Gebroiki a Taki-go-taki-kon-boekoe na gobaka
1 „Mi prani, Apolos ben gi watra.” Na so na apostel Paulus ben taki (1 Kor. 3:6). Den siksi wortoe disi e froeteri sjatoe san na den fosi toe stap foe meki disipel. Den ben sori go tapoe a gobaka wroko leki „na gi watra” wroko. A de wan toemoesi prenspari sani na mindri a fosi kontakti èn a tron di sma e tron wan disipel di dopoe. A gobaka wroko e gi wi na okasi foe ’panja sabi’ so dati wi kan sorgoe foe na belangstelling di a sma ben sori, te leki a e kisi roetoe èn wi kan bigin wan bijbelstudie. — Odo 15:7.
2 Sonwan e draidrai foe tjari wan fisiti baka pe sma ben sori belangstelling, bika den no sabi san foe taki. A handleiding foe wi, Taki-go-taki-kon nanga jepi foe den Boekoe, ben sori foe de boen srefisrefi na a „gi watra” wroko disi. So leki fa a gwenti de, dan bifo a ososma sa agri foe teki wan doronomo bijbelstudie, joe abi foe tjari difrenti sjatoe fisiti fosi. A Taki-go-taki-kon-boekoe e gi schema foe tori di gron tapoe bijbel, foe san joe kan taki nanga a ososma. Sreka joesrefi boen tapoe a gobaka, pe kande joe kan gebroiki wan ofo moro foe den idea di e kon now.
3 Efoe joe ben pristeri „Na Waktitoren” foe 15 april 1992 foe a tori foe begi, dan te joe e go baka joe kan poti na aksi disi:
◼ „San kan meki taki den begi foe wan sma no e plisi Gado?” Bakadi joe ben gi na ososma wan okasi foe piki, dan teki joe Taki-go-taki-kon-boekoe èn naki bladzijde 150 opo. Taki nanga en foe wan toe foe den tekst ondro a thema dati, èn gi en deki-ati foe leisi wantewante ini a boekoe nanga joe. Efoe joe si dati a sma abi opregti belangstelling, joe kan pristeri en wan abonnement.
4 Na wan tra gobaka, baka di joe aksi na ososma san a e froestan ondro a Kownoekondre foe Gado so leki fa den e taki foe dati ini a Wi Tata begi, drai go na bladzijde 242-249. Efoe ten de, joe kan taki foe den tekst ondro „A Kownoekondre foe Gado na wan troetroe tiri?” èn „San Gado Kownoekondre sa doe?” Poeroe a fowtoe denki taki a Kownoekondre foe Gado de ini wan sma en ati. A Kownoekondre na wan troetroe tiri! Na presi foe taki foe ala materiaal ini wán leisi, joe kan poti wan toe aksi foe san joe o taki wan tra leisi.
5 Na wan tra okasi, a ososma kan teki na Ontwaakt! foe 22 april 1992, di e taki foe a tori „San na a marki foe a libi?”
Joe ben sa kan aksi:
◼ „Iniwan marki de taki a libisma skin ben meki foe libi foe têgo na grontapoe?” Ofoe: „Joe denki taki den dedewan sabi san den libiwan e doe?” Den aksi disi kan wiki pikinso belangstelling na a ososma bika den abi foe doe nanga en srefi. Sreka sani foe go baka nanga den piki, so leki fa joe kan feni dati ini a Taki-go-taki-kon-boekoe tapoe bladzijde 268 nanga so srefi bladzijde 91,92.
6 Efoe a fosi takimakandra ben go foe a tamara foe grontapoe, joe ben sa kan aksi:
◼ „Gado sa meki libisma pori grontapoe na a wan noso tra fasi?” Dan drai go na bladzijde 50, 51 foe a Taki-go-taki-kon-boekoe èn taki foe a piki so leki fa bijbel e sori. Noso a ososma kan aksi: „Efoe miljoenmiljoen sma e kisi wan opobaka foe dede, dan pe den alamala sa libi?” A piki de foe feni ini a Taki-go-taki-kon-boekoe, bladzijde 333.
7 No proeberi foe lai den ososma toemoesi nanga a heri waarheid ini wán leisi. Libi son aksi so dati joe kan gi piki na tapoe den na wan tra fisiti. Leki kompe wrokoman foe Gado, wi wani doe a prani nanga a gi watra wroko na wan bekwaamfasi foe di wi e gebroiki a Taki-go-taki-kon-boekoe na wan fasi di no e misi en marki. Wi kan abi na overtoigi taki Gado sa meki a gro.