Wi e soekoe—600 jepi-pionier
Joe man dini leki jepi-pionier na ini maart? Na ini april? Na ini mei?
1 „Wi e soekoe 1000 preikiman” ben de a titel foe wan artikel di kon na doro na ini na uitgave foe a Watch Tower foe april 1881. A ben abi wan kari gi ala man nanga oema di gi densrefi abra, „na soema Masra gi sabi foe En waarheid”, foe gebroiki omeni ten leki den ben abi, foe abi wan prati na ini a prati foe bijbel waarheid. Den wan di ben kan gi afoe noso moro foe den ten soso gi a wroko foe Masra, ben kisi deki-ati foe gi densrefi na wan fri fasi leki colporteur evangeliepreikiman—den sma di ben de fosi den disiten pionier.
2 Ala di sani kenki sensi a di foe 19 jarihondro, wan sani e tan a srefi—den foetoeboi foe Gado di gi densrefi abra wani tan gebroiki omeni ten leki den kan foe prati a boen njoensoe. Foe dini leki jepi-pionier e meki den preikiman foe a gemeente man abi moro boen bakapisi te den e poti moro ten na ini a Kownoekondre diniwroko.—Kol. 4:17; 2 Tim. 4:5.
3 Sensi jepi-pionierwroko bigin, hondrohondro doesoen brada nanga sisa teki prati na ini. A faja gi a fasi disi foe a pionierwroko gro kon doro so fara taki a heimarki foe moro leki 350 jepi-pionier ben doro na Suriname na ini april 1985! Toe leisi sensi a jari dati, moro leki 600 preikiman teki prati leki jepi-pionier na ini a moen april—na ini 1992 nanga 1993. A kan seiker ete foe doe a moi wroko dati baka, na ini maart, april nanga mei 1997.
4 Wi e gi joe deki-ati foe abi a marki foe dini leki jepi-pionier na ini wán noso moro foe den moen maart, april, nanga mei. Foe san ede wi e taki maart toe? Bika a jari disi a Memrefesa foe a dede foe Krestes e fadon na tapoe sonde 23 maart. Wan moro boen fasi no de fa wi ben kan gebroiki den wiki fosi a Memrefesa, leki foe abi wan prati fajafaja na ini a Kownoekondre preikiwroko di wi Masra nanga Froeloesoeman, Jesus Krestes, ben seti. Te wi e gi wan bigi kotoigi na ini maart dan wi kan gi foeroe sma di abi belangstelling wan kari foe kon makandra nanga wi foe memre a dede foe Krestes. Maart sa de spesroetoe toe foe di foe a fosi tron wi sa pristeri a njoen boekoe A sroto gi wan kolokoe osofamiri. Boiti dati, a moen maart abi feifi satra nanga feifi sonde èn dati e gi na okasi foe wroko fajafaja na ini a weekend na ini a velddienst. A no de foe taki, dati na ini den moen april nanga mei a faja moeiti di wi sa meki ete na ini a diniwroko, sa gi wi pasi foe go baka na den sma pe wi ben feni belangstelling èn foe bigin njoen oso-bijbelstudie ala di wi e gebroiki a brochure San Gado e aksi foe wi? Wi sa wroko a gebied foe wi finifini toe, spesroetoe na ini den weekend, nanga den njoen uitgave foe A Waktitoren nanga Ontwaakt! di kon na doro na a joisti ten.
5 Soema doro den marki foe de jepi-pionier? Georganiseerd om onze bediening te volbrengen (Orga foe doe wi diniwroko) bladzijde 116, e taki: „Awinsi fa joe persoonlijk situwâsi de, efoe joe dopoe, efoe joe abi wan boen nen na moreel sei, èn kan seti sani foe doro a marki foe doro 60 joeroe wán moen na ini a diniwroko èn joe e bribi taki joe ben kan dini wán noso moro moen leki jepi-pionier, dan den gemeente owroeman sa prisiri foe loekoe na aanvraag foe joe gi a grani disi foe dini.” Joe kan seti joe sani na so wan fasi taki joe abi wan prati na a grani disi na ini maart? Na ini april? Na ini mei?
