Wan tumusi bun marki gi a nyun dienstyari
1. Sortu marki wi kan poti gi wisrefi na ini a nyun dienstyari?
1 Wi musu poti marki gi wisrefi efu wi wani du moro na ini a diniwroko. Sortu marki yu poti gi yusrefi gi a nyun dienstyari? Wan kefalek bun marki na fu du a yepi-pionierwroko wán mun noso moro langa. Fu man du a wroko disi di e gi wi furu prisiri, wi musu bigin sreka sani na fesi nownow kaba. Fu san ede wi musu poti a yepi-pionierwroko leki marki?
2. Fu san ede a bun fu poti a yepi-pionierwroko leki marki?
2 Fu san ede a bun fu du a yepi-pionierwroko: Te wi e du a yepi-pionierwroko, dan wi e kisi na okasi fu plisi wi hemel Tata moro bun, fu di wi kan du moro na ini a diniwroko (1 Tes. 4:1). Te wi e hori ala den sani di Yehovah du gi wi na prakseri, dan disi e meki taki wi wani fruteri trawan fu En (Ps. 34:1, 2). Yehovah e si èn a e warderi den muiti di wi e meki fu du moro na ini a diniwroko (Hebr. 6:10). Fu di wi sabi taki wi e plisi Yehovah te wi e wroko tranga, meki dati e gi wi furu prisiri.—1 Kron. 29:9.
3, 4. Sortu wini wi o kisi te wi e du a yepi-pionierwroko?
3 Furu tron a de so taki o moro yu e du wan sani, o moro makriki a sani dati e kon de, èn o moro a e gi yu prisiri. Na so a de tu nanga a preikiwroko, o moro yu e du en, o moro makriki a de fu preiki oso fu oso. Yu o sabi moro bun fa fu bigin wan takimakandra èn fa fu gebroiki Bijbel. O moro yu e taki fu a bribi fu yu, o moro a e kon tranga. Furu preikiman di no ben abi wan bijbelstudie ete, ben feni wan bijbelstudie di den ben du a yepi-pionierwroko.
4 Te a gersi leki a diniwroko fu wi kon soi fu di wi e du a srefi sani doronomo, dan a yepi-pionierwroko kan gi wi deki-ati baka fu du wi wroko nanga faya. Wan brada di ben de gewoon pionier fosi, ben kon si taki a ben e gebroiki tumusi furu fu en ten gi a grontapuwroko fu en, èn a ben bosroiti fu du a yepi-pionierwroko wán mun. A taki: ,,Mi no ben man bribi taki na ini a mun dati mi kisi bun furu deki-ati fu go doro na ini a diniwroko! Fu dati ede mi ben teki a bosroiti fu du a yepi-pionierwroko doronomo, èn te fu kaba mi go na ini a gewoon pionierwroko baka.”
5. San wi kan du te wi feni taki wi no man taki bun?
5 No meki noti tapu yu fu du a yepi-pionierwroko: Kande son sma e tweifri fu go na ini a yepi-pionierwroko, fu di den e denki taki den no man preiki bun. Efu yu feni taki yu no man preiki bun, dan Yehovah man yepi yu, neleki fa a ben yepi Yeremia (Yer. 1:6-10). Moses ben de wan man di ’no ben man taki bun’, ma toku Yehovah ben gebroiki en fu du a wani fu En (Ex. 4:10-12). Te yu e denki taki yu no man taki bun, dan begi Yehovah fu kisi deki-ati.
6. Fa wan sma kan du a yepi-pionierwroko aladi a siki, noso a abi furu sani fu du?
6 Yu e tweifri fu du a yepi-pionierwroko fu di yu siki noso fu di yu abi furu sani fu du? Efu yu siki, yu kan du a yepi-pionierwroko safrisafri so taki a no hebi gi yu. Efu a de so taki yu abi furu fu du, dan kande yu kan du den sani di no de so prenspari na ini wan tra mun. Son sma di abi wan grontapuwroko, ben man du a yepi-pionierwroko fu di den teki wan tu dei fakansi.—Kol. 4:5.
