¿Yu Abi na Okasi Now fu Go Pionier?
1 Wi yaritekst fu 1999 e memre wi taki wi de ete na ini Yehovah en „dei fu frulusu” (2 Kor. 6:2). Ma en dei fu frulusu sa kon na wan kaba heri esi. Dan en „krutudei” sa bigin (2 Petr. 2:9). ¡Na ini a ten pe Yehovah e tan gi na okasi ete fu frulusu a libisma famiri, a moi srefisrefi fu si taki sma di e tan kon moro nanga moro e handri na tapu dati!
2 Yehovah en pipel du ala muiti fu miti den sma di wani arki bifo a lati tumusi. Gi furu Kownukondre preikiman, disi wani taki dati den ben go na ini a pionierwroko. ¿Yu abi na okasi now fu go pionier? Fu san ede wi e aksi dati?
3 Den Ben Sori Warderi: Soleki fa a ben meki bekènti na ini Wi Kownukondre Dienst fu yanuari 1999, den yuru gi gewoon pionier nanga yepi-pionier ben kon moro mendri. Fu doro a nyun markitiki disi, dan den gewoon pionier musu wroko 70 yuru na ini a diniwroko ibri mun fu man doro ala nanga ala 840 yuru na ini wan dienst-yari. Den yepi-pionier sa wroko 50 yuru na ini a diniwroko ibri mun. Dyaso wan tu fu den wortu fu warderi de di wi ben kisi leki wan bakapisi fu den kenki disi:
„¡Disi de wan trutru blesi fu wi hemel Tata!”
„¡Mi no man taki nanga wortu o breiti mi de, èn omeni lobi nanga tangi mi abi gi a seti disi!”
„¡A sa meki taki a de moro makriki srefisrefi fu doro den schema fu wi!”
„Wi e begi taki moro sma sa teki a furuten diniwroko now èn nyan bun fu den blesi di sa kon te wi e dini Yehovah moro furu.”
4 Fu di wi e doro a heimarki fu Gado en dei fu frulusu, a de krin taki Yehovah wani taki en pipel musu gi wan lasti tranga babari fu prèise. A preiki fu a boskopu disi e kon moro bigi èn moro krakti (1) bika a nomru fu Kownukondre preikiman e tan gro nomo èn (2) bika ibriwan sma e pruberi fu du moro leki san a man du na ini a Kownukondre preikiwroko. Yehovah, a wan „di e meki a gro”, tyari bun bakapisi kon na ala tu fasi, fu di a blesi a yeye fu ala sma di de klariklari èn di teki a frulusu.—1 Kor. 3:6, 7; Ps. 110:3.
5 No Misi a Marki fu En: Nanga a dei fu Yehovah en frulusu na prakseri, Paulus ben frumane den kompekresten fu en: „Fu di wi e wroko makandra nanga en [Yehovah], wi e aksi unu nanga tranga fu no teki a no-frudini bun-ati fu Gado èn misi a marki fu dati.” Wi no sa „misi a marki fu dati” efu wi e si disi leki „a spesrutu bun ten” fu wroko gi a frulusu fu tra sma na ibri okasi (2 Kor. 6:1, 2). Na ini a ten disi den wortu fu Paulus de moro tranga fanowdu. Kresten di e sori wan opregti lobi gi Yehovah e si en leki wan grani fu du so furu leki den kan na ini a diniwroko di a gi den fu du. ¿Yu man fu du moro furu now na ini a diniwroko leki wan gewoon pionier?
6 A De wan Marki Di De Reidelek: Na ini Sranan a de a marki fu wi taki 120 sma kan de leki gewoon pionier na a ten fu 1 september. Wi e bribi taki a marki disi de reidelek èn taki wi man doro en. Fu san ede wi abi a frutrow disi? Na ini maart 1997 wi ben abi wan heimarki fu 236 brada nanga sisa na ini a yepi-pionierwroko, èn na ini april 1998 pikinmoro 472 brada nanga sisa ben du a wroko dati. ¡Srefi efu soso 12 fu den wan di ben de na ini a yepi-pionierwroko tron gewoon pionier bifo a kaba fu a dienst-yari disi, dan wi kan bigin nanga 120 noso moro furuten pionier na ini a mun september!
7 Wan Schema De Fanowdu: ¿A de so taki 70 yuru na ini a velddienst ibri mun de wan sani di yu no man doro? Kande te yu e prakseri taki yu musu wroko 17 yuru na ini wan wiki, dan dati sa yepi. Te yu e gebroiki den schema di de tapu a tra bladzijde, pruberi fu meki wan gewoon pionier schema di sa fiti den situwâsi fu yusrefi. Te yu e pruberi fu meki yu eigi schema, dan taki nanga pionier di abi ondrofeni èn di kan gi yu idea nanga rai di e sori fa den e hori balansi na mindri a pionierwroko èn den frantiwortu fu densrefi nanga den osofamiri. Aksi yu kringopziener fa den pionier na ini a kring e seti a schema fu a diniwroko fu den ibri wiki. Dan aksi Yehovah fu meki a blesi den plan di yu abi fu pionier.—Odo 16:3.
