Fruteri ala sma fu den kefalek moi fasi fu Yehovah
1. San e pusu wi fu meki den kefalek moi fasi fu Yehovah bekènti?
1„Fu yu, o Yehovah, a bigi nanga a makti, nanga a moifasi nanga a tumusi bunfasi nanga a wartifasi de; bika ala sani na hemel èn na grontapu na fu yu” (1 Kron. 29:11). Sortu krakti a lobi nanga a warderi di wi abi gi Yehovah abi na wi tapu? A e pusu wi fu ’fruteri ala sma fu den kefalek moi fasi fu a sma di kari unu komoto na ini a dungru fu kon na ini a tumusi moi leti fu en’ (1 Petr. 2:9). Wi no man tapu fu fruteri sma fu a bigi Gado fu wi! Na ini den mun maart, april, nanga mei, wi sa abi moi okasi fu meki den kefalek moi fasi fu Yehovah bekènti.
2. Sortu spesrutu kotoigiwroko seti fu kari sma gi a Memrefesa, èn suma kan teki prati?
2 Wan spesrutu kotoigiwroko fu kari sma gi a Memrefesa: Tapu munde 2 april wi sa poti prakseri na den moi fasi fu Yehovah, fu di wi o hori a Memrefesa. Fu 17 maart te go miti 2 april wi sa prati wan spesrutu papira fu kari sma gi a Memrefesa. Ala sma e kisi a deki-ati fu teki prati na a kotoigiwroko disi. A kotoigiwroko disi ben o de wan bun okasi gi nyunwan fu bigin preiki a bun nyunsu, efu den doro den markitiki fu du dati. Efu yu abi bijbelstudenti noso pikin di doro den markitiki, dan yu kan go taki fu a tori disi nanga den owruman.
3. San wi kan taigi sma fu gi den wan kari fu kon na a Memrefesa?
3 A kotoigiwroko disi sa de neleki a wan di ben hori fu kari sma gi a „Frulusu de krosibei!” distrikt kongres. Den gemeente sa kisi nofo fu den karta disi so taki ibri preikiman kan kisi 50, èn ibri pionier kan kisi 150 fu den. No taki tumusi langa nanga sma. Kande yu kan taki: „A papira disi na fu yu, èn a de fu gi yu wan kari gi wan prenspari sani di e pasa ibri yari. Wi o breiti srefisrefi efu yu kon. Moro bodoi skrifi na tapu a papira.” Ma efu na ososma e poti aksi, dan wi musu teki ten fu piki den. Yu kan gebroiki a Bijbel leri-buku fu piki den aksi disi. Na tapu bladzijde 206 fu a pisi di nen „Tra prenspari sani”, yu kan feni a pisi tori di e taki fu a Memrefesa. Satra nanga sonde wi sa pristeri den tijdschrift fu wi makandra nanga den spesrutu kari disi. Skrifi den nen nanga adres fu den sma di wani sabi moro, èn seti sani fu go baka na den.
4. Fa wi o prati a spesrutu kari gi a Memrefesa?
4 Efu a kan, a moro bun efu wi gi a kari disi langalanga na ibri ososma. Skrifi den adres pe sma no de na oso, èn seti sani fu go baka na den wan tra leisi. Efu gemeente de di abi furu fu den kari disi ete, dan den preikiman kan libi den karta na den oso pe sma no de. Ma den kan du disi soso na ini a lasti wiki bifo a Memrefesa. Sorgu taki den gobaka, den bijbelstudenti, den famiriman, den sma na wroko, den birtisma, èn sosrefi tra sma di yu sabi kisi wan kari gi a Memrefesa.
5. Fu san ede wi musu seti sani nownow kaba fu man du a yepi-pionierwroko?
5 A yepi-pionierwroko: Yu denki taki yu kan dini leki yepipionier na ini maart, april, nanga mei, so taki yu kan abi moro ten fu fruteri sma fu den kefalek moi fasi fu Yehovah? Fu man du disi, yu sa musu seti yu aladei libi tra fasi (Ef. 5:15-17). Yu kan de seiker taki yu o prisiri srefisrefi èn taki Yehovah sa blesi yu trutru, te yu e du muiti fu du moro na ini a diniwroko fu en (Odo 10:22). Fu di a ten fu a Memrefesa de krosibei, meki nownow kaba wi musu bigin seti sani fu man du dati.—Odo 21:5.