6 Wan positief fasi foe a sei foe den skin foe owroeman makandra nanga a jepi di den tra preikiman e gi nanga den heri ati, moesoe meki a piki tapoe a kari foe 600 jepi-pionier tron wan sani di abi krinkrin boen bakapisi (Hebr. 13:7). Ala den edeman foe osofamiri e kisi a deki-ati foe go loekoe omeni sma na ini den osofamiri kan go na ini a groepoe foe jepi-pionier gi wán noso moro foe den moen di e kon.—Ps. 148:12, 13; teki gersi Tori. 21:8, 9.
7 No de esi foe taki dati joe no man doe a jepi-pionierwroko foe di joe abi wan foeroeten grontapoe wroko, skoro schema, osofamiri frantiwortoe, noso tra froeplekti di abi foe doe nanga bijbel. Gi son preikiman a no makriki kande foe teki prati na ini a jepi-pionierwroko; tokoe, nanga wan boen orga èn a blesi foe Jehovah, den kan doro a marki (Ps. 37:5; Odo 16:3). Meki a tranga winsi foe teki prati na ini a pionierwroko basi a situwâsi foe joe; no meki den situwâsi foe joe basi a tranga winsi di joe abi foe pionier (Odo 13:19a). Foe dati ede, nanga wan tranga lobi gi Jehovah èn gi kompe libisma, foeroe brada nanga sisa man foe kenki den alawiki schema foe libi, foe man doe moro foeroe na ini a diniwroko foe den ibri leisi wan moen (Luk. 10:27, 28). Den wan di e doe tranga moeiti na ini a Kownoekondre diniwroko sa kisi foeroe blesi na ini a ten di e kon.—1 Tim. 4:10.
8 San jepi-pionierwroko e doe: A moeiti di doesoendoesoen dinari foe Gado e doe nanga den heri ati foe doe a jepi-pionierwroko, abi leki bakapisi wan bigi babari foe prèise gi Jehovah. Te den Kownoekondre preikiman disi e doe moeiti foe prati a boen njoensoe nanga moro sma, dan dati e hari den persoonlijk kon moro krosibei na Jehovah foe di den e leri foe anga moro na En foe kisi en jeje èn blesi.
9 Na abi di wi abi jepi-pionier, gewoon pionier, èn spesroetoe pionier di de aktief na wi mindri, e meki wan njoen krakti kon na ini a gemeente. A faja di den abi e wai go na trawan te den e taki foe den ondrofenitori foe den na ini velddienst. Disi e poesoe trawan foe loekoe den eigi sani baka di den e feni prenspari èn foe loekoe baka efoe den man abi wan moro bigi prati na ini a moro prenspari diniwroko. Wan sisa di ben dopoe di a ben abi 70 jari ben bigin wantewante nanga a faste jepi-pionierwroko. Di den ben aksi en wan toe jari na baka, foe san ede, nanga a jari di a ben abi, a ben doe so foeroe moeiti ete leki jepi-pionier ibri moen, a ben taki dati a ben firi leki a ben lasi den fosi 70 jari foe en libi, èn a no ben wani lasi no wan foe den jari di a de na libi ete!
10 Ibri sma di de na ini a jepi-pionierwroko e kweki wan moro boen bekwaamfasi na ini a diniwroko. Wan jongoe brada ben erken: ’Na ini den jongoe jari foe mi, mi ben gwenti foe go nanga mi papa nanga mama na ini a preikiwroko foe den. Velddienst ben switi srefisrefi. Ma baka ten, mi ben bigin si taki na skoro mi ben de difrenti foe den tra studenti. A ben kon tron wan sjen sani gi mi dan foe taki foe waarheid nanga den kompe studenti. Te mi ben e preiki oso foe oso dan a prakseri foe miti wan sma di mi ben sabi foe skoro ben e meki mi frede. Mi denki taki ini mi kefal a problema ben de frede gi libisma [Odo 29:25]. Baka di mi ben kaba nanga skoro, mi ben bosroiti foe proeberi foe pionier gi wan pisi ten. Leki wan bakapisi foe dati, preiki ben kon switi gi mi, wan sani di mi no ben abi noiti fosi. Mi no ben e si moro leki wan switi wroko, èn a no ben de wan hebi so srefi. Te mi ben si den bijbelstudenti foe mi e go na fesi na ini waarheid, dan mi ben kisi wan firi foe dipi satisfaksi foe a boeweisi taki Jehovah Gado ben e horibaka gi den moeiti foe mi.’ A jongoe brada disi ben go doro foe dini leki wan gewoon pionier.