8 Meki a de wan Sani fu a Heri Osofamiri: ¿Yu ben prakseri fu meki a pionierwroko de wan sani gi a heri osofamiri? Kande unu kan sidon leki osofamiri èn taki fa—nanga bun plan èn bun wroko makandra—wán noso tu memre fu na osofamiri man fu pionier kande. Wi kan frustan taki wan tu sma sa feni taki te den ondrosuku den situwâsi fu den na wan eerlijk fasi, dati no e gi den na okasi fu go pionier wantewante. Efu dati de so, dan poti a pionierwroko leki wan marki gi a ten di e kon. Ma bigin meki plan fu wroko go na wan spesrutu dei fu bigin pionier. Kande yu kan du a yepi-pionierwroko difrenti leisi na ini a yari, fu wroko safrisafri go na a marki fu a gewoon pionierwroko.
9 Den moro leki 108 gewoon pionier di de nownow na ini Sranan abi difrenti situwâsi. A no alamala abi wan kefalek bun gosontu, èn a moro bigi pisi fu den abi frantiwortu na ini den osofamiri èn na moni sei. Moro leki 24 pionier owru moro 50 yari, èn pikinmoro 9 fu den owru moro 65 yari. Pikinmoro 48 fu den no trow, èn pikinmoro 6 fu den owru 20 yari noso moro yongu. Pikinmoro wán na tapu feifi fu ala den pionier na brada, èn furu fu den abi frantiwortu na ini den osofamiri èn na ini a gemeente. Den alamala „e bai a yoisti ten gi [densrefi]” fu man pionier, èn na ini furu fu den kefal a wani taki dati den musu libi wan moro eenvoudig libi di toku de wan moro tevrede libi.—Kol. 4:5.
10 ¿Yu Musu Libi Moro Eenvoudig? Fu meki yu libi kon de eenvoudig kan de a sroto di e opo na okasi gi yu fu go pionier. ¿Yu libi de leki wan bigi oso di abi kamra nanga sani na ini di no de fanowdu, sani di e teki furu ten, moni, nanga wroko fu sorgu gi den? Efu a de so, dan a kan gi yu na okasi fu go pionier te yu e kenki sani kon moro eenvoudig. ¿Yu kan syatu a ten di yu e gebroiki na yu grontapu wroko? ¿Yu kan teki ten puru fu sani di no prenspari noso yu kan sori moro bun balansi na ini a ten di yu e gebroiki gi ontspanning?
11 Na ini 1 Timoteus 6:8, Bijbel e frumane wi: „Te wi abi nyanyan, krosi nanga wan presi fu tan, dan wi sa de tevrede nanga den sani disi.” Fu de tevrede nanga moro mendri sani na wan prenspari penti di kan yepi wi fu du ala san wi man na ini Yehovah en diniwroko èn a e meki en moro makriki fu poti yeye afersi na tapu a fosi presi (Mat. 6:22, 33). Na tapu bladzijde 104 fu a Jaarboek 1998 na ini a rapport fu Yapan, difrenti idea ben gi di e sori fu san ede so wan moi pionier yeye de na ini a kondre dati. Luku wan fu den: „A de moro furu so, taki den oso fu den Yapansma de heri bescheiden, èn fu dati ede furu ten no de fanowdu fu hori en krin, èn moro furu a de so taki den abi a gwenti fu libi wan eenvoudig libi.” ¿A no dati na san 1 Timoteus 6:8 wani taki?
12 Na heri grontapu den futuboi fu Gado e preiki a bun nyunsu nanga moro furu faya, bifo Yehovah en dei fu frulusu e kon na wan kaba. A de fu prèise taki a yari di pasa, gemiddeld 700.000 sma ben de na ini a pionierwroko ibri mun. ¿Yu kan kenki yu libi, so taki yu kan pionier nanga den? Wi e gi yu a kari fu ondrosuku den situwâsi fu yu bun na ini begi, te yu e piki na aksi: „¿Yu abi na okasi now fu go pionier”?
[Prenspari pisi na tapu bladzijde 3]
MARKI: ¡120 GEWOON PIONIER!
[Faki na tapu bladzijde 4]
Eksempre fu Gewoon Pionier Schema
Fanowdu: 17 yuru ibri wiki
Wán Wikidei èn a Weekend
Dei Yuru
Freida 8
Satra 6
Sonde 3
Ala Nanga Ala: 17
Tu Wikidei èn Satra
Dei Yuru
Tudewroko 7
Fodewroko 7
Satra 3
Ala Nanga Ala: 17
Dri Wikidei èn Sonde
Dei Yuru
Munde 5
Dridewroko 5
Freida 5
Sonde 2
Ala Nanga Ala: 17
Tu Neti èn a Weekend
Dei Yuru
Munde 3
Dridewroko 3
Satra 8
Sonde 3
Ala Nanga Ala: 17
Meki Yu Eigi Gewoon Pionier Schema
Dei Yuru
Munde
Tudewroko
Dridewroko
Fodewroko
Freida
Satra
Sonde
Ala Nanga Ala: 17