Gobaka di makriki èn di abi boen bakapisi
1 Joe e tjari gobaka doronomo, noso joe e feni en moro foeroe wan moeilek sani foe di joe no sabi san joe moesoe taki? A no de fanowdoe foe si dati leki wan hebi sani. Dri sani sa jepi joe foe meki sani waka boen: (1) wan boen sreka; (2) a bekwaamfasi foe man taki foe wan noso toe penti foe makriki bijbel tori foe takimakandra; èn (3) a wani di joe wani arki fa na ososma e prakseri foe a tori.
2 Go loekoe te joe e go sreka joesrefi foe tjari a gobaka, sortoe tori ben sa fiti foe taki nanga a ososma. En na wan studenti? Foeroe studenti sa abi a moen disi ekstra ten foe taki foe bijbel tori foe di den no sa abi skoro wan pisi ten. Seiker joe sa miti wan toe di sa wani foe jere a Kownoekondre boskopoe. Joe ben poti wan aksi di joe ben go fisiti a sma a tron na fesi, noso na ososma ben sori belangstelling gi wan spesroetoe tori? Loekoe den penti di joe ben skrifi ete wan tron, èn gebroiki a Taki-go-taki-kon-boekoe foe soekoe den bodoi di joe sa abi fanowdoe foe kan tjari wan gobaka di boen. De nanga waran èn switi fasi te joe e tjari a fisiti. Gi na ososma odi na en nen.
3 Te joe libi A Waktitoren nanga Ontwaakt! na baka gi na ososma, dan a gron foe joe gobaka kan de wan noso toe makriki penti di joe ben soekoe kon na wan ini wan tijdschrift. Efoe na a fosi fisiti joe libi wan traktaat a baka, joe ben sa kan bigin taki foe a traktaat srefi noso go doro nanga disi foe di joe e sori go na wan penti di fiti ini wan tijdschrift noso wan brochure.
4 Efoe joe libi na baka „Wan njoen grontapoe foe vrede—Dati sa kon wanten?”, taki dan makriki:
◼ „A lasti tron di mi ben de na joe, wi ben taki foe a pramisi foe Gado foe wan njoen grontapoe foe vrede. So leki fa wi ben taki, dan nanga jepi foe Gado Kownoekondre moro betre toestand sa kon. San joe prakseri taki wi moesoe doe foe de wan pisi foe a njoen grontapoe dati foe vrede?” Gi na ososma okasi foe gi piki èn tjari baka dati a prakseri di de ini Psalm 37:9, 11, 29 go abra.
5 Efoe joe libi na baka „Sortoe howpoe de gi lobiwan foe wi di dede?”, wan takimakandra kan bigin nanga wan toe sjatoe wortoe so leki:
◼ „Na a kaba foe a takimakandra di wi ben abi a tra leisi, mi ben libi wan traktaat na baka di abi leki nen Sortoe howpoe de gi lobiwan foe wi di dede? Ini a di foe dri paragraaf wan toe moi aksi tanapoe: ’Foe san ede sma e dede? Pe den dedewan de? Èn fa wi kan de seiker taki den kan libi baka?’ A tra edeprakseri di e kon now nanga a nen ’Dede, èn san e pasa te wi e dede’, e gi piki tapoe ibri aksi. Mi abi djaso ete wan eksemplaar foe a traktaat. Loekoe san tanapoe na ini a di foe fo paragraaf.” Leisi dan, ala di a ososma e leisi toe, a paragraaf nanga so srefi den toe tekst, èn aksi a ososma fa a prakseri foe disi. Arki boen san a abi foe taki, èn go doro akroederi dati.
6 Na ini a takimakandra, na ososma kan taki foe wan toe fasi foe si sani di no de joisti. A no de fanowdoe foe meki wan problema foe ala den sani san en taki. Na presi foe dati, tan na a tori foe taki makandra. Iniwan prakseri di a abi di no e kroederi nanga bijbel, joe kan taki foe dati na den fisiti di joe sa tjari ini a ten di e kon.
7 Ala fasi, seti joesrefi foe go loekoe ibriwan fasi foe belangstelling foe di joe e tjari gobaka di makriki èn di abi boen bakapisi ini april.