7. Fu san ede a bun fu begi doronomo fu man du a yepi-pionierwroko?
7 Fa yu kan du a yepi-pionierwroko: Begi Yehovah fu yepi yu efu yu wani du a yepi-pionierwroko. Aksi Yehovah fu blesi a muiti di yu e meki fu du moro na ini yu diniwroko (Rom. 12:11, 12). A kan yepi yu fu teki bun bosroiti so taki yu kan seti yu schema bun (Yak. 1:5). Efu yu no abi a winsi fu pionier, dan yu kan aksi Yehovah fu yepi yu fu abi prisiri na ini a preikiwroko.—Luk. 10:1, 17.
8. Efu yu e du san skrifi na ini Odo 15:22, dan fa dati kan yepi yu fu du a yepi-pionierwroko?
8 Leki osofamiri unu kan taki fa un kan poti en leki marki fu du a yepi-pionierwroko (Odo 15:22). Kande wan sma na ini na osofamiri man du a yepi-pionierwroko, aladi den tra memre e horibaka gi en. Taki nanga trawan na ini a gemeente di wani pionier tu, spesrutu den sma di de na ini a srefi sortu situwâsi leki yu. Na so fasi yu kan gi trawan a deki-ati fu du a yepi-pionierwroko tu.
9. Na ini sortu mun yu kan du a yepi-pionierwroko?
9 Na ini a nyun dienstyari yu sa meki wan schema fu den sani di yu musu du na ini a diniwroko. Yu luku tu o ten yu kan du a yepi-pionierwroko? Efu yu e du wan grontapuwroko noso yu e go na skoro, dan kande yu kan pionier na ini den mun te yu abi fakansi, noso na ini den mun di abi feifi satra noso feifi sonde. Fu eksempre, den mun maart, augustus, september, nanga december, abi feifi satra nanga feifi sonde. A mun mei abi feifi satra, èn a mun yuni abi feifi sonde. Efu yu na wan sma di e siki, dan kande yu kan pionier na ini den mun te a weer bun. A ben o bun tu efu yu pionier na ini a mun te a kring-opziener o fisiti yu gemeente. Te a kring-opziener de na ini yu gemeente, dan yu sa abi a grani tu fu de na a fosi pisi fu a konmakandra di a e hori nanga den gewoon pionier. Fu di a Memrefesa o hori tapu 22 maart 2008, meki a ben o bun fu pionier na ini maart, april, nanga mei. Te yu luku kaba na ini sortu mun yu o du a yepi-pionierwroko, dan yu kan bigin meki wan schema di sa meki taki yu o man doro den yuru fu yu.
10. San yu kan du te yusrefi no man du a yepi-pionierwroko?
10 Srefi efu yu feni taki yu no man du a yepi-pionierwroko na ini a dienstyari di e kon, toku yu kan du a preikiwroko fayafaya. Tan du ala san yu man na ini a diniwroko, fu di yu sabi taki yu e plisi Yehovah te yu e meki tranga muiti fu du a diniwroko nanga yu heri ati (Gal. 6:4). Yu kan horibaka gi den sma di man du a yepi-pionierwroko èn yu kan gi den deki-ati. Kande yu kan seti yu schema na so wan fasi taki yu kan go ete wan dei na ini a preikiwroko, so taki yu kan wroko nanga den wan di e pionier.
11. Fu san ede wi musu hori na prakseri taki wi e libi na ini tumusi prenspari ten?
11 A pipel fu Yehovah sabi taki wi e libi na ini tumusi prenspari ten. Wi abi wan wroko fu du, namku fu preiki a bun nyunsu. A wroko disi de tumusi prenspari fu di a abi fu du nanga a libi fu sma, èn furu ten no de moro (1 Kor. 7:29-31). Fu di wi lobi Gado èn fu di wi lobi tra sma, meki taki wi wani du ala san wi man na ini a diniwroko. Te wi e du muiti èn e seti sani bun na fesi, wi o man du a yepi-pionierwroko, awinsi efu na wán mun na ini a nyun dienstyari. Iya, disi na wan bun marki di wi kan poti gi wisrefi!