6. San wi kan leri fu na ondrofenitori fu wan sisa fu 90 yari, di du a yepi-pionierwroko a yari di pasa?
6 Wan sisa di abi 90 yari ben prisiri taki a ben abi a grani fu du a yepi-pionierwroko a yari di pasa. A taki: „Mi lobi prani sani èn na dati mi ben wani go du. Toku mi denki fu poti den moro prenspari sani na a fosi presi. Fu di mi ben wani poti a Kownukondre na a fosi presi, meki mi bosroiti fu du a yepi-pionierwroko na ini maart.” A sisa disi ben kisi wini fu a muiti di a ben du? A taki: „Mi e firi taki trutru mi de wan pisi fu a gemeente, èn a sani disi meki taki mi kon moro krosibei na Yehovah.” Kande wi kan luku tu efu wi kan poti den moro prenspari sani na a fosi presi na ini wi libi?
7. A de wan muilek sani fu dini leki yepi-pionier?
7 A no abi fu de wan muilek sani fu doro den 50 yuru leki yepi-pionier. Begi, èn ondrosuku san yu e du ibri dei. Meki wan schema èn poti en leki wan fu den sani di yu musu du na ini yu diniwroko. Yu sabi yu eigi situwâsi moro bun. Efu yu no de so gosontu èn yu swaki-swaki pikinso, dan kande yu kan seti sani fu preiki wan tu yuru nomo ibri dei. Efu yu e wroko heri wiki, noso efu yu e go na skoro ete, dan kande yu kan du a yepi-pionierwroko fu di yu e preiki te mofoneti noso te satra nanga sonde.
8. San yepi wan trowpaar fu du a yepi-pionierwroko?
8 Furu sma ben man du a yepi-pionierwroko nanga den heri osofamiri. Na ini den yari di pasa, wan trowpaar ben draidrai fu du a yepi-pionierwroko, fu di den ben feni taki a situwâsi fu den no ben gi den na okasi fu du dati. San den du? „Wi begi Yehovah fu yepi wi, so taki wi ben kan doro a marki di wi ben poti gi wisrefi so langa kaba.” Den sreka sani bun, èn den ben doro a marki fu den. Den taki moro fara: „A ben moi srefisrefi. Wi kisi bun furu blesi. We e gi ala sma a deki-ati fu pruberi en tu. Efu wi ben man du en, dan kande yu kan du en tu.”
9. San yu kan du na yu osofamiri studie fu sreka gi den spesrutu mun di e kon?
9 Kande yu kan gebroiki pikinso ten na yu osofamiri studie fu poti prakseri na a fasi fa ibri memre fu na osofamiri kan du moro na ini den mun di e kon. Srefi te unu no man du a yepi-pionierwroko leki osofamiri, toku kande wán fu unu kan du dati te a heri osofamiri e horibaka gi en. Efu dati no man, dan kande ala sma na osofamiri kan du moro na ini a preikiwroko na ini den spesrutu mun disi.
10. Fu san ede wi musu fruteri trawan taki wi wani du a yepi-pionierwroko na a ten fu a Memrefesa?
10 Yepi makandra: Te yu abi faya gi a preikiwroko, dan trawan e kisi a faya dati tu. Fruteri trawan taki yu wani du a yepi-pionierwroko. Disi kan gi trawan a deki-ati tu fu du a srefi. Boiti dati, den sma di ben pionier na ini a ten di pasa kan gi yu rai di sa yepi yu fu seti sani so taki yu kan doro a marki fu yu (Odo 15:22). Efu yu abi na okasi fu du a yepi-pionierwroko, dan fu san ede yu no e aksi wan tra preikiman, kande wan sma di de na ini a srefi situwâsi leki yu, fu du a moi wroko disi makandra nanga yu?