11 Te joe e loekoe en na wan praktis fasi, te foeroe preikiman e dini leki jepi-pionier na ini a gemeente, a bakapisi de taki a gebied e wroko finifini. A brada di e gi gebied kan aksi den jepi-pionier foe jepi wroko den gebied di no e wroko foeroe. Efoe den jepi-pionier e tjari njan nanga den èn efoe den e wroko wan heri dei na ini a diniwroko, dan dati sa meki taki den kan wroko srefi te na den moro farawe pisi foe a gebied.
12 Owroeman moesoe sreka sani na fesi: Den heri dri moen di e kon, sani moesoe seti foe poti difrenti sortoe aktiviteit foe gi kotoigi tapoe schema na tapoe difrenti ten na ini a wiki, so srefi den lati bakadina èn den froekoe mofoneti, so taki so meni preikiman leki a kan, kan teki prati. Boiti na oso foe oso wroko, poti ten toe gi stratiwroko, ten foe wroko bisnisgebied, èn foe go na den adres foe sma di no ben de na oso. Te den owroeman e doe disi, dan den e jepi den wan di e pionier foe abi wan prati na ini a diniwroko foe a gemeente na tapoe wan ten di de moro praktis èn moro boen gi den pionier. Den brada moesoe froeteri a gemeente finifini ala den sani di seti gi velddienst. Den moesoe orga den velddienst konmakandra heri boen. Boiti dati, nofo gebied moesoe de èn nofo tijdschrift nanga tra lectuur moesoe bisteri wantewante.
13 Sreka joe persoonlijk velddienst schema na fesi: Wan brada di ben frede fosi foe de jepi-pionier ben taki: „A makriki srefisrefi moro leki san mi ben prakseri a ben o de. Joe moesoe abi wan boen schema nomo.” Na tapoe a lasti bladzijde foe na inlegvel disi, joe e si wan eksempre foe wan jepi-pionier schema di ben kan de praktis gi joe? Ibri wiki 15 joeroe gi a diniwroko na ala san de fanowdoe gi jepi-pionier.
14 Foe man dini leki jepi-pionier, oso-wefi èn sma di e wroko lati bakadina te go miti mindrineti, foeroe tron kan poti den mamanten foe den tapoe schema gi a velddienst. Skoropikin èn sma di e wroko mindrineti te go miti froekoe mamanten, foeroe tron kan gebroiki den lati bakadina gi a preikiwroko. Sma di abi wan foeroeten grontapoe wroko si taki a man foe teki wán dei fri ibri wiki foe wroko, noso foe gi a heri weekend na a diniwroko, boiti a gi di den e gi kotoigi na mofoneti. Foeroe foe den sma di man doe velddienst soso na ini a weekend e teki moen di abi feifi satra nanga sonde na ini. A jari disi, dati de so nanga maart èn dati de so toe nanga augustus nanga november. Te joe e gebroiki a schema pe noti no skrifi, na tapoe bladzijde 6, di gi leki wan tirilin, loekoe finifini èn na ondro begi san sa de praktis gi joe persoonlijk velddienst schema na ini joe eigi situwâsi.
15 Wan wini nanga a seti foe a jepi-pionierwroko na taki joe man fiti en na joe situwâsi. Joe kan teki den moen di joe wani pionier èn joe kan dini so langa leki joe wani. Efoe joe ben sa wani foe de faste jepi-pionier ma joe no man, joe prakseri foe gi joe nen ibri tra moen na ini a heri jari? Na a tra sei, wan toe sma man tan dini leki faste jepi-pionier gi wan langa pisi ten.
