Joe man foe doe a jepipionierdienst?
1 Jesus ben gi en bakaman a deki-ati foe gi densrefi ini a diniwroko sondro foe wan sma dwengi den èn a ben djaranti den taki a teki di den e teki a waka nanga libi disi ben sa tjari kolokoe èn foeroe blesi na jeje fasi gi den (Mat. 10:8b; Tori. 20:35). April foe a jari di pasa, 384 sma ben ondrofeni a prisiri foe doe moro ini a velddienst leki wan jepipionier. Joe man foe abi prati ini den blesi disi, foe di joe e gi joesrefi leki jepipionier ini april noso maart noso kande ini ala toe moen a jari disi? — Ps. 34:8.
2 Ondrosoekoe den omstandigheid foe joe: Te joe e prakseri boen foe den ondrofenitori di skrifi djaso na ondrosei, dan aksi joesrefi: ’Mi e si misrefi na ini wan foe den eksempel disi? Fa mi kan tjari den kenki kon di de fanowdoe foe opo a pasi gi mi foe doe a jepipionierdienst?’
3 Wan sisa ben man foe go ini a jepipionierdienst, ala di a abi feifi pikin èn e doe grontapoe wroko. Fa a ben kisi pai? A masra èn den pikin foe en ben jepi en heri boen èn leki wan bakapisi foe a boen eksempel foe a sisa, dan disi ben boeweigi a masra foe tron wan preikiman di no dopoe ete, a moen na baka.
4 Ini wan gemeente ala owroeman èn dinari ini a diniwroko ben dini leki jepipionier ini wán moen. Moro foeroe foe den ben abi grontapoe wroko, ma den ben abi boen foeroe wroko na jeje fasi foe doe na a kaba foe den wiki. A moi tiri di den ben gi ini a preikiwroko èn ini na orga foe a velddienst, ben abi wini gi a heri gemeente. A moen dati 73 foe den 77 preikiman ben abi na a wan noso tra fasi wan prati ini a pionierdienst.
5 Wan skoro oemapikin foe 15 jari ben gebroiki den toe wiki di a ben abi fakansi, foe abi prati ini a jepipionierdienst èn a e taki: „Mi man si a difrenti troetroe, spesroetoe a hori foe takimakandra kon moro boen. Mi ben man foe hori moro foeroe takimakandra nanga sma na a doro.”
6 Den sma di ben go nanga pensioen foe den grontapoe wroko, foeroetron abi moi okasi foe feti baka kownoekondre afersi. Baka a dede foe en masra, wan sisa foe 84 jari ben skrifi: „Ala mi pikin ben kon bigi èn den ben trow èn ben abi wan osofamiri. Den no ben frigiti mi, ma a fisiti di den ben kon fisiti mi no ben kan poeroe den firi taki mi lasi wan sma èn taki mi de mi wawan. Ne wan foe den owroeman ini a gemeente foe wi ben gi mi a rai foe mi proeberi a jepipionierdienst. Mi ben degedege, ma te foe kaba mi ben teki a bosroiti foe proeberi dati. Fa a de wan prisiri! Mi ben firi taki Jehovah ben gi mi pasi foe doro a libimarki disi, so taki mi ben kan ondrofeni san na a jepipionierdienst. Sensi a ten dati mi ben tan wroko ibri moen leki wan jepipionier.”
7 Wan brada di e seri oso nanga gron, ben kon fiti en schema foe sori sma oso, so taki a ben man abi ten gi a pionierdienst. Na a srefi fasi trawan ben kenki a wroko foe den foe opo a pasi gi so wan diniwroko di kon moro foeroe.
8 Meki den plan foe joe now: San ede joe no e meki positief plan now foe go ini a jepipionierdienst ini april nanga mei? Foe abi boen bakapisi a de fanowdoe foe meki boen plan. Disi de foe si krin ini den ondrofeni foe den sma di ben man foe doe a jepipionierdienst ala di den ben abi osofamiri frantiwortoe, foeroeten grontapoe wroko èn tra bijbel plekti. Taki nanga trawan di ben pionier nanga boen bakapisi foe kan njanboen foe na ondrofeni foe den. Go na Jehovah toe ini begi èn aksi en foe jepi joe. — Jes. 40:29-31; Jak. 1:5.
9 Degedege no de taki den sma di ben seti den afersi foe den foe dini leki jepipionier, sa abi foeroe prisiri. Efoe joe no de ete ini a foeroeten dienst, joe ben sa man foe njanboen foe a grani disi? Efoe joe e doe moeiti foe bradi a grani foe joe foe prati a boen njoensoe nanga trawan, dan seiker Jehovah sa kanti den foeroe blesi kon a joe tapoe. — Mal. 3:10.