disi ben kan kon moro bigi, te joe kan go ini na pionierdienst.
10. (a) Foe san-ede son sma e hori densrefi a baka foe teki na pionierwroko na den tapoe? (b) Fa na pionierwroko e tjari wini kon gi wan sma di e feni en moeilek foe préki?
10 Son sma e hori densrefi na baka foe no go ini na pionierwroko foe di den e aksi densrefi efoe den kan jepi densrefi na monisé. Wan oema nanga man di ben pramisi foe trow ben taki nanga makandra foe na frede disi: „Wi ben kon na a besroiti taki a ben de wan mankeri foe fertrow ini na makti foe Jehovah foe sorgoe foe den fanowdoe sani gi wi. Baka di wi ben loekoe Matt. 6:25-33 pe Jezus ben leri dati efoe wi soekoe na Kownoekondre fosi wi sa kisi ala fanowdoe sani foe na libi, wi ben poti na marki foe de gewone pionier”. Sjatoe na baka den ben trow èn den ben libi den wroko di ben pai boen èn den ben tron pionier. Tra sma e feni na prékiwroko srefi moeilek. Joe toe kande? Efoe disi de so dan pionierwroko kan de wan jepi. Ia, na moro boen fasi foe firi srefi boen ini na oso na oso diniwroko, de foe psa wan pisiten ini na pionierwroko. Wan bedinari di ben abi wan prati na a jepi-pionierwroko, taki: „Wán blesi ben de ete. Mi ben firi misrefi moro switi ini mi oso na oso wroko. Na presi dati na frede ben kon ini mi ati na ibri doro, mi ben bigin loekoe na fesi foe taki nanga sma.” — Loekoe Fil. 4:13.
Pionierwroko — Wan osofamiri-afersi
11. Fa Timoteus ben kisi blesi nanga na opleiding di a ben kisi „foe en jongoe jari kaba”?
11 Timoteus foe „jongoe jari kaba” ben kisi leri tapoe wan progressief fasi gi na diniwroko (2 Tim. 3:14, 15). En mama nanga granmama kande ben abi na geest foe na kristen diniwroko èn ben tjari na geest dati go abra ini en. Di Paulus ben kon ini Lystra dan Timoteus ben de klari foe waka makandra nanga en ini na foeroeten prékiwroko activiteit sondro dati wan sani ben tapoe en. — Tori. 16:1-5.
12. Fa foeroe papa nanga mama ben sori taki den abi na geest foe na kristen diniwroko?
12 Ini na ten disi foeroe kristen bréti taki den papa nanga mama e sori sowan srefi geest. Alice, wan pionier sisa foe Ghana e taki: „Pikinmoro ala kotoigi di ben e kon sribi na wi oso, ben de foeroeten prékiman. Fa mi ben abi wan grani foe ben gro ini so wan theocratisch osofamiri! Mi papa meki dati na ala en pikin na lostoe ben kon foe teki na foeroeten prékiwroko na den tapoe, èn a ben sori leki eksempre a tapoe den brada nanga sisa di e doe a wroko disi. A ben de soso wan logis sani dati baka di mi ben kaba nanga skoro, mi ben meki den skrifi mi nen wantronwantron leki gewoon pionier.” Ed, wan jongoe bedinari ini Verenigde Staten (Amerkankondre), ben taki: „Mi denki taki a ben jepi mi troetroe taki mi papa nanga mama twarfoe jari langa ben de zendeling ini Zuid-Amerika èn fesi a ten dati, ben de pionier. Den ben poti foe dat’ede alaten na mi fesi den prisiri nanga grani foe na pionierwroko èn den ben sori mi tapoe den blesi di Jehovah e kanti tapoe den pionier . . . Disi na san ala papa nanga mama sa ben moe doe, bika a ben jepi mi troetroe. Den kan gi den jongoewan tranga foe dini Jehovah nanga den heri ati èn sili èn so foeroe leki den kan.”
13. Fa pionier e kisi jepi foe wini moeilekheid?
13 Sontron offer moe tjari te wan sma sa wani pionier, ma troetroe bedinari de klarklari foe tjari den offer disi, foe di den lobi Jehovah. Boiti dati den paiman de bigi. Michael nanga Theresa, wan man nanga oema ini Verenigde Staten (Amerkankondre) ben taki en na so fasi: „Te joe wani de moro tranga na jejefasi, dan pionierwroko de a moro boen sani di joe kan doe. Joe e anga moro na Jehovah èn joe no e anga so foeroe na joe srefi. Aladi wi leki pionier ben abi problema na monisé, alaten Jehovah ben sorgoe gi den sani di wi abi fanowdoe. Te joe e pionier, dan joe de ini a moro boen positie di de.”
14, 15. (a) Fa papa nanga mama foe pionier sontron e tjari offer? (b) Sortoe eksempre foe disi wi abi ini bijbel ten? (c) Fa papa nanga mama ini disi ten kan sori na geest foe na kristen diniwroko?