16 A e sreka joe gi a foeroeten pionierwroko: Foeroe sma di abi a pionier jeje ben sa wani dini leki gewoon pionier, ma den e aksi densrefi efoe den abi a ten, efoe a situwâsi foe den e gi den pasi foe dati, noso efoe den abi a krakti foe horidoro na ini. Sondro tweifri, a moro bigi pisi foe den wan di e doe gewoon pionierwroko now ben bigin nanga a jepi-pionierwroko leki wan sani di e sreka den gi a foeroeten pionierwroko. Foe di wan sma e poti wán joeroe nomo moro na tapoe en jepi-pionier schema ibri dei, noso wán heri dei ibri wiki, dan a man hori ensrefi na a schema foe gewoon pionier. Foe man sabi efoe joe man doe dati, foe san ede joe no e proeberi foe gi 90 joeroe na ini a diniwroko na ini wán noso moro moen te joe de na ini a jepi-pionierwroko? Na a srefi ten joe sa kisi gobaka èn bijbelstudie, èn dati sa gi joe na okasi foe abi wan pionier diniwroko di de na ini balansi èn di abi difrenti sani na ini.
17 Wan sisa ben de siksi jari langa na ini a faste jepi-pionierwroko. A heri pisiten dati a marki foe en ben de foe go na ini a gewoon pionierwroko. Foe doro a marki dati, a ben proeberi fo difrenti grontapoe wroko nanga a howpoe foe seti a situwâsi na so wan fasi taki a ben sa man doro den 90 joeroe di gewoon pionier moesoe doro. Ibri moen a ben meki wán noso toe schema foe sabi efoe a ben sa kan. Ma te a ben e loekoe den schema dan a ben denki taki a no man dini na ini a foeroeten diniwroko. Tokoe, a ben tan aksi Jehovah foe tiri en. Dan wan dei di a ben e sreka ensrefi gi a diniwroko konmakandra, a ben leisi wan artikel na ini Wi Kownoekondre Dienst foe september 1991 pe ben skrifi: „Na presi foe poti toemoesi foeroe krakti na tapoe a joeroe di joe moesoe doro, foe san ede joe no e poti prakseri na tapoe na okasi foe doe moro na ini a wroko foe tjari sma kon na wan? (Joh. 4:35, 36)” A e froeteri: „Mi leisi a lin disi go kon feifi noso siksi leisi èn mi ben de seiker taki disi ben de a piki foe Jehovah. Na tapoe a momenti dati mi ben teki a bosroiti foe go na ini gewoon pionierwroko.” Ala di a pisiten grontapoe wroko foe en no ben kroederi so boen nanga en pionierwroko, tokoe a ben gi en aanvraag foe gewoon pionier. Wan wiki baka dati, en wroko schema ben kenki èn a ben kisi wroko joeroe di ben de leki fa a ben wani. A ben taki te foe kaba: „Joe no ben sa agri taki disi na a blesi foe Jehovah?”, èn a ben taki moro fara: „Te joe aksi Jehovah tiri èn joe kisi en, no weigri en—teki en.” Efoe a de na opregti winsi foe joe foe dini leki gewoon pionier, kande na a kaba foe den dri moen jepi-pionier na ini maart, april nanga mei, joe sa kisi na overtoigi taki joesrefi kan doe foeroeten diniwroko.
18 Wi de seiker taki Jehovah sa blesi a faja foe en pipel èn sa horibaka gi den moeiti foe en pipel, ala di den e preiki a boen njoensoe foe froeloesoe na ini a spesroetoe pisiten disi foe aktiviteit (Jes. 52:7; Rom. 10:15). Joe sa doe wan sani tapoe a soekoe di wi e soekoe 600 jepi-pionier foe di joe sa abi wan prati na ini maart? Na ini april? Na ini mei?
[Faki na tapoe bladzijde 3]
Fa foe abi boen bakapisi leki wan jepi-pionier
■ Abi na overtoigi taki joe sa abi boen bakapisi
■ Begi Jehovah foe blesi den moeiti foe joe
■ Gi tra pionier a kari foe pionier nanga joe
■ Meki wan praktis velddienst schema
■ Bisteri nofo tijdschrift
■ Horibaka gi den sani di a gemeente seti gi a diniwroko
■ Soekoe okasi foe gi okasi kotoigi