Tjari den fosi fisiti foe wi nanga boen bakapisi
1 Foe bigin wan takimakandra ini a dienst kan de wan tjalensi srefisrefi, foe di sma e poti den heri ati tapoe den eigi afersi nomo noso abi fasti idea kaba foe relisi. San wi kan abi na prakseri, di ben sa kan jepi wi foe meki na fosi fisiti foe wi de nanga boen bakapisi?
2 Foe di a de now wan ten foe feistidei, kande joe kan bigin joe takimakandra na a fasi disi:
◼ „Ini a ten disi foe a jari, wi seiker e prakseri na ofrandi di Jesus ben tjari. San joe e denki dati Jesus e doe now?” Gi okasi foe a sma piki. Dan joe kan leisi Openbaring 6:2 nanga a ososma, pe den e taki foe Jesus dati a e sidon tapoe wan weti asi èn e rèi foe klari a wini foe en. Taki foe en ròl leki kownoe èn den têgo blesi di na tiri foe en sa tjari gi na heri libisma famiri di e gi jesi.
3 Te joe e pristeri na uitgave foe 1 april di e taki foe na artikel „Troe fri — Foe sortoe fonten?”, joe ben sa kan taki:
◼ „Sma na a heri grontapoe e feti foe kon fri. Ma pramisi foe fri di tirimakti foe na libisma famiri ben doe, no ben kon troe. Na anbegi foe Jehovah, a troe Gado, e tjari fri di e tan.” Leisi 2 Korentesma 3:17, èn sori dati na uitgave disi foe Na Waktitoren e taki foe Gado pramisi èn e sori krin san ede grontapoe afersi e gi wi na seikerfasi dati wi froeloesoe de krosibei.
4 Joe ben sa kan pristeri „Na Waktitoren” foe 15 april 1992 (Bakratongo), foe di joe e taki foe na tori foe begi. Joe kan taki:
◼ „Ini ten foe orlokoe sma ini algemeen e begi foe wini. Joe denki taki Gado e arki den begi dati èn e teki prati? [Gi okasi foe piki.] Loekoe san bijbel e gi leki piki.” Leisi dan èn froeklari 1 Petrus 3:12. Sori baka wan sjatoe froeklari na wan sani ini a Waktitoren-artikel san kan wiki na belangstelling foe a sma foe go leisi a tijdschrift. Efoe joe e si dati a abi opregti belangstelling, joe kan pristeri en wan abonnement.
5 Hori na prakseri dati na marki foe wi na foe hori bijbelstudie. Foe di foeroe preikiman sa de ini a jepipionier dienst ini april, wi sa abi srefi moro okasi foe feni sma di e abi belangstelling foe studeri a bijbel. Ma srefi efoe den situwâsi foe wi no e gi pasi foe wi go ini a jepipionier dienst ini april, wi alamala kan poti leki marki foe bigin wan bijbelstudie.
6 Son preikiman ben gebroiki traktaat foe bigin wan bijbelstudie na a fosi fisiti di den ben tjari.
Te joe e pristeri na traktaat „Libi ini wan njoen grontapoe foe vrede”, joe ben sa kan taki:
◼ „Wi na sma di e gi fri jepi ini joe kontren. Mi wani gi joe na traktaat disi, di e sori joe sortoe wroko wi e doe. Joe denki dati grontapoe oiti sa kon de leki dati? Baka joe kisi wan piki, joe ben sa kan go loekoe den fosi paragraaf makandra nanga na ososma, èn poti prakseri tapoe Mateus 6:9, 10 nanga Psalm 37:29.
7 Loekoe boen fa joe o bigin taki nanga a sma. Toemoesi boen idea den e gi ini a Taki-go-taki-kon-boekoe tapoe blz 9 te 15. Te joe gebroiki den bigin wortoe disi na wan koni fasi, dan disi sa jepi joe foe meki den fosi fisiti foe joe de nanga boen bakapisi.