Go baka foe bow warderi
1 Go baka di abi wani taki wan sani, safrisafri e boeweigi e tranga a gro di na ososma e gro foe kan tron wan sma di abi bribi. San na wan toe praktis rai foe hori ini prakseri te wi e go baka na den sma di sori belangstelling?
2 A fosi sani na, sreka boen na fesi. Disi e bigin na a fosi fisiti. Fa so? Foe hori wan soifri raport foe belangstelling di sori. Skrifi a nen foe na ososma, a tori di joe ben taki makandra, a fasi fa a sma ben piki, èn ala sani di joe libi na baka. Dan go loekoe joe oso-foe-oso-raport bifo joe go baka, èn prakseri ondro begi san joe wani taki.
3 Now joe de klariklari. San joe kan taki? Efoe joe ben gowe libi na ososma nanga wan aksi na a fosi fisiti, joe kan bow go doro tapoe a tori dati te joe e go baka. Leki eksempre, efoe na a fosi fisiti joe ben taki foe den blesi foe a Kownoekondre foe Gado, joe kan poti na aksi „Foe san ede Gado e gi ogridoe pasi?”
Te joe e go baka, èn joe kari joe nen, joe kan taki:
◼ „A lasti tron di wi ben taki, wi ben taki foe san ede wan Gado foe lobi e gi pasi foe so foeroe ogridoe ini a ten disi. Joe ben prakseri moro fara foe dati?” (Gi okasi foe piki.) „Joe e prakseri taki Gado e broko en ede troetroe nanga libisma? (Gi okasi foe piki.) Loekoe san bijbel e taki ini Joh. 3:16?” Baka te joe leisi a vers, joe kan tjari spesroetoe pisi foe kapitel 8 foe A Waarheid di e tjari joe go na têgo libi kon na fesi, di e tjari den reide foe san ede Gado e gi ogridoe pasi ini a ten disi kon na fesi.
4 Wan tra aksi di e meki sma prakseri, di joe kan poti na joe fosi fisiti ben sa de: „Efoe Gado ben wani taki sma moesoe libi foe têgo, foe san ede sma e kon owroe èn e dede?” Te joe go baka, joe kan sori den a piki foe bijbel so leki a de foe feni ini Romesma 5:12. Baka te joe leisi a tekst, poti prakseri tapoe a fosi paragraaf tapoe bladzijde 35 foe a boekoe A libi disi na ala san de?, di e taki foe a moro prenspari reide foe san ede sma e kon owroe èn e dede.
5 Efoe na joe fosi fisiti joe ben taki foe fasi foe kon sabi a troe relisi èn ben libi a boekoe A soekoe di libisma e soekoe Gado, wan boen aksi di joe kan abi leki gron gi joe gobaka kan de: „Fa a doe kon taki someni relisi de?” Te joe go baka, joe kan taki foe spesroetoe penti ini kapitel 2 foe a boekoe dati.
6 Wortoe leki warskow. Loekoe boen nanga den sani di joe e aksi te joe e go baka. Foe aksi „Joe ben leisi a materiaal di mi ben libi gi joe?” noso „Joe e memre mi ete?” noso „Joe e memre ete san wi ben taki a lasti tron di mi ben dja?” kan meki na ososma firi froeleigi. Foeroetron den sortoe aksi dati no abi boen bakapisi. Na tra sei, de nanga switi fasi, sabi fa foe doe na ala sortoe situwâsi, èn hori a taki sjatoe. Den eigifasi disi sa meki joe boskopoe kon moro boen.
7 Wi kan gebroiki disi èn trafasi foe bigin wan taki foe kweki warderi ini den ati foe den wan di abi belangstelling. Foe san ede joe no e poti wan marki foe meki no moro mendri leki wán gobaka ala wiki? Gebroiki den praktis bodoi di pristeri na tapoesei, èn soekoe foe taki nanga preikiman di abi moro ondrofeni di wani jepi joe. Joe prisiri sa kon moro foeroe te joe e bow go doro tapoe a fosi belangstelling foe meki gobaka nanga boen bakapisi.