Now na a ten fu preiki!

1. Fu san ede now na a ten fu preiki?

¹ „Frede Gado èn gi en glori.” Ondro a tiri fu engel, a boskopu disi e meki bekènti „gi ala kondre, lo, tongo, nanga pipel”. Fu san ede a boskopu e meki bekènti? „Bika a yuru doro kaba taki [Gado] o krutu sma.” Na ini a ten disi, wi e libi na ini a ’yuru dati te sma o kisi krutu’, èn disi sa doro en heimarki te a disiten seti fu sani sa kisi pori. A de tumusi prenspari taki sma e „anbegi a Sma di meki hemel, grontapu, a se, nanga ala den presi pe watra komopo”. Nowan tra wroko di sma e du na ini a ten disi de so prenspari leki a preikiwroko fu a „têgo bun nyunsu”. Iya, now na a ten fu preiki!​—Openb. 14:6, 7.

2. Fa den futuboi fu Yehovah e sori taki den e frustan taki den e libi na ini wan tumusi prenspari ten?

² Na ini den tin yari di pasa, futuboi fu Yehovah gebroiki sowan 12 milyard yuru fu du a Kownukondre preikiwroko nanga a wroko fu meki disipel. Furu fu den tyari kenki kon na ini den libi so taki den ben kan du moro fu tyari sma kon na wán (Mat. 9:37, 38). Fu eksempre, a yari di pasa, sowan 850.000 preikiman dini leki pionier ibri mun. Gi den gewoon pionier disi wani taki dati den e wroko sowan 70 yuru ibri mun na ini a preikiwroko. Den yepipionier e wroko 50 yuru.

3. Sortu kenki preikiman musu tyari kon na ini den libi furu tron fu man pionier?

³ San de fanowdu fu pionier: Fu di den pionier sabi taki „a ten di tan abra kon syatu”, meki den e du muiti fu de tevrede nanga san den abi na ini den libi (1 Kor. 7:29, 31). Den e suku fasi fu no abi so furu kostu na ini a libi, so taki den no abi fu gi so furu ten na grontapuwroko moro. Fu eksempre, sonwan fu den froisi go libi na ini wan moro pikin oso. Trawan puru den gudu di den no abi fanowdu (Mat. 6:19-21). Furu tron, den no man du so furu sani moro di den lobi fu du. Den e du ala den sani disi fu di den wani gi moro ten na a diniwroko èn den wani poti moro prakseri na dati (Ef. 5:15, 16). Fu di furu preikiman horidoro, fu di den du sani sondro fu suku wini gi densrefi, èn fu di den frutrow tapu Yehovah aladi den begi en fu yepi den, meki den ben man seti wan bun schema so taki den man pionier.

4. Sortu bun sani yu kan du di sa yepi yu doro a marki fu pionier?

⁴ Yu man pionier? Kande yu kan aksi den wan di abi bun bakapisi nanga a pionierwroko fu den, san e yepi den fu du a wroko dati. Wroko makandra nanga den na ini a preikiwroko, èn yusrefi sa ondrofeni a prisiri di den abi. Studeri den artikel na ini den publikâsi fu wi di e taki fu a pionierwroko. Poti marki gi yusrefi di yu kan doro èn di kan yepi yu fu pionier te fu kaba. Efu sani de di e tapu yu now fu dini leki pionier, dan taki fu den sani disi nanga Yehovah na ini begi, èn aksi en fu yepi yu lusu den problema disi.​—Odo 16:3.

5. Fa a pionierwroko e yepi wi fu du a diniwroko fu wi moro bun?

⁵ Den blesi nanga den prisiri sani di wi sa ondrofeni: A pionierwroko sa yepi wi fu gebroiki Gado Wortu moro bun, èn disi sa meki wi abi moro prisiri. „A de wan trutru blesi fu man gebroiki Gado Wortu fu waarheid na wan reti fasi”, na so wan yongu sisa di e pionier, ben taki. „Te yu e pionier, dan yu e gebroiki Bijbel bun furu. Now, te mi e go oso fu oso, dan mi sabi difrenti tekst di mi man gebroiki gi difrenti ososma.”​—2 Tim. 2:15.

6. Sortu sani a pionierwroko e leri wan sma?

⁶ A pionierwroko e leri wi furu bun sani tu di o meki taki wi libi kon moro bun. A kan leri yongusma fa den musu gebroiki a ten fu den na wan koni fasi, fa den musu gebroiki den moni, èn fa den musu libi switi nanga tra sma. Fu di den e pionier, meki furu fu den sma disi e kon si sani soleki fa Yehovah e si sani (Ef. 4:13). Boiti dati, furu tron pionier abi na aparti grani fu si fa Yehovah e horibaka gi den, fu di a e yepi den èn a e blesi den.​—Tori. 11:21; Fil. 4:11-13.

7. Fa a pionierwroko e yepi wi fu kon krosibei na Yehovah?

⁷ Kande wan fu den moro bigi blesi di e kon fu a pionierwroko, na taki a e yepi wi fu kon krosibei na Yehovah. Disi kan yepi wi fu horidoro te tesi e miti wi. Wan sisa di ben abi en kefalek muilek wan pisi ten, ben taki: „A krosibei banti di mi kon kisi nanga Yehovah fu di mi ben e pionier, yepi mi fu horidoro di mi kisi fu du nanga den problema.” A taki moro fara: „Mi breiti srefisrefi taki di mi kon bigi, mi gebroiki mi ten fu du furuten diniwroko gi Yehovah. A yepi mi fu gi misrefi na difrenti fasi, aladi noiti mi no ben denki taki mi ben o man du dati” (Tori. 20:35). Meki a de so taki wi e ondrofeni den bigi blesi tu te wi e du ala san wi man na ini a tumusi prenspari preikiwroko disi.​—Odo 10:22.