14 Papa nanga mama foe pionier e tjari sontron offer toe. A kan de moeilek gi den foe si taki den pikin „e libi na nesi” foe go pionier na wan tra presi, kande srefi ini wan tra kondre. Na sonfasi den papa nanga mama disi de leki Hanna nanga Elkana di ben seni na fosigebore pikin foe den, Samuël, gwe foe dini Jehovah ini na tabernkel foe Silo (1 Sam. 1:1-3, 24-28). So toe wi ben sa kan gersi den nanga Jefta, di ben gi en wan enkri oemapikin na a dienst foe Jehovah, sodati a ben offer ibri froewakti foe si oiti ini a ten di ben sa kon granpikin (Kroetoeman 11:36-40). Jehovah sa hori ini prakseri èn pai na fasi foe den sortoe papa nanga mama disi, pe den e sori dati den no e prakseri densrefi nomo.
15 Srefi offer na monisé kan de ini na tori. Ini son kondre den papa nanga mama e froetrow taki te den kon grani kaba, den pikin sa sorgoe den. Papa nanga mama di abi troetroe na geest foe na kristen diniwroko no e degedege tapoe na gron disi foe gi den pikin foe den tranga foe go ini na pionierwroko. Di wan sma foe Ghana di ben nen Justice ben wani pionier, en mama ben gi en pasi foe disi èn a ben libi ensrefi abra krinkrin na Jehovah foe a sorgoe foe en. Bakaten a mama ferteri en manpikin taki Jehovah ben sorgoe en tapoe wan wondroe fasi sensi di a ben teki na besroiti. Disi de sosrefi toe wan fasi foe „soekoe na Kownoekondre foe Gado fosi”, èn Jehovah no e libi den sma, di e doe disi, na wan sé. — Matt. 6:33, 34.
16. Foe san-ede den sma di de ini na foeroeten dienst, moe kisi tranga foe horidoro ini a dienst disi, solanga den omstandigheden e gi pasi foe disi?
16 A de wan sari sani foe jere wawantron taki papa nanga mama e proeberi foe kisi den pikin foe den so fara foe tapoe nanga pionierwroko. No foe di den abi jepi fanowdoe, ma foe di den abi na prakseri taki den pikin foe den ben de langa nofo ini na toewijzing foe den èn dati a de now ten foe kon baka na oso èn foe abi wan osofamiri èn foe libi wan „normaal” libi. Ma wi no e libi now ini wan normaal ten, èn o moro na kaba foe na seti foe sani disi e kon moro krosibé, dan a libi foe ibriwan sma moro nanga moro no sa de normaal. Pionier, memre foe na Bethelfamiri, bedinari di e waka lontoe èn zendeling, moe kisi tranga foe hori-doro. — Tit. 2:12.
Sori na geest foe na diniwroko
17. (a) Fa na wroko foe pionier nanga tra foeroeten bedinari de wan winimarki gi na gemeente? (b) Fa alasma kan sori taki den abi na geest foe na kristen diniwroko? (Hebr. 13:15, 16)
17 Na apostel Paulus ben skrifi: „Gado ben gi sonwan leki apostel sonwan leki proféti, sonwan leki evangeliumprékiman, sonwan leki herder èn leriman, nanga na prakseri foe na opleiding foe den santawan gi na wroko foe na diniwroko foe bow na skin foe na Kristus” (Ef. 4:11, 12). Ini a ten disi joe abi bedinari di e waka lontoe, pionier nanga zendeling di a moro bigi pisi foe den ten den e gi na a doe foe na ’evangeliumwroko’, èn sosrefi toe den memre foe na Bethelfamiri di a diniwroko foe den de dati den e dini den gemeente a tapoe wan trafasi. Den alamala e meki taki den gemeente bow kon moro tranga (Teki gersi Tori. 16:4, 5) Dat’ede meki ala kristen bedinari moe abi belangstelling foe pionier. Efoe den man foe pionier, dan den moe doe disi toe. Efoe den no kan foe pionier den srefi, dan den moe gi tranga na den wan di kan doe disi wel. — Rom. 12:11.
18. Foe san-ede na kristen diniwroko de now so prenspari?
18 Wan bigi fanowdoe de foe abi kotoigi foe Jehovah di gi densrefi abra nanga sowan sortoe geest. Srefi ini kontren pe ini na lon foe den jari nofotron kotoigi ben gi, doesoen-doesoen sma e teki ete tapoe wan boen fasi na préki foe na boen njoensoe. Den sma disi di e teki na njoensoe tapoe wan boenfasi e kon ini na okasi foe kisi tégo libi foe di wan kristen bedinari foe na evangelium ben teki na ten foe fisiti den èn foe ferteri den foe na prakseri foe Gado (Rom. 10:13, 14; 1 Tim. 4:16). Omeni sma e wakti ete foe jere na boen njoensoe? Efoe wi kan ofoe no kan foe abi wan prati na a pionierwroko meki wi abi na firi foe na tranga fanowdoe foe na ten èn na geest foe offer wisrefi. Meki wi de klari foe wroko tranga ini na kristen diniwroko. — Gal. 6:10.
Joe e froestan krinkrin
□ San a wani taki foe abi na geest foe na kristen diniwroko?
□ San de wan „agersi” dienst, èn san e mankeri na disi?
□ Foe san-ede ala kristen dinari foe Gado moe abi belangstelling foe pionier?
□ Fa ala Kotoigi di gi densrefi abra kan sori wan pionier geest?
□ Foe san-ede na kristen diniwroko de now wan toemsi prenspari sani?
[Prenki na tapoe bladzijde 7]
Ala troe kristen bedinari foe na evangelium abi na geest foe Paulus èn Timoteus