11. Fa den owruman kan gi sma deki-ati fu du a yepi-pionierwroko na ini den mun di e kon?
11 Furu owruman e seti sani fu man teki prati na a spesrutu wroko disi (Hebr. 13:7). Disi e gi a gemeente deki-ati trutru! Owruman kan gi trawan deki-ati gi a yepi-pionierwroko tu, te den e taki fayafaya fu a yepi-pionierwroko. Kande wan tu switi wortu, noso wan tu bun rai sari kaba fu gi wan sma deki-ati fu du a yepi-pionierwroko. Kande a dienst-opziener sa seti moro preikiwroko konmakandra so taki ala sma kan go preiki makandra na ini wan grupu, srefi te baka wroko noso te baka skoro. Den seti disi musu meki bekènti doronomo. A dienst-opziener sa sorgu tu taki ala sma abi nofo presi pe den kan go wroko èn sosrefi nofo buku nanga tijdschrift.
12. San yu kan du efu yusrefi no man du a yepi-pionierwroko?
12 Srefi te a situwâsi fu yu no e gi yu pasi fu du a yepi-pionierwroko, toku yu kan tranga den sma di gi den nen, èn yu kan begi gi den (Odo 25:11; Kol. 4:12). Kande yu kan seti sani fu wroko makandra nanga den na mindriwiki, na wan dei di yu no gwenti go na ini a preikiwroko, noso fu wroko moro langa leki fa yu gwenti.
13. Sortu marki wi wani doro na ini Sranan, èn san a gemeente fu yu kan du so taki wi doro a marki dati?
13 Wi wani doro 700 yepi-pionier na ini a mun april: Na ini april 2004 wi ben abi wan heimarki fu 629 yepi-pionier na ini Sranan. Na ini a mun april di e kon wi wani doro a heimarki fu 700 yepi-pionier. Wi kan doro a marki dati efu wán fu ibri fo preikiman na ini ibri gemeente e du a yepi-pionierwroko. Ma a no de fu taki, dati na ini son gemeente moro preikiman sa abi na okasi fu du a yepi-pionierwroko. Furu gemeente kan doro a marki disi makriki. Prakseri sortu prisiri disi sa tyari gi a gemeente fu yu, èn sortu bun bakapisi disi sa abi gi a preikiwroko na ini a kontren fu yu!
14. Fu san ede april na wan bun mun fu du a yepi-pionierwroko?
14 San e meki taki april na so wan bun mun fu du a yepi-pionierwroko? A Memrefesa e hori na a bigin fu a mun dati. Sobun, wi sa abi nofo ten fu tyari gobaka na sma di ben kon na a Memrefesa. Wi sa pristeri den tijdschrift, èn te wi e tyari gobaka, wi sa pristeri a Bijbel leri-buku nanga a marki fu bigin wan bijbelstudie. Sobun, te yu e du a yepi-pionierwroko na ini april, dan yu o kisi furu okasi fu bigin wan bijbelstudie. A mun april abi feifi sonde èn wan tu feistidei. Disi e gi den preikiman di e du grontapuwroko, noso di de na skoro na okasi fu du a wroko disi.
15. Fu san ede wi musu wroko neleki a ten kon syatu now di a Memrefesa e kon krosibei moro nanga moro?
15 Ibri yari te wi hori a Memrefesa wi e kon moro krosibei fu a kaba fu a grontapu sistema disi. Furu ten no de moro fu fruteri sma fu a bigi Gado fu wi (1 Kor. 7:29). Te a Memrefesa disi pasa, dan den moi okasi fu prèise wi hemel Tata na ini a pisi ten dati, no sa de moro. Meki wi sreka sani nownow kaba, so taki wi kan fruteri ala sma fu den kefalek moi fasi fu Yehovah!
[Faki na tapu bladzijde 4]
Wi kan kisi 700 yepi-pionier na ini april?
◼ Ondrosuku san yu e si leki prenspari
◼ Taki fu den marki di unu kan poti leki osofamiri
◼ Taki nanga trawan fu den marki di yu wani doro