San joe sa taki te joe go baka?
1 Foe abi boen bakapisi ini wi diniwroko e aksi taki wi abi wan boen sreka na fesi, so taki te wi e go baka na den sma di na a bigin ben sori belangstelling, wi sa man foe wiki a belangstelling foe den agen èn go moro fara nanga wi takimakandra. Fa wi kan doe disi?
2 Foe di troe kresten abi troetroe belangstelling ini tra sma, dan na a fosi presi joe kan sori go na wan sani di joe ben kon sabi foe na ososma na a fosi fisiti.
Gi wan sma di ben tjari kon na krin fa en e broko-ede nanga ogridoe, joe kan taki:
◼ „Na lasti tron di wi ben taki, joe ben froeteri taki na gro foe sondoefasi ben trobi joe. Joe denki taki efoe den e teki moro skowtoe, dan dati sa loesoe a problema?”
Efoe wan sma e taki dati a e broko ede troetroe nanga na fasi fa den grontapoe situwâsi foe now e waka, joe kan taki:
◼ „Na lasti tron di wi ben taki joe ben taki wan toemoesi moi sani foe a mankeri foe vrede na grontapoe. Joe denki dati den grontapoe tiriman sa tjari wan njoen grontapoe seti kon?”
Gi wan sma di na gridifasi foe tra sma ben trobi en, joe ben kan taki:
◼ „Na lasti tron di wi ben taki, joe ben froeteri foe wan kefarlek moi penti foe a bigi-ai di wi e si na libisma ini algemeen. Fa joe denki taki Gado e si bigi-ai sma? [gi okasi foe piki.] Disi na san bijbel e taki na ini Efesesma 5:5.”
3 Tra sani di den ben taki èn ben gebroiki nanga boen bakapisi na:
◼ „Mi ben prisiri toemoesi nanga a lasti takimakandra foe wi èn foe dati ede mi ben sreka na sjatoe prakseri disi foe sori joe fa Jehovah e si na pina situwâsi disi foe den sma di de sondro oso. Loekoe Jesaja 65:21-23.”
◼ „Mi ben prisiri nanga a piki foe joe taki libisma abi wan moro betre tirimakti fanowdoe.”
◼ „Joe ben poti wan moi aksi taki efoe Gado e feni ala relisi boen.”
◼ „Joe ben poti mi troetroe na prakseri nanga san joe ben taki foe a leri taki Gado poti kaba san o pasa nanga wan sma.”
◼ „Mi ben prakseri foe a takimakandra di wi ben abi, èn wan penti de na ini a boekoe Na moro bigi man di oiti ben libi, di mi denki taki joe sa abi prisiri nanga dati. [Joe kan sori na ososma spesroetoe penti di joe ben piki poeroe na ini a boekoe.]”
Inleiding leki den disi e sori taki wi e warderi a fosi takimakandra di wi ben abi, èn taki wi abi belangstelling foe taki baka nanga na ososma.
4 Bifosi joe tjari na gobaka, go prakseri san joe sa taki. Meki joe pristeri fiti na iniwan sma.
5 Efoe a sma di wi e fisiti de bezig, tokoe wi kan abi boen bakapisi foe di wi e taki:
◼ „Mi sabi taki joe abi soso wan toe miniti, ma djaso mi abi wan sani di joe kan go denki foe en, ala di joe e klari joe wroko. [Leisi Mateus 5:3]”
Noso joe kan taki:
◼ „Mi ben skrifi den dri tekst disi gi joe. Foe di a no de wan boen ten foe taki, meki mi wani libi den na baka gi joe èn te mi o kon baka, mi ben sa wani teki feifi miniti foe taki foe den makandra nanga joe.”
6 Negatief fasi di joe no moesoe gebroiki: Aksi tapoe san joe kan kisi wan negatief piki noso di kan poti na ososma ini wan froeferi situwâsi, no abi boen bakapisi. Den disi na: „Joe ben leisi den boekoe sani di mi ben libi gi joe na baka?” „Joe abi wan toe aksi?” Joe sabi mi ete?” „Mi ben kon foe si efoe joe abi belangstelling ete foe taki foe Gado prakseri nanga a grontapoe disi.”
7 Wi sa de nanga faja foe go baka na sma di a fesi ben sori opregti belangstelling, efoe wi e sreka boen na fesi foe gi den jepi di troetroe wani taki wan sani.