Du neleki a Bigi Leriman te yu e gebroiki a Bijbel leri-buku
1. Na sortu fasi Yesus ben e gi leri?
1 Ala ten, Yesus, a Bigi Leriman, ben fruklari sani na wan makriki èn na wan krin fasi. Son leisi a ben aksi den arkiman fa den ben e denki fu wan tori. Na so fasi a ben leri den arkiman fu denki dipi fu sani (Mat. 17:24-27). A ben meki sma poti prakseri na san Gado Wortu e taki (Mat. 26:31; Mark. 7:6). A ben luku bun fu no bruya den disipel fu en nanga tumusi furu tori fu di a ben sabi taki den ben o tan leri go doro (Yoh. 16:12). Yesus ben wani sabi tu efu den disipel fu en ben e bribi èn ben e frustan san a ben leri den (Mat. 13:51). A Bijbel leri-buku meki na so wan fasi taki a kan yepi wi fu gi leri na a srefi fasi disi.
2. Na sortu fasi wi kan gebroiki den aksi na a bigin fu ibri kapitel?
2 Den aksi na a bigin fu den kapitel: Fosi yu bigin studeri wan kapitel, dan a bun fu meki a studenti poti prakseri na den aksi di skrifi na ondro a nen fu a kapitel. Poti den aksi na so wan fasi, taki a studenti e kisi a deki-ati fu ondrosuku sani finifini. Yu kan aksi en tu fu gi wan syatu piki tapu den aksi. A no de fanowdu fu taki langa fu den piki di a studenti e gi, èn a no de fanowdu fu poti prakseri na iniwan piki di no bun. Yu kan taki en tangi fu den piki di a gi, dan yu kan bigin nanga a kapitel. A fasi fa a studenti piki den aksi na a bigin fu a kapitel o yepi yu fu sabi na sortu pisi fu a kapitel yu musu poti moro prakseri.
3. Fa wi kan hori wan bijbelstudie na wan makriki fasi?
3 Den bijbeltekst: Na a studie yu musu gebroiki a Bijbel doronomo (Hebr. 4:12). Ma a no de fanowdu fu leisi ala den bijbeltekst di skrifi. Poti prakseri na den bijbeltekst di e sori san wi e bribi. Yu no abi fu leisi bijbeltekst di e taki moro fini fu a pisi tori. A Bijbel leri-buku e taki fu den tru tori fu Bijbel na wan fasi di no muilek fu frustan. Hori a bijbelstudie na wan makriki fasi. Poti prakseri na den moro prenspari penti èn no fruteri tumusi furu finifini sani, noso sani di no abi fu du nanga a studie.
4. San o meki taki wi musu teki ten na a studie fu taki fu tra prenspari sani?
4 Tra prenspari sani: A pisi „Tra prenspari sani” e taki fu 14 difrenti tori di abi fu du nanga difrenti kapitel na ini a buku. Efu yu wani, yu kan taki fu den tori disi tu. Na sonwan fu den kapitel, yu kan gi a studenti a deki-ati fu leisi den tra prenspari sani gi ensrefi, spesrutu te a e frustan èn e bribi den sani di skrifi na ini den kapitel. Fu eksempre, te yu de na kapitel 4 di nen „Suma na Yesus Krestes?”, èn a studenti e bribi kaba taki Yesus na a Mesias, dan kande yu no abi fu taki fu a tori „Yesus Krestes—A Mesias di Gado ben pramisi”. Ma na tra okasi, a kan bun fu teki ten fu taki fu den tra prenspari sani, noso fu wan tu pisi fu den sani dati.
5. Efu wi wani taki fu den tra prenspari sani, dan fa wi kan du disi?
5 Efu yu bosroiti fu taki fu den tra prenspari sani, dan a bun fu luku na fesi sortu aksi yu kan poti na a pisi dati, èn yu kan studeri a pisi dati neleki fa yu ben o du dati nanga den kapitel na ini a buku. Te yu si taki a de fanowdu, dan yu kan teki ten fu taki syatu fu den tra prenspari sani. Na a fasi disi, yu kan kon sabi efu a studenti e frustan den sani di a leisi.
6. Fa yu kan gebroiki a faki na a kaba fu ibri kapitel, te unu e studeri?
6 Den faki na a kaba fu ibri kapitel: Na ini a faki na a kaba fu ibri kapitel, wi e feni den piki tapu den aksi na a bigin fu ibri kapitel. Yu kan gebroiki den sani di skrifi na ini a faki, fu taki baka fu den moro prenspari penti fu a kapitel. Gi son preikiman a de wan yepi fu leisi ibriwan fu den sani di skrifi na ini a faki èn ibriwan fu den bijbeltekst makandra nanga a studenti. Baka dati, den e aksi a studenti fu fruteri syatu fa den bijbeltekst e horibaka gi den sani di skrifi drape. Disi e sori a leriman efu a studenti e frustan den prenspari penti na ini a kapitel krinkrin, èn fa Bijbel e horibaka gi dati. Na a fasi disi a leriman kan kon sabi tu efu a studenti e agri nanga den sani di a e leri. Disi e leri a studenti fu gebroiki a Bijbel fu fruklari den tru tori fu Bijbel gi trawan.
7. Fa wi kan gebroiki a Bijbel leri-buku fu du a wroko fu wi?
7 A moro bun fasi fa wi kan du a wroko fu gi sma leri èn fu meki disipel, na fu poti prakseri na a fasi fa Yesus ben e gi sma leri (Mat. 28:19, 20). A Bijbel leri-buku kan yepi wi fu gi leri na so wan fasi. Gebroiki a buku bun, so taki yu kan leri trawan den tru tori fu Bijbel na wan krin, èn makriki fasi. Disi o hari a prakseri fu den trutru.