Yu kan tron wan gewoon pionier?
1. Neleki na apostel Paulus, sortu okasi wi abi fu du moro na ini a preikiwroko?
1 Di ’wan bigi doro fu wroko ben opo’ gi na apostel Paulus, a ben de klariklari fu gebroiki na okasi fu du moro na ini a preikiwroko awinsi a ben kisi furu gens (1 Kor. 16:9). Na ini a ten disi, sowan 642.000 preikiman na heri grontapu ben wani du moro na ini a diniwroko èn dati meki den tron gewoon pionier.
2. Fu san ede a bun fu luku a situwâsi fu wi ten na ten?
2 Situwâsi e kenki: Kande wi no man du furu now na ini a preikiwroko bika wi abi furu frantwortu. Ma a situwâsi fu wi kan kenki. Na presi fu wakti a yoisti ten fu go pionier, a moro bun fu ondrosuku a situwâsi fu wi ten na ten fu si efu wi man du moro (Preik. 11:4). Yu na wan yonguwan di o kaba nanga middelbaar skoro? Yu na wan papa noso wan mama di abi pikin di o bigin go na skoro? Yu o go nanga pensyun heri esi? Den kenki disi o meki taki yu o abi moro ten èn disi o gi yu na okasi fu tron wan pionier. Wan sisa di ben siki fosi, teki a bosroiti fu tron wan pionier di a ben abi 89 yari. Fu san ede? Fu di moro leki wán yari kaba a no ben abi fu go na ati-oso, èn dati meki a ben feni taki a kan pionier.
3. Fa son preikiman seti sani na so wan fasi taki den man du a gewoon pionierwroko?
3 A fosi sani di Paulus ben wani du, na taki a ben wani go na den brada fu en na ini Korente. Ma a no go drape moro, soso fu di a ben wani go doro nanga a preikiwroko. Furu fu den wan di de gewoon pionier now ben abi fu tyari kenki kon na ini den libi, soso fu man pionier. Den go wroko fu wan tu dei na ini a wiki nomo fu kan sorgu gi den moro prenspari sani di den abi fanowdu èn fu man pai den kostu di den abi. Den feni en wan grani fu pionier, èn dati e gi den prisiri trutru (1 Tim. 6:6-8). Son trowpaar tyari kenki kon na ini den libi di meki taki a masra wawan abi fu wroko èn a wefi kan pionier.
4. San wi kan du te wi no de seiker taki wi o man doro den yuru?
4 No de gaw fu taki dati yu no man pionier fu di yu frede taki yu no o man doro den yuru. Efu yu e wroko sowan tu nanga afu yuru ibri dei, yu o man doro den yuru. Efu yu no de seiker taki yu o man du dati, dan pruberi fu go na ini a yepi-pionierwroko wán noso tu mun, èn poti leki marki gi yusrefi fu doro 70 yuru. Na so wan fasi yu sa ondrofeni taki a pionierwroko na wan prisiri sani (Ps. 34:8). Taki nanga tra pionier. A kan taki den kisi den srefi problema di yu abi now (Odo 15:22). Aksi Yehovah fu blesi den muiti di yu e meki fu du moro na ini a preikiwroko.—1 Yoh. 5:14.
5. San na den blesi di yu o kisi te yu e du a gewoon pionierwroko?
5 Wan wroko di e tyari blesi kon: Te yu de wan gewoon pionier yu sa kisi furu blesi. A pionierwroko o gi yu na okasi fu de moro koloku, bika yu o gi moro fu yu ten fu preiki (Tori. 20:35). A pionierwroko o yepi yu fu gebroiki Gado Wortu na wan moro bun fasi (2 Tim. 2:15). Furu tron yu o si fa Yehovah e horibaka gi yu (Tori. 11:21; Fil. 4:11-13). A pionierwroko o yepi yu tu fu kon abi moi fasi soleki horidoro, èn a o meki taki yu e kon krosibei na Yehovah (Yak. 4:8). Yu kan du moro na ini a preikiwroko èn tron wan gewoon pionier?